منتديات صواديف عشاق - عرض مشاركة واحدة - روح عشقتة وقلب فقدتة للكاتبة : بنت البلاد

منذ 4 أسابيع

صدت خلود وشافت أحمد يدامها..: نحن شو قلنا .. مب خلاص خله يزول.. لاتتطالعينه ..
مجد: ماقدر خلود عايبني هالإنسان ماقدر اشله من بالي..
خلود: كيف عايبنج وامسات تحرطمين تكرهينه..
مجد وهي رافعه حياتها: متى قلت اكرهه ماكرهه.. عمري ماقلتها..
خلود: لا صدق انتي مب طبيعيه شي بلاج.. اميه اصحي.. امس امس الي هو امس.. قلتي لي هالكلام..
مجد: اوووووهووو انا ماطري العفريت أحمد.. اطري الدكتور ..
خلود: قولي جي من الأول.. وينه خل اشوفه؟؟
وشرحت لها مكان الدكتور وصدت خلود وشافته .. : لا وذوقج حلو بعد..
مجد: بالله عليج قارنيه ويا العفريت منو احلى..
خلود: شوفي انا انسانه صريحه ماعرف اجامل.. ومب عشانه ولد خالي بمدحه.. بس احمد احلى.. شوفي الجسـ...
قاطعتها مجد: جب ماعندج نظر صدق..
خلود: برايج..
وشوي الا حور وعبيد يوصلون والدكتور كان طالع قبلهم بشوي لأن ربيعه بعد وصل.. والكل تقرب من المعاريس يبارك ويسلم ويتحمد بالسلامه.. ومجد تمت على طرف تتريا الكل يخلص عشان تكون اخر وحده تسلم عليها.. بس الي ماقدرت تستوعبه .. عبيد قاعد يسلم على الدكتور.. تمت مبهته تتطالع وخلود اتطبطب على جتفها..
خلود: طلع يعرف عبيد..
مجد صدت صوب خلود وهي شاقه الحلج: يعني يعرفه .. ربيعه.. يعني في أمل..
خلود : انتي ايه اصحي لا تخلين لا امل ولا شي في بالج اصحي يابنت الناس اصحي..
بس الي قاطع افكار مجد يوم شافت حور واقفه يدامها .. لوت على حور وحضنتها من الخاطر ويلست تصييييييح من خاطرها.. : ولهت عليج دبه دبه.. ليش عرستي وخليتيني..
حور: والله اني ولهت عليج اكثر..
مجد: لا ادري ان الأخ خذاج عنا خلاص.. مالي مكان شرات قبل
حور: حرام عليج لا تقولين هالكلام..
وتموا يمشون وكل وحده حاطه ايدها على جتف الثانيه ولطيفه تتطالعهم وغامضتنها مجد.. تعرفها كيف متعلقه في حور.. ومشوا صوب المواتر .. بس الي مانتبهت له مجد انها راكبة موتر أحمد.. يلست ورى ويا حور.. وأحمد يسوق وحذاله عبيد..
صحت من سرحانها على صوت أحمد..: انزين خبرني يالعوبد شو سويتوا هناك؟
عبيد: ياخي شو الجو برد وحلوو.. شي عجيب..
أحمد: يالله الحمد لله اهم شي استانستوا..
عبيد: وايد...
حور: عبيد منو هذا الي سلمت عليه..
في هالوقت رفعت مجد راسها تبا تسمع.. وأحمد يطالعها من الجامه وقلبه ينتفض..
عبيد: هذا ربيعنا من أيام الثانويه محمد (الفلاني).. احين دكتور ماشاء الله عليه... سلمج الله ممكن تقولين من اعز ربعي..
أحمد: هذا هو الدكتور الي عالج ايد مجد..
حور صدت صوب مجد: ايدج؟؟ ليش بلاها؟؟
مجد: تو الناس.. توج عرفتي.. وين عيونج ماتشوف..
حور: والله مالاحظت من فرحتي لشوفتج..
عبيد: سلامات.. شو صار..
مجد: ماشي كل السالفة اني طحت وانكسرت ايدي ودوني المستشفى وجبسوه لي.. هاي كل القصه..
حور: فديت ايدج انا.. ماتشوفين شر اختي ماتستاهلين..
مجد: الله يسلمج..

