منتديات صواديف عشاق - عرض مشاركة واحدة

10-05-2023

(( بيت ابو بندر ))

( الساعة 12 ونص )

ام بندر : دانة .. ودي هذي الصينية المجلس .. ما بقى شي ويوصلوا بيت عمك ..
دانة وهي تاخذ الصينية : حااااضر ..

طلعت دانة من المطبخ شايلة صينية القهوة بحذر ويوم دخلت المجلس ..

حصلت اخوانها التوأم بندر وثامر يناقزون ويغنون زي الهبلان والطقاقين ... ومعلين الصوت ع الآخير....<< مو مصدقين الدنيا عيد خخخخخخ

حطت دانة الصينية على الطاولة الكبيرة .. تقدم بندر منها وأخذله فنجان قهوة .. ومدلها اياه وهو يغني بطرب :

صبولي من الفنجال .. صافي من عسل جرذان

دانة باست يدها تتحمد ربها وتشكره يوم شافت ثامر و بندر قاموا يغنون ويرقصون بالشماغ والعقال .. ويدورون كنهم في عرضة للجنادرية ..
دانة رفعت يدها للسما : يارب لك الحمد انك ما خلقتني زي هالمجانين اللي تقول مولودين في عرس بدو ...!!

بس بندر وثامر حقروها ولا عطوها وجه وكملوا يغنون ويرقصون :

بو صالح سرى ليله .. هل الدمع من عينه .. صبولي من الفنجان .. صافي من عسل الجرذان
بو صالح سرى ليله .. هل الدمع من عينه .. صبولي من الفنجان . صافي من عسل الجرذان
حبيبي وحبيته .. مرو بي على بيته .. خلي راح في وادي وانا رحت في وديان
حبيبي وحبيته .. مروبي على بيته .. خلي راح في وادي وانا رحت في وديان

وفجأة يدخل عمها أحمد متلثم .. والعقال بيده .. واول ما شافوه اخوانها قاموا يصفقون ويصفرون له ..وهو زاد الطين بلة وقام يرقص بزيادة .... ويركب على الكنب ويناقز هو و بندر وثامر ويغنون مع بعض ..

ياراكب وارد بهوان .. غيرك ما شراه انسان .. صبولي من الفنجان .. صافي من عسل الجرذان
يابكرة عمانيه .. ماتنزل صاله الميدان .. صبولي من الفنجان .. صافي من عسل الجرذان
يابكرة عمانيه .. ماتنزل صاله الميدان .. صبولي من الفنجان .. صافي من عسل الجرذان

وبين ما هم يرقصون ومندمجين دخل محمد ( ابو بندر وثامر ) وقعد يتفرج هو ودانة ويضحكون ....
ويوم خلصوا رقص وخلصوا الاغنية قعد يصفق هو وبنته ....
محمد : ماشالله.. تصلحون تشتغلون ف الحفلات ... !!
أحمد يقرب ويسلم على اخوه الكبير : يا هلا بمحمد .. كل عام وانت بخير
محمد : وانت بخير يالغالي ..
وتقرب دانة وتسلم على عمها : كل عام وانت بخير ..
أحمد : وانتي بخير يا حلوة .. ما تبين العيدية ...؟؟
دانة وهي شاقة الحلق : افااا .. وهذي يبغالها سؤااال ...؟؟ هات وش عندك ..؟؟
أحمد وهو يفتح المحفظة الفاضية اللي عنده ويسوي نفسه يعد الفلوس : مم ... كم تبين ....؟؟
دانة وهي مصدقة ومتوقعة عيدية محترمة: شوف عمي .. انا مو طماعة .. وكل شي منك حلو ....
أحمد وهو مسوي جدي : خلاص .. دامك شاطرة ومطيعة .. هذا البوك كله لك ....
دانة ما صدقت وطارت من الفرح وعيونها شوي وتطلع من وجهها ... اما بندر وثامر قعدوا يتغامزون ويضحكون .. خويهم ويعرفونه عدل ..
دانة: وش عندكم تضحكون ؟؟... غيرانين .....؟؟
لف أحمد عليهم وغمزلهم بمعنى اسكتوا ...
ثامر : ابد ولاشي سلامتك ..
محمد وهو كاشف حركة اخوه : دانة حبيبي رجعي المحفظة لعمك وانا اعطيك عيدية احلى من عيديته ...
دانة: من جدك يبا.؟؟!! .. عطاني محفظته بكبرها بللي داخلها .. والله ما استغني عنها ...
بندر وهو منفجر ضحك : هذا اذا كان في داخلها شي ..
ثامر : والمشكلة ان المحفظة من ابو ريالين ....!!! خخ ..
وانفجروا الكل هنا من الضحك على أحمد وسوالفه .. وهو بعد قام يضحك على وجه دانة اللي قام يقلب من بريء وفرحان لوجه وحدة معصبة ..
دانة وهي ترمي المحفظة : مالت عليكم .. مابي عيدية .. خلاص انا زعلت ..
وتطلع من المجلس وهي معصبة وبنفس الوقت كاتمة الضحكة اللي جاتها ..

__________________________________________________ ___