منتديات صواديف عشاق - عرض مشاركة واحدة

10-05-2023

الجزء الرابع والعشرون ( الأربع وعشرين ) :.

(( مطار الملك فهد الدولي .. بعد 3 ايام .. يوم الاحد ))

( الساعة 1 الظهر )

ريم حضنت اخوووها بحرارة ...

رائد : آآآآه منك يالدلوووعة ... ما تشبعين منا الأحضاآن .. !!؟؟
ام رائد : رائد ... لازم كل شي يكون جاهز بالوقت ... لا تتكاسل... فهمت
رائد : انشالله ...
ام رائد : ابغى ارجع من دبي واشوووف كل شي جاهز ... انا وصيت خالتك منى تشرف ع الوضع بعد ... عشان كذا ... كل يوم مر عليها وخليها تشوف ايش سويت وايش بقى .. لانه يا حبيبي ما بقى شي فهمت ..؟؟

رائد : انشالله يا يما .. اطمني انتي بس...
ريم تتطنز : يما...!؟؟!؟!
رائد وكانه سوى جريمة حط يده على فمه بخوووف : اوووه سوووري .. مامي... !!!
ريم : طيب طيب ... انا اوريك ..بس خليني ارجع لك وبتشووف وش بسوي فيك ...

ضحك رائد ... وسمعوا الكل نداء الرحلة لدبي ... ومشوا ريم وامها لدبي .. عشان يستلمون الفساتين اللي فصلوها هناك ... ويشتروا الاشياء الضرووورية من هنا ..

...
....
.....
....
...

ركب رائد سيارته ورجع للبيت وهو يفكر : الحين معقووولة العرس هذا يصير..؟؟ المشكلة للحين ما كلمت دانة ... اخاف تزعل وتقرر تأجل العرس ...!!
افففففففففف ... وش اسوي بعمري ..؟؟؟ مالي غير اكلمها ... الحين لا وصلت على طول بكلمها ....

.....
....
...
..
.

وصل للبيت وشاف سيارة احمد اللكزس قاعدة توقف ف الحوش ... وقف سيارته ونزل يوم شاف احمد نازل بثوووبه الابيض المعتاد وشماغه ...

رائد بالجينز والتيشيرت البنفسجي الفاااقع ... والكاب الحركتاااات
<< ما حصلت وصف للكاب خخخخخخ
رائد : اهلا اهلا ... نورت وشرف اخ احمد ...
احمد ابتسم وهو يفصخ نظارته : النور نووورك شيخ رائد ... كيف حالك..؟؟
رائد : تمام الحمدلله ... بس الشغل فوووق راااسي ...
احمد ضحك : ههههه يللا فترة وتعرس وتعدي ... كيف تحضيرات العرس ماشية معاك..؟؟
رائد : والله تعب ... بس لاتخاف .. انا قدها ....!!
احمد : نفس الحالة ف البيت عندنا ... لازم كل شي يكون من احسن ما يكون .. مع اني بصدق ما ادري ليش كل هذا .. السالفة كلها ليلة وحدة ....!!

رائد ضربه على كتفه بالخفيف : ليلة ..؟؟!! انت وش عرفك بالرووومانسية انت .. هذي ليلة العمر يا ذكي... مو أي ليلة عادية ...!!!
احمد : هههه مو بهين يا رائد ... خلاص ولا تزعل ... سوي كل اللي بخاطرك .. واشتر كل اللي بخاطرك ... خلي ليلة العمر حقتك على كييييف كيفك ....!!
رائد : كيف نفسية دانة ..؟؟
احمد مستغرب : ليش ما كلمتها ..؟؟

رائد ارتبك : ها..؟؟ ا .. الا بس ما ردت علي ( ابتسم ) دقيت عليها بدري شوي .. عشان كذا يمكن كانت نايمة ...
احمد طالع فيه بشك : انت متاكد انه كل شي بخير واوكي...؟؟
رائد : ها..؟؟ أي اكيييد ... مو بس اووكي .. الا بيرفكت ...!!
احمد ابتسم : عموما .. الله يهنيكم ...

رائد شق حلقه : يللا عقبااالك ... لاتطول عزووووبي .. خلاص ما بقى عليك شي ويروح شبابك ....
احمد طالعه بنص عين : ليش شايفني زيك ..؟؟ يا بابا... انا الشباب عندي شي دائم...
رائد ضحك : هههههه اعصااابك ابو الشباب ..
احمد تسند على السيارة مسوي فيها شخصية : صدق والله .. ليش منت راضي تصدق..؟ ما تشوووفني بسم الله ما شالله علي قمر ما شالله ..... قول ماشالله اشوووف قوووول ...

رائد يمزح معاااه : قرب قرب ...
احمد : ليش..؟؟
رائد : عشان اتفل عليك .. عشان ما تصيدك عين ....
احمد قام ووقف زين الناس : لا يا بابا .. خلي تفافيلك لك ... ما بغيناها ..!!
رائد : هههههه ... عندك اجازة اليوم ..؟؟
احمد : لا والله .. امس خلصت اجازتي .. واليوم مواعد عمي عبد الهادي .. عشان يبغاني آخذ ملفات من المكتب واوديها للشركة ...
رائد : ايوووه ... طيب لا اعطلك عن شغلك ...
احمد : طيب بس .. سوي لي طريق عشان امر ....

رائد ابتسم : لا عادي .. ادخل .. محد ف البيت ...
احمد : غريبة ..؟؟
رائد : توني موصلهم المطار .. رايحين دبي يشترون فساتين وخرابيط حق العرس .. ورموا كل الشغل علي انا هنا....

احمد " افااااا... ما لحقت عليها ..!.!!! " : طيب يللا عن اذنك ...
رائد : حياك تفضل ..

___________________________________

(( بيت ابو سعود ))

( الساعة 4 العصر )

نزلت لينا اللي من شوي قايمة من النوم وهي متكشخة .. لابسة تيشيرت اخضر فاقع
وعليه برووووش اسود .. مع جينز غامق ... وشعرها مسشور وراسمة عينها بالقلم الاخضر الغامق .... وكان شكلها مرررة روووعة ...

نزلت للصالة بس كالعادة ما حصلت احد .... وشافت الشغالة طالعه لبرى
لينا : اقول تاتا .....
تاتا التفتت وهي ماسكة صينية عليها سفرة وصحون : نأم ماما ..؟؟
لينا : وين ماما وبابا ... وسالم وين ..؟؟
تاتا : ماما رووح بيت جيران .. بابا مافي جا من صباح .. سالم في سوا سوا فيصل في مجلس برى ....

لينا فرحت : فيصل وسالم برى..؟؟
الشغالة : أي .. في جيب بيتزا حق غدا..
لينا : اشوه حصلت احد اقعد معاه ...

طلعت للمحلس اللي برى ودخلته : سلاااااااااااامون عليكم .... !!!!!
فيصل اللي كان قاعد يلعب سوووني : وعليكم السلاااام .... صباح الخير...!!
لينا ابتسمت منحرجة : والله ما نمت امس .. ما قدرت انام ...
فيصل ابتسم ابتسامة حلوة : كنتي تفكرين فيني صح ..؟؟

لينا مستغربة لفت حولها تطلع وين سالم .. بس ما حصلته .. عشان كذا عرفت ليش فيصل ماخذ راحته : انت وين خويك عنك يسمعك وش قاعد تقووول ...؟؟
فيصل ضحك : ههههه سالم دق عليه واحد من الشباب يبغاه ضروووري .. وراح شوي .. وبيرجع ...

