منتديات صواديف عشاق - عرض مشاركة واحدة

05-23-2023

الجزء الثاني والعشرون 22

هيف : يا هلا والله ومرحبا الله يرفع شانكم
ابو سلطان : وشلونك الحين
هيف : أبشرك الحمدلله هو بس قعدت السرير الي تضيق الصدر
سلطان بضحك : يابن الحلال احد يلقى القعده ويعيفها
ابو مثايل : هههههههههه لا حول ولا قوة الا بالله
ابو سلطان : تسنك تبي تجي بوزانه
" بوزانه بجواره .... غيوم "
سلطان : والله انها مهيب شينه
هيف : وش رايك اكسر رجلك ومنها تكون قعدتنا سوى
ابو سلطان : يا شين فالكم
هيف وهو وسلطان يطالعون بعض وكاتمين ضحكهم الشيبان ما عندهم مزح كل شي جدي
سلطان : يبه حنا نمزح
ابو سلطان : بتلقون ما تمزحون فيه غير الكسر والحكي الفاضي
ابو مثايل : طيب يا ولدي كم بتطول المده الي قاعدها على السرير
هيف : لا اقدر امشي على عكازه بس يبي لي يوم يومين عشان اريح جسمي بس
سلطان بجديه : لا تستعجل اصبر
هيف : ودي اروح وجي لو في البيت ترا كثر النوم تجيب ضيقة الصدر
ابو سلطان : يا ولدي احمد ربك والله ان به ناس لهم سنين وهم على سرير المستشفى وانت دكتور وعارف
الكل: الله يشفيهم

سعديه : نوت خلك شجاعه واطلعي شكلك حلو ومشاء الله
نوت : يا سعديه مقدر مقدر
سعديه : ترا لهم نصف ساعه جالسين بلحالهم جايبين حلويات وقهوتهم عشان زوجك
نوت : بس انا مراح اتم هنا كثير
سعدية : اقول بدى فعلا كلام الجنان امشي ومسكتها بيدها وسحبتها معها غصب
نوت دقات قلبها سريعه وتنفسها اقوى منحرجه وش بيكون ردت فعلهم

