روح عشقتة وقلب فقدتة للكاتبة : بنت البلاد

الجزء العاشر
الفصل الأول
=-=-=-=-=-=-=
الملخص= وفاة فيصل جراء حادث سياره.. عودة المعتمرين بالسلامه.. غياب جواهر عن العمل.. ظهور عيسى الأخ التوأم لخليفه...
.............

شما: أقول بوسعود... ياسه احاول ادخل هالبيانات الي عندي بس مادري الكمبيوتر بلاه ..
بوسعود صد صوبها وشاف ابراهيم قاعد يرمس واحد من العملاء.. : ان شاء الله احين بيي بشوفه لج..
نش بوسعود وقعد يحاول ويا شما وعدل لها الكمبيوتر وسار صوب ابراهيم وترياه يخلص ويا العميل الي عنده ويلس حذاله..
بوسعود: يا ريال شوفيك داش ماد البوز من الصبح ولا تسلم ..
إبراهيم: دخيلك ياي تتشمت فيني رد مكانك.. لأن مالي بارض..
بوسعود تضايق من رمسة إبراهيم: تحريت هالموقف غيرك.. بس أشوفك نفس ماكنت قبل.. وماهقيت اني طايح من عينك لهالدرجة .. او تحيد ان طبع الشماته فيني
إبراهيم: يا ريال شو هالرمسه.. والله اني مفتشل منكم كلكم..
بوسعود يقاطعه: وليش كلنا.. صد يطالع صوب شما ورد صوب إبراهيم.. شخص واحد بس هو محور الي صار كله.. والي عليك تعتذر لهالشخص..
صد ابراهيم يطالع بوسعود بنص عين: يصير خير.. رد مكتبك..
وشوي الا اييه واحد : السلام عليكم..
رفع ابراهيم عينه من شاف الريال تيمد مكانه ماقدر يحرك حتى رمش عينه من الصدمه.. وفي نفس الوقت مايقدر ينكر انه خايف.. صد صوب مكتب شما شافه فاضي..
ابراهيم: خير اخوي اي خدمه..
هزاع: هيه لو سمحت بغيت اقدم طلب على رقم يديد قالو لي ايي عندك لأن عندك لسته الأرقام اليديدة..
ابراهيم تم يطالع هزاع ولا يحرك عينه .. وحرك ايده صوب الدرج وطلع الورقه الي فيها وعطاها لهزاع: شوف واختار من بينهن..
هزاع: ابا رقم غاوي..
وشوي الا تيي شما تشوف هزاع .. خافت للحظة.. بس تمالكت نفسها: يا حي الله ولد عمي.. شو يايبنك هني؟
هزاع ابتسم لها وشافها ونزل راسه: ماشي ياي اختار لي رقم حلو..
شما: جان قلت لي .. كنت بتنقى لك رقم وبييبه لك
هزاع: كنت ناوي اخبرج بس استحيت تبين الصدق..
شما: ماعليك اخوي ابراهيم بيساعدك اكيد عنده لستة أرقام حلوة..
ابراهيم من سمع رمسة شما يوم قالت اخوي.. صدق افتشل من اللي سواه وتلوم أكثر.. كان وده الأرض تنشق وتبلعه من فشلته.. لكن بوسعود يوم سمع شما صدق كبرت في عينه هالبنت.. اخلاق وادب واحترام وكل شي..
وخلص هزاع أموره بسرعه من بعد ما اختار الرقم وتوه بيظهر زقرته شما..
شما: هزاع تعال بغيت ارمسك في موضوع..
هزاع: هلا بنت عمي خير..
شما: الصراحة مادري شو بتكون ردة فعلك .. ولا اخاف تفهمني غلط.. بس انت قلت لي تبا تتغير صح ولا لا..
هزاع: صح..
شما: انزين .. وانا اباك تتغير واساعدك لهالتغيير.. واللي اباه منك ماتنفعل من الي سويته ..
هزاع عقد حياته: خير .. شغلتي بالي..
شما وهي تلعب بالقلم الي في إيدها.. وتوطي صوتها عشان ابراهيم مايسمع: انا رمست ربيعتي الي فالدوام.. وقالت لي شي شواغر فالإتصالات.. ويقبلون اذا كان عندك شهادة ثانويه عامه .. فإذا بغيت .. ييب لي اوراقك وشهادتك وكل شي وبقدم لك.. وان شاء الله خير..
ابتسم هزاع وفعلا حس ان هاي خطوة حلوة تساعده على التغيير.. ولكن للحظة تذكر الفيديو ونزل راسه متضايق: بس اذا شافو الـ..
قاطعته شما: شو يضمنك ان كل الي قاعدين حواليك ماعندهم شرات سوالفك.. أو انت الي كنت تسهر وياهم ماكان فيهم واحد يداوم في مكان ما..
ابتسم هزاع كأنه متفائل من كلام شما.. فعلا شجعه كلامها.. : خلاص ان شاء الله بيمع اوراقي وكل شي لازم وبييبه لج.. وماتقصرين والله جميل ما انساه لج..
شما: هذا واجب .. انت بحسبة اخوي.. وانا ماسويت شي اكثر من واجبي
هزاع: الله الشاهد انج سويتي زود وزود..
شما تقاطعه: اخبرك نكمل رمستنا فالبيت.. مافيني يتحرون شي ثاني هالموظفين..
هزاع: الناس فاضيه للرمسه بس.. انتي بس أشري قولي لي منو لعوزج وصدقيني لأراويه نجوم الظهر..