لينا قعدت جنبه : وش تسوي..؟؟
فيصل : العب ... تلعبين ..؟؟

لينا هزت راسها بالايجاب واهتز حلَقها وشعرها البني الناعم اللي طول ...

فيصل وقف يتاملها شوي ....

لينا ابتسمت بخجل وخدووودها حمرا : شفيك تطالعني كذا ...؟؟
فيصل وعيووونه عليها ما تتحرك : متغيرة ....
لينا خقت وبدا دلعها يطلع : احم .. ادري .. حليانة صح ...؟؟
فيصل ضحك وهو يرجع يطالع التلفزيووون : هههههه أي حليانة ... قمر ..!!

لينا فتحت عيونها الثنتين ع الاخير " اوووو مااااي جوووود!!! هذا وش قاعد يقوول .. اول مرة ادري انه يخقق كذا ...!!!! من عذرك يا ديمة يوم انك حبيتيه ...!! خاطري احبه انا بعد خخخ ..!!"
___________________________________

(( بيت ابو بندر ))

( الساعة 6 المغرب )

نزلت دانة من غرفتها ببيجامتها .. وكانت توها قايمة ...

ام بندر مستغربة : دانة..؟؟ وش هالنووم ..؟؟ ماصارت .. احد يقوم الساعة 6 المغرب...؟؟
دانة تثاوبت بتعب : آسفة .. بس .. فيني نووم مو طبيعي .. امس ما نمت زين..
ام بندر : طيب .. ادخلي بسرعة المجلس .. ابوك يبغاك ..
دانة مستغربة : ابوووي ..؟؟ ليش شعنده ..؟؟
ام بندر : مدري .. انتي روحي الحين ..

راحت على طول دانة للمجلس "غريبة ..؟؟ ايش يبغى فيني..؟ ولوحدنا بعد ..؟؟ "

دخلت المجلس ويوم وصلت وسط المجلس وهي تدور بعيووونها على ابووها .. تسكر الباب ...

التفتت : يب.... ( سكتت يوم شافت رائد )
رائد متسند على الباب بطوله الفااارع : دانة لازم نتلكم ..

دانة عقدت يدينها قدامها : والله..؟؟ زين اكتشفت هالشي .. انا كنت متوقعة انه ما بنتكلم الا ليلة العرس .........!!
رائد : اسمعيني .. ادري انك معصبة والله ادري .. وانا زعلان على هالشي .. بس انتي الله يهديك .. ما تخلين احد يتفاهم معاك على طول تكبرين الموضوع ...!!
دانة فتحت عيونها ع الاخير : الحين بتحطها فيني...؟!!؟

غمض عيووونه بقوة " الله يقطع ابليسي .. شكلي خربت الموضوووع !! "
قرب مسكها وخلاها تقعد ع الكنبة وقعد جنبها : اسمعيني .. حقك علي انا آسف .. الغلط كله مني .. بس اسمعيني ولا تقاطعيني ... وانا بقولك كل شي .. بس بشرط ..
دانة : ها..؟؟
رائد : ابغاك تصدقين اللي بقولك اياه .. وتتفهمي اللي قاعد اقولك اياه زين ..

سكتت دانة تنتظره يبدا ...

رائد : دانة .. انا كنت زي أي واحد من الشباب ... ما اتحمل المسؤولية وما يهمني أي شي غير وناستي .. ك.. كنت اغازل زي باقي الشباب .. ووكنت احيان بعد اخاوي بنات على التليفووون .. و .. و .. ومن هالخرابيط .. انتي فاهمتني صح ..؟؟

دانة هزت راسها بالايجاب متفهمة ..
رائد شق الحلق : حلوو .. هذا هو الموضوووع كله ..
دانة : بس..؟؟
رائد : أي بس ...
دانة : طيب .. ما قلتلي ايش سالفة الcd و الورد ...؟؟
رائد : أي cd؟؟ واي ورد..؟؟
دانة : اللي قلت لك عليهم ...
رائد ابتسم : هذي الاشياء كلها .. اللي رسلتها لك وحدة غيرانه .. تلاقينها وحدة من اللي كنت اكلمهم وغيرانه لاني باخذك.. وتبغى تفرق بيننا ... ما عليك منها يا دانة ...
دانة : طيب .. وش كل هالصور عندها فهمني ...

رائد : يعني يا دانة السالفة واضحة .. الا ما اكون رسلت لكم وحدة صووورتي .. يعني ما يبغالها تفسير ... انتي ما عليك من كل هالاشياء .. هذا ماضي يا دانة .. انا نسيته ولازم انتي بعد تنسيه .. وبعدين احنا بنبدا حياة جديدة .. لازم ما نلتفت للاشياء اللي ورى ... عشان نقدر نكمل حياتنا بسلام وزي الناس ...

دانة قعدت تفكر ....
رائد باسها على خدها : ها..؟؟ أيش قلتي..؟؟
دانة ابتسمت له ...
رائد : فديتك انا....

___________________________________
(( شقة سعود ودلع ))

( الساعة 10 المسا )

دلع : خلاصمو مشكلة ... طيب .. لا لا ما عنده أي مانع بالعكس ... اوكي .. لا ماله داعي.. عندي كل شي .. واذا احتجت شي بخلي سعود يجيبه ... اوكي .. انتبه للينا .. يلا باي ..

سكرت دلع من سالم ورجعت قعدت ع الكنبة جنب سعود اللي غفيان وهو قاعد
دلع طالعته بحنيه " يا عمري تعبااان !! " : سعود .. سعود حبيبي ..

سعود فتح عيونه وطالعها : هاز..؟؟ معاك انا معاك ...
جلع : هههههه دارية انك معاي ... قوم نام ف الغرفة احسنلك ..

سعود تعدل ف قعدته : كم الساعة ...؟؟
دلع : الساعة الحين 10 .. قوم نام .. حرام من الصباح قايم ..
سعود يحاول يفتح عيووونه : لا لا ماله داعي .. ما فيني شي ...
دلع طالعته بنص عين : متاكد تقدر تكمل الفلم..؟؟
سعود : أي أي متاكد ..

وكلها 5 دقايق وكان سعود طايح على دلع ورايح ف سابع نووومة ....!!

ابتسمت دلع " عنيييد ... ما يسمع الكلام !! "

@@@@@@@@@@@@@@@@@@@@@@@@@@@@@@@@@@@@@

(( اليوم الثاني .. بيت ابو رائد ))

( الساعة 9 الصباح )

رد بتعب : الووو ...
دانه تصااارخ : يللا قووووووم ... قووم لا تتاخر عن الجيم حقك.. يللا قوووم اليوم اول يووم ....!!