نوف : يمه والله ان جيتنا غلط
ام سلطان بعصبيه : ليتس ساكته
مثايل : ههههههههههه ويك طاح وجهك
نوف : اقول اها بس
ام مثايل : هم صادقين يا ام سلطان البنت ما طلعت علينا ترانا ما دقينا ولا عطيناهم خبر
تو ام سلطان بترد إلا نوت وسعديه داخلين
الكل أنصدم كان شكل نوت غير صح ما عندها مكياج إلا قلوس وبودره وقلم كلحها
ماخذتها من سمر يوم كانت تبي تلتقي مع هيف بالحديقة وشعرها مجعدته عشان مابه ستشوار بس طالعه مرتبه حيل لبس عادي كانت ام سلطان جايبته بس جسمها فيه جنان خطير مره بهدوء عكس رجفت يديها
نوت : السلام عليكم
الكل : وعليكم السلام
أقبلت على أم سلطان وحبت راسها تحت صدمتها حتى يوم قالت لها نوت شلونك ماردت عليها كانت شاكه البنت مهيب مجنونه والحين تأكدت بس ما بغت تتدخل تبي تشوف تاليها والبنات يوم شافوا كيف سلامها على امهم وقفوا عشان يسلمون عليها و سلمت على الجميع وجلست وهي تفرك يدينها بتوتر
نوت : ياهلا ومرحبا حياكم الله
ام سلطان تداركت نفسها : الله يبقيتس وشلونتس يمه
نوت وهي تحس بعبرة غصت بحلقها : الحمدلله طيبة
الصمت قاتل والمواضيع ضاعت ما درت وش تقول وشلون تبدا اكيد الكل يبي توضيح وش اسوي يا نوت اوضح وقول كل شي ولا ابين بعض الشيء وخلي باقيه
نوت : بروح وبجيب القهوه
ام مثايل : بسم الله عليتس يمه شوفي القهوه قدامتس
ابتسمت بحرج تبي تسوي شي تلقى موضوع تتكلم فيه البنات ناظروها وابتسموا يبون يهدون ارتباكها وهي خذت نفس قوي وتكلمت
نوت : اكيد مستغربين متوقعين تصرفات مجنونه
ام سلطان بابتسامة مره حكيمه وعاقلة : لا بالله مانيب مستغربه من شفتس يمه دريت ان الجنون في صوب وانتي في صوب
ابتسمت نوت لها وش كثر هـ الحرمه مريحه ومحترمه تمنى تضمها تبي تحس بحنان الام
نوف بضحكه : نوت بسالك بس بليز لا تشرهين علي اعتبريه فضول
نوت تبادلها الأبتسامه : تفضلي بالعكس
مثايل : بدى محقق كونان
ضحك الكل على كلمة مثايل
نوف : يعني أنني ما هتميت اقول مثايلوه لا تحطين نفسك مره معرسه وعاقل ترا مو لايق ابد
مثايل : ياشين دور الحماه عليتس اقول وش سوالتس اخلصي
نوف وهي تسوي حركات بيدها ما علينا : ممم مدري كيف اصيغ سؤالي صراحه بس انتي فعلا مثل ما قالت امي كنت تعانين من مره وتشافيتي او وش السالفه وضحكت لا تشرهين ما اعرف اصيغ جمل
ام سلطان تناظر بنتها ورجتها خافت انها احرجت نوت
نوت : هي سالفه طويله مره بس زبدتها اني مو مجنونه كانت لي اسبابي عشان ادعي الجنون
الكل تفاجا مهما كانت اسباب الشخص ما يدعي الجنون ما يتخلى عن مبادئه وخلاقه هذا وانتوا ما دريتوا انها كانت تمشي بدون عبايه ... غيوم
ام سلطان : اجل ربي راضي على هيف يوم ربي رزقه ذا الوجه
ابتسمت نوت لها كانت ام مثايل ما تعرف نوت مره ماخذه بس دور المتفرج وهي ما تحب تتدخل في شي ما يعنيها في الوقت الي بياكل الفضول البنات إلا يبون يدرون بكل شي
نوف توشوش لمثايل : ما كون بنت مبارك اذا ماعرفت بس خلينا نجي يوم بدون العجز
مثايل بضحكه مسموعه : ياويلي على القافه
نوف وهي تقبصها : قصري صوتس فضحتينا شوفي تغمز بعينها يا ردي حظي اذا جينا البيت وش بتقول
نوت : تقهووا فناجيلكم ما شربت
نوف : الحين انفتحت نفوسنا للقهوه بشوفتس
نوت بضحكه : الله يسلمتس يارب
ام سلطان : متى تبدى إجازة ضحيه
مثايل : يمه تونا نقول يا هادي يا كريم
ام سلطان : لا أنا ناوين ذا السنه نخيم
نوف بحتاج : لا تكفوون يمه نسيتي
ام سلطان : عشانتس بتعرسين شهر ثنين
مثايل : ترا بديران دبل كبدنا كل شوي يأجل ذا العرس ما خلص مثلنا كلها في شهر ومشاء الله كل شي تمام
نوف : ياختي حنا راكدين مو مطيورين
ام سلطان : صيته امحق ابني ما عاد به سحى يتكلمن بالعرس يوه الي مهوب مثلنا لا جابوا طاري العرس ودنا الارض تنشق وتبلعنا وتركبنا حراره وانتن تفصختن
نوف : يمه خلوا المهايط زمانا وزمانا خلونا ساكتين قبل نطلع فضايحكم
ام سلطان : نويفه عيني خير قبل يجي علمن ثاني
مثايل : نوف خربتي الطلعه والله اني خاطري بالتخييم
ام سلطان : أي والله عاد بناخذ هيف ونوت معنا بخيمتهم
مثايل : يا سلاااام بتطلع جنان
نوف : حرام عليكم بسمر
مثايل : اخذي مداسيس ولبسي برقع ونظارات ماعلينا منتس نجلس عشان عرستس تبطين
نوف : يارب انكم ما تطلعون
مثايل : نوت ما عندكم ماء ارش بنت عمي على وجهها هي ودعاويها
نوت تبتسم ماعمرها خيمت في حياتها وفكره انها تروح معهم وهيف معها حسستها برجفه خفيفه وحساس حلووو
قطع عليهم صوت سعديه : نوت تعالي شوي
مشت نوت وطلعت تشوف سعديه وش تبي

