منتديات صواديف عشاق - عرض مشاركة واحدة - عزاي إنك رجاي العذب لو كل الدروب عثور،للكاتبة/ اديم الراشد

11-29-2021

البارت الخامس ..

وفي الحفل
بدت علاقة البنات تاخذ مجرى الضحك والسوالف والرقص ودخلت ليلى معهم وهي تشاركهم بكل شي
مضاوي بهمس: وحده تقوم ترقص معي
ندى: مافيني حيل تعبت
اماني: مابي يفوتني الحلا
مضاوي : حسبي الله عليك يا بطينيه
عهد: اكرهه ذا الاغنيه
مضاوي: حسبي لله عليكم من بنات اخوان
سحر: وانا ما احب ارقص تعرفيني
ليلى : الله يسامحچ من مايحب الرقص
شهد: سحر عندها عقده من الرقص
مضاوي: فكوني من عقدتها الحين راحت الاغنيه
ليلى: قومي انا ارقص وياچ
مضاوي بمزح وضحك :كفو بنت الچويت
عهد: فشلتينا
ليلى: خليها عادي
وقفت مضاوي وليلى يرقصون وعجزت مضاوي تجاري ليلى في رقصها اللي كان فنان ومحترفه فيه فعلاً تخلي الكل يناظرها انسحبت مضاوي وخلتها تتمايل على ألحان الاغنيه بلحالها وليلى اللي عشات جوها والكل يصفق ويناظرها
وانتهت الاغنيه ورجعت ليلى متفشله وهي تضرب مضاوي بخفه: شفيچ رحتي خليتي وانا ارقص مثل الخبله
مضاوي بضحك: ماعندي ابداعك والله استحيت على وجههي
ضحكت ليلى وقالت مريم: ماعليچ منها هي دايماً ترقص بروحها
وجدان: تحبيين الرقص حيل شكلك
ليلى: اييه احب ارقص و اغني وكل شي حلو بالحياه احبه
اماني : الله يعني صوتك حلو
مريم: وازيدچ من الشعر بيت تدق العود وتغني
شهقوا البنات وسحبتها مضاوي بمزح : تكفييين تعالي عيشي معنا
ضحكت ليلى: والله انا ماعندي مانع
اماني: لا والله تعالي عندنا انا انسانه طربيه احب الطرب ابي انسانه تشاركني اهتماماتي انا مظلومه في بيتنا لحالي
وعد : حرام عليك جحدتي خلف المسكين هو اكثر واحد يدعمك في ذا الموضوع
ضحكت اماني: صادقه والله
عهد: لا تكفين حنا بيتنا خالي من الحس الفني نبي احد ينعشنا
مريم: خلف اخوكم !؟
وعد: ايه اخونا الكبير
مريم: ماشاء الله متزوج!؟
حنان ببتسامه: لاا خاطب سحر بنت عمي
لفوا لسحر اللي ابتسمت بحب والكل يناظرها
مريم: ماشاء الله زييين ما اختار
اما ليلى كأن احد ضربها كف ( عمى بعييينه هاللي مايستحي ابو عين زايغه!؟ هذا وهو خاطب الله يفشلك يا شيخ حرام فيك هالذهبه)
كانت ليلى ما تعرف خلف الا بهالصدف والحقيقه ان خلف طول عمره وهو انسان يغض البصر ولا يحب يناظر الحريم لكن من يوم شاف بنت النوخذه انهبل ماعاد يقدر ينزل عيونه عنها ابد
كملوا الحفل والبنات يعزمون ليلى وهي تعزمهم ومبسوطين في بعض حيييل
_______________________.
وفي الليل في بيت ابو خلف
رجع خلف مهدود حيله من لف السوق والهواش مع نادر وضااري
انسدح بالحوش وهو ينادي: وجدااان
طلعت وجدان تركض : خلف جيييت
خلف: ايه ليه وش تبين!؟؟
وجدان: ابيك تنقذني من كرف المطبخ
ضحك خلف : ابد بنقذك لكن ابي تهمزيني
وجدان: برسم الخدمه
نزلت وعد من فوق: وجدان خلصتي!؟؟
ركضت وجدان تجلس ورا ظهر خلف : لا خلف يبيني اهمزه
اشر خلف لوعد بضحك: خليها عشاني اليوم
وعد : زين زين نتفاهم
طلعت حنان: جيت وجابك الله توني مسويه قهوه يحبها قلبك
خلف: حمدلله ، وين امي وعمتي!
وعد: يشاركون جدتي وام ممدوح فالاستديو التحليلي
دق الباب الفاصل وركض غيث يفتح وكانت مضاوي : ساعه تفتحون
خلف: وش فيك انتي
مضاوي : انفجر راسي من طلبات ام ممدوح وسحبت عليها وجيت
خلف : لا حووول اقول ورا ما تضبطين وضعك معها يمكن تزوجك ولدها ونفتك
مضاوي بمزح: من زين ولدها ابو راس مربع ما ابييه انا اتطلع لمستقبل دولي وزاهر
ضحكوا البنات يعرفون قصدها ولف خلف: احلى يا دولي ومن اي دوله ودك تعرسين
مضاوي بضحك: ماني طماعه قريب جيرانا الچويتين
ندى: الله يلوع كبدك يا شيخه صدقيني لو يدرون انك تقولين چويتين ليهجون من السعوديه
وعد :مو بس يهجون من السعوديه لا بيهجون من قارة اسيا كلها ينقلون الكويت ورا امريكا
ضحكت مضاوي: ماعليه نتعدل لعيونهم
خلف تكتف : ايييوه وانتي وش مسكك على الچويتين على قولك!؟؟
مضاوي حطت يدها على قلبها بهيمان: عشانك ماشفت اللي شفته انا اليييوم صراحه حبيتهم اول مره اعرف كويتين بس حبيتهم
حنان : خليف هالخبله تقصد ان اليوم عند ام سعود جت جارتنا ام نهيان الكويتيه وهالخبله خقت
اماني: مألومها والله
وجدان وهي تهمز خلف: اي ولله يعني يج..