ومجد طول الوقت تمت ساكته وسرحانه بالدكتور.. يعني طلع ربيع عبيد.. ياسبحان الله.. ولا بعد من زمان والروح بالروح.. بس احمد ليش ماعرفه يوم شافه بالمستشفى..؟؟.. اصلا شافه ماذكر.. اوه مايخصني هذا لازم يدخل في كل شي عنبوه يني..
حور: شو الإستعدادات لملجة خلود؟
مجد: بتكون عائلية أكثر من جي ماشي استعدادات كبيره وايد
حور: احسن بعد.. الله يوفقهم ويهنيهم يارب..
الكل: آمين يارب..
عبيد: الفال لك ياأحمد..
أحمد: ان شاء الله بس خل نخلص دراسه وعسى الله ترضى فينا
حور: ليش في حد في بالك؟
أحمد: لا تعليق..
عبيد: هههههههه احمد ومايكون حد في باله مستحيل..
مجد وفي خاطرها.. حتى اخوه عارفنه.. اكرهه.. الله لا يقول حاط عينه علي بجلعهن له..
رفع عينه احمد وتم يطالع مجد شافها منزله راسها وهي تعدل شيلتها .. تنهد وهو حاس بغصه في صدره.. وده يعيش لحظات حلوه وياها بس مب قادر يعدل الوضع..
وصلوا بيت بوعبيد ونزلت حور وياها عبيد ورن تليفون مجد في هالوقت..
مجد: هلا ابويه..
عبدالعزيز: انتي وين سرتي؟؟
مجد: انا سرت ويا حور.. تحريتها بتيي عندنا البيت احين ماعندي حد اييبني..
عبدالعزيز: منو وصلج؟
مجد: أحمد.
عبدالعزيز: خلاص خليه يوصلج عيل..
مجد انصدمت: هااااا شو..
عبدالعزيز: شوبلاج.. تراه ولد عمج مب غريب.. والا بيوصلج شو بتسوين وراج كلية باجر..
مجد وهي تحايس بثمها: انزين انت اتصل فيه وقول له انا ماقدر ارمس..
عبدالعزيز: خلاص ان شاء الله..
وبندت عن ابوها وسارت عند حور وسلمت عليها وعلى عبيد..
مجد: عاد تعاليلنا باجر..
حور: هيه انزين ترا باجر على الغدا بكون عندكم.. اقول ماعندج اخبار عن خولة؟
مجد: لا الخاينه بس اتطرش مسجات ماتتصل..
حور: هههههه.. حليلها تولهت عليها بتصل فيها باجر..
عبيد: وانا ولهت على خلووف..
حور: اصلا قول ولهنا على سوالفهم وحشرتهم..
عبيد: مابقى شي وبنرد للشقا..
حور: لا دخيلك لا تذكرني.. زين منهم يوم وافقوا على اجازتي هاي..
أحمد: مجد جاهزه عشان اوصلج؟
حور: بتسيرين ويا احمد؟
مجد وهي تبلع ريجها غصب.. : هيه لأن مافي حد ثاني يوصلني..
حور: زين يالله روحي بالسلامه وسلمي على امي وابوي.. وقولي لهم باجر بيي..
مجد: على الرحب والسعه..
ومشت ورا احمد الي سبقها للسياره وقعدت ورا.. وتمت صادة صوب الجامه رافضه انها تنطق بأي كلمة.. وهو ساكت نفس الشي..
أحمد.. : اقول..
مجد ونفسها في خشمها: هلا..
أحمد: كم سنه باقي لج؟
مجد: سنتين..
أحمد: يالله بالتوفيق.. عيل انا بخلص قبلج يعني..
مجد: ان شاء الله.. بالتوفيق..
أحمد: وياج..
وسكتوا لفتره.. واحمد ماقدر يمسك نفسه اكثر.. : ممكن اقولج شي؟
مجد: قووووووووول..
أحمد في خاطره.. : بل.. شديدة.. (صد صوبها من الجامه وهو يشوفها).. انتي ليش تكرهيني؟
مجد: أكرهك؟؟ ليش؟؟ لا ماكرهك ولا احبك.. عادي..

أحمد تضايق شوي بس ماحب يبين لها شي.. : اهااا لا بس احسج ماتردين علي شرات ماتردين على عبيد ولا على خالد اليوم يوم سلم عليج..

مجد: لا عادي ماقصد شي.. هذا اسلوبي..
أحمد: اهاا.. يالله عيل سلمي على عمي ومرت عمي وايد..
مجد: يبلغ.. مع السلامه..
ونزلت من الموتر وبندت الباب بقوة وراها.. غيض احمد زود .. عفان الله حتى ماجاملت تعال اشرب شي تقهوى.. شدييييدة..
ودخلت مجد البيت وهي تتذكر الدكتور ابتسمت.. وصعدت غرفتها.. كانت في هاليوم هاديه وحاسه بالراحه شوي.. يمكن شوفة الدكتور فتحت نفسها .. وعطتها امل هي بعدته عنها.. وأحمد في هالوقت ماكان قادر يشيل مجد من باله
ملاحظة بسيطة:.. بالنسبة لشخصية عفرا.. مقتبسه من الواقع.. للأسف مريت في بإنسانه مثل هذي وانهدر دم احدى البنات الي اعرفهن بسببها.. الله يرحم البنت .. ويجازي هالإنسانه.. طبعا اسمها مب رقيه غيرت الإسم لزوم القصه والتمويه.. وعلى فكرة رقية حرمه كبيره في السن.. شغلها أماكن تجمعات النسائية.. أعراس وغيره.. وتتنقى بنات وتوديهن للشباب.. شرات مايقولون (دلاله).. عفان الله