شما وهي تتطالع صوب إبراهيم الي كان يسمع رمسة هزاع وخايف ان شما ترمس عنه: محد الحمد لله مرتاحه والكل هني يحترمني (وهي تشد على الرمسه وتقولها بصوت عالي تقصد ابراهيم) ويقدرني..
هزاع: يالله عيل بسير اساعد عموو فالمطبخ.. اتعلم لي شي بدال هالبطالية
شما: هههههههه
وراح هزاع وشما فتحت شنطتها طلعت تليفونها شافت 10 مسد كولات.. و3 مسجات.. وحده من هالمسجات كانت من سلطان
( رجعت من العمره بالسلامه)
ومن بين المسد كولات .. كان رقم خلود..
استغربت.. مسج من سلطان واتصال من خلود.. لا اكيد في شي صاير.. اتصلت في خلود على طول.. وبعد عدة رنات ردت عليها..
خلود: السلام عليكم
شما حست بالتغيير في صوت خلود.. : خلود .. شو فيج؟
خلود بدت تصيح .. : شما ريل اختي مااااااااات.. نوره اختي ترملت..
شما: شوووووو.. انتي شو تقولين؟
خلود: الي سمعتيه.. نوره ترملت وبناتها تيتموا.. آآآآآآآه يا شما حالتنا حاله فالبيت ..
شما: لا حول ولا قوة إلا بالله.. عظّم الله أجركم وصبركم على مابلاكم..
خلود: اجرنا واجرج .. وربي يصبر اليميع يارب..
شما: خلاص انا فالدوام احين ماروم ارمس وايد من اظهر بمر عليكم البيت..
خلود: حياج الله..
بندت شما الخط ويلست سرحانه وهي تفكر في نوره رغم انها ماتعرفها ولا شافتها.. وتذكرت سلطان.. يحليلك يا سلطان.. وانت ناقص.. صارت لك مشاكل ورا بعض.. الله يعينك ..
.. .. ..
خلصو الدوامات كلهم وطلعوا البنات من صفوفهم مستانسين لأنهم بيردون البيت
عذاري: يالله عيل نتلاقى باجر.. لا تنسين اتييبين الصور.. ابا اشوفهم..
فاطمه وهي تضحك: بستأذن من ريلي أول عقب بييبهم..
عذاري: اوننننننه من متى هالأدب.. خلاص عيل عالأقل هاتي صورتج انتي اشوف كيف كان شكلج..
فاطمه: اوكي اليوم بسير استلمهم من الإستيديو..
ومشت فاطمه وهي شاله شنطتها .. ولابسه مريول المدرسة.. وقفت تتريا جاسم .. وتمت اتدور بين السيايير وتتطالع مالقت سيارته.. استغربت.. طلعت من البوابه قعدت تشوف برع فالباركنات وين السيايير موقفه عن تشوف سياره جاسم.. بس ماشي فايدة ماشافت سيارته.. وتوها بترجع صوب بوابه المدرسة سمعت صوت واحد يزقرها..صدت شافت فيصل.. ماعرفت شو تسوي من فرحتها بشوفته.. تزاعج ولا تصرخ.. ولا شو تسوي.. تمت واقفه مصدومه .. وماحست إلا بهرن سياره خلاها تصحى من السرحان ومشت بسرعه صوب سياره فيصل وركبت حذاله..
فاطمه: السلام عليكم..
فيصل يطالعها بنص عين وغضب: وعليكم السلام.. من ساعه اشوفج اتدورين بين السيايير.. ممكن اعرف على شو اتدورين بالضبط؟
فاطمة وهي مستغربه منه: سياره جاسم..
فيصل: ليش ماتعرفين سيارته عشان توقفين من داخل المدرسة تشوفينها..
فاطمة: بلا اعرف.. بس بالعادة يوقف قريب الباب.. واحين مرت اكثر من 10 دقايق ماشفت سيارته .. قلت يمكن واقف بعيد طلعت عشان اشوف..
فيصل: آهاا..
فاطمة وهي حاسه بغصه: بعد هالفتره الي ماشفتني فيها تستقبلني بهالطريقة..
فيصل تلوم يوم شاف الحزن في عيونها .. اااااه من هالعيون ماقدر اشوفها زعلانه.. : اسف بس مادري حسيت بغيره غير طبيعيه يوم شفتي اتدورين بين السيايير بمريول المدرسة
فاطمة تمت ساكته ومتضايقه من فيصل وتصرفه.. لكن ماحبت انها تبين ضيجها وتضايجه زود: انزين ماقلت لك .. امتحنا تجريبي فالفيزيا .. جان اييب درجة كاملة.. شفت مرتك شاطرة
فيصل ابتسم لها مستانس: والله .. مبروووك.. عقبال ماتييبين نسبه عاليه وترفعين راس ريلج..
فطوم: انزين فيصل بالنسبه لموضوع زواجنا فالصيف ماتحسه بسرعه؟
فيصل: لا ليش؟؟ انتي تبين تأجلين العرس؟
فطوم: احس لو تتريا اني اثبت عمري فالدراسه شوي عقب ..
فيصل: لا انا اقول لو نعرس فالصيف احسن..
فطوم: بس انا موووول ماجهزت شي مابيمديني الوقت
فيصل: بنعرس على بداية 8.. بيكون عندج شهر تقريباً تجهزين فيه للعرس مايكفيج..
فطوم وهي تفكر: بيكفيني لو بضغط على عمري هالشهر..
فيصل: خلاص اضغطي على عمرج وفالنهايه بنستانس لأن بنكون سوى تحت سقف واحد
سرحت فاطمة في تفكيرها شوي.. وهي تتذكر ان فعلا هالحلم الي تمنته طول عمرها انها تجتمع ويا فيصل تحت سقف واحد.. وتعيش باقي حياتها وياه..