رائد فز بسرعة : يووووووووه .... تصدقين نسيت .. زين ذكرتيني ...
دانة : اعرفك تنسى بسرعة ... يللا حبيبي .. بسرعة افطر واطلع ...
رائد جا بيسكر : طيب حياتي ... يسلمو .. بااااي ..
دانة : هههه باي...

___________________________________

(( شركة بو رائد ))

( الساعة 11 الصباح )

الشركة كانت زحمة مرة .. ناس رياحة وناس جاية .. والشغل ما يوقف .. حتى بو رائد .. كان يتنقل من كتب لمكتب .. يعطي تعليمات واوامر للموظفين .. ويشوف الشغل شلون ما شي ..

دخل على مكتب احمد بسرعة .. كان احمد قاعد مع المحاسب ...

بو رائد : احمد .. بغيتك شوي ...
احمد : انشالله .. ( التفت للمحاسب ) عن اذنك يابو فهد .. دقيقة وراجع لك ..

طلع احمد من المكتب : سم يا طويل العمر ...
بو رائد : احمد بغيتك بشغلة برى الشركة .. مالي يغيرك ...
احمد : آمر ..
بو رائد : توهقت .. رائد مشغووول بعرسه والحين هو ف الجيم .. ومحد ف البيت غير الشغالات .. واحنا مسويين لريم دولاب جديد ف الورشة موجود .. ويقول محمد انه المخزن زحمة ... ويبغانا نستلم الدولاب ...
احمد : خلاص اتطمن .. انا بروح استلمه ...
بو رائد : هو بيرسل معاك 2 عشان يشيلونه ويركبونه ف مكانه ف الغرفة ...
احمد : طيب بس وين يركبونه ..؟؟
بو رائد : ف غرفة ريم .. تعرف وينها..؟؟
احمد : لا والله يا بو رائد ما ادري..
بو رائد : خلاص مو مشكلة ... اسال وحدة من الشغالات وهي بتعلمهم .. وانت استريح ف الصالة .. وهم بيسوون كل شي .. وقول للشغالات يسوون لك عصير .. افتح التلفزيووون وارتااااح
احمد : ههههه انشالله .. خلاص .. اعتبر الموضوع منتهي ... بس .. بو فهد ف المكتب...
بو رائد : ما عليك من بو فهد .. انا بشوفه الحين ..
احمد طلع النظارة الشمسية من جيبه : خلاص اجل .. انا استاذن ...
بو رائد : الله معك ...

___________________________________

(( بيت فيصل ))

( الساعة 1 الظهر )

كانت شوووق تركض ف الممر وتصاااآرخ ..
شالها فيصل وهويضحك ضحكة شريره : هع هع .. وين رايحة يا قمر...؟؟!!
شوق : ابغى مامااااااا ......
فيصل باسها : تبغي ماما..؟؟ ماما نايمة ... خليها ترتاح شوي ...
شوق ضربته : ما ابغى مااا ابغى ....!!!
فيصل مسوي فيها زعلان : افااا .. انا فصووولي حبيبك تضربيني..؟؟؟ قولي آسفة .. قولي آسفة .. ولا ما بوديك معانا اليوم ...

شوق : وين بتلوحووون ..؟؟
فيصل : بنروح عند خالة دلع ... ولا بناخذك ...
شوق بعناد : إلا ...
فيصل يهز راسه بالنفي : لأ ...
شوق باسته ببراءة وابتسمت : خلاث عطيتك بوووثة وديني ...!!!
فيصل ابتسم وحضنها : يا قلبي انا..!! خلاص بوديك ولا تزعلين ....!!! كم شوووق عندي انا..؟!!؟!؟

___________________________________
(( بيت بو رائد غرفة ريم ))

( نفس الوقت )

اروى : لا مو حلوة .... حراام عليك ايش هالذوووق ....!!؟؟
ريم اللي مع اروى ع المسن ومشغلة الكاميرا وتوريها الملابس اللي اشترتها : مو حلوة..؟؟؟ اروى...!!!! هذي احلى الملابس وافخمها .. وتقولين مو حلوة ..؟؟؟ انتي صاحية .....؟؟؟!!
اروى : اففف.. والله ما عجبتني ... والحين انتي ليش جايبتني اليوم هنا..؟؟

ريم ابتسمت : افتحي دولابي ...
اروى مستغربة : وليش انشالله ..؟؟
ريم : افتحيه وانتي ساكتة .. الحين بتعرفين ...

قامت اروى وفتحت الدولاب : وبعدين .. ؟؟
ريم : بتحصلين تنووورة بيضا قصيرة معلقة .. طلعيها ...
اروى حاست بين الملابس : افففف ... ياكثر الملابس .. ابغى افهم متى يمديك تلبسينهم ...؟؟
ريم ابتسمت ابتسامة واسعة : نصهم ما لبستهم ...
اروى : هههه الحمدلله والشكر.. ويييين
ريم تحمست : تلاقينها على اليسار ... قسم الملابس الغير مكتملة ....
اروى لفت مستغربة : ايش..؟؟
ريم : never mind .... دوري بس... ما عليك ..
اروى حصلتها : هذي هي ...

ريم : طيب جيبيها خليني اشوووفها ..
اروى : ششششششش.....
ريم استغرب : شفيك..؟؟

اروى : في احد ف بيتكم..؟؟
ريم : ممم .. ما اتوقع .. الا اذا رائد نسى شي .. ورجع ياخذه .. مدري ..
اروى بخووف : الا والله اسمع صوووت واااحد ..
ريم : صوت رائد ..؟؟
اروى انفعلت : وش دراني انا رائد ولا مو رائد ..؟؟
ريم : طيب خلاااص ... تيك ات ايزي ....
اروى : ايزي بوجهك ...!!!

انفتح الباب وانخشت اروى على طووووول ف الدووولاب اللي كان قدامها ...
اما ريم " ااااحمممممممممممممممد......!!!!!!!! ايش يسوي هذا هنا..؟؟ ف غرفتي..؟؟!!!!!!!! اصلا شلووون دخل..؟؟؟ "

سكرت الكاميرا بيدها .. وقعدت تراقب الوضع وهي ساكته ..
احمد دارت عيووونه ف الغرفة الانيقة واللي يطغى عليها طابع الانوووووثة بزيااادة ..

ضحك احمد : هههه سبحاان الله ... من يشوووف ديكور الغرفة يعرف على طول حقت مين ....
دخل الهندي وراه شايل نص الدولاب .. والهندي الثاني النص الثاني مو الدووولاب : بابا وين هطي هادا...؟؟

احمد التفت : ها..؟؟ ا ... ا... وين يحطه ..؟؟ شدراني انا..؟؟ والله توهقت ..
الهندي : سرأة ( بسرعة ) بابا هادا مرة تقيل .....!!

احمد متوهق : ا.. يااا .. يااا .. يووه .. الحين هذي وش اسمه الشغااالة .. افف ... ياااا شغاااالة .... يااا .. انتييييي... يااا ... هييييي...
جات الشغالة : نأم بابا ...؟؟
احمد : وين احط هذا...؟؟
الشغالة تهز كتووفها وراسها بغبااااء : ما ادري... هطي برى ...
احمد : برى وجهك ...!!! اقووولك ف الغرفة تقولين لي برى ..؟؟
الشغالة : انا مافي معلوووم ....
احمد زهق : خلاااص رووحي رروووحي ...

