منتديات صواديف عشاق - عرض مشاركة واحدة

05-23-2023

الجزء الثالث عشر 13

مشى بخطوات بطيئة ودخل عليهم المطبخ كانت لابسة عبايتها ولافتها عليها واقفة جنب سعدية ناظرها وهي رفعت عيونها ولزقت في سعدية اكثر مشى وجا قريب بعدين غير رايه وجلس على الكرسي الي بالمطبخ
سعدية : اسفه يا دكتور تأخرت وانا ادور الأغراض
هيف بهدوء : مافيه مشكلة
لكن نظراته على إلي منزلة راسها وتلعب في طرحتها قعد يناظرها بهدوء مثل هدوء مكانهم دقق في توتر يدينها من كثر ما تلف طرف الطرحه على اصابعها وترجع تلفها مره ثانية وتتركها وتلفها مره ثانية يحس بالحرارة بكل جسمه شكلها أثر فيه كثير أحساس حس فيه تمنى لو يقرب منها ويرفع شعرها ويتحسس بشرتها دوافع رجل مهي غريبة تعتبر حلال له لكن يحس بينه وبينها حواجز أخيراً نطق وعيونها عليها
هيف : سعدية ماشفتوا عروس تناسبني
تلقائي رفعت عيونها صارت عيونه بعيونها هي عيونها ترمش وتحرك راسها بشويش دليل التوتر وهو شبه ابتسامة طلعت منه
سعدية : اسمحلي يا دكتور تبيني ادور لك عروس وانت عندك اجمل عروس
هيف ومازال يشوف نوت ويراقب تصرفاتها :عروسي مجنونه
غمضت نوت عيونها بقوة وهو حس انه جرحها بس خلاص سبق السيف العذل وطلعت الكلمة منه حتى سعدية الكلمة أوجعتها
سعدية ناظرت نوت إلي منزلة راسها ومغمضه عيونها حطت الكاس على الطاولة وطلعت ونوت ما درت ان سعدية طلعت وهو قعد يطالعها شافها تاخذ نفس قوي يعني تتنهد بصوت مسموع وتفتح عيونها وناظرته والتفتت تبي سعدية لكن ما شافتها صارت فعلا مثل المجنونه حركاتها وتوترها تبي تطلع بسرعه
هيف : شوي شوي وش فيك
وهي ما هتمت لكلامه طلعت بسرعه برى المطبخ

اخذ الكاس وطلع وراهم شاف سعدية ظامتها وهي ترجف بين يديها تمنى يلف وجهها ناحيته ويخليها تشوفه ما يدري ليش اشر بيده لسعدية : شوفي أي غرفة هنا تصلح لكم ناموا فيها
طلع لغرفته واخذ شماغه وحطه على الشماعه وفتح ازارير ثوبه من فوق واستند على السرير وتمدد ويشرب من الشاهي وقعد يتذكر شكلها بالأسود ابتسم

سعدية : اهدي يا بنتي وش فيك
نوت : تعبت تعبت
سعدية : يابنتي كلمية صارحيه بكل شي عشان يوقف معك
نوت : مقدر اذا شفته قدامي ارتبك ما اعرف انطق ولا كلمة
سعدية : روحي له الحين وقوليلة صارحية صدقيني اذا قلتي كلمة طلع الكلام من نفسه
نوت : مستحيل مقدر

نوف : يمه
ام سلطان : وش تبين رجلي توجعني بروح ارقد
نوف : بس كلمه شفتي شكل نوت ما تقولين مجنونه
ام سلطان : أي والله يا حسافة شبابها
نوف : لالا يمه صدقيني يمه البنت تصرفاتها تصرفات عاقل
ام سلطان : انا تعبانه خلي الكلام لبكره
نوف : طيب انا مافيني نوم
ام سلطان : روحي ارقدي بكره الغداء عندنا
نوف: يمه الحين الغداء صراحه ماله داعي الناس تعبانه
ام سلطان : هذي سلومنا وعاداتنا لازم يجون يباركون ويشوفون العروس
نوف : طيب يمكن العروس تسافر
ام سلطان : مهوب رايحين إلا العصر
نوف وتنط جنب امها : يمه وين بيرحون طيب
ام سلطان : اللقافة ما تخلي اهلها بيرحون لمكه يعتمرون ومدري وين بيرحون بعدها
نوف : امممم يمه يصلح اروح معهم
وقفت ام سلطان وراحت وخلت نوف
نوف : طاف محترم وطيحة وجه معتبرة هين يا ام سليطين بس والله نوت مو مجنونه لازم اتعرف عليها اكثر

