04-29-2025
|
#8586
|
يقولوا الناس الأولى ..
فراق الدنيا يوريك فراق الآخرة ..
والدنيا ونسة يوم من يوم ..
في وقتنا وفي هالزمان هذا تمت القطيعة ساهلة
عند البعض .. واخدتهم الدنيا وتيارها ..
رافعتهم عزة النفس الكذابة لفوق خلتهم ما يحسوا بناسهم واحبابهم .. وماعاد يحسوا بالوحشة إلا لما يرميهم تيار الحياة ويبقوا بروحهم لا صاحب ولا حبيب ..
واللي نبي نقوله وممكن مش جديد الا لازم علينا إن نذكروه وهو راهو وجود الاحباب بينا ووجودنا معاهم نعمة .. راهو الفراق مر ..
راهو فراقنا وغيابنا على الناس اللي نحبوهم يخلينا نخسروا ونفقدوا شيء كبير من ارواحنا والنور اللي داخلنا بوجودهم ينطفى بعدهم ..
زي الصورة لما تكون مظلمة بدون ألوان .. تنعدم الحياة فينا مش بالموت ولكن تكون حياة بدون طعمة.. حياة بدون معنى .. راهو الود والسماح والتغاضي والمحبة
والمساعدة و الصبر والحنان والرحمة هن معنى
الحياة ...
ويقولوا
آجري علي لمة الشَملْ
و حيد ع الفخر و المَّنَه
و تغاضي و هلّب و حَملْ
و خليك صاحب محنَّه
طير السما ياكل النَملْ
و إنّ مات ياكل النمل مِنّه
|
|
|
|
|