الفصل الثاني
=-=-=-=-=-=
الفواصل الموجودة فالقصه من تصميمي.. والي يحب ياخذ منها .. ياخذها عادي لأني سويتها لكسب الأجر والثواب : )
=-=-=-=-=-=-=
نوره: بس خلاص فيصل والله اني تعبت.. مب قادره.. انت خالد وياك من صوب.. وانا حرمته من صوب.. شو ذنبي..
فيصل كان قاعد ومنزل راسه ويلعب بصبوعه .. تنهد..: تحملي ماعليه..
نوره وهي تتطالع مهره بنتها في السرير وهي تلعب..والدمعه تنزل على خدها: تخيل موقفي يدام كل الحريم فشلتني بهالطريقه.. عيالي شو بلاهم.. وان كانو بنات.. ترا هاي نعمه من الله ..
فيصل: وانا عمري مانكرت هالشي ولا تذمرت.. بالعكس مستانس ان الله رزقني بعيال على الأقل شرات ماقلتي ناس وايد محرومين منها..
نوره وهي تمسح دموعها.. تقربت من فيصل ونزلت على الأرض وقعدت تتطالعه: فيصل.. اذا اهلك يبونك تعرس ويا وحده ثانيه... ترزقــ..
قاطعها فيصل وحط ايده على ثمها: اسكتي وبلاها هالرمسه البايخه.. شو يعني انتي مالج ذنب.. وان يبنت بنات ترا الريال الي له دور في جنس الجنين.. نحن ناس متعلمين ومتثقفين ونعرف هالشي ..
نوره وهي تبتسم له بحزن: يعني عمرك مابتلومني على هالشي..
فيصل: والله انتي مب صاحيه انا متأكد.. شو هالكلام.. ألومج على إرادة ربج .. وليش ألوم بالأصل..
ابتسمت له نوره وحست بتفائل.. ونشت سارت عند مهره.. وتنهد فيصل وعق عمره على الفراش قعد يطالع سطح الغرفه ويتأمل.. ويفكر شو بيصير.. أو كيف بيفتك من هالرمسه الي مالها أول ولا تالي.. غمض عينه وهو يدعوا في قلبه ان هالمشاكل تنتهي..
=-=-=-=-=-=
فيصل ربيع فطوم كان يالس ويا ربيعه ناصر فالقهوه.. هو كان يدوخ وناصر يشيش..
فيصل: نصوور ماقلت لك..
ناصر وهو ينفخ في ويه فيصل الدخان : قول..
فيصل: غربلاتك .. هف هناك هب في ويهي.. تحيد فطيم الي رمستك عنها..
ناصر وهو يعتدل في قعدته كأنه متشوق يسمع شي عنها..: هيه بلاها..
فيصل: الأربعا بظهر وياها..
ناصر وهو يضرب على جتف فيصل: قول والله..
فيصل: عيل.. يوم اقولك بروم عليها ماتصدقني..
ناصر: عيل خل نخبر الشباب باجر سهره يديدة..
فيصل: لا ..
ناصر: ليش لا؟
فيصل: مابا من أول مره تظهر.. خلها اول مره تحس براحه وياي واوهمها بحبي وهيامي فيها.. والمره الثانيه بنضبط اليلسه الحلوة ويا الشباب..
ناصر: ههههههه.. صدق انك لوتي.. انزين مايستوي ايي وياكم..
فيصل: اتيي ويانا.. اممم.. لا خلها المره اليايه..
ناصر: ههههههه ننتظر شو ورانا..
فيصل: اخبرك اسكت اسكت.. سلطان وصل.. هذا ان عرف مابيخليني في حالي.. طيب غصب يشوفها ..
ناصر: هههههه هذا من كثر البنات الي عنده وبعد مايشبع..
فيصل: هههههه
سلطان: جني الا حاس انكم تحشون فيني..
فيصل وهو يرفع ايده: لا حشى..
سلطان: انزين شي سهره بالخميس؟
فيصل: لا ليش؟
ناصر: بلا.. تراني رمست رقيه وقالت بتييب لنا شله يديده ..
سلطان: اوهووو خل تأجله لليمعه مايستوي..
فيصل: ليش شو عندك؟؟
ناصر: شو عنده.. أكيد مواعد مايبالها رمسه..
سلطان: هههههه.. لا أبوي هالمره غلطان.. ملجة الرضيعه من جي ..
فيصل: هيه بالبركه ان شاء الله..
سلطان: الله يبارك فيك ان شاء الله..
وقعدوا عقبها يكملون سوالفهم.