ضباب ابيض يلف المكان ما يشوف قدامه يمشي يبي يشوف ما يشوف يدور وشوي بيصيح يدورها ما لقاها ويركض بسرعه يطلع من مكان من مزارع ويدخل شوارع وكلها يلفها ضباب اخيرا شافها وهي تمشي راح ركض وراها ... تعالي ... تعالي صارت تمشي بسرعه وهو يمشي وراها هي تمشي وهو يركض مد يدها وماقدر يمسك إلا اطراف شعرها سحب شعرها وقربه له ومسك يدها ولف وجهها له بشهقة ...نوت
طاحت دمعه من عينها ...هيف لاتخليني
قام مفزوع شاف نفسه على سريرة وثوبه مازال علية وشكلها بالحلم مازال مأثر علية استغفر الله العظيم خير خير ان شاء الله قام وفسخ ثوبه ولبس قميص نوم وطلع برى الغرفة وقف عند الدرج تمنى لو سعدية مو موجودة ويقدر يدخل عليها ويشوفها يبي بس يطمن عليها وش قصة الحلم رجع له مره ثانية ناظر ساعته خلاص يأذن الفجر الحين وراسه يوجعه وعيونه ما يقدر يفتحها زين راح توضى وجلس يصلي ويدعي الله ينور له طريقة وما يظلم البنت سمع اذان الفجر على طول طلع يصلي حتى قبل يقيم يبي يروح للمسجد طلع برى بيته واصوات الاذان بكل مكان زايد على ظلمة الجو على شوي بروده احاسيس مختلفة بين خشوع بين بروده بين تعب كلها امتزجت داخل هيف دخل المسجد وصلى ركعتين تحية المسجد واخذ القرآن وبدى يقرا وتذكر صوت نوت بالقرآن وابتسم مشاعر اول مره تمر عليه يحس انه مشتاق لها بس بنفس الوقت ضيقة ليه تخدعه بس انا سمعتها سمعت ان فيه احد يطاردها يبي يستولي على شي لها طلع من افكاره على صوت الإقامة وبدى الناس تجتمع بسرعة ويصفون استعداد للصلاة

مؤيد : بندر وين رايح
بندر : شوفي البزارين بروح اسئلهم
مؤيد تسئل بزران
بندر : وش يدريك انت البزران راح يقولون الاخبار كلها
هشام : وش ورانا خلنا نسئلهم
بندر وهو يمد السلام : الســـلام عليكم
بزران .. يعني اطفال غيوم : وعليكم السلام
بندر : اخباركم يا ابطال
واحد من الصغار يقال انه اكبرهم : الحمدلله طيبين انت شلونك
بندر وهو يبتسم لمرجلتهم : بخير ولله الحمد
مؤيد يناظرهم بدون نفس وهشام يتفرج على المزارع واشكال الزرع وبندر ياخذ ويعطي معهم
بندر : اكيد انكم تدرسون
رد الولد الي يقال عنه اكبرهم : يا الغثى يارب ليش تطري المدرسة
بندر بضحكه : ليش ليش المدرسة مفيدة لكم عشان بعدين تتخرجون وتتوظفون
رد ولد صغير : أي يا ستاذ انا ابي ادرس وكون مثل الدكتور هيف
بندر : الله من الدكتور هف
رد الولد الكبير : هذا الدكتور الجديد الي هنا توه منتقل عندنا
رد الصغير: أي الي تزوج المجنونه نوت
هنا ناظرهم مؤيد وجا مسرع ومسك صغير : نوت من الي تزوجها
قرب الكبير ودف يد مؤيد : ابعد عن ولد خالتي لا تقرب منه
مؤيد : مابي اقرب منه بس ابي اسئله عن نوت
الولد الكبير : انت ما تستحي تسئل عن حرمة والتفت على الولد الصغير :عمر عيب تطري حريم للرجال ما تفهم كم مره اقولك
عمر وهو يبرطم : ما طريتها بس قلت المجنونه
مؤيد : طيب وين بيتهم
الولد الكبير :وش تبي فيهم
سحبه بندر : تعال مؤيد واشر للبزران مشكورين يا شباب
ورجع يكلم مؤيد :انت ما تفهم خلاص عرفنا انها تزوجت الدكتور الي هنا خلنا نروح ننشد وين الدكتور بغيت تفضحنا عند البزران شغل مخك
مؤيد وهو يدفه : امش ورينا وش بتسوي
بندر : انا أوريك

