منتديات صواديف عشاق - عرض مشاركة واحدة - عزاي إنك رجاي العذب لو كل الدروب عثور،للكاتبة/ اديم الراشد

11-29-2021

البارت الرابع ..

العصر في بيت النوخذه
كانت ليلى جالسه جنب نهيان وهو يعلمها كيف تدق
ومريم وشيخه جالسين يناظرونهم ببتسامه وابو نهيان وام نهيان
نهيان: خلاص الحين نوقف وبالليل نكمل
ليلى: زين بس قبل نوقف الله يخليك خلنا نغني
ابو نهيان: اي والله يا نهيان غن لنا من زمان ما سمعتنا صوتك
نهيان: ابشر
طل جابر من الشباك وهو يضحك: تكفى نهيان اذا غنيت غن شي يوصل للقلب
ليلى صفقت : ايه ايه
ضحك ثنيان وهو يبدى يدق (ابعتذر ... عن كل شي ... وصرخوا جابر وليلى معه :إلا الهوى .. ما للهوى عندي عذر ..
وكملوا معه يغنون ويضحكون ووقفت ليلى وهي تغني الكوبليه وهي تشرحه على نفسها وتضحك (اتصدقين ... ما اخترت أنا أحبك ... ما احدٍ يحب اللي يبي ...
ياحبي المرّ ... العذب ... )
وقف نهيان ما غنى وكملت ليلى والكل يصفق لها ويضحك
_______________________.
وفي بيت ابو خلف
طلع خلف وهو بعد ماصحى من النوم وهو ضايق خلقه واخلاقه وقف وهو يضبط شماغه وملامح الضيق واضحه على وجهه
لكن لف وهو مستغرب الغناء للي بالمطبخ وريحة الكيك طل وانصدم: وعد!؟ وش عندك!؟
ركض فيصل: منيييين طالعه الشمس اليوم
قربت ندى وهي معها سلة الغسيل: اذكروا الله تكفون ماصدقنا تروق
وجدان اللي كانت محشوره تغسل المواعين بعد تخبيص وعد : ياخي ليه الروقان مايشملني وتعفوني من المواعين
اماني : الا احسسسن عشان تصيرين سنعه
وجدان: مابي ياخي
قربت حنان: اطلعي خليها انا اكمل
وعد: حنااان وخري عنها خليها تعلم
وام وعد اللي كانت جالسه بالحوش هي وام خلف ضحكت: كفو خلوها تسنعها
اماني : عاااد وعد اذا مسكت احد تعلمه الشغل يعني تعلمه
وعد: خليف لا تروح لين تذوق الكيكه
خلف: كنت بروح بس هونت والله ، بس اقدر اعرف وش المناسبه
وعد قربت وهي معها قطعه عطتها خلف : ابد مسويتها مكافأه لنفسي ومصالحه ذاتيه
فيصل بضحك: كل هالفلسفه وبتدرسين بعد!؟ حمدلله ابوي رفض
ضحكت وعد : ماعليه خذ راحتك
انهبل فيصل من الوناسه انها ماهاوشت : حمدلله هاذي فرصه ما تتفوت
ركض سالم وغيث: نشم رييييحة كيك
وعد: ايي لكن افرشوا يلا الفرشه عشان نجلس كلنا وانت غيث ناد وروح ناد مضااوي وهيا والبنات وجدتي وخذ هالصحن عطه عزوز يلا
فيصل: لا لا هاتوا صحن عزوز انا اوديه
خلف : عطيني قطعتي هنا بأكل واطلع وراي شغل وجهزي قطعه على طرف ابيها لنادر
وعد: ابشر
وركض غيث وهو يدق الباب وفتحت مضاوي قبله : مسوييين كيك
غيث: ايييه ومسويته وعد بعد
شهقت مضاوي :شصاير بالدنيا!؟
ضحك غيث: تقول مكأفاه لنفسها
ضحكت مضاوي ودخلت وركض غيث ينادي وسمعه عقاب
وطلع هيا والجده وراح غيث لسحر وعهد وشهد : بنات وعد تقول تعالوا قهوة العصريه
وقفوا بيروحون بس طلع عقاب بغضب: وللله للي تطلع لكسر رجلها تسمعون
سحر: ليش!؟
عقاب: كذا مزاج
عهد: ليه يا عقاب!؟ وش سوينا عشان تحكرنا!؟ صد عقاب بغضب: والله ياعهد لو تنطقين كلمه ثانيه ما ترضين العواقب
سكتوا وطلعوا لغرفتهم بضيق لكن قبل يطلع عقاب شاف غيث راجع : عقاب جدتي تقول خل البنات يجون
عقاب: اقول اذلف احسن لك
طلع غيث خايف ورجع و وعد واقفه بحقد وراء البابب: وش قال
غيث: عيا وهاوشني
وعد:هين
راحت وهي تجلس قدام جدتها: جدتي!؟ شوفي عقاب رافض ان خواته يجون يتقهوون معنا
ام خلف: لييه وش فيه الله يصلحه
ندى: من الشر اللي براسه
هيا: هو معصب حتى السفر كنسله و يمكن يبيهم
ااماني: ماهو عذر !؟ وش ذنبهم خواته
وعد : جدتي ترضين بنات عيالك يتفرقون عشان مزاج السيد عقاب
ام وعد: وعد خلاص
ام ناصر : هيا تعالي قوميني هذا ماعاد يستحي
وقفت معها هيا ورجعوا لبيتهم وعقاب واقف بغضب يعدل شماغه
ام ناصر: عقاب وجع يوجع العدو
عقاب : وش فيك ياجده وش فيك
ام ناصر: ماعاد الا هي تحبس بنات ولدي نايف عن بنات عمهم معصي والله
عقاب : جدتي لا تحوسين الدنيا خواتي مايروحون ابيهم اليوم
ام ناصر: معصي والله معصي ماعاد الا تشغلهم خدم تبي شي اقض شغلتك بنفسك اما انك تحبسهم لا يستانسون ويوسعون صدرهم ماقالها الله يا عقاب
اعتلى صراخ عقاب والبنات يسمعون من طرف الباب الثاني ووعد مستانسه وكان عقاب يدري ان وعد مرسله جدتها لكن سوت اللي براسها وجابت ام ناصر البنات وعقاب واقف بغضب وطلع وهو يضرب الباب برجله