حور: خبريني شو السوالف الي عندج..
مجد وهي حاطه راسها على ريول حور.. وحور تلعب بشعرها.. : ماشي بس ولهت عليج يالدبه..
حور: ماقلتي لي عيبتج الهدايا..
مجد: مووووت عيبتني.. ماتوقعت ذوقج حلو جي..
حور وهي تضربها على يبهتها: سخيفه انزين..
مجد: ههههههه.. انزين انا بعد عندي لج هديه وايد بتتفاجئين منها.. ويمكن هالشي انتي ماتعرفينه عني.. بس احين بعترف لج فيه..
حور: خير قولي..
نشت مجد وسارت صوب الكبت عندها.. وفتحته.. وسحبت لها لوحه محطوطه على الطرف.. ويابتها صوب حور.. : اممم صكي عيونج..
صكت حور عيونها وقعدت تتريا مجد تعطيها التصريح تفتح عيونها.. وقفت مجد باللوحه يدامها.. وتبتسم.. : يلا افتحي عيونج..
فتحت حور عيونها ومن شافت اللوحه انذهلت.. فجت عيونها.. وتمت تتطالع الصورة .. وانتبهت على توقيع الرسمه.. فيه اسم مجد..
حور والكلام متقطع عندها: احين هههذذا انتي راسمته؟؟
مجد وهي تبتسم بفخر: هيييييه نعم.. شو رايج فيه..
حور: شو شو رايي.. رووووووووعه رووووووعه .. انتي من متى تعرفين ترسمين..
مجد: اممم.. من زمان بس كنت خاشه هالموهبه..
حور: شوووووو.. وليش ماقلتي لي ؟
مجد: مادري كنت خايفه من الإنتقاد..
حور: وانا اقول ليش البنت داخله جرافكس..
مجد: هيه عيل..
نشت حور وشلت اللوحه.. : بسير اراويها لعبيد..