قاطعتها وعد قبل تهور وجدان وتوصف البنات عند خلف: هيييه وقفي وين بتطيرين
ابتسم خلف : ماعلينا كيف شفتوهم !ناس طيبين
حنان: ماشاء الله اخلاق اخلاق اتعب وانا اقول اخلاق
وجدان: بذاات ليلى تخيل يا خليف تدق العود
وعد: وجع يا شيخه
اماني : انا اخيراً لقيت احد نفس جوي ياليت فيصل كبير ونزوجه اياها
مضاوي : شكلي بزوجها عقاب
بدت سوالف الطقطقه
نزل خلف القهوه بهدوء وصمت وهو يقول : خلاص يا وجدان
تكى على التكايه الموجوده وهو يسمع سوالف البنات عن الحفل لكن كان فيه نوم وغالب الوقت مسكر عيونه لكن سمع وعد تضرب وجدان: خبله انتي كم مره اقول ما توصفين البنات عند العيال
وجدان: نسيت
مضاوي: والله ما ألومها انا للحين اتذكر و ما اتذكر شي كثر الشامه تجذذب مااشاء الله
وعد: قصري صوتك لا يسمعك خلف
مضاوي: مايدري نايم وبعدين وش فيها
حنان: فكينا تكفين ما تسمعين القصص كم واحد يحب له وحده مايعرفها كله من السوالف
مضاوي : استريحي تكفين خلف اول شي عارف نهايته مع من وبعدين عاقل وفاهم
اماني ضحكت: خلونا بس من هالكلام انا ما انسى يوم فشلتك بالرقص وطلعتي
مضاوي : الله ياخذكم كله منكم ماهقيتها رقيصه
ندى: احسها لو عطوها مجال اوسع بتبدع
حنان:احس انها وسيعه صدر ودي تصير صديقتنا
وعد : شيخه شيخه بعد احسها من مزاج هيا اشوفهم اندمجوا
مضاوي : اااه اسكتي عطتها قائمة كتب تقراها بغيت ابكي من هول الصدمه
ندى: خليهم لاقين راحتهم
اماني: انا بدفع عمري واسمع صوت ليلى
حنان: نتعرف عليها ونروح لها
كملوا سوالف وخلف على الصامت وهو يسمع الثناء والمدح في ليلى كان شي مهيييب مهيب جداً تحرك بإنزعاج اول ما حس انه اكتفى من اوصاف ليلى وقرر يطلع لغرفته دخل وهو يقفل الانوار وانسدح يمثل على الكل انه نايم لكن كان غااااطس في بحر ليلى لللي وين ما جابتها الفكره تكون آيه في الجمال
_______________________.
ومن بكره
ومثل اي يوم روتيني دوامات وصراخ وهواش على الدوام
لكن هالصبح الغريب ان عقاب كان جالس جنب جده وهو يمسح على شنبه بهدوء غريب عليه وهو و وصل لفكره لكن يدري انها مستحيله لكن هالفكره لها بابيين وكل هالبابين على وعد بتكون جحيم وعشان يسوي هالفكره لازم ينتبهه لانه احتمال يضحي بأشياء كبيره وهذا خوفه
ابو ناصر: عقاب علامك اليوم راكد
التفت له عقاب بهدوء : مافيني شي
ام ناصر: لا يكون مريض
عقاب وقف يعدل بدلته: لا لا بس ما شبعت نوم المهم انا رايح لدوام
طلع مستعجل بعد ما عطى اخوانه مصروف
هيا: وش فيه عقاب !
ام ناصر: مدري عنه
ابو ناصر: يا مضاااوي تعالي تعالي نادي خلف
نزلت مضاوي : ابشر
ركضت تدق الباب وانفتح وقبل تصرخ سكتت: ناصر وين خلف
ابو خلف: انتي خببببله كم مره اعلمك ما تدقين كذا
مضاوي: مستعجله ابوي يبي خلف
ابو ناصر: عليك فيها يا ناصر ربها من جديد
مسكت مضاوي يد ابو خلف : افا بس يبه وش ذا التعنيف ترسلني عشان يكفخني
ابو خلف: انتي مزعجه العالم كلهم اعقلي احسن لك
مضاوي : ابشر بس وين ولدك
ابو خلف : روحي دوريه
دخلت وهي تلف : ام خليف وين ولدك
ام خلف: في الغرفه
ركضت و هي تفتح الباب بكل قوتها : خليييف
التفت خلف اللي كان واقف يسكر ازارير ثوبه وهو بين كل واحد والثاني تهجم عليه كحه تهد حيله خلف بصوت مبحوح : يالله صباح خير
مضاوي: ابوي يبيك
صد خلف يجمع اغراضه: ليه ؟
مضاوي تكت وهي تسولف بعيييد عن الموضوع: والله مدري بس قال ناديه وعاد ابوك هاللي ما يستحي ما صدق انه يمسكني عشان يطقني لك...
سكتها خلف اول ما رماها بالمشط: خبله انتي تسبين ابوي قدامي
مضاوي: اااه ايه وانا صادقه
خلف : امشي امشي بس
لفت مضاوي عليه: وش فيه صوتك !
خلف: عشان توي صاحي
نزلوا ومضاوي من اللعانه تمر البنات وتخرب عليهم التنظيف وتنحاش لكن اول ماشافت وعد هجت
اما خلف دخل وهو مستعجل متوقع ان عند البنات خبر انه بيجي لكن وقف على صوت شهقه ورفع راسه وشاف الكل يناظرونه بصدمه وساكتين ولف اول حس يساره احد لكن اتسعت عيونه بذهول ووصد ورجع وهو مايدري من هاللي شافها لكن ما انتبهه لها ولا ركز فيها
لكن سمع جده يقول : ماعليك يا سحر روحي روحي ماشافك
ركضت سحر بفشله وهي ما درت ان خلف بيجي وقفت تخبط وجهها بخوف وفشله
عهد : وش فيك بسم لله
سحر: شافني خلف شافني
ضحكت مضاوي: بسسس! ماعليك حلال شوفه شرعيه
سحر : يافشلتي وش بيقول عني الحين
عهد : وش بيقول !؟ مابيقول شي وبعدين خلف اجودي ما يناظر ولا هو قايل شي
هيا: وش فيكم!