وجلسوا سحر وعهد وشهد وهم متفشلين من تصرف عقاب
لكن ماهي الا ثواني وتغير الجو لسوالف وضحك ونسوا عقاب اللي بيموت من القهر
_______________________.
وفي اسفل الحاره
في المكان المعهود كان خلف جالس بهدوء يفكر وفز على صوت نادر : خليف انت هنا
خلف:ايه توني وصلت
نادر: جيت وجابك الله
خلف : وش فيك !؟
نادر: اول شي وين عقاب
خلف : عقااب طار يقول بيسافر مع عمي محمد
نادر: الله الله ياعقا..
قبل يخلصون كلامهم دخل عقاب مثل العاصفه وجلس بغضب
خلف: بسم لله الرحمن الرحيم وش فيك ؟ ليه مارحت مع عمي محمد
نادر: وش فيك معصب!؟ صاير شي
عقاب: ماصار شي بس ماعاد بسافر
خلف: لييييه!؟ وش طرا
عقاب بكذب: طلبونا في مهمه مقدر اغادر البلاد
خلف:اشوى خوفتني
نادر: يلا خيره الهم زين انكم تجمعتوا الحين احتاج فزعتكم
فزوا كلهم: وشو !؟
نادر ببتسامه بارده:زواجي بعد اسبوعين .
عقاب : وشوو!؟ بعد اسبوعين انخبلت انت !؟
خلف: وش ذا السرعه ياولد!؟
نادر: ياخي ابوي وابو البنت اتفقوا كذا انا من الصدمه عجزت حتى اعلق
خلف : وش السوات
نادر: السوات انك تقوم انت وياه وتفزع معي يعني نبي نرتب امورنا قبل العرس
عقاب : ابشر اللي تبيه بس اشر وابشر
نادر: ما تقصر
خلف : انت قلنا وش ينقص وحنا نكمله
نادر مد الورقه بينهم اللي فيها الاغراض وهم متعودين يساعدون بعض في كل الحالات واللي معه يعطي اللي ما معه
وكانت حالتهم الماديه متوسطه كلهم
خلف: اول شي البيت كيف وضعه!؟
نادر: امي وابوي بيروحون حفر الباطن بيجلسون عند جدي ثلاث شهور لين يتشافى تعرفون بعد حالته تعبانه
عقاب : يعني بتكون فالبيت لحالك
نادر: ايه
عقاب : بسيطه اثث غرفتك وباقي البيت مأثث يعني التزاماتك خفيفه
نادر: ايه
عقاب : اجل اسمع اثاث غرفتك علي
نادر: لا تكفى دور شي هين مالي خلق اشتري لك غرفه اذا تزوجت
ضحك عقاب: لا ما عليك مسموح
نادر: لا ياعيال انا ابيكم بالخفايف مابي تثقلون على انفسكم
خلف: اقول اعقل بس حنا وشوله اسمنا اصحاب !؟ عشان نوقف بالثقايل ووقت الزنقه يلا عقاب الغرفه وانا علي كل النواقص الباقيه وقف نادر يحضنهم بضحك: كفو كفو هذا هم اصحابي
عقاب : وامك وابوك متى بيروحون!؟؟
نادر: هنا مربط الفرس
خلف : وشو بعد
نادر: ابوي يقول ندخلك على زوجتك من هنا ونطلع للحفر من هنا
خلف : في عز الليل!؟؟؟؟
عقاب: انا احس هالزواج لخبطه
نادر: لحظه سفر امي وابوي عشان يروحون لجدي بسرعه حالته صعبه بالقوه ابوي مدبر له ممرض يجلس عنده هالاسبوعين يعني حالته مستعجله وابوي خايف عليه
خلف : مهما كان طلعتهم بالليل صعبه !؟
نادر: هو انا بجلس يومين هنا وبعدين اطلع وراهم اسلم على جدي واطلع اتمشى
عقاب : انت ابخص
وقف خلف: زين انا تاخرت على الدكان لكن شوف وش ينقص وبلغني
نادر: الله يرزقك من واسع فضله ياخليف
خلف : امين
عقاب : يلا انا بعد بروح اشوف دوامي
نادر: كلنا رايحين
كل واحد راح لمكان وعقاب رايح يقطع اجازته عشان ما تنحسب عليه وهو يبي يتفضوى لقلة حياء وعد