.. ..
..
نزلت تحت تتريا ابوها يمر عليها عشان ترد البيت .. طلعت من البوابه توايج اذا ابوها وصل أو لا.. تنصدم من الي تشوفه .. وتهز راسها وتوها بتدخل البنايه مره ثانيه تتجابل ويا سليمان نزلت راسها: السموحه منك..
سليمان يمشي عنها : لا ماعليج..
انتبهت مجد ان سليمان بيظهر وبيشوف الي شافته.. زقرته بسرعه: استاذ سليمان..
صد صوبها: نعم..
مجد وهي تدور على سالفه ترمس فيها بس مب عارفه..
سليمان: نعم مجد زقرتيني؟
مجد: هيه بغيت اسألك عن التقييم اليوم ان شاء الله حطيت لي تقييم اوكي..
سليمان: كل واحد ياخذ على مستوى جهده..
مجد: هيه زين يعني.. وعن الشغل ترا مايعطوني شغل وايد احس عمري بطالية..
سليمان: خلاص بقولهم من باجر يكرفونج كرف...
مجد: هيه زين عشان اتعلم.. امم وايد ارمس.. انزين شي ثاني.. ممكن اغيب باجر .. لأن بصراحة بغيت اغيب اليوم بس تذكرت ان شي تقييم فحضرت.. لأن عندنا عزا وقلت اغيب (هيه مابغت اتغيب بس البنت مب محصله سالفه ترمس فيها عشان تشغل سليمان ومايشوف جواهر وهي تتريا اهلها عند باب المبنى) ممكن يعني ..
سليمان: عظم الله اجركم.. افا والله جان غبتي اليوم كنت بعذرج.. ماعليج معذورة.. والدوام لله..
مجد: تسلم استاذ..
سليمان: تامرين بشي ثاني..
مجد : لا سلامتك..
فتح سليمان باب المبنى شاف ابو مجد واقف.. يعرفه لأنه دوم يشوفه. : مجد ابوج برع..
مجد: ها .. شكرا..
ومشت بسرعه وراه وركبت السياره وراحت.. ياربي انا شو الي خلاني استر على جواهر.. جان خليته يشوفها عشان يفكها مني.. لا لا لا .. عن يتحراني شراتها عقب لأنها ربيعتي .. مافيني .. تزول استر عليها ولا اني افضحها.. الله يعين اهلها لا دروا بينجلطون اظني..
عبدالعزيز: مجد في شو سرحانه؟
مجد: ها ابويه.. لا ماشي كنت افكر في نوره ابا اروح لها..
عبدالعزيز: الله يصبرها المسكينه.. ترا احين بنسير لها لأن امج ويدتج هناك بعد..
مجد: هيه زين تسوي ابا اكون بقرب هالبنت المسكينة.. غامضيني عيالها..
عبدالعزيز: هيه اليوم العنود طول الوقت تصيح تقول ابا بابا.. ماحبكم احب بابا بس..
مجد وهي متأثره: مهره صغيره على انها تستوعب فراق ابوها وتحس بغيابه..اما العنود فوايد تحب ابوها كنت ملاحظة.. كل ماتشوفه تربع في حضنه..
عبدالعزيز: شو تقولين كانت تدخل ميلس الرياييل غصب عشان تيلس في حضن فيصل.. الله يرحمه ويغمد روحه الجنه
وصلوا بيت شيخه ( أم خلود) ونزلت مجد عشان تدخل البيت.. جابلت سلطان في دربها وكانت متغشية..
مجد: اشحالك سلطان؟
سلطان صد صوبها ابتسم لها من ورا خاطر: الحمد لله.. انتي اشحالج؟
مجد: بخير الحمد لله.. اسمح لي ماتحمدت لك بالسلامه بس انت عارف كيف صارت الأمور..
سلطان: ماعليج بنت خالي معذورة..
مجد: كلهم داخل..
سلطان: هيه ادخلي حياج.. توها بتدخل سمعت صوت سياره تدعم شي فزت وصدت وراها.. وسلطان ربع يوايج برع بيتهم يشوف شو الي صاير.. شاف سياره داعمه درام الزباله .. لكن ماصار شي قوي فالسياره.. ابتسم غصبن عنه .. نزلت صاحبة السياره وهي مصدومه وخايفه.. وانصدم سلطان يوم شافها.. تذكر هالويه .. لأنه في عمره ماغاب عن باله ولا نساه.. وابتسم من كل خاطره وتقرب شوي صوبها
سلطان: سلامات سلامات..
صدت شما صوبه من شافته استحت وحجت راسها: مادري شو بلاني نسيت عمري دست على البترول بدال البريك ودعمتها..
سلطان: يفداج..
شما تمت تتطالعه نص عين: درام زباله يفداني ها.. ماعليه.. اوه سوري.. عظم الله اجرك ..
سلطان تنهد وهو يتذكر حال اخته: اجرنا واجرج .. كيف عرفتي؟
شما: اليوم خلود خبرتني وقلت لها لازم ازوركم وعطتني العنوان ماشاء الله سهل..
سلطان: انزين حياج ادخلي.. وعن موترج خليني انا بتصل فالشرطة عشان التقرير وبسميه بإسمي .. لأن على ماعتقد انتي اقل من 25 سنه .. وبيدفعونج التأمين 10% من قيمة التصليح.. فبخليه بإسمي احسن..
شما: لا ماعليه لا تعب روحك..
سلطان: عطيني السويج .. والملكية فالسياره ؟
شما وهي مفتشله: هيه فالسدة بتلقاها في ظرف.