سعدية : يا بنتي الوقت قرب 12 وهيف ما صحى
نوت : وش اسوي طيب
سعدية : روحي شوفيه وصحية
نوت : لا مستحيل أروح له
سعدية : يا بنتي ما يصلح انا اطلع له
نوت : طيب لا تدخلين عليه الغرفة صحية من برى طقي عليه باب الغرفة
سعدية : الله يهديك يارب انا احاول اقرب من بينكم
نوت : لا تحاولين ماتشوفين شلون يناظرني محتقرني لا وبعد يبي يتزوج

هيف : صباح الخير
أنصفق وجه نوت وصار أصفر أكيد سمع كلامي
سعدية : صباح النور يا ولدي طولت وانت نايم
هيف : والله ما قدرت انام البارح حتى لو ما سلطان أزعجني ما قمت
سعدية : الله يوفقة يارب يالله اجل بجيب لك الفطور
هيف : امين
وراحت سعدية ونوت الي كانت لابسه قميص قطني بيتي لونه وردي وقفت تبي تروح معها مسك يدها
هي تحاول تفك يدها من يده وهي مدنقة
هيف : الحين كل ما تقوم سعدية ورآها باكلك انا اقعدي
نوت : مابي
ابتسم هيف لا إرادي على كلامها :اجلسي بسرعه قبل اطقك
رفعت عيونها وافتحتها على الأخير
ضحك هيف : أي خلك شاطره واجلسي
نوت : هذاني جلست هاه وش تبي
هيف وهو يكلم روحه بالله تبيني اقولك اني ابي اشوفك وش وراي خلني ارفع ضغطها : ابيك انتي ابي اجلس معك وشوفك
رجعت حالة التوتر لها وارتباكها الواضح خلاها يكبت ضحكته : وش فيك ترجفين
نوت وهي منحرجه اولا من شكلها مو مرتب ابد وتحس نفسها اقل منه كثير واكيد انها مو معجبته واكيد هو يبي وحده حلوه يعني بالمختصر تحس نفسها ماتستاهله
شاف ملامحها تتغير والحزن يوضح على معالم وجهه صار لا إرادي معالمه تاخذ من معالمها ومن تصرفاتها وتذكر يوم جته بالحلم البارح لا تخليني غير الموضوع مره
هيف : نوت
ناظرته تبي تشوف وش يبي
هيف : تروحين معي
نوت وبصوت مبحوح من الانحراج : وين
هيف : لسلطان عندهم غدا اليوم
هزت راسها نوت معنى لا
هيف : ليش
نوت : مابي
تعجبه كلمة مابي منها تحسسه كأنها طفلة ابتسم : أي ليش ماتبين
نوت : احس هنا بالراحة
هيف ونسى انها كانت تمثل عليه الجنون وحتى اهي نست : لا لا اعترفي اكيد ماتبين تخطبين لي
نوت رفعت عيونها له : ما مسكتك تبي تخطب تدل الدرب
ضحك هيف : ههههههههههههههههه انا طالب من ام سلطان تدور لي اكيد البارح شغلت الرادار
وقفت :الله يهنيك

ابتسم وهو يشوفها كيف تمشي بسرعه للمطبخ

نوت وهي تدخل على سعدية في المطبخ : اوف
سعدية :وش فيك
نوت : مليت طقت كبدي وش أسوي
سعدية تبتسم لها : ليش هيف قايل لك شي
نوت : يبيني اروح معه لاهل سلطان
سعدية : كويس تغيرين جو
نوت : ليش تبيني اروح عشان اشوفهم وهم يختارون له عروس
سعديه وهي تشيل الصينيه:هههههههههههههههههï؟½ ï؟½ شكلنا بدينا نغار
نوت وهي تقرب من المغسله وتشوف نفسها من القزاز العاكس : يحق لي اغار او لا