_______________________.
في السوق
دخل خلف وهو يسلم على اهل السوق لكن وقف ببتسامه يناظر ضاري اللي كان بالسوق وهو يسند حرمه كبيره بالسن على ذراعه ومشغول في المحلات لكن صوته عالي كالعاده
اتجهه خلف مبتسم اول ماشافه عند محلهم : حياك الله
لف ضاري وابتسم : انت يااااهلا والله ومسهلا
سلموا على بعض وابعدوا وضاري للحين ماسك امه ماتركها ولا حتى خلاها وراها زي مايسوون بعض الشباب اللي يستحون من اهلهم
ابتسم ضاري : تراك رحت ماعلمتني اسمك
ضحك خلف: ابد معك خلف ال قايد من اصحاب هالمحل
ضاري بفرح: والله شرفتنا يا خلف عاد جيت وجابك الله
خلف: امرني
لف ضاري على امه :يمه وين الراديو !؟
رفعت ام ضاري الكيس وهي رابطه وفي داخله راديو قديم اخذه ضاري وهو يعطيه خلف : راديو امي خربان من صبح الله تبي تزينه ولا زان قلت اجيبه لمحلكم تصلحونه
اخذه خلف وهو منزل راسه مايناظر ام ضاري : على خشمي تبشر انت وامك
سحب الكرسي يحطه قدامهم: ارتاحي ياخاله
جلس ضاري امه وقال: وش تشربون
لف ضاري يناظر: اذا عندكم قهوه
خلف: ابشر
صب خلف لهم القهوه وضاري يبدي امه على نفسه في كل شي
وجلس خلف وهو يضبط الراديو وضاري يسولف ويسأله عن كل شي يسويه
ورفعه خلف: وهذا راديوك وصلحناه ياخاله
ام ضاري: عساها يدك ما تمسها النار
خلف: اميين وياك
لف ضاري لها بضحك ويمازحها: ايييه صلح راديو العجوز وبتزعجنا باغاني بدر الغريب
ضحك خلف: الله يطول بعمرها خلها توسع صدرها
ام ضاري صدت وهي تضحك ووقف ضاري: كم الحساب ياخلف
وقف خلف مبتسم : ابد هالمره على حسابي ضايفتكم
قبل يحلف خلف فز ضاري : والله ما تدفعها كلها
خلف : يا ابن الحلال اذكر الله اسمعني طيب نص علي ونص عليك
ضحك ضاري :اجل تم
دفع النص وطلع وهو يودع خلف ويسولف مع امه وضحك خلف بعجب من هالشخص
لكن وقف عيونه على جابر اللي جاي ومعه واحد غريب لكن معهم وراهم حرميتن ( ليلى ، ومريم)
فز قلبه لا شعورياً وهو يتذكر بنت النوخذه اللي شافها ترقص لكن الحين عيونها واضحها وعيونه حلوه وجريئه لكن مجرد ما طاحت عينها بعينه صدت بخوف ولفت
_______________________.
اما ليلى كانت تمشى مع اخوانها وهي جايه بس تتمشى لكن حست ان احد يراقبها ولفت انصدمت انه خلف !؟ مدت يدها لقلبها بخوف ( شفيه هذا!؟ ليش يخزني ! عمى بعيييينه مايتسحي ماينتخي )
صدت وهي تقرب لجابر بخوف
ولف جابر: شفيچ !؟
ليلى: ولا شي
جابر: فلوس ماااكو ترا لا تلزقين
ضحك نهيان: تعالي انا اعطيچ
ضحكت ليلى بخوف انهم يشوفونه : لا مابي بس ابي امشي معاه
سحبها نهيان عنده وهم كلهم متوقعين انها تبي فلوس
_______________________.
وجلس خلف وهو منحرج من نفسه ( الله يفشل العدو شافتك البنت يا مريض!؟ وش عرفك انت هي ولا ماهي هي )
طلع من الدكان رايح للبقاله اللي قدامهم اخذ عصير بارد وجلس يبي يبرد قلبه اللي فجأه صار يدق
ولف لكن تصلبت عيونه على الدكان اللي قبالهم كانت وحده جالسه على الكرسي وتشرب عصير والباقين لاهيين بالمحل
واول ما رفعت طرف النقاب عشان تشرب بان خدها وبانت الشامه
وهي ماهي منتبهه لكن خلف انتبه وشرق بعصيره ووقف يكح بذهول
وركض ممدوح يخبط على ظهره : بسم لله عليك وش فيك
ابعده خلف : مافيني شي
نزل العصير وطلع وهو يمسح وجهه وللمره الثالثه لف على صوت نهيان: ليلى حبيبتي يلا خلصنا
وقفت ليلى وهي متوتره من وجود خلف اللي توها تلمحه
اما خلف رجع لمحله وهو منلخم مفجوع ومصدوم
هاللي ترقص بالفيديو هي ليلى
اليوم عرف اسمها وعرف انها من بيت النوخذه وشاف الشامه اللي جذبته
لكن من هاللي معها من هاللي يقولها حبيبتي ... !
دخل وجلس ماشاف جده ولا شاف ابوه
ابو خلف : خليف علامك
فز خلف : بسم لله الرحمن الرحيم
ابو ناصر: وش فيك منخطف لونك
فز ابوه وركض له: تعبان!؟ مكتوم فيك شي
خلف : لا يبه لا
ابو خلف : اجل وش فيك
خلف : شرقان بس
ابو ناصر: بس ؟
خلف: ايه ايه
رجعوا لاماكنهم ورجع خلف ورا مكتبه وهو ثانيه يضيع في الشامه وصاحبة الشامه وساعه تبدل ملامحه لاستغراب اذا تذكر الرجال اللي معها