سلطان: خلاص خير ان شاء الله..
ودخلت شما البيت واتصلت في خلود..
نزلت خلود واستقبلت شما..
خلود: حياج الغاليه..
شما: عظم الله اجركم ..
خلود: الدوام لله.. ادخلي..
دخلت شما وشافت الصاله ممزوره حريم من الأهل.. ودتها خلود عند امها عشان تسلم عليها..
خلود: أميه هاي شما ربيعتي الي رمستها عنج..
شيخه ماكانت مركزه فالبداية وعقبها تذكرت انها شما الي سلطان ناوي يتزوجها..: هيه حياج بنتي .. تفضلي..
شما: عظم الله اجركم خالو.. والله يصبركم يارب..
شيخه: اجرنا واجرج الغاليه..
تقربت مجد من خلود ويودتها: منو هاي..
خلود: يوزي عن لقافتج الوضع مايسمح.. هاي شما.
مجد وهي تحايس بثمها تحاول تعرف منو شما.. بس ماعرفت.. : اي شما..
خلود: لحووووول.. انتي فضيحة والله.. هاي الي يباها سلطان..
مجد : هيييييييه (قالتها بصوت عالي مب منتبه على عمرها .. يودتها خلود من ثمها)
خلود: اسكتي فضحتينا..
جلثم: انتي ايه وين تتحرين عمرج ياسه.. استحي وشوفي الوضع كيف مايسمح.. صدق انكن بنات خريشات مامنكن فايدة..
مجد قفطت يدام الحريم من رمسة يدتها .. وعطتها خلود نظره انج تستاهلين الي ياج..
وبعدها بنص ساعه استأذنت شما وظهرت من البيت عشان ترد بيتها.. ظهرت وياها خلود.. وتوها مجد بتلحقهم.. ضربت جلثم ريل مجد بعصاها..
مجد: أي.. شو ها..
جلثم: تعالي وين سايره..
مجد: بسير ويا البنت اوصلها عيب..
جلثم: ماعليج انتي .. انثبري يلا..
يلست مجد وهي تحرطم.. : افففف.. وفي لحظة غفلت يدتها وظهرت بسرعه.. شافتها لطيفه وهزت راسها واخفت ابتسامتها.. ربي يحفظج يا بنتي..
طلعت مجد تلبس نعالها (اكرمكم الله) بسرعه ومانتبهت انها لابسه كل فرد مختلف.. بس اثنينهم للبيت.. لكن كل واحد لون.. عدلت شيلتها .. وغطت نص ويهها.. وشافت خلود واقفه ترمس سلطان.. وهي تبا ترز بويهها بس تستحي..
في بيت شيخه الحوي كله عباره عن زرع.. ماشاء الله حويهم كبير وايد.. يقدرون يبنون فيه فيلا من مساحته.. ومساحه صغيره خلوها للسيايير.. كانت مجد واقفه مكانها متحرقصه تبا تروح وتسمع الي يدور بين سلطان وخلود بس مستحيه.. تمت واقفه تتطالع من بعيد .. الا وتحس بأن في شخص وراها يطالعها..
صدت شافت أحمد واقف يبتسم لها وهو لابس نظارته عن الشمس.. وواقف تحت وحده من الشير الي فالحديقة..



قفطت مجد من الموقف وابتسمت من فشلتها..
مجد: هو انا كنت ابا ادخل البيت بس قلت اشم هوا شوي قبل لا ادخل لأن الجو حلو..
أحمد ابتسم لها.. ونزل نظارته : هيه صح وايد حلو الجو اليوم.. حتى من حلاوته قمتي تشكلين فالألوان.. فرد أحمر وفرد أصفر..
استغربت مجد ماعرفت أحمد شو يقصد.. : كيف يعني مافهمت؟
أحمد يأشر بنظارته صوب نعالها.. نزلت راسها مجد وشافت النعال افتشلت صدق.. لأن شكله كان يضحك وايد.. هههه كل زنوبه شكل ولون... صدق اني خديه ولا حسيت اني لابسه فرق.. من لقافتي استاهل..
بسرعه دخلت البيت وأحمد يضحك عليها.. خطفت خلود وهي متغشيه .. ووياها سلطان مستغربين من احمد يضحك ويا منو..
سلطان: شو بلاك تضحك؟
أحمد: ها.. لا ماشي.. بس تذكرت شي..
خلود: تدرون .. ودي اشوف الإبتسامه في ويه نوره..
أحمد: الا اشحالها نوره؟
خلود: لا تذكرني دخيلك.. قلبي يعورني عليها.. كله تصيح وتصرخ تقول انتو جذابين.. وماتهدأ الا عقب مانقرا عليها قرآن تيسلي وتيود المصحف وتقراه..
أحمد: ربي يصبرها الموقف صعب وايد..
سلطان: هيه الله يعينج يختي..
أحمد: الا صدق شو سالفه الشرطة ؟؟
سلطان: ماشي ربيعة شما كانت داعمه وقلت خل الدعمه بإسمي لأن عمرها اقل عن 25 وتعرف قوانين التأمين كيف..
أحمد وخلود مستغربين.. لكن خلود فاهمه كل شي بس ضحكت.. : اقول الظاهر خذوا عقلك وايد لدرجة ان اسم اختك بعد صار على اسمهم..
سلطان: اوه انا قلت شما.. اقصد ربيعه خلود..
أحمد: اهااا جي السالفه عيل.. ماخذين عقله.. الله يعينك عيل.. اسألني وانا اقولك عن الحب وسواياه..