نوت : هلا سعديه
سعديه : هيف يبي يكلمك بتلفون البيت
نوت مشت بسرعه اكيد يبي شي ضروري : هلا والله
كان يسولف معهم والجوال عند اذنه دقات قلبه زادت يوم سمع نبرت صوتها بس تكلم عكس المشاعر الي بقلبه : نوت ترا حلفت عليهم يتعشون عندي وكل شي طلبته من آدم بيجيبه من برى بس ابي احط عندك خبره
نوت : حياهم الله
هيف : يالله مع السلامه
نوت : الله يسلمك
شعور حلو معقوله هيف يعترف فيني كا زوجه او وش طرى عليه وهيف سرح شوي يبي يشوف وش كان ردت فعل أهل سلطان يتمنى يكلم سلطان ويقوله على الي في قلبه بس وجود الشيبان ما خلاه وسلطان حاس فيه وسمعه يوم يكلم نوت ونصدم وحب يستفسر بس الوقت هذا صعب

ابو سمر بعصبيه : يا كلااااااااااااااااااااااا ااب احد يجي اتفاهم معه
مؤيد : هد هد اعصابك بكره التفاهم مو اليوم
ابو سمر : وش تبون خلصوني أكيد أهلي يحتروني
مؤيد : لا تخاف أهلك بالحفظ والصون
هنا خلا انفجر ابو سمر حس بشي غريب حرارة داخل صدره اتش : نعم وش تقول
مؤيد : اقول حرمتك وبنتك عندنا لا تزعجنا وتصارخ واذا جا المعزب بكره بيتفاهم معكم
ابو سمر : ما اصدق حقير مثلك خلني اشوفهم
مؤيد : احترم نفسك قبل تندم
ابو سمرر تردد عشان زوجته وبنته خاف ينشب معه وينقلب على اهله : طيب وش المطلوب مني الحين
مؤيد : تبلع صوتك وتخليه داخل فمك لحد ما يجي بكره
ابو سمر : طيب ابي اشوف اهلي
مؤيد : ممنوع ما تشوفهم الحين
ابو سمر بخوف : وينهم الحين
مؤيد : مثل ما قلت لك لا تخاف بالحفظ والصون واذا تعاونت معنا مراح يضرهم حاجة
وكمل تبي حاجه مويه اكل
ابو سمر في نفسه من له نفس ياكل