_______________________.
وفي بيت ابو خلف
الكل مجتمعين ويسولفون وقفت سحر وعهد
عهد: يلا شهد
وعد: وين رايحين
عهد بهمس: بنروح للبيت اكيد عقاب بيرجع واختف يزعل علينا ومايخلينا بكره نروح الحفل
حنان: ايه احسن لاتعاندون ويسوي سالفه
سحر: هو ذا اللي بيصير
شهد: والله انا ماني رايحه بجلس مع وجدان
مضاوي: انتي وياها ما تملون من بعض
وجدان :لا زي ما انتم ما تملون
اماني : اسمعوا طيب مايمديه يجي الحين اكيد مع خلف وجدي بالمحل خلونا نطلع فوق نلعب
مضاوي: ماعليكم انا اتوسط لكم
هيا: ايييه هين شفنا وساطتك اليوم يوم عصب
ندى : ماعلينا بس خلونا نلحق قبل
طلعوا كل البنات السطح
مضاوي : نبي نلعب غميضه
وعد :نلعب بس ياويلك تنغزيين احد او تضربين
ندى : لا تصدقينها كذابه اول مانبدى تبدا حركاتها
هيا: صدق مضاوي فكينا
مضاوي : خلاص طيب
اماني : كذااااابه خلوها تبدا اول وحده عشان ماتسوي شي
مضاوي : خلاص ببدا
اخذت الطرحه وهي تربطها على عيونها وابتدوا يلعبون
وكل ما تمسك وحده ينقلب السطح كله صراخ
لكن وقفهم سالم وغيث اللي يناظرون
وعد : وش فيكم!؟
غيث : نبي نلعب معكم
ندى: تلعبون مع البنات!؟
غيث: وش نسوي عزوز وفيصل يطردونا وانتم تطردونا
حنان: خليهم تعالو تعالو
تجمعوا يلعبون ويضحكوووون ومبسوطييين
_______________________.
الليل في بيت النوخذه
كانوا مجتمعييين ويشوون وكان ليلى تنقل بين البنات فالمطبخ والعيال فالحوش
بس وقفت بالنص اول ما تذكرت خلف ونظراته اليوم غريب هالرجال بكل تفاصيله غريبه حتى نظرته
فزت على صوت مريم اللي قالت بضحك : ويييين سرحانه يا ليلى العامريه
ضحكت ليلى بمزح: اسرح بمنو بالله!؟؟ قيس مثلاً
مريم: ما ادري من ردينا من السوق وانتي مختبصه
ضحكت ليلى: تعتب من الفراره بس
مريم: زين
وقفت وراحت تساعد جابر ونهيان تحاول تتناسى هالرجال
_______________________.
اما عند خلف
اللي رجع لبيتهم وهو في عالم ثاني دخل وهو يسمع صوت خواته في غرفتهم وقبل يطلع لغرفته
طلعت حنان: خلف جيت
خلف : ايه
ندى بصوت شبه عالي: تعال إلحق على الشاهي والمكسرات
قبل يعترض دخلته حنان: تعال معنا شوي
دخل وهو يجلس بينهم وكان كعادته ساكت والبنات يسولفون بكل شي معه عادي
لكن كان خلف سرحاااااان في عالم ثاني وفجأه تبخرت احلامه اول ماقالت اماني : خليف صدق بتتزوج قريب
لف خلف بهدوء: ومن قال !؟
ندى: ابوي من الصبح يقوله
وعد: وش دخلهم!؟ هو اللي قرر بيتزوج او لا
حنان: صراحه ودي تتزوج احس نبي زواج نستانس فيه اماني: الله يا خليف لو تزوج برقص رقص الدنيا بجلس اسبوع اردح وألفح وازغرط
ضحك خلف على احلامها: ان شاء الله
وعد: طيب وش بتسوي انت!؟
خلف بضيق: سوات الله ابرك بعدين اشوف
وجدان: يا حليلها عمتي ميييته من الوناسه من الصبح تقول بسوي في زواج خلف وبحط في زواج خلف
ضاق صدر خلف ووقف :ان شاء الله ربي ييسرها
طلع وتركهم وهو حتى الشاهي ماشربه
قربت اماني بشك: كأنه خلف متضايق
ندى: تراني شاكه فيه من فتره احسه مايطيق طاري الزواج
حنان: اخاف مايبي سحر
ندى: مدري بس اللي اعرفه انه هو ماعنده مشكله مع سحر بالعكس
وعد : هو ماعنده مشكله مع سحر وعادي يحبها بس احس اول ما وصل الموضوع لزواج تردد خلف واضح عليه
وجدان: اخاف يحب
لفوا كلهم يناظروها : وشوو!؟ انتي من وين تجيبين هالكلام
وعد : عشتوا بزر توك باخر الدنيا وتسولفين هالسوالف
وجدان: قلت احتمال
وعد : اقول استحي على وجهك بس هذا اللي ناقص
ندى بتفكير : صدق اخاف يبي احد ومايبي سحر!
سكتوا كلهم خوفاً من هالفكره اذا كانت صدق معناها دمار بيوت
_______________________.
وفي غرفة العيال
كان فيصل ماسك غيث وسالم وغصب يسوي لهم تمارين ومطارحه وحركات صعبه عليهم بس فاضي ويطلع شطارته عليهم وبعد ما انتهى قرر يروي لهم حكايات الجن وهم خايفين ولازقين ببعض
فزوا على دخول خلف وركضوا سالم وغيث له : فكنا من فيصل
تنهد خلف بضيق: وبعدين يافيصل وبعدين!؟
فيصل: ماسويت شي
خلف : فكني من الازعاج حط راسك ونم وخل الناس ينامون
نزل ثوبه خلف وارتمى على فراشه ولف على صوت فيصل يهمس : من مضيق صدرك !؟ فيك شي!؟
خلف: لا وش بيكون فيني بس تعبان من الشغل بنام
فيصل: اذا فيك شي تقدر تقولي
ابتسم خلف : اكيد يا فصيييل اكيد يلا قم نام
قام فيصل ينام ورجع خلف يتلحف بهدوء وهو في دوامة هالزواج ونعيم المنظر اللي شافه اليوم
وفي عز الظلام حس باحد يقرب ويضممه مد يده يتحسس اليد وابتسم كان غيث ولف يناظره بضحك : غيث وش فيك !؟؟