عهد قربت تعلمها وهي تضحك وهياا مبتسمه بحرج
_______________________.
اما خلف ماعاد رجع ابد وطلع سيدددده للمحل وترك جده وهو اول مره في حياته يطيح بهالموقف من الساعه اللي تغطو فيها بنات عمه عنه مايعرف سحر ابد حتى الحين يوم شافها ماركز فيها
مسح وجهه بضيق ووقف يرتب الاغراض
لكن شاف جده جاي وراح له يسنده : المعذره يا جدي رحت وخليتك
ابو ناصر: ماعليه انت بعد اختبصت
خلف: انا ما دريت توقعت عندهم خبر
ابو ناصر بضحك: ماعليه ماهي خساره ان شاء الله ايام وتعقد عليها وتصير حلال
ابعد خلف وهو يكح ومارد وسحب كل الشغل وهو مايبي هالطاري ولا نقاش فيه لكن كل المعطيات حوله تجبره يتقبل فكرة سحر غصب عليه
ورفع راسه على صوت ابواب المحل اللي تتحرك بقوه من الهوى بس ماعطاها اهتمام ورجع لشغله وهو يفكر لكن وقف وهو يحاول يوقف كحته ويتنفس لكن ماقدر رفع راسه يشوف الدنيا حوله غبااار وتراب حاول يتنفس ما يتنفس الا غبار رفع شماغه لوجهه بس اختنق
ووقف ابو ناصر بخوف : خلف خلف بسم لله عليك
اسود وجهه خلف من الكتمه وابو ناصر يحوم حوله مايدري وش يسوي وصرخ ينادي ممدوح اللي كان قريب : ألحقني ألحقني
كان معروف ان خلف يتأثر من الغبار ويختنق وهو اصلا من يوم صحى يحس صدره تعبان
ركض ممدوح يهوي خلف اللي من غير مايحس سحب ثوبه وانقطعت ازاريره
ابو ناصر: خلف دواك
اشر خلف على جيبه ورفعه ممدوح يعطيه البخاخ بس مافيه فايده وركض ممدوح يجيب السياره وهو ياخذه للمستشفى وابو ناصر معه
واهل السوق واقفين بضيق
ابو نهيان : سلامات عسى ما شر شنو صاير مع ابو ناصر
ابو ممدووح: طاح عليه حفيده خلف تعرفه
جابر : لا لا شنو فيه ! ان شاء الله مافيه شي عود ( كبير)
ابو ممدوح: لا لا معروف هو معه ربو حاد من يوم هو صغير اذا جاء غبار او شي او تأثر من شي يطيح اذا ما اخذ دواه
ابو نهيان: لله يعينه ويقومه بالسلامه
الكل: امين
_______________________.
بعد ساعه في المستشفى
وصل ممدوح وهو ينادي الطوارئ لخلف اللي كان في حاله يرثى لها واخذوه وهو يساعدونه ويعالجونه وابو ناصر واقف بضيق : مدري مدري كيف سهيت ما قلت له ان فيه غبار ماقلت له
ممدوح: وش بتسوي يا عمي مكتوب ومقدر وهو بخير الحين
جاء ابو خلف يركض: علامه خلف يبه
ابو ناصر: الظاهر جته نوبة الربو والغبار زاد الطين بله
ممدوح: لا تخاف يا ابو خلف الدكتور يقول انه بخير لكن يحتاج وقت تعرف انت حالته
جاء الدكتور ووقف ابو خلف : يادكتور كيفه خلف
الدكتور: حمدلله بخير ! بس هو ينتظم على الدواء!؟
ابو خلف: والله اللي اعرفه انه منتظم
الدكتور: لكن اتوقع انه مفرط فيها هاليومين عشان كذا تأثر بشكل كبير ولازم يجلس عندنا يومين
ابو خلف : عسى مافيه شي خطير
ابو خلف : لا لا بس قصبات الهوائيه متاثره كثير يعني يومين ان شاء للله ويكون استصح وصار تمام
ابو خلف : ومتى بيصحى
الدكتور: هو نايم من اثر الدواء لكن ساعه ويصحى
ابو ناصر : يعطيك العافيه
راح والتفت ابو ناصر: وش السوات بتقول لامه
ابو خلف :ايييه والله لو يقولها احد ثاني تنهبل تحسب فيه شي
ممدووح: روح ياعمي وانا اجلس عنده لين تجي
ابو خلف : زين انتبه له
اخذ ابو ناصر ورجع للبيت
_______________________.
وفي بيت ابو خلف
كانت ام خلف قلقانه وهي تناظر الجو اللي في ثواني انقلب لعج
وعد : عمتي استريحي وش فيك
ام خلف : الجو مايطمن خايفه على خلف
ام وعد : يابنت الحلال خلف ماهو طفل اكيد مع ادويته ومنتبهه لنفسه
ندى: عمتي انا بنفسي عطيته الدواء وحطه بجيبه
ام خلف : ياربي انك ترعاه وتحفظه من كل شر
شوفي وانفتح الباب وكان ابو خلف
ام خلف : ناصر جيت وجابك الله شفت خلف!؟ مريت عليه!؟
ابو خلف: ايه
ام خلف : هاه عساه ما تأثر
ابو خلف : لا ما عليه لكن مهما كان غبار واتعبه شوي وواخذناه للمستشفى وطيب وبخير بس يحتاج يجلس عندهم يومين
شهقت ام خلف: بسم لله عليه ولدي والله اني حاسه وش فيه وش صار
ابو خلف: مافيه شي بس الظاهر ماهو ملتزم في ادويته وتعب وهو بخير وجاي اخذك له
وعد : يبه تعبان حيل!؟
ابو خلف: لا لا
حنان: طيب بنروح معك كلنا
ابو خلف : وين تروحون تزحمون المكان وتقطعون عليه الاكسجين ويتعب اكثر هو ماهو مطول يومين ويطلع