نوف : اوف اعرست ولا افتكيت منك ياخي روح لمرتك غثها
سلطان : والله ودي ازين على الاقل من مقابلتس بس هي تتزين ومابي اخرب عليها
نوف : يا عيني الدلع للزوجة والاخت لها الدفاشه
سلطان : ياختي وش جاب لجاب
وقطع عليهم صوت مثايل
مثايل : السلام عليكم
سلطان وهو يبتسم لها : هلا هلا والله هلا بالي لها القلب يا هلي ارحبي
ابتسمت مثايل بحراج ومشت بشويش وجلست على الكرسي الي جنبه
سلطان : لا لا هذا ما يفيدني وجا وجلس جنبها ومسك يدها وشوش بإذنها : هاه اخبارك بعدي قوليلي اشتقتي لي
احمر وجه مثايل :احم بخير
سلطان : افا أخبارك بعدي بخير وانا الي احسبك بتقولين ضاقت علي الوسيعه
رفعت عيونها له ابتسمت من الإحراج قعد يطالع عيونها وسرح فيها وهي تطالعه بحب ونسو نوف الي تطالع فيهم
وحبت تنكد على اخوها : اقول يا عرسان ترا الناس بيجون الحين
سلطان يلتفت عليها : وش رايتس تطسين لامي تساعدينها
نوف : بطلع بس باخذ مثايل معي
سلطان : بالله عليك اقول قومي
نوف : بقوم من زين خشتك
التفت على مثايل الي تبتسم بهدوء : الله على الزين والهدوء الله يديمه اقول مثايل يارب تكونين كذا على طول
مثايل :وش قصدك
سلطان : ايوى ايوى الحين بدى يبين انك من طقت نوف
افتحت عيونها :لااا
سلطان : اقول شكلي بقوم لا اطينها الحين وجيب العيد بروح اساعد امي
مثايل تناظر فيه بزعل
سلطان : فديت الي زعلان وقرب منها وباس راسها وقومها بيدينها : ولا تزعلين انتي أرق بنت بالوجود
مثايل من الحيا ما نطقت ولا بكلمة
سلطان : يالله انا بطلع بروح لابوي