غيث: خايف
حضنه خلف مبتسم وهو يسمي عليه وشوي حس بسالم يقرب وينسدح وراه بالضبط
ضحك وهو يضمهم الاثنين وفيصل في سابع نومه ولا هو حاس
_______________________.
وفي سطح الجد
كان عقاب يدور وهو للحين مقهور من وعد ويفكر كيف بيسوي وكيف بينتقم منها وكان لازم يكون حريص لو احد انتبه له بتقوم الدنيا وتقعد
سرح وهو يفكر ( والله يا العوبا ما انتي سهله لكن ما اكون ولد نايف اذا ما ربيتك )
رجع للغرفه وهو كل انتقام شين فالدنيا يطري له لكن مايبي الا انتقام يكسر شوكة وعد العمر كله ماهو يوم ويومين
_______________________.
ومن بكره يوم الجمعه
كان هو اليوم المليييييان بالروحانيييه وريحة العوود والبخور والقهوه وصوت الراديو يعم على البيت بالقرآن
وفي حوش ابو خلف
كان ابو خلف جالس يردد ورا القرآن
والبنات ينظفون ومنتشرين وغيث وسالم وفيصل كلهم متروشين وجاهزين لصلاة وينتظرون
وفي غرفة العيال
وقف خلف وهو ياخذ دواه والتفت على دخول امه اللي اسرعت تفتح الشبابيك عشان ما يكتمه الدخان
وابتسم خلف وهو يبوس راسها: الله يخليك لي يمه
ام خلف : امين ولا يخليني منك ، هاه يمه خلصت ابوك ينتظر عشان تطلعون الصلاة
خلف: ايه خلاص
دخلت ندى مستعجله وهي تعطيه شماغه: خليف هاذي شماغك
اخذها وهو يلبسها ودخلت حنان تركض معها فنجان قهوه : خلف خذ
خلف: ليه!؟
حنان: تقول مصدع قلت اجيب فنجان يصحصح بك
خلف: مشكوره
ام خلف : يلا يمه يلا
طلع خلف معه الفنجان وهو طالع عطاه وعد اللي واقفه تكنس: خذي
اخذته وهي تشوفهم طالعين كلهم للمسجد
ورجعوا لشغل والتنظيف
_______________________.
وفي بيت الجد قايد
كان ابو ناصر واقف وهو يعدل شماغه ونزلت مضاوي تركض معها البشت: يببببه خذ بشتك
وقف ابو ناصر : هاتيه يا ابوك هاتيه
لبسته مضاوي وهي تبوس كتفه: جعل عمرك طويل يا يبه
ام ناصر: نهار جمعه ادعي للمسلمين اجمعين
ضحك عزوز: جده تغارييين حتى من الدعاء
هيا: الله يطول بعمركم جميع ولا تزعلين
ضحك ابو ناصر: ماعليه خلوها خلوها الحريم لازم يحسدون
عقاب: صدقت ياجدي
صرخت مضاوي : اقووول ترا انا اللي ادعي لكم وانا في فريق الحريم لا تخلون اغير وادعي عليكم
ابو ناصر: تدعين على ابوك!؟
مضاوي بضحك: لا بس بدعي الله يحسن الختام
رماها الجد بالمفتاح بضحك وانحاشت وقالت ام ناصر: خليه والله محد رفعه لهالمكان الا دعاي له
ضحك ابو ناصر: صادقه صادقه الله يجزاك خير
عقاب : يلا ياجدي بتجلس تسولف مع الحبيبه والصلاه بتفوت
ابو ناصر: يلا
طلعت سحر وهي تركض بالعود : لحظه تبخروا
مرت عليهم واحد واحد وهم كل واحد يقول : طاب طيبك وعاش حبيبك
وتبتسم سحر وهي تدعي لخلف الحبيب ان الله يطول بعمره
وبعد ماطلعوا ركضت مضاوي وهي تبخر: طاب طيبك
وهمست وعاش خليف
ضحكت سحر : ياشينك
عهد: وهي ما كذبت
وقفت هيا اللي كانت تقرا سورة الكهف: خلوا الكلام الفاضي ويلا عشان تقرون وتصلون ورانا غدا وحفله ناسين
وعلى طاري الحفله طلعت شهد : بنات وش اللبس !؟ عهد بضحك: يالله خييير اصبري لين يوافق عقاب وبعدين فكري
ام ناصر: غصب عليه يوافق خلصوا بس اغراضكم
ركضوا البنات يرتبون ويخلصون عشان يلحقون يجهزون _______________________.
وفي بيت النوخذه
طلع الكل لصلاة والحريم جالسين بهدوء يسمعون الخطبه بالراديو ودق الباب وفزت ليلى تفتح وشافت ولد صغير وفتحت الباب شوي وجلست : هلا حبيبي منو تبي !؟
ابتسم سعود بخجل: امي تسلم عليكم وتقول قولي لام نهيان الله يحيها للحفله في بيتي العصر
ضحكت ليلى بفرح: والله ابشر وسلم على امك وقولها ان شاء الله بنحضر ، بس وين بيتكم
اشر لها سعود : هذا بيتنا قدامكم
قربت ليلى تبوسه وهي مبتسمه: ان شاء الله لكن انطر دقيقه
ركضت ليلى وهي تجيب بسكوت وعصير وبطاطس واعطته سعود مبتسمه واخذها وهو مستحي وطلع
ورجعت ليلى فرحانه: يمه ابشرچ
ام نهيان: خييير خييير
ليلى: معزومين على حفله واااي بموت من الوناسه
شيخه: خافي ربچ تعالي اقري لچ كلمتين من القران وانتي تدورين الحفلات
ليلى: ولييّيييه شفيچ شيخوه ترا ما كفرنا والحمدلله قريت وردي وخلصت.