جات حنان معها اغراض ام خلف اللي اخذتها وهي خايفه
وطلعت اماني : يبه حطيت كم غرض لخلف اذا احتاج
اخذوها وطلعوا والكل خايف على خلف لكن متعودين على ذا الحال
_______________________.
في المستشفى صحى خلف
وهو ماوده يصحى ويسمع هواش ابوه اللي يهاوشه ليييه ما انتظم على الادويه وليه ما انتبه لنفسه وليه وليه وليه
كان يشوف ممدوح جالس وهو يكلم خلف اللي يرد بصوت متقطع وجمل قصيره وهو مسموع صوت تنفسه
ودخل عقاب مستعجل: خلف بسم لله عليك علامك وش جاك
ممدوح: مافيه شي طيب وبخير
اشر خلف بيده: انا طيب ماعليه
دخلوا امه وابوه وطلع ممدوح وعقاب للحين فيه
ركضت ام خلف تسلم عليه وتمسح على راسه وتقرا عليه وابو خلف كالعاده يهاوش
لكن قال خلف بتعب : خلاص يا يبه... انا لو ادري .. اني بتعب.. واتعبكم معي .... كان مت وريحتكم
ام خلف: بسم الله عليك يمه لا تقول كذا
جلس ابو خلف بضيق: يا ابوك انا ما اقول كذا عشان تزعل وتعصب بس انا اخاف عليك لو لا سمح الله ماكان ابوي فيه ولا ممدوح كان صار لك شي
عقاب: خلاص يا عمي هانت ان شاء الله بينتظم فيه
سكتوا اول ما بان على خلف الضيق وماحبوا يتعبونه اكثر
_______________________.
مرت ايام الاسبوعين سريعه
صح فيها كان خلف تعبان واغلب وقته بالبيت لكن يطلع نص ساعه بس يقابل نادر ويرجع لكن هالاسبوعين اللي ابعدته عن السوق والازعاج والضجه والجهد
فتحت في قلبه اكثر من باب وفي عقله اكثر من فكره بدا فعلياً يشوف جانب انه مايبي يتزوج وهو تعبان ولا يبي يرتبط بسحر كان يفكر كيف بيرتب اموره بدون ما يجرح سحر
لكن تأكد ان ليلى صارت جزء لا يتجزأ من تفكيره ولازم يحل سالفته معها يا انه ينساها او يشوف له طريقه ...
عقاب اللي رست فكرته على قواعد ما يخسر فيها ابد بيكون في كل الحالتين فايز لكن يبي الوقت المناسب يجي وينفذها ... اما نادر اللي راحت ايامه يركض وهو فرحان من فرحة امه واهله وصح ضايق على خلف وانه احتمال مايحضر زواجه لكن متأمل خييير في زواجه
...
بالنسبه لضاري اللي مع الايام بدا يقرب من خلف ونادر وصار اغلب اليووم يمر عليهم وهو متوقع انه علاقته مهم بتكون حلوه .... اما ليلى اللي طول هالاسبوعين تروح وتجي وهي مستغربه اختفاء خلف اللي فجأه ماعاد ينشاف لكن حمدت ربها انها افتكت منه بس اول ما قالهم ابوها عن اللي صار خافت وهي ماتدري وش هالانسان اللي في اغلب اوقاته مريض .... والباقين مستمره حياتهم بهدوء
_______________________.
يوم الخميس يوم زواج نادر
اللي كل الحاره مجتمعين له والكل يساعد وشاد حيله
كان في حوش كبييير بطرف الحاره معروف انه للحفلات وهناك الحريم
اما الرجال يفرشون زل في اطراف الحاره ويجتمعون فيها
كان ابو نهيان وعياله اول مره يحضرون عرس بالحاره ومبسووطين على اجواء ما قبل العرس
_______________________.
في بيت ابو خلف
كانوا الكل مستعدين وهم بالقوه اقنعوا ابو خلف يحضر العرس ويخليهم يحضرون
وقف خلف يعدل شماغه ولف على صوت ابوه: اسمع يا خلف اللبس الكمام احسن عشان ماتتعب
ام خلف : ايه ياحبيبي عشاني
كانت حنان واقفه جنبه معها الكمام واخذه خلف بضيق وهو يلبسه
غيث: انا بعد ابي زي خلف
ام وعد : هذا ماهو للعب اخلص اللبس شماغك
فيصل : تعبت تعبت وانا اشخص له
ابو خلف : خلصوا يا دوب نلحق
بدوا يطلعون كلهم وقربت وعد لخلف : وش فيك ضايق
خلف : مليت من هالزفت اللي على وجهي 24 ساعه
وعد : وش بتسوي يعني!؟ هذا ارحم من انك تتعب وابوي يحلف انك ما تروح زواج صاحبك
خلف : ااه بس
وعد : هونها وتهون
خلف: يلا يلا
_______________________.!
في بيت ابو نادر
كان نادر يجهز وهو ضايق صدره لان امه وابوه بيسافرون
لكن مبسوووط بيوم زواجه وهو ينتظر متى تجي خالته والعروس المنتظره كان يلبس وهو يسمع الزغاريط واصوات الرجال برا وقلبه يدق بفرح شد على يده وهو يدعي( ياااااربي ياربي انك توفقني والله مدري ليه خايف يارب تسهل )