سلطان: تدرون .. انتوا متفيجين.. نحن في عزا وانتوا في عالم ثاني..
خلود وهي تدخل البيت: اسأل روحك بالأول ..
أحمد مشى صوب سلطان: امش خل ندخل ميلس الرياييل واسكت الله يخليك عن تسمعك يدو تحشرنا..
.. .. .. ..
عبيد: انتي شو فيج من طلعنا من المستشفى وانتي تتحرطمين..
حور: أقولك مافيني شي وانت مصر الا توديني من هالمستشفى للثاني.. غصب اتطلع ان فيني شي..
عبيد: مب اني ابا اطلع فيج شي.. ياحبي يا قلبي.. افهميني.. كل الي اباه اطمن عليج وبس.. صار لج فتره تتعبين وماندري شو السبب
حور: ارهاق وبس
عبيد: انزين انا انسان ابا اطمن على مرتي وولدي .. عندج مانع..
حور تبتسم له: لا ماعندي مانع...
عبيد: انزين وين تبا تتغدى مرتي حبيبتي اليوم؟
حور: بيت عمتي شيخه
عبيد تم يطالعها وهو ماد بوزه: حريم مو ويه خير.. نعزمهم يقولون مانبا.. واذا ماعزمناهم يحتشرون..
حور: هههههه لا ماقلت مابا بس تدري من واجبي اكون قرب بنت عمتي هالأيام .. هيه محتاجة لنا
عبيد: هيه والله يحليلها غامضتني..
حور: عبيد .. الله يخليك اترجاك لا تسرع ..
عبيد يبتسم لها: خايفه علي؟
حور: اخاف عليك من نسمة الهوا.. انت اقرب الناس لي من بعد امي وابوي كيف ما اخاف عليك
عبيد: ربي يحفظج لي.. بعدني اتذكر موقف شهر العسل يوم كنتي في نص الشارع.. لوهله حسيت اني بفقدج والله يا حور كنت حاس الدنيا دايره في راسي .. مب متخيل هالموقف.. كيف نورة تتحمل موقف فراق ريلها صعب والله صعب..
حور: هيه والله .. ربي يعينها ويصبرها
عبيد: آمين يارب..
.. .. ..
..
الساعه 6 المغرب..
خوله وهي تتقرب من خليفه: انزين يعني بيوصل الساعه 1 فليل.. وشو بتقول لعمتي؟
خليفه: مادري انا بسير احين برمسها والله يعين..
خوله: تدري احس السالفه كلها معجزة من رب العالمين..
خليفه: صدقج.. يعني مشكلتي انحلت بطريقة موووووول ماتخطر على بالي..
خوله: احس من دعوة محمد ولدي..
خليفه: كيف يعني.. ومحمد شو دراه..
خوله: سلمك الله ذاك اليوم كنت اصيح.. دخل عندي محمد يقولي ماما انا سمعت كلام يدو.. تصيحين عشان بابا بيتزوج... يلست اتطالعه مارمت ايود عمري صحت زود.. جان يتقرب مني ولوى علي.. قالي .. انتي قلتي ان الله يحبني صح لأني اسمع كلامج.. قلت له هيه.. قالي انا اسمع كلامج .. يعني الله يحبني... بقول حق الله ان مايخليج اتصيحين .. والمسكين مب عارف شو يعني انك بتتزوج وحده ثانيه .. بس عشان دموعي قال هالكلمتين.. وربك يستجيب دعوة الطفل..
ابتسم خليفه: الحمد لله رب العالمين ان المشكلة انحلت.. وان الله ظهر لي اخوي الي صدق مشتاق له..
خوله: انزين خل نسير نقول لعمتي على الأقل نمهد لها الموضوع..
خليفه: يلا ..
نشوا الثنينه وراحو الميلس شافو ام خليفه ياسه ويا محمد وتسولف وياه.. قعدوا حذالها.. وتموا يشاركونهم السوالف.. وبعد لحظة صمت .. اشرت له خوله بأن يبدأ..
خليفه: امييه .. تذكرين اخوي عيسى الله يرحمه..
تنهدت أم خليفه .. ونزلت راسها وحست بغصه : اااااه ضناي الي مادريبه في أي ديار هو أحين..
خوله: ترحمي عليه عمتي.. هو عند رب العالمين..
أم خليفه: خمس سنين والكل يقول نفس الرمسة.. وتوفى ابوك وهو يقول ان عيسى مات... بس قلبي يقول غير جي.. احس بقلب ولدي بعده ينبض بس مايندرابه بأي ديار.. هالإنجليز مايرحمون أحد ولا يخلون رحمة ربنا تنزل.. ماتشوف العراقيين والفلسطينيين والأفغان ينجتلون من تحت ايدين هاليهود الخياس..
خليفه: بس اميه السفاره ماقصرت ودورت عليه .. ولكن ماشي اي اخبار عنه .. انحبس ومن عقبها اختفت اخباره..
أم خليفه وعيونها تدمع: انت وابوك .. منعتوني وماخليتوني اسير هناك ادور على ولدي.. احساسي يقول غير الي تقولونه كلكم..
خليفه: يعني تتوقعين ان عيسى في أي لحظة يدخل من هالباب ..
تصد ام خليفه صوب باب البيت.. وتمسح دمعتها.. : انا غرفة اخوك ماهبشتها من اليوم الي سمعت انه ضايع.. لأني عارفه انه بيرجع لها.. وكل يوم ابخر واعطر الغرفه .. اقول اليوم بيرد .. واذا مب اليوم باجر..