مريم: ووين هالحفله
ليلى: يمه تتذكرين ام سعود!؟؟
ام نهيان: ايه
ليلى: جاء ولدها سعود يقول امي تسلم عليچ وتعزمچ الحفل اليوم
ام نهيان: زين الله يسهل
ركضت ليلى تجهز اللبس اللي بتلبسه وكل شي تحتاجه
_______________________.
في الشارع للي اسفل الحاره
واللي كان لازم يمرون فيه عشان يروحون المسجد في هالشارع بيت النوخذه
والكل يمشي ومنزل راسه من حرارة الشمس الا خلف اللي اول مارفع راسه شاف باب النوخذه مردود وواقف عنده سعود وتأخر خلف بمشيه وهو يمشي بشويش بس وقفت رجله وهو يشوف ليلى اللي رجعت وهي مبتسمه واعطت سعود الحلاوه والبسكوت وهي تبوسه وودعته
وسكرت الباب
شد خلف شماغه بقوه وهو عارفها وعارف شكلها لا شعورياً ابتسم من ابتسامتها وسكرت الباب وماشافته لكن خلف وقف بحيره عذبه امتلى بها صدره لا شعورياً وقف سعود : سعود وش تبي هنا
سعود : امي ارسلتني اعزمهم للحفله
جلس خلف قدامه مبتسم وهو يسلم عليه كان منتظر يشم عطر او شي لكن حبس انفاسه ووقف ناقد على نفسه من هالتصرفات اللي ماهي من تصرفاته واطباعه
راح سعود ووقف خلف متكتف واستغفر وهو يكمل للمسجد وهو يحاول يخشع وينساها وهو عجزان في هالصدف اللي تحطها قدامه في كل مره
_______________________.
وفي بيت ابو خلف
بعد الغداء ابتداء مشوار البنات فالتجهيييز وكل وحده تدخل وتطلع وتدور
وكان خلف متكتف وجالس وهو يفكر لكن لف : يمه من بيجي فالحفل!؟
ام خلف : كل الجيران والحاره ، ليه!؟
خلف : مدري قبل فتره جيرانا الكويتين سكنوا مدري احد جاهم تعرف عليهم
ام خلف : والله ماشفتهم انا يمه بس عزموهم الحريم
ام وعد : وانا قابلت ام نهيان في مجلس ماشاء الله عليها حرمه رزينه وعاقله وبنت حلال واكيد ام سعود بتعزمهم
فيصل: خساره لو عندهم ولد بعمرنا كان فليناها معه
خلف : خل عيال الناس بحالهم بس
ام وعد : طيب خلف ياحبيبي اخذ سالم وغيث معك
خلف : ليه مايروحون مع سعود يلعبون بالحاره
او وعد : اخاف يتطاوقون
خلف: لا يا عميمه خليهم يلعبون احسن
طلعت وعد بعد ماجهزت وجلست وابتسم خلف : الله الله اختي اليوم ناويه تعذب العرب
ضحكت وعد: الله يجبر بخاطرك ياخليف
طلعت ندى وهي تدور: بالله علييييك شوف انا اللي بكسر الدنيا
طلعت اماني مبتسمه وهي تغني :ياشييييخه روحي بس انا اللي يقول عني خالد الفيصل ( نصف زين الخلايق في عيونه
وباقي الزَّين في باقيـه كِلَّـه)
ضحكت وجدان: كثررري منهها
ابتدت حرب المنافسه لكن انهاها خلف اللي طرا له يكمل الاغنيه وكلمات الاغنيه جت على جرحه ودخل بالجو وكمل معه فيصل يدق على الصحن والبنات يصفقون
(وقلبي تايهٍ مِـن عـام الاوَّل
ألا يالله يسَّـر مـن يدلَّـه
خذاه الَّلي على خدَّه علامه
سوادة غيم في شمسٍ مطلَّـه
سرقني مادريت إنَّه سرقنـي
سلبني و أحسب إنَّي فاطنٍ له
أنا يوم أرسل عيونه لقلبـي
عطيته مُهجتي والمعطـي الله)
ضحكت ام وعد : هانت يا خليف هانت كلها شهور ويعود لك قلبك ( تقصد زواجه من سحر )
لكن خلف ماكان صوبها ابد كان فعلاً يحس ان صدره فضى وعقله بعد فضى من كل شي واحتلته بنت النوخذه ام شامه اللي فعلاً سرقته وهو ماهو حاس