عبيد كان يالس فالصاله ويا يدته وأم حور (لطيفه) وعبدالعزيز..
حور: عبيد عندي لك شي روووعه براويك اياه....
عبيد وهو يطالع ويشوف البرواز الي في إيدها ومستغرب.. : اشو ها الي في إيدج؟؟
حور: ترا هذا هو الشي الي ابا اراويك اياه..
عبيد: راويني خل اشوف..
جلثم: يلا شو تريين عشان تراوينا؟
حور: انزيييييييين شوي شوي علي... ليش جي مستعيلين..
وشوي شوي لفت حور البروزا ومجد ماقدرت تيلس.. صعدت وسارت الغرفه فوق..
لطيفه: شو بلاها مجد؟
حور: ترا تستحي اونها.. عبيد ترا هاللوحه الي بتشوفها احين هديه من مجد لنا..
عبيد: يلا نشفتي ريجي ساعه لين ماتلفين البرواز صوبنا..
حور: هههههههههه..
ومن وجهته صوبهم الكل انبهر.. وعيبته اللوحه.. إلا عبيد.. الي دوم يحرج وتفكيره يخونه.. : ومنو الي راسمنا ان شاء الله؟
حور وهي تبتسم له: مجد..
نش عبيد وتقرب من اللوحه: أحين مجد تعرف ترسم جي.. (تقرب من حور وتم يطالع عيونها بغضب وبصوت واطي).. حسابي وياج بعدين مب يدام هلج..
فجت حور عيونها وطاحت اللوحه من ايدها وانكسر البرواز..
عبدالعزيز: بسم الله عليج.. سلمتي..
لطيفه: ماحيد بنتي تعرف ترسم ؟
صد عبيد صوب حور ورفع حياته: شوفي حتى امج قالت هالرمسه..
مجد كانت فوق وتسمع.. حست ان الوضع تأزم.. نزلت وياها لوحه نص مكتملة لخالد أخو خلود.. وشويه لوحات ثانيه.. : شو بلاكم محد مصدق.. هالكثر فاقدين الأمل فيه.. خخخخخخ لازم من شطانتي.. بس وحده في هالبيت تعرف اني كنت ارسم .. وماقلت لأي حد غيرها غير خلود الي قلت لها من فتره..
جلثم: هيه وافديتها بنتي.. تعرف ترسم ورسمها غاوي..
لطيفه وهي تنش وتسحب اللوحات من ايد بنتها وتتطالعهن.. وتبتسم: فديتج يا بنتي.. لا خليت منج ان شاء الله.. الله يحفظج..
عبدالعزيز: مجووووود ياللوتيه من ورا امج وابوج كل ها..
عبيد من سمع وشاف اللوحات قفط.. وتلوم بمعاملته لحور.. الي كانت شوي وبتنفجر من الصياح.. صد صوبها وهي كانت واقفه وتتطالع اللوحه وساكته ..
مجد: اقول عبيد.. بما إنك شايف خالد على الطبيعه وانا ماشفته وايد.. فعطني رايك هل يشبهه؟
شل اللوحه عبيد من ايد مجد وقعد يطالع الرسمه.. وابتسم وهو يطالع حور وفي خاطره متلوم: هيه ماشاء الله عليج..
مجد: باقي التشطيبات وبعطيه اياها..
حور: مجد شلي اللوحه وحطيها عندج في الغرفه..
مجد: ليش عندي انا في الغرفه؟؟ لازم تكون عندج.. ولا نسيتي ان هاي هديتي لكم..
حور صدت صوب عبيد.. : لا بس انا افضل تكون عندج.. او اقولج.. علقيها في غرفتي انا ..
مجد: اوكيك.. عراحتج ولو ان هالشي يزعلني..
لطيفه حست ان الجو متكهرب بين حور وعبيد.. بس طبعها الهادي والكتوم خلاها ساكته وماحبت تبين لهم شي... والي قطع عليهم هالهدوء رنة التليفون.. كانت وحده من الجيران متصله عشان تكلم جلثم.. وشلت مجد اللوحه وصعدت فوق ومن وراها حور.. دون ماتعطي اي مجال لعبيد انه يرمس او ينطق بشي..
=-=-=-=-=-=
خالد: دكتور قول غير هالرمسه؟؟ تعرف شو يعني ثلاسيميا؟؟ وبعدين انا عندي 3 بنات ولا وحده فيهن فيها ثلاسيميا؟
الدكتور: شو نقول لك يا أخ خالد.. هذي نتايج الفحوصات الي طالعة يدامي.. وانت في جيناتك حامل للثلاسيميا والحرمه بعد حامل للثلاسيميا.. فالنتيجة تطلع جي.. يعني أي ولد تنجبه منها بيكون نسبة الإصابه بالثلاسيميا 3\4
خالد: لا حول ولا قوة إلا بالله.. شو العلاج؟؟
الدكتور: العلاج المتعارف للثلاسيميا نقل دم بشكل دوري عشان نعوض كريات الدم المتكسرة.. بس واضب على علاجه وعلى مواعيد المستشفى اهم شي..
نزل راسه خالد وتنهد.. : تسلم دكتور .. ويزاك الله ألف خير... (توه بيظهر تذكر شي ورد عند الدكتور) بس انا سامع في علاج الي هو زراعه.. (سكت يفكر..)
قاطعه الدكتور: هي نعم زراعه النخاع.. بس هذا يكلف وايد وبعدين مب مضمون
خالد: مايهمني المهم ولدي يتعالج فلوس الدنيا تفداه.. مع السلامه
تم يطالعه الدكتور ومعورنه قلبه عليه.. هذي حاله اي اب او ام يسمعون بهالخبر..
طلع خالد وهو حاس بقلبه قابضنه.. الولد الي ياه بعد 3 بنات من حرمه وحده... وبنت من الثانيه.. يعني بعد 4 بنات.. طلع فيه ثلاسيميا حاده.. ركب الموتر وقعد يطالع الساعه الي فالسياره ومب قادر يجمع كم الساعه ألحين.. رن تليفونه وكانت مرته الي متصله..
فوزيه: ها شو طمني؟
خالد: كله خير.. برد البيت وبقولج على كل شي احين قاعد أسوق ماروم أرمس في التليفون..
فوزيه: خلاص اوكي.. هالله هالله فالدرب..
خالد: ان شاء الله
لايروح فكركم بعيد.. خالد الي أطريه هو أخو زوج نوره... فيصل