وورى اللابتووووب كانت ريم فاقة من الضحك " خخخخخ اجل يا شغااال ها..؟ هههههااااي ... الله يهديك يا احمد ... عليك حركاااااااات ... ههه واي واي عليك ...!! "

احمد : يااربييي .. انا وش عرفني وين احطه ..؟؟ ا.. حطوووه ف الزاوية ...
الهندي : زاوية....؟؟ مو حلووو
احمد طالعه معصب : انت بتعلمني..؟؟؟!! رووح حطه وانت ساكت !!

حطوا الهنود الدولاب ف الزاوية وبالفعل .. طلع موقعه مرررة ممتاااز ...

احمد يزعط : شفتوا ...؟؟ شفت شلون طلع حلوو ... تقول مو حلو..هذا هو طلع حلوو .. انت وش عرفك بالذوووق انت وش عرفك ...؟؟
الهندي : لا مو هلوو ... حطي عند شباك حلوو ...
احمد طالعه ووده يذبحه : عند الشبااااك..؟؟ انت متزوج ...؟؟
الهندي : أي...
احمد : اقووول الله يعينها من خذتك مع هالذوووق انت ووجهك... روح انت وياااه .. روحوا بس يللا....!!

راحوا الهنووود وقرب احمد ... فتح الدولاب من داخل .. وقام يطالعه : والله كبير .. مدري وش بتحط فيه ..؟؟ وانا شدخلني الحين..؟؟ خليني ارجع الشركة اكيد بو رائد ينتظرني..

طلع رائد من الغرفة .. ونزل للدور اللي تحت ...
احمد " والله اني عطشاان .. ما بيضر لو تاخرت 5 دقايق " : ا ... تعالي انتي يا هييي .. والله انا لازم احفظ اسماء شغالاتهم ... عشان ما اتوهق زي اليوم ...
جات الشغالة : نأم بابا..؟؟
احمد : انتي وش اسمك ..؟؟
الشغالة : تاتا ...
احمد : تاتا..؟؟ دلع ايش هذا..؟؟
الشغالة ضحكت وشقت الحلق وبينت اسنانها السودا...
احمد بقرف : ضحكتي بلا ضروووس انشالله .. اضحك معاك انا..؟!؟!؟ روحي .. روحي من وجهي وسويلي عصير ليمووون رووحي.. ولا اقووولك.. خلاص ما ابغى .. سديتي نفسي...!!!!!! بقعد شوي قدام المكيف ابرد .. بعدين بمشي...

( ف الغرفة )

طلعت اروى من الدولاب مختنقة : اففف ... اففف وش هالحر..؟؟؟!!؟!
ريم شالت يدها عن الكاميرا : الحمدلله على السلامة ... شلون شفتي الدولاب...؟؟
اروى تتحرطم : فوووق الحر والكتمة .. حوسة مو طبيعية ..
ريم : هههه طيب .. انا لازم اسكر الحين ... ماما تقول بنطلع بعد شوي ..
اروى : وين ..؟؟
ريم : مدري... تقول يمكن وافي...
اروى : ترى وافي مرررة حلووو ... بتستانسين اكيد ...
ريم : طيب خلاص .. شوفي الحين بسرعة .. آخذ للتنورة البيضا بلوزة أي لون ..؟؟
اروى : ممم .. شوفي دامها بيضا ... أي لون يركب عليها... يعني وردي.. اخضر .. كحلي .. احمر .. كله يركب ... اهم شي يكون شي ناااعم ..
ريم : اهااآآآ... طيب انتي بتقعدين هنا..؟؟
اروى : لااا... السواق برى ...
ريم : اوووكي .. سي يووو
اروى : اووكي .. باااي

سكرت اروى عن ريم ... اخذت اللابتوب حقها وطلعت من الغرفة ... وهي شايلة عبايتها بيدها ....

وصلت للصالة الكبيرة ... وبدون ما تلتفت .. حطت العباية على الكنب وجنبها اللابتوب ..
طلعت كليب من الشنطة اللي بيدها ... ورفعت شعرها الطويل .. اخذت عبايتها ولبستها بكل نعوووومة ...

وكل هذا كان قدام عيووون احمد اللي كان واقف عند الباب اللي برى ..
احمد " هذا هي..؟!؟؟! ما توقعتها كذا..؟!؟!؟ سبحان الله .. نفس الشكل لما يكون هااآدي ... ونفس الهيئة والملاآمح ... "

حطت نقابها وعدلته ... وحطت فوووقه الملكي ... وجات بتمشي بس وقفت منصدمه..

احمد ارتبك " الله يقطعني على هالوقفة..!! صدق اني اهبل.. الحين وش اسوي..؟؟ "

اروى وقفت مترددة شوي .. " هذا مو كانه احمد..؟؟ الا هذا صديق عوض اللي كان دايم يجي البيت عندنا.... غريبة وش يسوي هنا..؟؟ " : لو سمحت بمر ..

احمد " جات من ربي " : ا.. ا.. انا كنت اشرف على العمال وهم يركبون الدولاب .. وخلاص طالع ..
اروى " وش اسويلك..؟؟ "

احمد " انقلع يا حمااار شفيك واقف..؟؟ عجبتك الوقفة اشوووف ... مااالت عليك صدق تفشل...!!! "
تحرك احمد لبرى البيت ... وركب سيارته ... واروى نفس الشي .. ركبت السيارة ..
وكل منهم راح في طريقه ...

___________________________________
(( سيارة رائد ))

( بعد ربع ساعة )

نزل رائد من السيارة راجع من الجيم ... العرق يصب منه ...
رائد " اففف ... حر مو طبيعي ...!!! "

دخل البيت وطلع للدور اللي فوق وهو يركض شايل شنطة ملابسه اللي كان لابسها ف الجيم ....

وصل لغرفته بس التفت على غرفة ريم وشافها مفتوووحة ... حط شطته ع الارض ومشى لغرفة ريم .. دخلها وشاف الدولاب ...
رائد : اووووه ... ركبوووه ... والله طالع شي ف الغرفة ...!!!! شكلي بوصي على واحد..

طلع جواله وهو فرحان ودق على ريم .....
ريم : الووووووووووووووووووووو
رائد : الو هلا...
ريم : اهلين رائد .... كيف حالك..؟؟
رائد : بخير الحمدلله ... كيف امي..؟؟
ريم : ماما بخير ... تسلم عليك
رائد : سلمي عليها وقوليلها بكلمها بعد ما آخذ لي حمام .. ميت من الحر ..
ريم : توك راجع ..؟؟
رائد : أي... توني الحين... المهم ... عندي لك مفاجأة ...
ريم تحمست : قووول قووول .. قوول ..
رائد : هههه وصل دولابك الجديد ...