ندى: اوووووو اخونا طااار
التفت خلف مبتسم:يلا يلا خلصوا عشان اوصلكم واطلع
ام خلف : تبي تطلع يمه عادي روح فيصل يوصلنا
خلف : لا لا ماعليك يمه انتظر انا
وقف فيصل يربط ثوبه على خصره: لا والله انا بروح ألحق المباراه فاتتني
فز معه سالم وغيث: فيصل اخذنا
قبل يرفض فيصل قالت وعد : خذهم معك محد فاضي لهم
صد فيصل : زين
طلع وكملوا تجهيزهم
_______________________.!
وفي بيت الجد قايد
ما صدقوا البنات ان عقاب يوافق وانطلقوا يجهزون بسرعه
وعقاب جالس على الدكه اللي بالحوش ويتقهوى جنبه جدته وهيا اللي اول وحده تخلص وسحر لكن كالعاده مضاوي وشهد وعهد دايماً متأخرين
اخيراً طلعوا والتفت عقاب لمضاوي بعبط : بسم الله وين رايحه وييين عرس عرس
مضاوي بمزح: شتبي فيني خلني اكشخ كود الله يرسل لي حرمه مسكره عيونها وتخطبني ولدها
عقاب : يابنت الله لا يعاقب المسكين اللي بيتزوجك وشكل اللي داعيه عليه امه هو اللي بيتزوجك ولا هو موفق ولا هو رضي والدين
ام ناصر : لييه وش فيها بنيتي كامله والكامل الله
عقاب : والله يا جده بنيتك هاذي من اصحاب المظاهر الخداعه تشوفينها من بعيد تقولين ملاك واذا قربتي الله لا يوريك
مضاوي : يالله ياعقاب يبلاك ربي بزوجه اردى مني ويالله ترزق باللي تصلي بك شرق والناس قبله
ضحك عقاب بإستهزاء: ماجابتها امها اللي تصلي بس شرق
عهد : اييي هيييين كلكم كذا مع خواتك كلام ومع زوجتك كلام ثاني
عقاب : والله وش مسوي فيك وانا مدري!؟
قربت شهد وهي تجلس جنبه: اقول ماعليك منهم والله انك اطنخ اخو واحسن اخو واللي بتزوجك يحبها الله وخلق الله
ضحك عقاب : والله صادقه بس وش المصلحه من هالكلام!؟
كشرت شهد وهي اللي فعلاً كانت تقدس عقاب : افا يعني انا ما امدحك الا ابي شي
سحر: عاد مالك حق يا عقاب شهد ما تسمع فيك وتحبك
قربها عقاب يحضنها: ولا انا احبها حبيبة اخوها
طلع عزوز: عقاب بروح المباراه
ابعد عقاب: زين بس لا تبطي
عزوز اسرع بخطواته يحضنه بمزح: لو سمحت احضني بعد مايصير تصحروني عاطفياً
ضحك عقاب وهو يحضنه بعد ويحضن عهد وسحر بشكل جماعي ومن بين الزحمه دخلت مضاوي معهم بالاحضان
ام ناصر: يلا يلا بنروح
عقاب : هاه بس انتبهي انتي وياها وخليكم مع جدتي
هيا: اللله يهديك وين بيروحون يعني
عقاب: نوصي عاد
طلعوا مع طلعة ام خلف وام وعد ومعهم خلف
عقاب: الله بالخير
لف خلف : هلا عقاب غريبه!؟ مارحت للحين
عقاب : توني بروح انت وين!؟
خلف : بوصلهم
عقاب: زين اخذ جدتي والبنات معك
خلف تقدم وهو يبوس راس جدته وهو يمسك ذراعها: على خشمي
لف عقاب وهو يشوف اطول وحده واللي من وقفتها اللي فيها ثقه وهيبه واقفه على يمين خلف وهي دايم كانت يمين لخلف كأنها رجال من كثر ما خلف يحبها ويعتمد عليها في اشياء مايعتمد على فيصل فيها ويدري عقاب ان سبب طغى وعد هو حب خلف لها المفرط لكن هو حالف يكسر هالطغيان وبيكسره
لكن وعد كانت متجاهلته وهي تدري بغيض صدره
في الطرف كانت مضاوي مشغله خلف وتسولف معه لكن خلف شايل هم سحر اللي يحس بنظارتها له ووده يلتفت وده يوصلها من عيونه انه في حيره مايدري وش مصيرهم!! من يوم دخلت بنت النوخذه بالخط ومن صدف بسيطه سلبت تفكير خلف اللي كان خالي الفكر والقلب ومرتاح ويحاول يحب سحر ويتعود على الواقع لكن خوفه الاكبر خايف من ظليمتها وكسرة خاطرها
اما سحر للي في كل خطوها يخطيها خلف او كل حرف ينطقه تحس انه يهمها ولازم تسمعه بكل حواسها
_______________________.
في بيت النوخذه
الكل استعد وجهز وليلى اللي تناظر نفسها بإعجاب وحب عدلت اساورها بيدها وعدلت شعرها وهي تسمع امها تنادي : يلا يا ليلى
طلعت ليلى : خلاص يمه خلصت خلصت هاه شرايكم
مريم :واي ليلى تهبلييين بسم الله عليچ
ام نهيان: حصني نفسچ وانتو شيخه مريم بعد تحصنوا
شيخه: يمه انا ما بطول نص ساعه وارد البيت
ليلى: شيخوه شفيچ ليه علاقتچ مع الحفلات عكسيه!؟ شيخه: لاني ما احب الطقطقه واللّويه والازعاج
ام نهيان: خلونا نروح ونشوف
طلعوا متجهين بيت ام سعود
_______________________.
وعند باب ام سعود
كان خلف واقف بالطرف بعيد وهو يقلب المسبحه بيده ينتظرهم يدخلون لكن شاف بيت النوخذه ينفتح وطلعوا منه 4 حريم متجهين بيت ام سعود بينهم ليلى اللي يعرف عيونها اللي شافته هالمره وكل ماقربت شافت انه يناظر وارتبكت وتعثرت وطاحت وشهقت ام نهيان: بسم لله عليچ
مريم: ليلوه شوفي الطريچ علامچ طايره
ارتبكت ليلى وهي تحاول توقف ورفعت امها اطراف العبايه عشان توقف ما تعثر فيها وتدبست عيون خلف على اسفل فستانها الاحمر وخلخالها
لكن نزلت الفستان بخوف وهي توقف بارتباك وصد خلف ومشى وهو ماعاد يبي اي صدفه زياده هو ما بقى شي ما شافه وحبه
دخلوا وليلى انخبصت وخافت من هالخلف اللي بكل مكان غطى لون وجهها على لون فستانها
شيخه: ليلى ليش ويهچ احمر!؟ تعورتي؟؟
ليلى: لا لا
مريم: قولي بسم الله
قربت ام سعود تسلم وهي ترحب فيهم
_______________________.
وفي الحوش الداخلي
الكل جالس والبنات مجتمعين هم يعرفون بعض ولفوا على دخول ام نهيان وبناتها ووقف الكل يسلمون
وهمست مضاوي للبنات: اوووف هالمزايين جيرانا ويينس مادريت عنهم ولا كل يوم اسير لهم
ضحكت ندى: ابشرك يقول عندهم ولد يمديك تضبطينهم
هيا: الله يفشلك انتي وياها
وعد : اعقلوا فضحتونا!