الأربعا الصبح
كانت مجد في الغرفه تسشور شعرها .. فكانت راده كل شعرها على يدام ومغطي ويهها .. وقاعده على الكرسي وتنشف شعرها.. كانت جلثم (اليده) تدور عليها فهالوقت..
جلثم: غربلاتها من بنت لا ناديناها تتصمخ..
لطيفه: شبلاج أميه ترمسين عن منو؟؟
جلثم وهي تساند على الدري وتصعد.. : وليش في غيرها في هالبيت. بنتج
لطيفه ابتسمت وراحت صوب المطبخ..
صعدت جلثم فوق.. وتقربت من غرفه مجد وقعدت تزقر فيها بس ماشي فايده الإخت مشغلة السشوار وتغني ولا حاسه بالدنيا.. وفتحت الباب الا بالعصا اتطيح منها وتفز وتصرخ..: عبدالعزيز الحق ييب الملا خل يقرا على البنت ينت مكششه شعرها..
رفعت مجد عينها صوب يدتها ويلست تطالعها من بين شعرها.. وضحكت. وبندت السشوار..: هلا والله بهالويه المنور الي متعب عمره ويايني لهني..
ردت شعرها على ورا ومشت صوب يدتها وبدت اليده تصرخ في هالوقت.. : شو بلاج يدووووو..
اليده: يالله بالستر... شو مستوي بج.. (يودت ايد مجد وسحبتها) تعالي اقرا عليج..
ويلست على الأرض ويلست مجد حذالها ورقدتها على ريلها وبدت تقرا عليها .. ومجد تضحك من الخاطر.. صعد عبدالعزيز وشاف الحاله في الصاله الي فوق.. وضحك..: شو صاير أميه؟؟
جلثم وهي تأشر له يسكت: اصصصص.. خلني اقرا عليها..
مجد: هههههههههه بس بس يدوو ماروم ايود عمري زود بمووووووت..
جلثم: واي واي.. بنتي استلبست.. عبدالعزيز شو تريا تعال شلها نوديها عند المطوع..
عبدالعزيز: أميه البنت مافيها شي الله يهداج... هاي اليني يخاف منها كيف بيستلبسها..
نشت مجد وحطت ايدها على خصرها وتدلع: احين انا جي بابا..
عبدالعزيز: فديييت بنتي.. انتي تاج راسي لا خليت منج ومن هالضحكه..
جلثم: استغفر الله العلي العظيم..

ونشت من مكانها وتساندت ع عصاتها وبدت تمشي.. وربعت وراها مجد ولوت عليها : فدييييتج يدوو وين سايره عني..
جلثم: خوزي مناك.. زيغتيني عليج وانتي ولا فيج شي..
مجد: يدوو انا ماسويت شي كنت انشف شعري وتعرفين من طوله ماقدر اني انشفه وهو عظهري لازم اييبه يدام عويهي..
جلثم: يالله بالستر.. جان زقرتيني انشف لج اياه..
مجد: هاي بوسه على هالراس الحلو بس عاد لا تزعلين مني..
جلثم: فديتج وانا اقدر.. ان شااااء لله بحول الله اشوفج عروس تغدين يدامي شرات بنت عمتج..
نزلت مجد راسها تتظاهر المستحى وهي في خاطرها تقول آمين بس من برع العايله..
جلثم: انزين عبدالعزيز ودني بيت شيخه
عبدالعزيز: ان شاء الله .. تامرين أمر..
جلثم: الله يخليكم لي يا عيالي..
ونزل عبدالعزيز ونزلت من بعده جلثم وردت مجد الغرفه تكمل شغلها.. وتجهيزاتها..
الأجواء في البيوت الثلاث كانت وااااااااايد مرتبشه وحلوة.. والكل مستانس وينتظر طلعه يوم الخميس والإرتباط اليديد الي راح يصير في العايله.. خلود كانت أكثر وحده مستانسه في هاليوم.. لأنه في نظرها حلم حياتها راح يتحقق.. ونفس الشي لجاسم.. الي مرتبش ومستانس من صوبه..
مروه وخالد ونوره وفيصل كلهم في بيت شيخه ام خلود.. وحور كانت ويا مجد عساس انهم بيسيرون الصالون عشان يتحنون للحفلة الي راح يسوونها باجر.. ومن جهة ثانيه كانت فطوم متفقه ويا فيصل عساس يمر عليها الصالون الي بتروح له .. ومنى اختها كانت مقرره انها ماتتحنى فمن جي ماراحت وياها..
فطوم: ألووو .. ها وينك تأخرت ؟
فيصل: واقف فالباركنج تراني.. يلا تعالي.. بتشوفين رينج سودا..
فطوم: اوكي..
ومشت فطوم بخوف وتحس بقلبها بيوقف .. ومنزله راسها وهي تمشي.. وبدون لا تحس دعمت بواحد.. رفعت راسها ومن شافته بلعت ريجها من الخوف وربعت بسرعه صوب الصالون وردت دخلت داخل..
فيصل: انتي ايه وين سرتي؟؟
فطوم: ها .. احين بطلع بس لحظه شوي..
فيصل: يلا اففففففففف ..
بند الخط..
فيصل: شو هالبلشه .. ماحب اتريا وايد انا .. الدوريات اتدور في كل مكان وهاي بتوهقنا بتأخيرها..
وطلعت فطوم في هالوقت وشافت نفس الريال الي دعمته بس كان معطي ظهره لها ومشت بسرعه صوب موتر فيصل وركبت الموتر وقعدت ..
فيصل وهو شاق الحلج: اففف مابغيتي..
فطوم تمت ساكته من الخوف والربكه الي فيها..
فيصل: اوه ها ربيعي شو عنده هني؟
فطوم فجت عينها ..: ها منو ربيعك؟
فيصل: انتي اشلج؟؟..
فطوم: اسفه
فيصل: تعرفين اغار عليج ليش تسألين هالأسئلة..
فطوم: انزين خلاص اسفه حبيبي
فيصل: ها شو قلتي..
فطوم ضحكت ونزلت راسها.. : ماقلت شي..
فيصل: دخيلج اذا تحبيني قولي مره ثانيه..
فطوم: حبيبي..
فيصل: ياويل حالي..
فطوم: وين بنسير..
فيصل: بنسير مكان انتي اشلج؟؟
فطوم وهي تتطالع المواتر الي حذالهم وبخوف.. : انزين مب بعيد .. خلنا قريب..
فيصل: انتي لا تحاتين.. تعرفين اني اخاف عليج من نسمه الهوا.. كيف تقولين هالرمسه..
فطوم: فديتك..
وقفوا عند الكافتريا وخذ فيصل عصيرين منه ومن عقب تم يمشي الموتر صوب الممزر.. وقف مجابل البحر وصد صوبها..
فيصل: يلا عاد شلي الغشوة خل اشوف هالويه الحلو..
نزلت فطوم الغشوة وكانت طالعه آيه من الجمال.. راسمه عينها بالجحال والجلوز الفاتح.. كانت فاتنه بشكلها وايد.. واحلى شي فيها ابتسامتها الحلوه البريئه.. تخبل فيصل من الخاطر.. الود وده يشرد بها صوب المزرعه.. بس فضل انه يطبخ على نار هاديه..
فيصل: تسمحين لي اشربج العصير؟
فطوم وهي منزله راسها: اوكي..
فيصل شربها وهي شربته وسولفو شوي.. وبعد ما كملوا ساعه مع بعضهم ردها الصالون ودخلت وخذت دورها وتحنت ومن بعدها مر عليها جاسم وردت البيت وطول الوقت سرحانه وتفكر في فيصل..
جاسم: افف من ريحه الحنا.. الله يعيني عن تطلع خلود تحب الحنا بعد..
فطوم: شو... فيصل؟؟
صد جاسم صوبها ومعصب من الخاطر.. : شووووووووو ؟
فطوم وهي مرتبكه وخايفه.. : اقصد شفت فيصل جاسم توني..
ضحك جاسم: هههههههه قولي جي من الأول..
ارتاحت فاطمه ان مشت الجذبه على اخوها ونزلت بسرعه من الموتر ودخلت البيت وهي حاسه بروحها بتطلع من مكانها.. ودشت الغرفه شافت منى راقده على الأرض وميوده قلم ويدامها أوراق..
فطوم وبعصبيه: انتي اييييييييه شو تسوين؟؟ جالبة الغرفه مزبلة..
منى: لاحوووووول.. بس عاد.. ياسه اكتب قصيدة للمعاريس باجر..
فطوم: متفيجه اقسم بالله.
منى: اقول اسكتي وخليني اركز..
فطوم: ركزي ركزي عن تاكلينا.. بنت علي الخوار غادية لنا..