مع دخلت ام سلطان ونوف
قربت مثايل وحبت راس عمتها
ام سلطان : مبروك يابنتي شلونتس اليوم
مثايل بصوت واطي الحمدلله
وجلسوا وقعدت ام سلطان تتقهوى وقربت نوف من مثايل : هاه أخبارك أعجبته التبديلة
مثايل بشهقة : قليلة أدب
نوف : مالت على ذا الوجه بس اسئل انتي الي نيتك شينه شوفي وين راح تفكيرك
مثايل تغير السالفه : توقعين بيجون حريم
نوف بقهر : تشوفين خليني اتزوج والله ما تدرين عن شي
مثايل : مو لازم ما يهمني
نوف : هين والله ان تترجيني
مثايل : لاتحاولين حرام ما تسمعين الحديث وروى أبو داود بإسناده عن أبي هريرة رضي الله عنه في حديث طويل فيه خطبة للنبي صلى الله عليه وسلم وجاء فيه ثم حمد الله وأثنى عليه ثم قال : أما بعد … هل منكم الرجل إذا أتى أهله فأغلق عليه بابه وألقى عليه ستره واستتر بستر الله ؟ قالوا: نعم قال : ثم يجلس بعد ذلك فيقول : فعلت كذا فعلت كذا قال : فسكتوا قال : فأقبل على النساء فقال : هل منكن من تحدث فسكتن فجثت فتاة على إحدى ركبتيها وتطاولت لرسول الله صلى الله عليه وسلم ليراها ويسمع كلامها فقالت : يا رسول الله إنهم ليتحدثون وإنهن ليتحدثنه فقال : هل تدرون ما مثل ذلك ؟ فقال : إنما مثل ذلك مثل شيطانة لقيت شيطاناً في السكة فقضى منها حاجته والناس ينظرون إليه … ] وصححه الألباني كما في آداب الزفاف ص 144
نوف :اوف خلاص مابي اسمع شي
ام سلطان : وش تكلمون فيه
نوف : نتكلم عن العرس البارح
ام سلطان : مشاء الله ما بقى احد ما جا
نوف : أي من حبة الله كثر ضيفانه
ام سلطان : والله ان رجلي إلى الحين وهي توجعني
نوف : عشان الردح
مثايل :ههههههههههههههههههههههههï؟½ ï؟½
ام سلطان : أي غدينا يالعجز ابرك منكن نرقص مهوب انتن يالله تقومن تعازمن
نوف : ذبحتونا بالمدح من اول الليل لتالي الليل وحيوا آل فلان وحيوا من حياهم وحنا نبي أشياء لها معنى
ام سلطان : أي تبن أغاني يقوم الشياطين ترقص معكم
نوف : مافيها موسيقى نبي شي يحركنا ويدفعنا للرقص
ام سلطان : يا زين لمن قعد يزعزع ابوتس وخوتس
مثايل :هههههههههههههههههههه بدت الحميا
نوف : اسكتي انا روح وطي اذا سمعتهم يقولون كل ال فلان كلهم لافرق الله شملهم تدرين ذا الاغنية من أي عصر يمكن والله العالم من عصر الديناصورات
مثايل : يوه لا هذيك الي يقولون فيها مدري الظاهر فيها خرفان
ام سلطان : اممه يا مثايل ما تعرفينها جاكم سلطان سريع وبهر الدله حط صينية واذناب خرفاني
مثايل ونوف :ههههههههههههههههههههههههï؟½ ï؟½هههههه يمه تكفين امحق اغنية
ام سلطان :وش يدريكن انتن روحن بس اموت واذوب امحق اغنية صدق
مثايل : لا خالتي ما سمعتي اجل آهـ ونص بعد
ام سلطان : الا ابشرتس البارح يتراقصن عليها وقامن المعصقل وقعدن يتلون عليها
مثايل :ههههههههههههههههههههه
نوف : يمه ليتهن يسمعنتس ذولي يسون مثل اللبنانيات
ام سلطان : غدن عظام ويادافع البلا لا الملابس ولا الاشكال اشكال بناتنا تسني اتفرج على تلفزيون وين راح ذاك الحشمه وين راح ذاك الديرم والكحل الزين
نوف : أي والله البارح أشوف مبالغات في اللبس تخيلي فتحات من الظهر والصدر وعرى اعوذب الله
ام سلطان : ليته بس على ذا الا بناطيل هجل احد يسير على احد وهو لابس بنطلون
مثايل ونوف : ههههههههههههههههههههههههه هههههه
مثايل : الدنيا تغيرت يا خالتي خلاص وقتكم غير ووقتنا غير
ام سلطان : بنتي حينا ما لحقنا على وقتكم حنا أهل الحشمه وانتم اهل التفسخ الله يحمانا
نوف : أي على طاري قديم وجديد وبناتنا وبناتكم قالولي البنات على برنامج 99 حسافة ما تابعته يقولون الاثنين الجاي الجزء الثاني
مثايل : أي الي عن الابتزاز انا شفته
نوف : شفتيه الكل يمدحه يوه مصايب خاصة من النت تخيلي مثايل فيه بنت تشغل الكاميرا وتوريه وجهها
ام سلطان : الحمد الله الذي عافانا مما ابتلاهم استغفري
مثايل : أي الله يعينهن وثقن فيهم
نوف : أي تقول يتعرفن عليهم من خلال دردشات ومنتديات والبنات مساكين يصدقون ذا الشباب
مثايل : وش يسون اذا الولد يسوي فيها أخلاق وانه مشاء الله ويدردش معها ويأخذ ويعطي وتطور شوي وتدخل وياه بالماسنجر ثم يدخل الشيطان بينهم وتعطيه معلوماتها كلها ثم صورها ثمن ينقلب عليها
نوف : أبي افهم البنات ذولي دلوخ ليش تثق بعيال ومن الأصل ليش تروح لدردشات