تأثرت خوله .. حست ان ودها تفرح قلب هالمسكينة وتقول لها ان ولدج اليوم بيوصل وبيدخل من هالباب.. نشي وعطري له غرفته وزهبي له كل الي يحبه.. راجع لج وهو كله شوق للقياج.. بس مب قادره وخليفه نفس الشي وده .. بس عيسى موصنه مايقول.. وغيروا السالفه عشان مايضايقون ام خليفه زود..
ومرت الساعه وعالساعه 12:30 ..
خليفه: اميه وين سايره؟
ام خليفه: بسير احط راسي .. تأخر الوقت..
خليفه: لا امي ممكن تلبسين عباتج وتيين وياي؟
ام خليفه تتطالعه مستغربه: ايي وياك؟ وين؟
خليفه: تعالي وبتعرفين..
ام خليفه: لا مب يايه لين ماتقولي... وين بتوديني هالحزة..
خليفه: بلاج امي زايغه جي.. تراني ولدج ههههههه وين بوديج يعني..
أم خليفه تصد صوب خوله الي كانت لابسه عباتها وميوده ايد ولدها محمد: يلا عمتي نشي خل نسير.. وبتعرفين فالدرب..
أم خليفه مستغربه منهم..: انزين بييب برقعي وعباتي وبيي..
وعقبها يتهم ام خليفه وهي لابسه برقها وعباتها وطلعوا من البيت وركبوا السياره
ام خليفه: وين توديني؟
خليفه: المطار..
أم خليفه: ويدي.. بتسفر أمك؟
خليفه: ههههههه بشكاره انتي الله يهداج عشان اسفرج.. لا سايرين نستقبل ضيوف..
ام خليفه: ماحيد عندنا حد مسافر وبيرجع..
خوله: عمتي لا تستعيلين بنوصل وبتشوفين
ع زحمه درب المطار.. وصلوا شوي متأخر.. عيسى لأن ماكان عنده وايد اغراض وصل بسرعه.. وكان يترياهم برع.. واتصل على تليفون خليفه الي كان توه يبركن السياره..
عيسى: وينك ياخوي.. انا وصلت؟
خليفه: خلاص ثواني بس ابركن الموتر..
ام خليفه صدت صوب خليفه لأنها كانت يالسه حذاله وصوت التليفون عالي.. حست ان الصوت الي سمعته مب غريب عليها.. هالصوت حرك قلبها بطريقة غريبه.. تعوذت من ابليس وصدت الصوب الثاني..
نزلوا من السياره ومشوا صوب بوابه القادمون..
عيسى تم يطالع حواليه.. ياسبحان الله كيف تغيرت البلاد .. 5 سنين بس واشوف هالتغيير كله.. مشتاق لهالأرض.. لهالدار.. لريحتها وكل شي فيها.. دار بوخليفه الله يرحمه.. نزل راسه.. كنا بعاد عنك يوم اغمضت عينك يا أبوي زايد..
خليفه لأنه طويل كان قادر يشوف عدل.. شافه واقف على طرف عدال الترولي ومعاه شنطه سودا.. ولابس بدله... حس ان وده يصرخ ويربع في حضن اخوه.. ادمعت عينه غصبن عنه.. اخوي بعد هالغيبه الطويله اشوفه.. ياشوقي لك ياخوي..
أم خليفه: خليفه ممكن تفهمني شو الي قاعد يصير.. ويايين نستقبل منو نحن؟
خليفه يصد صوب امه يتبسم لها: ويأشر صوب عيسى: يايين نستقبل الغالي..
من شافته ام خليفه حست ان قلبها بيوقف من الفرحة والصدمه.. وصرخت وادمعت عينها غصبن عنها: قلت لك قلبي مايخيب.. قلت لك ولدي عايش وينبض ماصدقتني..
من شافهم عيسى وشاف امه .. انقبض قلبه. ااااااااه مشتاق لديرتي واهلي وناسي وكل شي فيها.. ودر كل شي عنه وربع صوب امه .. وماحس بعمره الا ينزل يحب ريلها والناس كلهم يطالعونهم مستغربين.. ويتهامسون.. وحضن امه وضم ويها بإيده وتم يحب كل قطعه في ويه امه.. وحب راسها.. وهي قعدت تحضن ولدها وتلمس كل قطعه من جسمه.. تحس ان تبا تتأكد انه ولدها .. ضناها الي تريته هالسنين كلها.. وهي عارفه انه حي والكل معارضها.. خوله تأثرت وايد من الموقف يلست تتطالعهم ولوت صوب خليفه الي كان يصيح... نزل نظارته الطبيه وقعد يمسح دموعه.. محمد الصغير يطالع ولا فاهم شي..
ام خليفه: وينك يا ولدي.. وينك مادريت عن حال امك من عقبك.. والله اني عارفه وحاسه انك حي والكل يجذبني.. ويقول انك مت..
عيسى وهو يصيح ويحضن امه بكل قوته .. الود وده يشلها على راسه ويمشي فيها الأرض كلها.. : فديتج الغاليه ربي لا يحرمني منج.. والله غصبن عني هالغيبه مب بيدي.. والحمد لله اليوم انا بينكم وفي بلادي..
خليفه: وانا ماتبا تسلم علي..
صد عيسى صوب اخوه وحضنه وقعدوا يصيحون في حضن بعض.. صدق كان مشتاق لأخوه ومفتقده.. وسلم عيسى على خوله وشل محمد في حضنه ولوى بإيده الثانيه على امه ومشوا صوب الموتر..
عيسى: لحظة.. اغراضي يا ريال نسيتهم..
خليفه: شو تبا فيهم .. أغراض من ديار خايسه ابعدتك عنا..
عيسى: ههههه.. الحمد لله على كل حال..