ريم مسوية ما تدري : والله ..؟؟!!
رائد : أي والله جد ...
ريم : واااااااااااااااااي .... كيف شكله ..؟؟
رائد : والله رهيب ... مرة طالع حلووو ..
ريم : وااااااو ... متى ارجع متى ارجع ... ابغى اشووووفه ....
رائد : خلاص بصوره وبرسلك اياه بالمسن اليوم بالليل....
ريم : خلاص كذا اوكي ....
رائد : يلا يلا رووحي ... حاااس انه ريحتي طالعة على بعد مترين ...
ريم : يعععععععععععععع ... ادعك جسمك زي الناس...
رائد : خخخخ شوف اللي ما تستحي ... عطيناك وجه ... يللا انقلعي ...
ريم : الناس يقولون باآي...
رائد : ههه يللا باي ...
ريم : بااااااااي ....

سكر رائد عن ريم .. وراح ياخذله حمام سريع ... قبل ما يتغدا ويطلع ..

___________________________________

(( بيت ابو بندر .. غرفة احمد ))

( الساعة 4 العصر )

كان قاعد على السرير يفكر ....
احمد " ثنتين بنفس اليوم ..؟؟!!!! يعني دخلت غرفة ريم ... وشفت اخت عوض .. على ما اعتقد اذا ما كنت غلطان اسمها اروى.... أي اروى .. والله ماني بصاااحي .. الحين انا ايش ابغى بالضبط...؟؟!؟ ليش قاعد اسوي كذا ..؟؟ بعدين احد يوقف زي وقفتي اليوم قدام الباب وف وجه البنت ... زين انها ما درت اني شفتها وهي تلبس عبايتها .... آآآآآآآآآه .. بس الحق ينقااال .. البنت هذي شي... نعوووومة ورقة مو طبيعية"

قام وقعد على حيله مستغرب " انا وش قاعد اقووول ..؟؟ شفيني ..؟؟ شكلي مريض.. معقووولة جاتني المراهقة متأخر ..؟؟ شدعوة ...!! انا عشت مراهقتي وشبعت لعب فيها .... اجي الحين اراااهق من جديد ..؟!؟!!؟ لا لا لا ... مو معقووولة .. هذا شي مو منطقي... انا فيني شي ... "

مسك راسه " افففف .. ما فيني حرارة .. ياخي انا ممكن اعرف ايش صارلي..؟؟ قبل كنت واحد هادي ماعندي هالحركات .. والحين .. استغفر الله .. صرت اشووف بنات الناس ....!؟؟!؟! وبعدين ليش اليوم سويت كذا..؟؟ انا من متى ارتبك قدام البنات ..؟؟
انا ريم لما تكلمني كل شي فيني يوحي بالهيبة ... ليش اليوم قدام اروى ما قدرت امسك عمري وما عرفت ايش اقوووول ...؟؟ ليش فجة صرت ضعيف قدامها ... ارتبكت .. وما عرفت انطق حرف ...!!! ولا عمرها صارت فيني هذي قدام ريم . مهما كانت اسئلتها محرجة .....!!! "

___________________________________

(( شقة سعود ودلع ))

( الساعة 7 وربع )

كانت دلع ف المطبخ تسوي القهوة قبل ما توصل نساايم وبناتها .. ولينا ..
دخل سعود المطبخ كاااشخ ببنطلون جينز وتيشيرت اسود ..

سعود : ما خلصتي..؟؟
دلع بدون ما تلتفت : الا حبيبي.. خلصت بس باقي القهوة .. بخلصها قبل ما يوصلوا ..

سعود قرب وهو يبتسم .. حضنها من ورى وباسها على خدها بكل حب : يعطيك العافية ...!!
دلع عضت شفايفها مستحية : الله يعافيك .. سعود وهو للحين حاضنها : انا بطلع الحين ... تبغين اساعدك ف شي...؟؟محتاجة شي..؟؟ شي ناقصك..؟؟
دلع : لا حبيبي خلاص ... روح سلامتك ..

جا سعود بيطلع ...
دلع : تعااال .. تعال تعال تعال...
سعود لف : آمري..
دلع بنص عين : وين رايح..؟؟
سعود ضحك : ههههه يعني وين ..؟؟ يمكن بروح اقعد لي ف أي كوفي شوووب .. العب بلياردوووو .. او بشوف عندي واحد من ربعي .. اذا فاضي بروح معاه ..
دلع ابتسمت : طيب روووح .. ترى بتصل بشيك وينك ...
سعود ضحك وهو يطلع : هههههههههه ماني راد عليك ..

ضحكت دلع ف المطبخ وهي تتامل الدلة الفاضية .... ورن الجرس..
دلع انتبهت : وصلوا ...!!!! ...

طفت النار تحت القهوة ... وفصخت مريلة المطبخ على السريع ... وطلع من المطبخ وفتحت لهم الباب .....

دلع مبتسمة حضنت نسايم : اهليييييييين ... وحشتيني..
نسايم حضنتها بعد : حتى انتي يا قاطعة .. كذا ما تتصلي ولا تسالي ؟؟ .. يخصا عليكي يا دلع بس..
دلع : معليش والله الظروووف مو بيدي..... لاتزعلين وتحطين بخاطرك ..
نسايم ابتسمت : آخر مرة والله
دلع ضحكت : توووبة .. والله آخر مرة ..

دخلت نسايم ووراها شوووق الصغيرة ... وطبعا وراهم لينا اللي شايلة امل ..
التفتت دلع وشافت لينا بس طلعت عيووونها : لينا..؟؟ ( همست ) ليش شعرك طالع..؟؟
لينا مسوية ما سمعتها : هايااااااااااااات ....

دخلت لينا وتجاهلت الدلع اللي تعرف انها بتسويلها سالفة الحين ....

___________________________________
(( ستاربكس اللي على كورنيش الخبر ))

( الساعة 9 المسا )

رن جوال سعود اللي كان على الطاولة ...
سعود : الووو ... هلا معاذ ... انا ف ستاربكس.. انت وين ..؟؟ ( رفع راسه يلتفت حووله) أي أي هذاني شفتك .. جايك الحين ....

قام سعود واخذ مفاتيحه وجواله وراح لخوبه ..

معاذ ابتسم : هلا والله سعووود ...
سعود : كيف الحال.......؟؟
معاذ بخير :وينك يا قاااطع .. كذا ما تسال ولا شي..؟؟ ولا كانه عندك ربع ..؟!!
سعود : الظروووف يا معاذ ...
معاذ : تعال تعال معاي واشرحلي كل شي صارلك ...
سعود : وين اجي معاك..؟؟
معاذ : امشي معاي .. بنروح نتعشى ف البحرين ...
سعود بعد تفكير " الحين سهرة الحريم بتتاخر .. خليني اروح ما بيصير شي .. ما اتوقع دلع تقووول شي.. " : خلاص مشينا ... تجي معاي ف السيارة ..؟؟
معاذ : اقووول اركب سيارتي وانت سااكت ولا لانها تويوتا مو قد المقام ...؟؟
سعود : هههه لا افااآ عليك... بس عطيني دقيقة اجيب جوازي ...
معاذ : يللا بس بسرعة ... اليوم اربعاء .. وتعرف اليوم الجسر مزحوووم مرة ..
----------------------------------------------

(( بيت ابو بندر ))

( الساعة 10 ونص المسا )

حط ثامر الجوال على اذنه بعد ما دق على الرقم اللي يبغاه ...
رد واحد : الوو ...
ثامر : الو ... هلا سلمان ..
سلمان صديق ثامر : هلا ثااامر .. كيف الحال..؟؟
ثامر : بخير الحمدلله .. وانت شخبارك...؟؟
سلمان : تمام ... تطالع المباراة ..؟؟
ثامر مستغرب : مباراة وشو..؟؟
سلمان : يا غبي اليوم نهائي بطولة أمم اوروبا ... اسبانيا والمانيا ..