انتبهوا يا بنات حتى لو يقول لتس الولد كلنا نعرف بعض ومع بعض من زمان ومافيها شي ندردش مع بعض انتبهي تأكدي لو أخته اتحداه يطلب منها تدخل دردشة حكمي عقلتس مكان منحط ما يجتمع فيه إلا ناس فاضيه مالهم شغل حكي على الفاضي ممكن تدخلين منتديات بس بعد انتبهي وحرصي مره ولا تخبين على اهلتس شي حتى لو صار ولا قدر الله شي نار اهلتس ولا جنة حبيبتس على قولتهم .... غيوم "
مثايل : الله يحمي بناتنا وعيالنا اسكتي شفتي الولد
نوف : عساه الخبل طلال
مثايل :ههههههههههههههههه استغفر الله
نوف : اسكتي لا تضحكين معقولة في رجال مثله
مثايل : ممكن ليش لا
نوف : واعزتي لا أمن جابته
مثايل :هههههههههههههههههههه كل ما اتذكر انه مسفرها على حسابه لشهر العسل اموت ضحك
نوف : تصدقين اني ما صدقت احسه يكذب يمكن يلعب على البنات
مثايل : والله مدري مثل مافيه بنات ناقصات عقل اكيد فيه شباب
نوف : او ممكن مريض
ام سلطان : اتركوا ذا الحتسي الي مهوب زين الله يحمانا يارب واشرفي على قهوة الرجاجيل
نوف : ابشري يمه من عيوني
ام سلطان وهي تلتفت على مثايل : الله يحمي بنياتنا يارب ما كثرت المشاكل الا مع الجوالات الي بكميره وانترنت يولونه بنات مراهقات
مثايل : خاله على التربية
ام سلطان : أي والله انتس صادقة

سعديه :ههههههههههههههههه وش تسوين
نوت وهي تكتم ضحكتها : اتزين
سعدية : اغسلي وجهك يابنتي الخرابيط هذي مو الي تجذب الرجال
تقاطعها نوت : من قال اني ابي اجذبه
ابتسمت سعدية : طيب اسمعيني ترا حلات البنات في تصرفاتها ما اقول لا تحطين مكياج حطي بس بشويش بشكل بسيط يجذب مهوب بشكل هذا يبعده اكثر منه يقربه
نوت : من قال ابي اقربه
سعدية : يابنتي لا تكذبي علي اشوف من طلع وهو متشخص وانتي قدام المرايه تلبسين وتتزينين وعيونتس فيها اليوم شي غريب

نوت وهي تاخذ المنديل وتبلله ماء وبعصبيه تمسح وجها ماتبي تعترف ان شوفة هيف بدت تأثر فيها وتوترها

ابو سمر : ليش يابنتي ما رحتي لزواج صديقتك
سمر وهي تسوي نفسها زعلانه : مالي خلق
ابو سمر : طيب وش رايكم اليوم نتغدى برى منها نغير جو
ام سمر بمزح : والله على كيف سمر
سمر : بروح معكم بس على شرط
ابو سمر : اشرطي والي تبين بيتنفذ
سمر : ابي تكلم زوج نوت وتخلينا نشوفها
ابو سمر ونزعج من السالفه : طيب ماتخافين يشوفونها
سمر : انا كل يوم اطل من عند دريشتي ماعاد احد بين وخلاص خلونا نتقابل في مكان مو بيتنا تكفى يبه تكفى
ابو سمر وهزة ترجاي بنته : خلاص ابشري بتصل على عمي يعطيني رقمة واتصل عليه
وقفت سمر ولفت يدينها على ابوها وضمته قوة
ام سمر : شوي شوي على ابوك
سمر بضحكة : اعترفي يمه تغارين
ابو سمر :ههههههههههههههههههه
ام سمر : اغار منتس لا حبيبتي انا اعرف غلاي
سمر : اقول شكلي انا الي بديت اغار
الكل :ههههههههههههههههههههههههï؟½ ï؟½هههه

بندر : قسم بالله انك غبي يا مؤيد عرفنا طرف سالفه خلاص سهل نعرف الباقي نروح نسئل الحين عن الدكتور ونعرف بيته وخلاص صار الحل سهل
مؤيد : امشي وش يدريني عن عبقريتك ذي
بندر بابتسامة شريرة : مابعد شفت شي
مؤيد : اقول امشي بدى يتفشخر علينا
بندر : ههههههههههههههههههه ايوى شوف هذا المستوصف
مؤيد : بخليك انت الي تسئل
بندر : اوكي طال عمرك