مشئ مؤيد رايح لبندر جهت ام سمر وبنتها كانت الام وقتها ترجف عليها حراره هشام كثر كمية البخاخ وسبب لها الم في حلقها كانه بداية زكام ورتفعت حرارتها سمر تحس بحرارة جسم امها
سمر بخوف : امي امي
بندر وهو كان يقرا شي بجواله ومعطيهم ظهره كلمها وهو نفس وضعيته : وش فيها
سمر : امي مريضه تكفى امي مريضه
هنا بندر ارتجف كلمه تكفى صعبه وخاصه من انسان غالي قرب منهم وش فيها
هنا دخل مؤيد : وش في اصواتكم
طالعته سمر وحست بخوف كان مؤيد الحريم اخر شي يهمه كان اكثر شي يهمه ياخذا اكثر كميه من الفلوس ويسافر لجده عند أهله يبي يسدد ديونه ويرجع لهله ويحل ضروفه
سمر وهي ما همها مؤيد : امي والله لو يجيها شي ما أسامحكم
بندر : مؤيد الحرمه تعبانه
مؤيد : واذا تعبانه وش تبيني اسوي
بندر : خلنا نجيب دكتور
مؤيد : انت تخرف تبي دكتور يشوف سواد وجيهنا ويروح يبلغ عنا
بندر : طيب تبيها تموت
هنا بكت سمر لا إلا طاري الموت
ارتبك بندر يوم شاف بكيها
بندر : طيب انا باخذها لدكتور
مؤيد بعصبيه : بندر تعتب شبر الكلام يوصل لناصر وشوف وقتها وش بيصير عليك
وطلع ما كأن فيه انسانه تحتاج مساعده وين الرحمه
قرب بندر ما عاد اهتم بالحاجز الي حطه بينهم فك ام سمر وخلى بس سمر هي الي مربوطه قرب كرتون وسحب الفراش من تحت سمر وحطه تحت ظهرها عشان يسندها شاف حراره جسمها مرتفعه اخذ جواله واتصل كان قريب من سمر كانت تشوف كل حركه يسويها
بندر بعصبيه وصوت واطي : سعد
سعد : بندر منتب صاحي انا ما قلت لك لا تتصل انت عارف انكم مراقبين
بندر : سعد اسمعني زين الحرمه مريضه
سعد : طيب تصرف انت
بندر : كيف اتصرف
سعد : بندر وش فيك انت افضل واحد عندنا يعطي الحلول مدري وش صار عليك
روح لقرب صيدليه وجيب أي مسكن هي وش فيها بالضبط
بندر بتوتر : مرتفعه حرارتها
سعد : جيب مضاد وانتهينا
قطع عليه المكالمه صوت مؤيد : من تكلم
سكر بندر التلفون ومسك نفسه زين عشان مايبين توتره : اكلم الصيدليه وشوف وش يوصيني فيه
مؤيد : خلاص حليتها روح وجيب لها سم تتسمم فيه
سمر كان مؤيد قاهرها تتمنى لو معها مسدس وتفرغها بصدره شجاعه جتها ومايندرى فعلا تقدر تسويها او لا
راح مؤيد وبندر وقف عشان يروح لصيدليه لكن توقف وكانه انتبه والتفت عليها وهي دنقت ماتبي تطالع في عيونه وهو ارتبك من حركتها : تبين شي
سمر بتردد : أي أي شي يسترني
بندر : ان شاء الله وشي ثاني
سمر تهز راسها كانه يطالعه وهو منزل عيونه تاخرت عليه ورجع يكلمها من جديد : هاه تبون شي
ارتبكت سمر : هاه قلت لا
ابتسم بندر ما قالت وطلع وخلاها
راح بسرعه لصيدليه اخذ مضاد وحبوب للحمى وبنادول للحاجه ومشى لمحل وحتار ما يعرف وش حاجات الحريم
بندر : وين القى عبايات
راعي المحل : بالسوق مو هنا
بندر استحى السوق بعيد وما يقدر يشرح راعي المحل وعلى طول طرى عليه يوم شاف سجاده ومعها جلال بنفس الوقت
كان محل بسيط يعرض معروضات بسيطه
بندر : طيب عطني ثنتين من الأطقم هذي وشاف فرشه خفيفه خذاها وطلع بسرعه خاف يتاخر على مؤيد ومر البقاله وشرى مويه وعصيرات وشبسات كبار ولوزين بالجبن اسرع شي وطلع
مشى لهم وفرش الفرشه وجا يبي يشيل ام سمر تكلمت سمر
سمر : بندر فكني انا بهتم بمي
ارتجف بندر حلو كلمه بندر منها مو قته يا بندر حاول تسيطر على نفسك قرب منها ويبي يفكها بسرعه ومرتبك لا تصك يده بيدها مو الحين ابي كل شي حلال عشان ربي يتمم لي على خير فكه بسرعة و دفاشه وهي منحرجه بس ماتبي تبين حط الأغراض وعطاهم ظهره وجلس اخذ له عصير وقعد يشرب
وهي قربت من امها صعب عليها تسحبها بلحالها بس لو تموت ما طلبت منه قربت الفرشه اسهل لها ودفت امها شوي وصارت توشوش لمها يمه رتفعي شوي وصارت امها تساعدها وقفت وراحت للكيسه وطلعت المضاد والمويه وشربتها وخذت حبه وعطت امها وشربتها مويه وشافت الأغراض وفي نفسها من جده يبيني اكل قدامه
وقف بندر وطلع يبيها تاخذ راحتها

مؤيد : طلعت وتركتهم
بندر بعصبيه : تراهم حريم والبوابه عندها حارس خلهم ارحم انت ما تعرف ترحم