...
مجد: يابنت الناس لا إنتي أول ولا آخر وحده بتملج.. عالأقل حالج احسن من حال حور .. مسكينه ماكان تعرف ريلها ليوم العرس..
خلود: ههههه هي والله دخيلج لا تذكريني.. يالله عاد ابا افرح فيج..
مجد: آمين ويا الي في بالي..
خلود: ردينا للأفكار المستحيله..
مجد: انتي ليش تكرهيني؟
خلود: مجد انا ماكرهج وانا ماباج تحطين نفسج في احلااااااااااااام.. اصحي لأن كلها احلام مالها صلة بالواقع...
مجد: ماعليه انا راضيه فيهن وان كانو احلام..
خلود: الله يهديج ان شاء الله..

مجد: خل عنج احين.. وخبريني شو الإستعدادات الي سويتيها للحفلة..

وكملوا سوالفهم لوقت متأخر ومن بعدها كل وحده سارت ترقد.. الا خلود صعب اييها رقاد من ربكتها لليوم الثاني كيف بيكون وشو بيصير فيه.. بس الي تعرفه انها بتكون مستانسه وايد.. الله يخلينا لبعض ويدوم علينا الوناسه.. فديته جسوووم بيصير ريلي ماصدق..

الا وتحس بالباب ينفتح وتفز من على السرير.. : بسم الله الرحمن الرحيم.. مايفتحون الباب جي..

سلطان: عاد انا جي افتح الباب يعيبج ولا مايعيبج برايج مب مشكلتي..

خلود: ههههههههه.. بس بس انزين.. شو عندك؟؟ خرعتني وهالشي مب زين لبشرتي تسبب الشحوب..

سلطان: عروس ماتنلامين.. انزين يايب لج هدية..

خلود وهي تيلس على الفراش: قول والله..

سلطان: والله عندج مانع.. ؟ترا بردها..