ثامر : صدق..؟؟ واقول انا وش فيه بندر للحين ما رجع .. وكل ما ادق عليه ما يرد ..
سلمان : والله انك مو صاحي .. نهئي وش قاعد تسوي..؟؟ روح شووفه بس لايفووتك المباراة حماااااااااس ...!!
ثامر : شوووف .. انا احب الكوورة .. بس تجي تقول لي اسبانيا ما اسبانيا والمانيا ومدري ايش... انا مالي ف هالسوالف ... انا مواطن سعووودي نصراااوي حتى النخاااع..
سلمان يتطنز : نصراوي حتى النخاع..؟؟ والله منت بوجه تحضر .. ودك من يصكك ببلووك على وجهك عشان تتعلم التحضر شوي ... قال نخااااع قاال... !!!!!!!

ثامر : المهم مو موضوعنا ... اسمع بغيت منك خدمة ...
سلمان : طيب قولها بسرعة .. واشالله بكرة بردلك خبر اذا اقدر اسويها ولا لأ ... لاني ماني قادر اركز ...
ثامر : بعطي رقمين .. وابغاك تشوف مسجلين باسم مين ..
سلمان : حق مين الرقمين..؟؟
ثامر : وانت وشش هاللقافة اللي فيك .. رقمين وبس .. لا تسال حق ايش..!!
سلمان : خلاص خلاص .. نتفاهم بكرة ...
ثامر : اقووول لاحسة مخك الكووورة .. خلاص بكرة لا فضيت دق علي...
سلمان : انشالله .. مع السلامة ..
ثامر : ف امان الله ...

ثامر يتحرطم مو عاجبه الوضع : قال اسبانيا قااال ...!!! اقوول مالت عليكم وعلى الدوري الاوروبي السخيف اللي تطلعوووونه ...!! والله مافي احسن من سعد الحارثي الذابح ... يشق المرمى شق!!!!!!!!!!!!!!!!!!!!!!!!!!!!!!!!!!!!!!!!!!!!

___________________________________

(( ف البحرين ))

( الساعة 12 المسا )

سعود : اففففف ... ما بغينا نوصل..؟؟ تقول الناس مسوين هجرة ...!!!
ضحك معاذ : يعني بالله عليك وش عندنا احنا نقعد ف الشرقية نسوي .. راشد وكوفي شوووب ... وغيره...؟؟ ولا شي ... كل شي عوائل وممنوع الشباب ... والله ذاك اليوم رايح ابغى ابدل الجزمة اللي خذتها .. وقلت اقرب شي لبيتنا مجمع الظهران .. ولله ما خلوني ادخل ... ليلة العيد تخيل...!!! والله قمت احلف له دقيقة ببدل الجزمة وبرجع .. والله ما خلاني .. يقول ممنوع ... جيب حرمة معك وبخليك تدخل ...!!!!!

سعود ضحك : طيب وقف ورى أي حريم تشوفهم ماشيين .. سوي فيها انك معاهم ..
معاذ طالعه بنص عين : قالووولك ما جربتها..؟؟ سويتها ..
سعود : ههه ما نفعت ..؟؟
معاذ : والله حست علي بنت من البنات .. قامت راحت وقالت لابوها اللي ماشي قدامهم ....
فتح سعود عيووونه الثنتين : اوووف ... وايش صار بعدين..؟
معاذ : ههههه انا من شفته جاي باتجاهي ... رحت وادعس واجري للسيارة ..
سعود فقع صحك : هههههههههااااااااي ... ههههههههه الله يقطع شكلك...!!!
معاذ يضحك وهو يتذكر : والله كان معصب مرة .. وجاي وهو يتوعد فيني .. وانا ماني بايع حياتي ... شردت وانتهى الموضوع ... وما بدلت الجزمة للحين .. ولا ببدلها .. بخليها ذكرى ف الدولاب ...

وبعد 5 دقايق .............

وقف معاذ السيارة : يللا انزل ...
سعود : وين جايبني انت..؟؟!!
معاذ : انزل بس وانت سااكت .. حاول تستااانس ف حياتك شوي ...
سعود نزل : ومين قالك انا مو مستانس ... كل شي الحمدلله بخير ..
معاذ : والله ..؟؟
سعود : أي والله ...
معاذ : دام كذا .. لازم نحتفل بترتيب حياتك ....!!!!
سعود وقف : حفلة...؟
معاذ : افففف .. سعود احنا ف فندق ... والفنادق دايم تسوي حفلات .... امشي بس..
سعود مشى وراه " الله يستر !!!! "

دخلوا داخل ... وتجهوا للقاعة اللي فيها الحفلة .. كان المكان زحمة .. واغلبهم سعوديين .. واكثرهم يا شباب ... يا عجايز عندهم عيال كبااااار ... والفنان اللي جايبينه كان عراقي .....

سعود : وش هالزحمة ..؟؟
معاذ طالعه بنص عين : سعود .. يا كثر ما كنا نروح اماكن ازحم من كذا اول .. شمعنى الحين صرت تتضايق من هالجو ...!؟!؟
سعود : لانه صارلي فترة ما جيت هنا....
معاذ حط يده على كتف سعود : عشان كذا انا جايبك هنا.. ابغاك تغير جو ..

قعدوا على طاولة وطلب معاذ كاستين ....
ويوم جابت الفلبينية الكاستين ...
معاذ مسك الكاسة : يللا اشرب وروق....!!!
سعود تردد : أي .. بس ...
معاذ استغرب : انت شفيك ...؟

سعود ما يدري وش يقول ..؟؟ خاطره بالكاسة .. وماوده .. لانه وعد نفسه ووعد دلع ما يرجع للي كان عليه اول ...

معاذ مسك كاسة السعود وحطها ف يده : اشرب يا سعووود ... انسى كل شي .. وخلينا نستانس شوي ...
شال سعود الكاسة وقعد يطالع فيها ... تذكر لذة الشعور اللي يحس فيه لما يشربها .. تذكر التخدير اللي يسري بكل جسمه بعدها ... هزها عشان يذوووب الثلج شوي .. ويخق طعمها المر القوي ...

----------------------------------------------
..... : اوووه .. اشوووف بديتوا قبلنا ...
معاذ ابتسم : انتوا تاخرتوا ...
جلس واحد من الربع جنب سعود : اووخص .. سعود هنا..؟؟

ابتسم سعود ....

انتبه الرجال للكاسة اللي بيد سعود وضحك : هههههه ما ودك نطول كلام .. خاطرك تشربها .. اشرب .. اشرب يا حبيبي ... ولكم كلكم كاسة على حسابي ..