نوت اول مره تستمتع بحياتها كانت جلستها مع البنات غير ردت الروح فيها راحت ترتب الإغراض مع سعديه وتنظف وسعديه تحلف عليها تروح
سعديه : روحي لزوجك يمكن الحين محتاج شي
نوت : خليني اساعدك تنظفين بلحالك
سعديه : روحي هذي شغلتي
طلعت نوت ترددت تدخل عليه كذا او تروح تغير بس جا عنده فضول تدخل عليه بشكلها تبي تشوف ردت فعله
كان سرحان ودخلت وتندمت انها ماغيرت وش بيكون تفكيره الحين بيقول جايه بالتيور الضيق عشان تفتني
طالعها ابتسم لها وهي خلاص فكرت انه يمكن يضحك عليها بس هو كان اسرع منها
هيف : تدرين اني كل الوقت افكر فيك
طالعته بصدمة وهو انحرج فهم تغيرها وكمل : كنت ابي اشوف ردت فعلهم يوم دروا
نوت بابتسامة له : تدري عاد انهم عارفين من زمان
كانت جالسه في مكان سلطان كرسي قريب منه بس هو كان يبيها تقرب منه وتجلس على السرير تلخبط ما درى وش قالت وافكاره وين راحت
نوت بستغراب وش فيك
هيف : ابي ماء
نوت راحت تصب له
هيف : أي وش قالوا
نوت : ابد تقول ام سلطان اني عارفه من زمان
ابتسم هيف : خطيره ام سلطان
ابتسمت نوت : رهيبه مره وقربت منه ومدت الكاس له
ناظرها : تبيني اشرب باليسار افا
ضحكت نوت : الظاهر اعجبك اني أكلك قالتها بعفويه وتندمت ياربي وش فيني
هيف : خليني اتدلع ولا ما يحق لي
نوت : هههه الله حتى انتوا يا رجال تبون التدليع
هيف : ليه ماعندنا مشاعر
نوت : مدري احس انكم جفسين
هيف : هههههههه عطيني المويه يا الناعمه
قربت منه وشربته ريحتها دوخته أي هذا ريحة العطر الي بختها هذاك اليوم وقفت يوم خلص هو يشرب ويخاف يشرق مسك يدها ناظرته بستغراب وحراج
هيف : اجلسي قريب مني ترا ابي اسولف وانا دايم ارقد متاخر
فسح لها مجال وجلست قريب منه وهو يطالعها من فوق لتحت وحمر وجهها وضح عليها
وحب يفتح حوار بينهم
هيف : نوت كلميني عن ابوك
نوت : ابوي توفى من قبل لا أولد كان معه الدكتوراه في علم الفيزياء
هيف : الله كنت اتوقع انه داعيه
نوت : وهو داعيه طيب الدكتور يصير داعيه ما تعرف عبد المحسن الاحمد وخالد الجبير مو دكاتره ودعاه بنفس الوقت
هيف : صحيح كملي
نوت : وانت تعرف كيف طريقة موته
هيف : بس موته حادث
نوت : بفعل فاعل
هيف : طيب ابوك وش اسمه الكامل
نوت : محمد ياسر ....
هيف : لا تقولين من جدك
نوت : وش فيك
هيف : هذا صديق ابوي الروح بروح وشريكه وكان ماسك بعض اعمال الوالد
نوت بابتسامه : الله يرحمهم يعني طلعنا معرفه
هيف : سبحان الله تدرين عاد بشي خطير
نوت : وشو
هيف : ترا محد قالي ان ابوك متزوج وان له ذريه فلوسه متراكمه عندنا كنا بنسلمها للدوله عشان ماله وريث
نوت : لا كان عطيتها جمعيات خيريه وبعدين كيف صديق ابوك وما تعرف اذا متزوج او لا
هيف : يمكن ابو مات قبله بس الي اعرفه انه صديق ابوي ومدري يمكن تشابه اسماء اذا جا بكره بخلي آدم يطلع الأوراق
نوت : ماتهمني الفلوس كثر ما يهمني من سبب موت ابوي
هيف : كل شي بيبان
وطالعها كانت تفكر في ابوها امها حياتها سرحت بعالم اهلها في الوقت الي هيف يناظرها مره وعجب فيها و لأول مره بحياته عدل جلسته وقرب منها نبها حركته وجهه صار قريب من وجهها خلاص ما يقدر ما عاد يقدر يقاوم قرب منها وباسها نوت نصدمت حاول تتحرك بس هو مسك يدها عشان ما تقوم وقربها لصدره بيده اليسار وحط راسه عند رقبتها هي عجبها ودها تدفن نفسها بصدره بس الحيا ذبحها وهو شعور حلو وده ما يصحى منه
هيف بصوت مبحوح : ربي رحمك اني مكسر
حمر وجهها وهو ضحك عليها

وقامت وطلعت على ضحكه العالي اوف ياربي ابي هوا احس الاكسجين خلص
نوت : فديت روووووووووحك