_______________________.
بدا الحضور يكتمل والناس مبسوطيين
وفي قسم الرجال ما صدق نادر يشوف ابو شوق وصل بالسلامه واخذ نفس
لكن شاف ضاري مقبل عليه وهو مشمر اكمامه ومعه الدله وهو يصب له قهوه: تقهوو يا عريس
نادر: تكفى يا ضاري ماعاد ابي خلاص طفحت
ضاري : وش فييك خايف ومتوتر الخوف للحريم تقهوو وعين من الله خير
ابتسم خلف اللي جالس بجنب نادر: خله يا ضاري الرجال في عالم ثاني
ضحك ضاري : افا وانا احسبك كفوو وينشد بك الظهر بس يا حسافه
نادر: مب وقت شدت الظهر جربني في وقت ثاني
تكتف عقاب وهو يهمس لخلف : انت من وين طايح على هالمريض تراه حوم كبدي
خلف : لا حول الله يا عقاب وش فيك كارهه ومستقعد له والله انه ابن حلال وطيب
عقاب: انا ما حبيته ياخي مطفوق وخبل
خلف : تكفى يا شيخ فكنا من هالكلام اللي ماله داعي ما حبيته لا تكلمه ولا يكلمك وريحنا
عقاب : انتم ابخص بس انا وياه لا تجمعونا في مكان
صد خلف وهو يشوف الناس ترقص العرضه والحماس وابتسم لضاري للي ساعه يصب قهوه وساعه يرقص وكأن الحفل حفل احد يقرب له او من اهله
_______________________.
وفي قسم الحريم
كان خلف وعقاب موصين البنات يوقفون مع ام نادر ولا يخلونها لحالها ولا يطلعون الا كل شي نظيف
وابتسمت ليلى باستغراب وهي تشوفهم شايلين العرس
ليلى: اقول عهدد يقرب لكم المعرس
عهد : لا ليش!؟
ليلى: لا بس اشوفكم ماشاء الله شايلين العرس وام المعرس
مضاوي ببتسامه: طال عمرك عشانك ماتعرفين وش ينتظر بالبيت لو ما وقفنا معهم بالعرس
اماني : خلف اخوي وعقاب ولد عمي اصحاب نادر من عمر ومن يوووم اعلن زواجه وهم كل يوم يوصون ساعدو ام نادر ولا تقصرون معها
شيخه: ماشاء الله على صداقتهم
ندى بهمس لوعد : لو تدري وش يصير في ذا الصداقه من ابوي وجدي بس
وعد : الله يعينهم بس وزين ابوي رضا نحضر
ليلى: طيب وينها العروس
سحر: في البيت
ليلى: شحقه ما تطلع لناس !؟
وعد : عندنا الاغلب مايطلعون العروس يعني تجلس ببيتها لين يجي عريسها
ليلى: ييييمه ليييش !
ندى: عادات وتقاليد
هيا: بنات وينكم يلا ساعدونا
فزوا البنات ووقفت ليلى معهم
مضاوي : وين بتروحين انتي!؟
ليلى: انا ما اعرف هنيه الا انتم ومابي اقعد چذيه بقوم وياكم
مضاوي : يالبييه يالفزعه قومي جعل مايقوم الا انتي
وعد : فشلتييينا
ضحكت ليلى: شحقه تفشلكم عادي إحنا صرنا رفيچات
اماني: حبيبتي احلى رفيچه والله
انطلقوا يساعدون ويرقصون ومستانسييين
_______________________.
واستمر الزواج والكل مبسوطين
واخيراً صار وقت زفة نادر وتجمعوا الشباب حوله وهم يغنون له ويصفقون له ويزفونه ويدعون له وابو شوق واقف جنبه وابوه جنبه
ودعوه ودخل بعد ما ابو شوق وصاه عليها وحرص عليه و وطلعت امه وهي تحضنه وتبكي وتودعه وتوصيه على شوق وخالته
كان نادر في قلبه شعور فرح وخوف اخيراً طلعوا من البيت وسكر الباب وهو واقف للحين ماشاف شوق وللحين ما يدري كيف هي العروس عدل بشته وابتسم ودخل : السلام عليكم
ماسمع صوت ورفع راسه لكن انصدم واختفت ابتسامته شوي شوي شوي لين ارتسمت الصدمه على وجهه واخذت حقها الكافي في ملامحه مد يده يمسح عيونه لكن النتيجه وحده
لا شعورياً قال : شوووق!؟؟؟
طلع صوت همس بسيط من شوق وخايف وقالت: سم
عجز ينطق حرف زياده وهو يناظرها وهي واقفه ويناظر نفسه كان الفرق بينهم واضح
كانت صغيييره صغييييره صغييره كانت طفله كانت ترتجف مثل الريشه
رفع يدينه يحاول يهديها وليته ما قرب اول ما حط يده على كتفها انهارت تبكي تورط نادر وابعد وهو مايدري وش يقول اخذ نفس وهو يرمي البشت عنه عشان يعرف يتفاهم معها
لكن شوق كل ما قرب تزيد بكى وخوف رفعت راسها وهي تبكي : تكفى لا تسوي لي شي
انصعق نادر : ماني مسوي لك شي بس اهدي اهدي لا تبكين اهدي
ابعد شوي وهو يهديها من بعيد وهي بالقوه لين هدت جلس وهو حاط يده على راسه يناظرها وتوه الحييين يعرف سبب هالزواج السريع
بس مذهوول كيف يزوجون طفله صغيره كان يقدر عمرها وهو يناظرها ماكان يعطيها عمر ابداً اكبر من 15 سنه
جلس بالساعات يحاول يسكتها حزن عليها وهي تصيح وتبكي تكسرت ضلوعها من البكي
طلع برا يمكن تهدى وقف يناظر حوله الدنيا هدوء والناس راحت والوقت تأخر واكيد امه وابوه سافروا وخالته بعد
كلهم راحوا وتركوه مع هالطفله اللي وراه اللي حتى المكياج والفستان ما اخفى طفولتها وضياعها وخوفها
_______________________.
بعد الزواج
كل الناس طلعوا عشان يرجعون وكل واحد ينتظر اهله عند الباب
وكان خلف وعقاب ينتظرون وخلف واقف وهو عليه الكمام
ورفع ساعته يناظر الساعه : عقاب اسمع وصلهم وتعال نبي نسهر في مكاننا المعتاد
عقاب : اصبر لا تروح لحالك
خلف : لا بروح مع ضاري
عقاب : ضاري بعد!