وسار خليفه ياب الأغراض..
ام خليفه وهي تلوي على ولدها: ربي لا يذوقني حزنك يا عيسى.. ويخليك لي.. ماشي سفر من اليوم وساير.. وين ماتروح ريلي على ريلك..
عيسى ضحك.. ومشوا كلهم رادين البيت.. ورن تليفون خليفه.. كانت سوسن.. رد عليها ورمسها عساس انها واحد..
خليفه: حي الله بو الشباب هلا..
سوسن: وصل..
خليفه: هيه الحمد لله..
سوسن: عطني اياه ابا اسمع صوته.. ابا اسمع حسه دخيلك..
خليفه: استح ياريال شوهالرمسه بعد.. متصل نص الليل وتقولي هالرمسه.. خل عنك بس.. خلاص عيل نتلاقى باجر ان شاء الله
سوسن: من صغرك نذل.. ماعليه انا اراويك باجر.. مع السلامه
خليفه: مع السلامه
خوله تقربت من خليفه: منو؟
خليفه: سوسن تبا ترمس عيسى..
خوله: حليلها والله .. ماتنلام مشتاقه..
خليفه : حتى انا مشتاق لج..
خوله: بس انا وياك..
خليفه: ماعليه اشتاق لج حتى وانتي وياي..
نزل عيسى الجامعه: انتوا مب ناوين تردونا البيت.. مشتاق له ابا اشوف غرفتي..
ام خليفه: غرفتك ماهبشتها ( لمستها ) من اليوم الي سمعت فيه خبر انك اختفيت.. وكل يوم اعطرها وابخرها .. ولله اني حاسه انك بترجع وماخاب احساسي..
عيسى: ربي يحفظج لي.. اليوم برقد في حضنج .. صدق مشتاق له..
صدت صوبه امه وتمت تتطالعه: وحليلك يا ولدي .. ضعفان وايد.. يبالي أكلك ذاك الأكل الزين عشان ترد صحتك
عيسى: هيه دخيلج امي خاطري في كل اكلاتج.. وحاس اني مفتقد كل شي فالبلاد ..
خليفه: شوف الشوارع.. دبي تغيرت وايد في هال5 سنين..
عيسى: هيه والله صدقك.. احلوت وايد ماشاء الله..
خليفه: بس الإمارات فقدت شي غالي وايد عليها..
عيسى: دخيلك لا تذكرني.. خسارة كبيره للإمارات..
أم خليفه: خسرنا قايد .. وولي .. وأبو .. وكل شي..
عيسى: الخير في عياله ان شاء الله..
خليفه: ان شاء الله
..
....
.
ومرت الأيام على هذا الحال.. الكل عند نوره يواسيها عشان تقدر تتقبل الوضع اليديد في حياتها.. مجد ترجع من الدوام على طول صوب بيت عمتها شيخه .. وجاسم وباقي الرياييل كلهم يتيمعون في ميلس الرياييل في هالأيام.. يواسون ابو نوره .. لأنه صدق حزين على حال بنته.. وشما يومياً كانت تزورهم.. ودخلت وتعرفت على نوره وتمت ترمس وياها.. ارتاحت لها نوره وايد .. وارتاحت لرمسة شما.. كان لها اسلوب حلو يقعنها ويعطيها أمل فالحياة.. سلطان كان مرتاح لشوفة شما في بيتهم.. وخصوصاً يوم امه قالت له انها فعلا معجبة بشخصية شما وأدبها.. مرن هال4 أيام على الكل والحزن يعم على الكل فالبيت..
فطوم ماكانت قادرة تكون وياهم فالعزا وهذا بسبب انشغالها بدراستها وتحضيرها للإمتحانات .. لأن مابقى غير شهر ونص وتبدأ امتحاناتهم..
نتايج فحوصات حور بتطلع يوم الأربعا..
.. .. ..
.. ..
..
.
الأربعا الصبح
سار عبيد ويا حور المستشفى.. ودخلوا عند الدكتورة .. من شافت حور ارتبكت..
الدكتوره: تسمح لي أخي تنطر برع شوي بدي إفحص المريضه شوي..
حور ابتسمت لعبيد: اترياني برع..
نش عبيد وطلع من الغرفه.. ونشت حور سارت صوب سرير الفحص عشان تفحصها الدكتور..
الدكتورة: ايه انا رايحه جيب لي شي من المختبر لأن ناسين يجيبوه لي وجايه.. لحظة بس
حور: خذي راحتج دكتورة..
طلعت الدكتورة وشافت عبيد ومشت صوبه..
الدكتوره: استاذ ممكن اكلمك شوي على انفراد..
حس عبيد من اسلوبها ان الموضوع خطير.. لدرجة انها طلعت من الغرفه عشان ترمسه اكيد في شي.. : دكتورة لا تخرعيني .. حور فيها شي؟
الدكتور: والله ماني عارفه كيف بدي قلك.. بس لازم حدا يعرف من أهل المريضه مشان يوصلو لها المعلومه بطريقتهم..
عبيد زادت دقات قلبه وهو يتريا الدكتورة ترمس وتقول شو الي صاير.. : قولي دكتورة .. دخيلج بلاها هالمقدمات..
الدكتورة وهي منزله راسها: مرتك فيها أورام سرطانيه في..
مالحقت تكمل قاطعها عبيد وهو معصب: جب . لا تفاولين على حرمتي.. حور مافيها شي.. انا ادري مافيها شي.. هيه بعد تقولي مافيها شي..
الدكتوره وهي تحاول تهديه: استاز عبيد ماراح اقدر اكمل هيك وانت منفعل..