اقبلوا على الهندي الي جالس يمسح الأرضيه
مؤيد وبندر : السلام عليكم
الهندي : وعليكم سلام
بندر : وين الدكتور
الهندي : هزا دكتور سافر
مؤيد : يارب وين ذلف
بندر : هدي خلنا نسمع وين راح
الهندي : روهـ رياض
مؤيد : وتقول سافر سفروك قريب قول امين
الهندي : اش قول بابا
بندر بابتسامة : مافيه قول شي متى ايجي دكتور
الهندي : مافيه معلوم بابا هو قول بروح ما فيه قول متى يجي
بندر : يالله مشينا
مؤيد : لاحول ولا قوة الا بالله كل ما قربنا بعدنا خطوه
بندر : وش فيك هو سافر بس البنت موجوده
مؤيد وهو يتذكر : أي خلنا نسئلة وين بيته
رجعوا للهندي
بندر : وين بيت الدكتور
الهندي : شوف بابا روهـ يمشي طريق قدام يلقى سكة امشي امشي بعدين يلف يمين يلقى مزرعه
مؤيد : انت من جدك تبينا نروح على وصفه
طلع عشرة ريال : اقول امش دلنا وين البيت ورجع كمل شغلك
الهندي وضحك يوم شاف الفلوس : شكرا بابا يالله تعال انا وري بيت دكتور هيف
ومشى يدلهم البيت

هيف : اقول شوف الدكتور عبد العزيز هذا اهو جا
سلطان وهو يلتفت على هيف : أي انا الي عازمه المصالح ياخوك نبي اجازات
هيف :ههههههههههههههههه امش خلنا نرحب به بس اشهدنك مصلحجي

سلطان : يا هلا والله يالله حيه
الدكتور عبد العزيز : الله يحييك مبروك
سلطان : الله يبارك فيك عقبالك
عبد العزيز : هههههههههه لا خلاص جربنا وتكفينا وحده
سلطان : افا ليه شوف هيف يدور الثانية
عبد العزيز وهو يسلم على هيف : هلا والله بالدكتور هيف وش اخبارك
هيف : الحمدلله بخير
عبد العزيز : صدق تدور عروس ثانية
ناظر هيف سلطان وعرف انه هت السبحه : لا طال عمرك سلطان يمزح تسدني وحده
ناظره سلطان وستغرب
سلطان : تفضل داخل حياك الله
عبد العزيز وهو يلتفت على هيف : أي هيف نسيت اقولك ان الدكتور احمد جا وتقدر تباشر من بكرة عندنا بالمستشفى وهو توجه للقرية
سلطان : لا ياشيخ احلى خبر مبروك ياهيف
هيف استغرب : من بكره اباشر
الدكتور عبد العزيز : أي من بكره خلاص الدكتور من بكره بيروح للقرية
هيف : طيب واغراضي واشغالي الي هناك وشريت لي مزرعه
الدكتور عبد العزيز : تبيني اعطيك يومين ترتب وضعك
هيف : ياليت والله عشان ادبر احد يهتم بالمزرعه
الدكتور عبد العزيز : خلاص معك يومين

ودخل داخل والتفت سلطان على هيف: وش فيك ما فرحت
هيف : مدري مابعد راح من ست شهور الا ثلاث شهور وحبيت القرية وجوها
سلطان : طيب وسالفة انك خلاص ماعاد تبي تعرس ليكون سويت بالبنت شي
هيف : سلطان الوقت ما يسمح اني اكلمك في شي وانت العصر ماشي خلنا نأجل الكلام لبعدين وقول لامك خلاص لا عاد تدور لي عروس
سلطان وهو يناظره بنظرات استفهام : والله مدري عنك
سمع هيف صوت جواله وطلعه ناظر سلطان : رقم غريب
سلطان : رد عليه شوف وش يبي
هيف : السلام عليكم .... هلا والله أي معك هيف سم طال عمرك هلا والله أي عرفتك ابو سمر يالله حيه وش أخبارك وأخبار الأهل لا أبشرك بخير والأهل بخير ولله الحمد وين طالع عمرك الثمامة متى العصر خلاص ابشر تم وسكر منه
سلطان : من أبو سمر اقول هيف خليتك وجا بينا اسرار
هيف : لا هذا الي كان مسئول عن نوت عازمنا العصر
سلطان :وبتروح له
هيف : أي يقول اهله يبون يشوفون نوت وانا ابي اطلعها
سلطان يانظره ويبتسم : اقول هيف شكل صدق صار بينا أسرار
هيف وهو يدزه : خل تفكيرك منحصر على مثايل بس
سلطان : اقول متى كلن يروح لبيته
هيف : ههههههههههههههههههه طرده محترمة
سلطان : اسكت بس الله يهدي ابوي مدري وش فايدة الغدا