خلف : مشها الليله تكفى ترا ماصدقت ابوي وامي يخلوني الليله
عقاب: طيب طيب
طلع خلف يمشي على مهله متجهه لاسفل الحاره وكعادته ما يناظر حوله
لكن الصدمه كانت لليلى اللي شافته يمشي وهو رافع اطراف شماغه على راسه ويبان وجهه والكمام اللي لابسه ونظارته الطبيه
استغربت هدوءه وانشغاله وتفكيره بس نسبته للمرض وهي تشوف كتوفه نازله من التعب ماهو مثل اول مره شافته
دخلت بيتهم وركضت للسطح وهي تطل من فوق شافته جالس وينتظر وبعد شوي جاء واحد ثاني واخذه وراحوا لنفس المكان اللي يجلسون
رفعت كتفها باستغراب: والله هالخلف غريب
نزلت تبدل ووقفت على صوت جابر: اقول ليلوه بتنامين
ليلى: لا شفيك
جابر : زين جيبي العود وتعالي السطح خاطري انطرب الليله
شيخه: خلاص قاضين مافيكم طب!؟ توكم رادين من عرس ماشبعتوا
ليلى: ما ورانا شي نبي نستانس
جابر: خليها تولي بس بدلي وتعالي
ليلى: من عيوني
_______________________.
وعند نادر
اللي رجع للغرفه وشافها متكوره على نفسها ونايمه وهي تتنهد ضاق صدره وضاقت به الوسيعه ونزل اغراضه وسكر النور ولحفها وطلع وهو شايل هم مايدري وين يروح بس مايبي يجلس يراقبها وينقهر
اخذ طريقه للمكان المعتاد ووقف وهو يشوف ضاري يسولف وعقاب متكي وهو يتقهوى ويتهاوش مع ضاري اللي بعد ما حب عقاب ولا عقاب حبه
اما خلف منسدح وهو ساعه معهم وعشر سرحان لكن فز عقاب : نااادر
التفت ضاري : افاا المعرس وش فيه هج قايلك ماينشد فيك الظهر
خلف بضحك : نادر لهدرجه ميت علينا
دخل نادر بوجهه بارد ومخطوف لونه وجلس
وخافوا من وجهه وقربوا : نادر وش فيك
خلف : امك وابوك فيهم شي
هز راسه نادر: لا
عقاب : اجل وش مخليك تترك عروسك وتجي
ضاري بضحك: ذيي عروس عروس ما تنتخلى
نادر: اي عروس واي بطيخ
خلف: نادر لا تخوفنا قل وش بلاك
نادر سكت وهو مايدري وش يقول والعيال يناظرون بعض بهدوء
نادر بصوت منذهل : العروس المزعومه طلعت طفله
الكل :هاااه
خلف : شلون يعني طفله
ضاري : خبل انت كيف طفله
نادر: اقولكم طفله تعرفون كيف طفله !
عقاب : ياحبك للمبالغه يا نادر شلون طفله وابوها مزوجها هاه!؟؟
خلف : نادر اشرح زين
نادر: هذا اللي بيجنني شلون زوجوها وهي بزر
ضاري : بزر من اي ناحيه
عقاب : تكلم الفيلسوف !؟ مهبول انت وش هالسؤال
ضاري :انت مالك شغل
خلف : سمعونا انت وياه وقت هواشكم ، نادر تكلم
نادر : اقولكم مستغرب سرعة الزواج وتقولون عادي ! فالاخير اطلع متورط بزر عمرها 15 ولاا اقل بغت تموت عشاني بس ناديتها تكسرت ضلوعها تبكي وتصيح
خلف : 15؟ متاكد
نادر : هذا اكبر عمر عطيتها اياه هذا اذا ماهو اقل
عقاب : ياخي يمكن ماهي صغيره يمكن حجمها صغير
نادر: انا ماني خبل انا شفتها بعيني اقولك بغت تموت من الخوف
ضاري : طبيعي بتخاف ياخي عروس واهلها بعيد واول مره تشوفك اكيد بتخاف
عقاب : سبحان الله اللي نطقك بالعقل وانت مجنون
ضاري : شوف ذا الابريق بهفك على وجهك لين تصير عاقل
خلف : والله بلشنا بك انت وياه
نادر: مب وقتكم شوفوا لي حل
خلف : كلمت اهلك طيب !؟
ضاري : يعني معقوله محد قالك انها صغيره
نادر: انا بنجن امي تقول لي كبيييره
فجأه تذكر عقاب وماقدر يمسك نفسه لا يضحك: هههههههههههههههههههه هههههه اصبر اصبر الحين هاذي البزر على قولك اللي ولدت سنة جدك يموت
ابتسم خلف وصد نادر: سبحان الله السنه 365 يوم وكلها وانت مكشر ومعصب والحين يوم صار وقت الجد طرا لك تضحك
ضاري : انا ماحضرت معكم 365 يوم بس 14 يوم علمتني ان هالانسان نكبة على اللي فوق الارض واللي تحت الارض
وقف عقاب وهو ياخذ عقاله ويلفه: شكلك تبي تكون من اللي تحت الارض
سحب خلف العقال : قسم بالله لو ما تنثبر انت وياه لقوم احطك انت وياه على بعض ، فكونا ياخي فكونا نبي نسمع الرجال
جلس عقاب وهو يضرب ضاري برجله لكن حذفه ضاري بالفنجال
خلف: اسمعني يا نادر تعوذ من ابليس وقم رح لبيتك حرام تخليها لحالها وهي على قولك طفله اصبر لصباح والصباح رباح يمكن فيه شي ماتدري انت عنه