معاذ : ما تقصر يا هاني .. دومك كريم خخخخخ .. بس مرة ثانية .. لازم تكون ع الموعد مو تتاخر ....!!
هاني : والله مو بيدي اسال حسين شلون كان الجسر
حسين : أي والله مرة زحمة ... وحقون الجمارك غصب يفتشووون ... ما يصدقووونك الا لما يشوفون بعيووونهم!!!

هاني رفع يده ياشر للفلبينية : sweety..!
قربت الفلبينية اللي تنورتها طول شبر شاقة الوجه وعيووونها فوق ماهي صغيرة صغرت زيادة من الوناسة : yes….
هاني يتكلم بالانجليزي وكانه اجنبي : we need 4 more glasses ( نحتاج 4 كاسات زيادة )
الفلبينية : ooh … OK
هاني : but quickly baby….!! ( بس بسرعة حبيبتي ...!! )

ضحك سعود اللي كان قد شرب الكاسة اللي بيده وخلص : هههه تراها فلبينية ...
معاذ طالعه بنص عين : انت شفت جسمها .....
حسين : بنت كلب مع هالسيقااان .....!!!!!!!!!!!!

@@@@@@@@@@@@@@@@@@@@@@@@@@@@@@@@@@@@@

(( شقة سعود ودلع ))

( الساعة 7 الصباح )

دلع اللي كانت تدووور ف الصالة وميتة خووووف ... وقلبها ناغزها وماهي راضية تهدى..

دلع : افففففف... ياربييييييي هذا وين رااااااااااح...؟؟ ما صارت طلعة ...!!!! الساعة 7 الصباح المفروووض اصلا يكون بالبيت من زماااااااااااااااااان .... الله يستر لا يكون صارله شي ......

رفعت سماعة التليفون ودقت عليه ..... بس... جواله مغلق ....

سكرت دلع التليفون والعبرة خانقتها : انا شكلي بتصل ف الشرطة .... اخاف صار معاه شي .... او احد سواله شي .....!!!!!! بنتظر ساعة زيادة .. اذا ما جا .. بتصل مالي دخل ... ياااارب عديها على خير ياااااااااااااااااااااارب ......

ومع نزول دموووع دلع .... انفتح الباب ... ودخل سعود وشكله كان تعبان مرة .. والنوم ماخذه ....

دلع ركضت وحضنته تصيح : حبيبي......
سعود متخدر للحين : ها حبيبتي ... شفيك تصيحين..؟؟
جلع رفعت راسها : وين كنت للحين ..؟؟ خفت عليك ...

سعود ترنح ف وقفته ... وحست عليه دلع وفتحت عيووونها ع الاخير : حبيبي شفيك..؟؟ تعبااان ..؟؟ فيك شي..؟؟ شي يعووورك..؟؟

سعود وخرها عنه وهو يضحك بهستريا ويترنح ف المشية: هههههههههااااي .. انا تعبااان ..؟؟ ليش ..؟؟ ا.. ايش .. ف .. فيني ..؟؟ مافيني شي .. هذاني .. زي .. زي الحصاان ...........!!!!

وتركها ومشى للغرفة ....
دلع واقفة ف الصالة مصدووومه : شفييييه ..؟؟ ليش كذا يتكلم ...؟؟!!

مشت وراه للغرفة وشافته مسندح على السرير بملابسه وجزمته ...
دلع قعدت على السرير جنبه وحطت يدها على راسه : سعود ... فيك حرارة ..؟؟ مريض....؟؟ كلمني ...

سعود فتح عيووونه : انتي ما تفهمين ..؟؟ انا م ... م .. ما فيني شي ..

دلع شمت ريحة كريهة ... استغربت .. وبعدين يوم بدت تطلع منه كلمات مو مفهووومة.. استوعبت ... وفتحت عيونها ع الاخير ...
دلع : سعود شارب شي...؟؟
سعود رفع اصابعه ياشر لها : بس 6 ... والله بس 6......!!!

دلع حطت يدها على فمها من الصدمه تصيح : ياربييييييي... ليش سويت ف نفسك كذا لييييييييييييش...؟؟
سعود : حبيبتي .. لا تخافين .. مافيني شي.. انا ز... زين ..
دلع : انت وين رحت امس..؟؟ مين خلاك تسوي كذا ...؟؟

سعود قعد : بقووولك .. ب ... بس .. ل ..لا تصيحين ..
دلع نزلت دمعتها : قووووووووووول خلصني ..
سعود مسح دمعتها وهو يقول لها : ششششش ... قلت لك ... ل .. لا تصيحين
دلع مسكت يده وباستها : ياربييييييي ... سعود حبيبي .. قول لي انتا وين كنت..؟؟

سعود قال وعيووونه حمرا : امس كنت ف .. م ... مع معاذ .. وو .. و هاني .. و .. حسين....
دلع : ربعك..؟؟
سعود : أي..
دلع : طيب .. ايش سويتوا...؟؟
سعود : وش سوينا .. ب .. بعد ..؟؟ بس .. شربنا .. ش .. شوي .. وو .. و هاني .. ط .. طلع مع .. مع ....
دلع : طلع مع مين قوووووووول ..؟؟

سعود ولا حاس بعمره : هاني طلع مع .. الفلبينية .. ا .. اللي كانت .. ت .. تصب ال.. ال .. هذا ... ف.. الكاسة ...
دلع فتحت عيونه الثنتين : وانت طلعت مكان يا سعووود ....؟؟

سعود طاح ف خضنها نايم .......
دلع تهزه : كلمني ... قووم كلمني ....
سعود : همممممممممممممممممممممممم ...؟
دلع : انت طلعت مع احد مكان ..؟؟ كنت مع وحدة ثانية ..؟
سعود : لا...

غمضت عيونها دلع بارتياح وسعود كان ناايم خلاص ورااايح ف النوووومة ..
صلحت له نوومته .. وقعدت تفكر ... ما هي عارفة وش تسوي ...
دلع " ياربيييي .. من وين طلعتلي هالمصيبة ...؟؟ انا ما صدقت متى تعدل وصار إنسان زي العالم والناس .. يقوم يصير فيني كذا ...!؟!؟؟! حسبي الله عليكم من أصدقاء .. حسبي الله عليكم بس ...... "

___________________________________

(( بيت بو بندر ))

( الساعة 5 العصر )

ثامر : وينه هذا ما اتصل فيني ..؟؟ صدق ما يعتمد عليه ابد ....!!!