خلود: لا لا .. وين خل اشوفها..

صد سلطان صوب الكوميدينه وشاف رسمه خلود.. ابتسم وشل اللوحه..: وايد حلوة هالرمسه منو راسمنج؟

خلود: مجد..

سلطان: منو مجد؟؟ احيده اسم فريق كابتن ماجد..

خلود: ههههههههههههههههههه.. والله لو سمعتك مجووود بتاكلك..

سلطان: منو هاي انزين؟

خلود: بنت خالي عبدالعزيز..

سلطان: هيه .. هاييل الي مانعرف شي عنهم.. بس ماشاء الله رسمها وايد حلو.. خل ترسمني عيل..

خلود: لا دخيلك.. كافي ذلتني على رسمة خالد الي بترسمها..

سلطان: ماعليه انا بقول لها.؟. عيل ترسم خالد وماترسمني .. ليش ان شاء الله على راسه ريشه..

خلود: ههههههه.. لا تغير الموضوع.. وين الهدية..

سلطان وهو يمد ايده بالجيس الي وياه.. وفتحت خلود الجيس وطلعت منه علبه .. وفتحته شافت طقم رووووووعه شاريه لها من داماس.. تخبلت..

خلود: وااااااااو روعه والله رووووعه.. ماتوقعت ذوقك بهالحلاة..

سلطان وهو يضربها على راسها: ويا هالويه.. جب انزين..

خلود وهي تصك العلبه وترفع راسها وتتطالع سلطان في عيونه: سلطان انت ليش مبتعد عنا وعايش بشقه روحك؟؟ ليش ماتخلينا نحس انك ويانا..؟؟

سلطان: طبيعة شغلي يا خلود.. انا اشتغل في بوظبي.. وماقدر كل يوم اروح وارجع درب بوظبي مب قصير.. وبعدين خلاص يعني تعودت.. الفتره الي كان خالد فيها فالبيت كنت اكثر وياكم..

خلود: ادري.. بس والله نتوله عليك وايد ونفتقدك..

ابتسم سلطان وتقرب وقعد حذالها: والله اني افتقدكم كلكم واحبكم وماحب افوت اي مناسبه وياكم.. بس اعذريني تعرفين بعدني شباب ابا استانس واطلع ..

خلود وهي لاويه عليه: الله يحفظك لنا وين ماكنت ياخوي..

سلطان : كم يسوى اختي تدعي لي هالدعاء.. يالله تامرين بشي بسير ارقد تعرفين باجر انا بستوي دريول العروس ولازم ارتاح شوي عشان اكرف باجر..

خلود: هههههههه اوكي..

ونش سلطان بيطلع من الغرفه لاحظ في صورة طايحه على الأرض شلها واطالعها وتم فاج عيونه من جمالها..: منو هاي؟؟

خلود: اويه هاي صورة مجد اكيد.. طاحت من بوكي..

سلطان: ماشاء الله عليها وايد حلوة..

خلود: هيه فديتها طالعه علي..

سلطان: ههههه عيل طالعه علي انا بعد... لأنج تشبهيني..

خلود نشت وقفت حذاله وسحبته صوب المرايه : خل اشوف.. لا لا انا احلى..

سلطان: ويا ويهج .. يالله تصبحين على خير..

طلع سلطان من الغرفه وسار غرفته وملامح خلود حاجبه نظره

*وقفه مع سلطان* تقولن منو سلطان.. هذا سلمكم الله قل ذكره في بدايته القصه وايد.. واليوم رد ظهر.. هذا اخو خلود العازف عن الزواج على قولتها.. سلطان أكبر من خالد فالعمر لكنه يرفض الزواج.. يفضل يعيش حر وعزوبي ولا إن حرمه تقيده وتتحكم به في نظرته .. جميل بملامحه البدويه .. خشمه وعيونه احلى مايميزه . ورموشه الطوال الي زادت من حلاة عيونه.. مغرور في مشيته والي يشوفه ينعجب بمشيته وشخصيته القوية.. مرح بين ربعه وأهله .. وحنون عليهم.. لعاب من الدرجه الأولى.. ربيع ناصر وفيصل.. وكل خميس عندهم سهره في المزرعه لازم يكون حاضرها.. عاد انتوا تدرون شو حال هالسهرات

... ... ...

خوله: خليفه تسمح لي باجر احضر ملجة بنت عمة حور...؟؟

خليفه: نسيتي شو واعدين امايه باجر

خوله: هيييييييه صدق آسفة حبيبي نسيت ..

خليفه: مب مشكله مافي انسان معصوم من النسيان والخطأ.. الا شخبار المعاريس؟؟

خوله: الحمد لله .. تقول انها وايد مستانسه الحمد لله.. وبيداومون بالسبت ويانا..

خليفه: يالله.. ربي يوفقهم...