نادر: ياخلف انت صاحي انا كل ما اناظرها ينتك صدري
عقاب : والله انا من وجهة نظري اقول يمكن صغيرة سن لكن عقلها كبير
التفت نادر بغضب: صاحين انتم وش كبيرة عقل وش خرابيطه الحين انت وياه كلكم عندكم خوات بعمرها اكيد ما ترضون انهم يتزوجون وبعدين نتكلم عن زواج ماهو لعب ومقارنة بالعمر تراك للحين انت وياه كل ما مرينا البقاله قلتوا بنوقف نشتري لشهد و وجدان حلاو ترا كلها نفس السالفه
عقاب طارت عيونه وهو يناظر ضاري : ولد لا تقول اسماء محارمنا عند الغريبين
نادر: يا شيخ كل تبن كأني اخوك الحين انا بعد غريب
خلف : والله يا نادر معك حق انا مستحيل اتخيل اني اشوف بنت بذا العمر تتزوج الموضوع صعب بس زي ما قلت لك ارجع صل ركعتين ورييح ولا توتر وتحوس نفسك وتحوس البنت معك وبعدين حرام تجلس فالبيت بلحالها يمكن تخاف او يصير لها شي
ضاري : حبيب قلبي الحنون هذا الكلام اللي ينسمع مب بعض الناس
عقاب : اص اص ازين ، المهم زي ما قال خليف ارجع واصبر لين بكره تكلم امك وابوك وتفهم السيره وبعدين تشوف
نادر: يعني ذا الحل
خلف : مافيه غيره
ضاري : وترا ماهي عدله يطلع احد يشوفك جالس هنا وانت عريس وبكره عاد خذ لك اشاعات وكذب
التفت عقاب : انت متاكد انك ما انت مسكون!؟ ياخي تمر عليك دقيقه تقول كلامك المفروض خبل مثلك ما يقوله
وقف نادر ينهي الهوشه : خلاص خلاص برجع وبكره اشوف
خلف : اييه توكل على الله وربك يفرجها
رجع نادر ووقف ضاري : انا راجع البيت اكيد امي تحتري
خلف: زين وحناا بعد بنروح ورانا صلاة جمعه والوقت تأخر
عقاب :وعمي اكيييد واقف يحتري
خلف: يلا يلا
تحرك ضاري بيمشي بس وقفه عقاب : اقول تعال طف النار معي ولملم هالعفش ترا ما اشتغل عندك
ضاري: بتموت اذا طفيت نار ولا..
وقفوا اول ما تحرك خلف بيطفيها وسحبه عقاب: وين رايح
خلف : بطفيها وارتاح من هواشكم
عقاب: خله يطفيها هو وبعدين يكتمك الدخان
ضاري: الحشيمه لخليف والا انت ما انت كفو
اخذ خلف اغراضه وراح وتركهم يتهاوشون من بيشيل الاغراض وصح ان ضاري ماله فتره معهم بس دخل معهم بميانة وروح حلوه لكن ما يسكت على كلام عقاب وعقاب مثله
_______________________.
وفي بيت ابو خلف
كالعاده تنتظر امه وابوه ووعد واخيراً دخل خلف
ابو خلف : يا انسان انت تفهم ولا لا اقولك لا تأخر والحين الساعه 3 وانت توك تجي
خلف غمض بهدوء وهو يعطي اغراضه وعد : لهينا ما انتبهنا للوقت
ام خلف : يا يمه ليه تطول وتخوفنا عليك
وعد : خلاص يا عمتي هذا هو طيب وبخير
ابو خلف : انتي اص اص ننصح من هنا وتخربين من هنا
خلف: يايبه ترا مليت اسبوعين وانا محكور في ذا الغرفه مافيها شي اذا طلعت ساعه رفهت عن نفسي ومعي عقاب
ابو خلف: مايخالف رفه عن نفسك بس بحدود
ام خلف: خلاص روح نام يمه
خلف : بنتظر الصلاة وانام
دخل ابو خلف وام خلف وطلع خلف ومعه وعد
وعد : غريبه اليوم جالسين لين3 !؟
خلف : معنا ضاري ونسولف نص ساعه وباقي الوقت افكك هوشاتهم وراح الوقت ما انتبهنا
وعد: و ولد عمك ذا ما يخلي احد في حاله
ضحك خلف :هذا هو عقاب ما يتعدل لو يموت
وعد :الله يعين خواته بس
التفت خلف يناظر حوله وكان بيت هادي والكل نايم واخيراً قرر يتكلم: على طاري خواته وعد ابيك بشغله
قربت وعد : خير وش فيك
خلف : تعالي فوق السطح احسن لا احد يسمع
وعد : طيب
طلعوا وجلس خلف متوتر
وعد : ترا ادري انك من شهر وانت حالتك حاله وتفكر وتهوجس عشان كذا اعترف بسهوله
خلف : شوفي يا وعد الكلام اللي بقوله لك ما قلته لاحد ولا بقوله لاحد غيرك ولازم مايطلع لاحد
وعد: تعرفني ياخلف
خلف: عشاني اعرفك بقولك ، ا ا السالفه ومافيها سحر
وعد : وش فيها !
خلف: كلنا نعرف سحر ونعرف كيف تشوفني ونعرف وش تفكر فيه
وعد اختصرت عليه: نعرف انها تحبك
قطب خلف حواجبه بضيق: هالكلمه صعبه يا وعد وتجرح كثير اذا ما لقت لها احد يرد عليها بنفس الشعور وانا ما احس اني اميل لسحر ولا اشوفها الا بنت عم وكأنها وحده من خواتي
وعد : ا لكن !