طلع جواله ودق على سلمان .......
سلمان : الووو
ثامر : مااااالت عليك وعلى اللي يطلبك خدمة ....!!
سلمان : هلا ثامر .. معليش يا رجال .. والله امس من الفرح نسيت كل شي ...
ثامر : وليش فرحان انشالله ..؟؟
سلمان : يالتعباااان امس فاااازت المانيا بالبطوووولة ... فزناااااااا ...
ثامر : طيب مبروووك ... الحين وش صار على موضوعي....؟؟؟
سلمان : أي موضوع ..؟؟
ثامر : شووف..؟؟ ويقول لي أي موضوع بعد ...؟؟؟ موضوع الرقمين اللي طلبتك تشوف لي مسجلين باسم مين ...؟؟
سلمان تذكر : ايوااا.. أي أي صح تذكرت ...
ثامر : شصار عليهم ..؟؟
سلمان : شوووف والله مدري ..بس ... عطيني الرقمين وانا بتصرف ..
ثامر : بس ها.. والله لو انتشروا الرقمين ما تلوم الا نفسك ...
سلمان : خلاص درينا انها ارقام خويتك .. لاتقعد تزعط علينا ....!!!
ثامر : تدري شلووون .. انت ما تنعطى وجه ...
سلمان : خلاص خلاص ... تعال .. ليش تزعل ..؟؟ والله امزح معاااك ..
ثامر : متى يعني استلم منك خبر...؟؟ مو زي امس تقول بتصل فيك ولا تتصل...!!
سلمان : لا انشالله اللحين بكلم واحد من ربعي يشتغل ف الاتصالات .. وبشوفلك..
ثامر : تسلم ما تقصر ....
سلمان : تآمرني بحاجة ثانية ..؟؟
ثامر : لا سلامتك ... بس اركد شوي .. خل عنك هبالة الغرب و اوروبا والدوري الاوروبي هذا..............!!!!

سلمان : هههههه اسمها بطولة امم اوروبا .. مو دوري اوروبي .. بعدين مافي شي اسمه دولي اوروبي ...
ثامر : اللي اسمه .. كرستيانو وما كرستيااانو وبيكهام ومدري ايش... عن هالخرابيط ... مالك الا الحارثي وماجد وبس...........!!!!

سلمان : خخخ ههههههههههاااااااااااااااااااي .. آآآآآه يا بطني والله انك يا ثامر نكتة .. خلاص ابشر .. بطلنا دوري اوروبي ههههههههههههههه ...!!!
ثامر : تتطنز مع وجهك .. اقول انقلع مااااالت عليك ...!!

سكر ثامر بوجهه وهو يتحرطم : يتطنز الكلب...!! انا اوريه .. والله سعد يسواه ويسوا كل فرق الدوري الاوروبي حقه هذا ...!!!!!

___________________________________

(( شقة سعود ودلع ))

( الساعة 8 المسا )

فتح سعود عيووونه وتلفت حوووله بصعووبة وتعب ...
دلع اللي كانت تلعب بشعره باست رايه : اشواا قمت ..!!

سعود : آآآآآي يا راااااااااااااااااااسي....!!!
دلع خافت : راسك يعورك ..؟؟ شفيك..؟؟
سعود مسك راسه : مدري .. راسي يعورني...
دلع : لحظة فورت لك موية .. بسويلك كوب كوفي ...
سعود : أي الله يخليك ..

قامت دلع للمطبخ 3 دقايق وعلى طول رجعت ..
دلع : وهذا احسن كوب كوفي ...

اخذ سعود الكوفي وهو يبتسم .... شرب منه شوي .. وبدا راسه يخف ...
حط الكوب على الكومادينا وطالعها وشافها سررحانه ...

مد يده ومسك يدها : دلع ... شفيك ..؟؟
انتبهت دلع وطالعته بعتب : ليش سويت كذا..؟؟
سعود سكت .. ما عرف وش يقول لها ...
دلع : يعني يعجبك شكلك وانت جاي مو عارف توقف حتى ... ولما تقوم راسك شوي وينفجر من الالم..؟؟ يعني اللي شربتهم يسوون التعب هذا كله ... والله ما تسوى عليك ..

سعود : دلع والله ما ادري شلون سويت كذا ... رحت انا وربعي اللي صار لي فترة ما شفتهم.. قالوا انهم بيتعشون ف البحرين.. قلت اروح معاهم بنغير جو ...وبعدين ما احصل الا وصلنا للفندق .. ونزلوا .. قلت لهم لأ ... خلونا نروح مكان ثاني... وو اصروا
دخلت معاهم وقعدنا .. وما اشوووف الا الكاسات صارت قدامنا .. والكل قام يشرب...

دلع : تروح وتشرب معاهم يعني ..؟؟
سعود : ما قدرت .. تذكرت يوم كنت اشرب براحتي وانا مستانس .. والكل كان قدامي قاعد ومستانس .. ما قدرت امسك نفسي .. والشيطان ما قصر .. قام يوسوس لي لين شربت .. وش اسوي..؟؟

دلع حضنته بقوة : اوعدني ما تسويها مرة ثانية .. والله بغيت اموووت خوف ...!!
سعود : خلاص لا تخافين .. انا جنبك ..
دلع : اوعدني ما تعيدها .... سعود انا ابغاك تضيع مرة ثانية علشان كاسة ما تسوى...!!

سعود ابتسم لها يطمنها: خلاص اوعدك .. لاتخافين ...!!!!
----------------------------------------------

(( بيت ابو بندر ))

( الساعة 12 الظهر )

رائد : يععع ... احد يحط بيض على وجهه ..؟؟
دانة : لا والله .. اجل وش يحطووون ..؟؟ لحم...؟!؟!
رائد : مو عن كذا .. بس شي مقرف بجد ...

دانة : لا بالعكس .. لما اشيله بتشوووف شلون وجهي بيصير ..
رائد : انتي حلوة بدووون شي ... عمرك شفتي قمر يحط بيض!! على وجهه .. ؟؟
دانة : طيب حبيبي .. انت الحين قاعد تغازل على التليفون ... صليت الظهر اول..؟؟

رائد : توضيت .. وبعد شوي بروح
دانة : لا والله ..؟؟ لأ ... يللا روح الحين .. عشان لايقيمون الصلاةوانت لسى ما وصلت...
رائد : طيب حياتي توصين على شي ..؟؟
دانة : سلامتك ...

سكر رائد عن دانة ورجعت دانة فتحت اللابتوب تتفرج على البودي لوووشن الجديد اللي نازل .....
وجا على بالها ايميلها .... فتحت ايميلها وحصلت كثير رسايل .. اكثرها من غادة وصديقاتها بالجامعة ... بس .. هذا الايميل مو معروووف ...

فتحت الايميل وهي مستغربة : مين هذا..؟؟

شوي الا تقرا المكتوب ...

هاااي دانة ,,, كيفك ..؟؟

قالولي انك قاعدة تحضرين لعرسك ... الله يوفقك ..

وانا عندي لك مفاجأة بما انه عرسك قرب... واتمنى تعجبك ...

..
...

وقفت دانة منصدمه ... " هذا راائد..!!!! بس... مين هذي..؟؟ وشلون توقف جنبه كذا..؟!؟! طيب يا رائد ... شكله هالمرة .. لازم تلاقيلي تفسير مقنع لهالصووورة ... هذي مو علاقة على تليفون ولا نت بس ... السالفة اكبر من كذا...!!!!"

___________________________________
نهاية البارت ال24 ...

الاحداث قاعدة تتعقد ..

رائد ودانة وحياتهم كيف بتكووون ..؟؟
وهالعرس هل راح يتم..؟؟

ريم وسفرها..؟؟ هل راح ياثر على علاقتها مع احمد..؟؟
ووجود اروى في ظل غيابها .. هل راح يكون له دووور ...؟؟

دلع وسعود .. هل راح يتجاوزون الاخطاء اللي تصير ف حياتهم ..
ويعيشون بسعادة..؟؟