مضاوي بمزح : مالي دخل حجزت اخوهم
اماني بضحك: يقول ابوي عندهم بعد واحد متزوج اذا هو مثل خواته مزيون انا راضيه اكون ضره
ضربتها حنان: حرام عليك
اماني: امزح امزح
قربوا يسلمون وابتسمت لليلى للبنات المبتسمات وسلموا انتهى مطافهم في السلام وقربت ام سعود تاخذ ام نهيان وشيخه لمكان لكن ماكفى ليلى ومريم
وقالت مضاوي ببتسامه وسييعه: تعالوا هنا حياكم
مريم: الله يسلمچ
ليلى: مشكوره
مضاوي بهمس: يمممه بموت شوفي اللهجه ماشافوا كلامنا صبه ما تفرقين بين رجال ومره
عهد : الله يفشلك يا مضاوي اسكتي تكفين
سحر: لا يسمعونك بس
لفت اماني لهم : حياكم الله
مريم: الله يحيك
هيا : ماشاء الله من زمان نسمع عن جيرانا الكويتين ما حصلت لنا الفرصه نشوفكم
ليلى: توها شاءت الاقدار
مضاوي: صادقه والله
وعد: وتشرفنا فيكم والله
ليلى: لنا الشرف
كانوا ودهم يسولفون مستحين من بعض
عهد : حنا جيرانكم بيت القايد في اول الحاره صح بعيد شوي لكن ان شاء الله تجونا ونجيكم
همست سحر: كثري منها نجيهم والله عقاب يذبحنا
عهد: نلمع الصوره قدام الناس
مريم: ان شاء الله لكن انا ضيفه كلامكم مع ليلى
لفوا وقالت ليلى ببتسامه: انا ليلى وهاذي مريم زوجة اخوي
اماني بهمس : افااا ضرتي يا بنات
ضحكوا بهمس قالت وعد تغطي الفضيحه : انا وعد وهذولا خواتي ندى واماني وجدان وحنان
وهاذي عمتي مضاوي وعمتي هيا
وبنات عمي سحر وشهد وعهد
ليلى : ماشاء الله
مريم: وانتم كلكم بنات القايد!؟
مضاوي : لا انا وهيا بنات القايد نفسه ووعد خواتها بنات اخوي ابو خلف وسحر وخواتها بنات اخوي ابو عقاب
تكهربت ليلى وهي تقول بنفسها( لايكون خوات المجنون اللي عند الباب !؟ الله يستر ماغيره خلف القايد شهالقراده ياربي)
مريم: ماشاءلله الله يخليكم لبعض
الكل: امين
مضاوي : هاذيك مين!؟ لفوا يناظرون شيخه وقالت ليلى: هاذي شيخه اختي ومعها امي
مضاوي : ماشاء الله
سكتوا وارجعوا وقالت حنان: كيف السعوديه معكم! مرتاحين
ليلى: حلوووه حييل انا صراحه احبها لكن هم نحب الكويت اكثر
وعد : ايه مافيه زي الوطن بس السعوديه ديرتكم الثانيه
مريم: بالنسبه لي نجي يومين هنيه لكن اموت من الشوق للكويت ماني متعوده
بدت السوالف الروتيينيه وكل وحده تحاول تتعرف على الثانيه
_______________________.
في السوق
كان خلف يمشي مع نادر ونادر يسولف ويعلق ويقلب وخلف ساااهي وفجأه ضربه نادر: خييير اسولف مع نفسي
خلف: اسمعك
نادر: كذاب ! خليف تراي اعرفك لك ايام ما انت طيب
خلف : لا تكبر الموضوع سهيت شوي
نادر : وش مشغل بالك قلي
كان خلف ينكر ويصرف نفسه لكن نادر مصر ورحم الله خلف بجية ضاري اللي شافه من بعيد اقبل يسلم عليه
خلف : نادر هذا ضاري حكيت لك عنه وضاري هذا رفيق عمري نادر
مد يده ضاري يسلم على نادر بحراره: يا هلا والله تشرفت فيك يا نادر
نادر: الشرف لي
ضاري : كيفك واخبارك وعلومك
ابتسم نادر باستغراب: بخير انت وشلونك
ضاري : بخير ، دامكم تجمعتوا حلفت الا تجون معي واقهويكم
خلف : لا يارجال مكثور خيرك واللله مستعجلين
ضاري : لا والله والله
نادر قبل يحلف ضاري قال: يارجال والله مستعجلين
ضاري بسؤال بحسن نيه وكأنه من سنين يعرفهم: وش معجلكم!؟
خلف ابتسم: نادر على وجهه زواج ويجهز لبيته
ضاري بفرح: ماشاء الله مبروك مبروك والله يبارك لك
نادر: الله يبارك فيك
ضاري : هاه امروني تبون فزعه شي تراي اعيين واعاون
ضحك خلف اللي صار يعرف طريقة ضاري بس نادر مفجوع من دخلت ضاري السريعه :لا والله مشكور
ضاري :لا تستحي انت مثل اخوك
نادر: تسلم والله
خلف: انت وين رايح !؟
ضاري : ابد وصلت امي عند احد الحريم واحتريها تخلص واخذها
خلف ابتسم : الله يخليك لها ويخليها لك
رفع يدينه ضاري بحب: يالله يارب ويخلي لك من تحب
خلف : طيب تخاوينا!؟
ضاري : مابي اثقل عليكم
نادر باستهزاء في خلف : لا والله ما انت مثقل على الاقل ترد الصوت علي
ضحك خلف : تعال تعال
دخل معهم ضاري اللي اثبت صوته وكلمته في هالروحه واشغل خلف على ليلى
_______________________.
.
.
انتهى البارت â™¥