قاطعها خلف :ادري ان السالفه صعبه وان هالشي خطير لكن انا مقدر اتزوجها واعذبها معي ولا اقدر ارفضها واجرحها
وعد : وش تبي اجل!؟
خلف: ابيها هي ترفضني ابيها هي تعيفني وتقول ما ابيه
وعد: خلف تعرف عقاب وتعرف جدي بعد اكيد بيغسلون شراعها والاهم هي مستحيل ترفضك
خلف : يا وعد مايصير مايصير اكمل في هالطريق لازم تقنعينها لازم تشوفين حل انا مدري وش اسوي لكن ما ابي يجي الرفض مني وتنكسر سحر ،سحر ماتستاهل الا كل خير لكن ماهو معي ولا بيدي اعطيها
وعد بشك: وش غيّرك !؟ كنت راضي!؟
خلف بتوتر: اكتشفت اني مقدر ، يا وعد اول شي انا مريض و24 ساعه تعبان ولا مافيني حيل ولا ما اقدر اتصرف بأريحيه
وعد: رافضها عشان مرضك!؟
خلف : لا بس هذا سبب من عدة اسباب انا مابي اخرب علاقتنا بعيال عمي وجدي ولا ابي جدتي تزعل لكن انا مقدر اعيش مع سحر ابد
وعد : مدري وش اقولك لكن وضعك صعب
خلف: انا احاول احلها وابيك تساعديني
وعد : زين بتصرف بشوف وش اسوي
خلف: خليها بينا وانا مستعد اوقف مع سحر اذا رفضت
وعد : والله مدري كيف بنحلها
خلف : المهم يا وعد تكفين اذا لقيتي حل تكفين لا يكون حل ثقيل ولا تجرحينها وتحرجينها ولا يمس كرامتها ابد ولا يضيق صدرها ويبكيها ترا تعز علي دموع بنات عمي وضيقهم
ابتسمت وعد : والله مدري كيف اقنعها تنازل وهي بتخسر كل هالطيبه
خلف : ماهي خسرانه والله انها ربحانه وربي بيعوضها
وعد : الله يعين
سكت خلف وهو ارتاح شوي بس هو فعلاً طول هالفتره كان يحس انه بيرضى ويتقبل بس ماعاد يقدر وحتى لو ما صار بينه وبين ليلى شي المهم يكون متحرر من اي ذنب
كانت وعد تراقبه وهي تعرفه زين وحافظته تعرف متى يحن ومتى يكرهه ومتى يتضايق لكن حالته هالايام جديده وخايفه انه حب ووقتها بتزيد عثراته ورغم انه مراعي جداً وحريص وحنون بس تخاف الحب ينهيه ويبني شخصيه جديده فيه
_______________________.
في بيت الجد قايد
كانت سحر تنتظر عقاب كالعاده واول ما جاء ونام طلعت تبي تنشر اخر الغسيل اللي كانت تغسله لكن سمعت صوت همس في سطح عمها وقربت وهي تعرف صوت وعد وخلف وسمعت كل شي قاله وكل حرف نطق به فهمت كل شي بيقوله خلف وانصدمت حطت يدها على قلبها اللي صار يدق بخوف وهي تسمع هالكلام من خلف اللي طول عمرها تبني احلامها معه
كان ثقيييل الكلام وكان يوجع بس هان وهي تسمعه يحرص على وعد ما تجرحها ولا تزعلها كان فقد واحد مثل خلف صعب صعب حيييل
رمت باقي الملابس ونزلت تبكي كانت تشوفه ساكت ما يعلق كثير على موضوعهم توقعته يحبها بعد لكن خاب ظنها
دخلت بفراشها وهي تبكي بصوت مكتوم مستصعبه كل شي سمعته وعرفته ومستصعبه اللحظه اللي انهارت احلامها فيها وشلوون بترفض خلف وشلون بتقول لا الدنيا والناس تدري وش كثر تحبه كيف بتنكر
ماقدرت تنام ابدد وهي تفكر وش بتسوي وش بتقول اذا جت وعد وقالت ( خلف ما يبيك )
_______________________.
ومن بكره
في بيت ام ضاري اللي واقفه على الباب وتنادي : ضاري ضاري يلا يا وليدي قوم عشان تفطر وتلحق لصلاة
وقف ضاري وهو مييت نوم : طيب يمه طيب
وقف يغسل وجهه وراح للمطبخ يحوس فيه كالعاده ويسوي فطور واخيراً طلع وهو معه الصينيه ودواء امه
ام ضاري : الله يعطيك العافيه يا وليدي
ضاري : الله يعافيك ياميمتي ما سويت شي
ام ضاري : علامك اليوم متأخر
ضاري : امس تاخرت مع خلف ونادر وما بغيت انام الا لين اصلي الفجر
ام ضاري : الله يثبتك يا حبيبي ، وش اخبار صديقك اللي تقول مريض
ضاري : خلف بخير حمدلله امس سهران معنا وطيب وبخير ونادر امس زواجه قلت لك
ام ضاري : ايه الله يبارك له
رفع راسه ضاري بضيق: والله اموره ماهي متسهله يمه
ام ضاري : ليه!؟
شرح لها ضاري السالفه وهزت راسها ام ضاري بضيق: ماهو حرام يزوجون بزر! مايخافون الله
ضاري : والله مدري نادر منهبل الظاهر انها صغيره مره انا مدري كيف قدروا يمشون الامور
ام ضاري: والله يا يمه ماندري عن ظروف الناس لكن الله يعينه ويصبره ماله الا الصبر
ضاري : امين
ام ضاري : وان شاء الله بعد نزوجك ونفرح فيك
ضحك ضاري وهو يبوس يدها: ماهو الحين يمه اصبري شوي
ام ضاري : ياولدي العمر مابقى فيه كثر اللي راح خاطري افرح فيك قبل اموت
ضاري : بسم لله عليك يا يمه لا تقولين كذا ان شاء الله بتطول ايامك وتشوفين عيالي وعيال عيالي بعد
ام ضاري : الله يهديك بس
سكت ضاري وهو ما يبي يدخل في امور الزواج الحين
_______________________.

انتهى البارتâ™¥