عبيد دخيلج قولي لي الي سمعته جذب.. دخيلج قولي..
الدكتوره: كنت أتمنى يكون كذب .. لكن للأسف انو هاي الحقيقه الي لازم تتقبلها.. الأشعة والفحوصات أثبتت هالشي ومابنقدر نعمل أي شي لأن مرحلته متأخره ان شاء الله تولد بالسلامه..
عبيد: والجنين؟
الدكتوره: مشان هيك انا بدي كلمك.. نحن لازم نولد مرتك من تدخل السابع.. مشان نتطمن على الجنين ونقدر نعمل علاج كيميائي لمرتك..
عبيد حس بغصه .. رفع راسه وشاف حور واقفه ورا الدكتوره وهي تسمع الكلام الي تقوله الدكتوره وهي مصدومه.. انصدم عبيد ونش واستغربت وين رايح عبيد .. صدت وراها الدكتورة شافت حور تلومت..
عبيد تقرب من حور: لا مافيج شي الدكتورة ترمس عن وحده ثانيه.. انتي مافيج شي انا اعرف..
حور صدت صوب الدكتورة متجاهله عبيد الي مجابلنها: يعني انا مابعيش اربي بنتي؟؟ .. توني اقرا التقارير الي فالغرفه ماصدقت.. وقريت ان الجنين بنت.. قلت اسمع منج واتأكد .. قولي اني بقدر اعيش اربي بنتي وبعدين بموت.. دخيلج قولي ..
عبيد يود حور وقعدها على الكراسي.. : هدي .. انتي ماعليج منها .. اصلا مافيج شي انا بوديج برع البلاد تتعالجين .. الجنين مانباه المهم انتي.. والجنين الله يعوضه..
انفعلت حور وهي تحط ايدها على بطنها: جريب ال5 شهور وانا تعبانه على هالجنين واخر شي تقول مانباه.. لاااااااا.. بنتي اباها.. ولا مستعدة اخسرها.. بتم بنتي في بطني لا تحرمني من احساس الحمل والأمومه قبل لا أموت الله يخليك عبيد..
ادمعت عيون عبيد غصبن عنه وهو يتخيل انه حور بتروح عنه ومابيشوفها .. وبيعيش وحيد شرات نوره.. : بتعيشين وبتييبين هالبنت و10 غيرهم.. انا اعرف.. نشي بنطلع من هالمستشفى .. جذابين مايعرفون شي..
نشت حور ويا عبيد وهي منهاره ... اتصل عبيد في الدكتور محمد (ربيعه) ...
وقعد فالموتر وحذاله حور الي حاطه راسها على جتف عبيد وساكته شرات المصدومه..
عبيد: اشحالك محمد؟
محمد: بخير ربي يعافيك انت اشحالك؟
عبيد: اقول محمد .. ابا اييب مرتي عندكم المستشفى تسوون لها فحوصات..
محمد: خير ان شاء الله .. بس عندها موعد؟
عبيد: ماعندها شي واباك انت تساعدني وتسوي كل شي.. ونسوي لها فحوصات... لأني توني طالع من مستشفى الزهرا ويقولون لي .. (سكت) .. ماعليك المهم تقدر تخدمني هالخدمه..
محمد: خلاص من عيوني برمس قسم الملفات والمواعيد يضبطون كل شي..
عبيد: تسلم والله ماتقصر..
محمد: افا عليك.. اخوي انت واخدمك بعيوني..
عبيد: خلاص عيل نحن فالدرب يايي..
وتحرك عبيد صوب المستشفى الي يشتغل فيه محمد.. وبعد نص ساعه وصل المستشفى .. ونزلوا .. وفهم محمد كل السالفه.. وطبعا بواسطة محمد سوو لها كل الفحوصات المطلوبه عشان يتأكد من الي سمعه من مستشفى الزهرا ..
الدكتور محمد: طيف.. هاتي الأوراق الي على الرف هناك..
مشت طيف ويابت للدكتور الأوراق وعطته.. ويلست تتطالع حور .. غمضتها.. كيف كانت منهاره وطول الوقت ماتشل ايدها من على بطنها وتحس بجنينها..
عبيد: متى بتظهر النتايج دكتور؟
الدكتور:انا رمستهم وقلت لهم ارجنت.. يعني بياخذ له 4 ايام..
عبيد: دخيلك مايستوي اسرع من جي..
الدكتور: ماعليك انا برمسهم .. وبييب لك النتايج لعند بيتكم .. وان شاء الله يطلع كل شي عكس الي سمعتوه..
عبيد: والله اتمنى يا دكتور..
ونش عبيد وهو قابض ايد حور وطالع من الغرفه..
الدكتور وهو يهز راسه: الله يعينه.. تدرين ماخذ مرته عن حب .. ويحبها حب ماتصورينه.. بنت عمه .. وماصار لهم 5 شهور من تزوجو.. وهي حامل بأول طفل لهم.. واليوم يسمع خبر ان مرته ممكن تموت..
طيف: الله يعينهم.. غامضتني وايد .. طول الوقت حاطه ايدها على بطنها..
الدكتور: خايفه على الجنين اكثر من خوفها على نفسها..
طيف تحسست من الموضوع وايد.. ادمعت عينها.. صدت الصوب الثاني عشان مايحس بها الدكتور ويلاحظ دمعتها.. وتضايق لأنه مب قادر يساعد محمد في شي.. لكنه من خلال الأشعه الي شافها شك ان فعلا الفحوصات صحيحة.. بس ماقال شي لعبيد لغايه مايتأكد من باقي الفحوصات الي سووها.. وعقب يحكم..
... ... ...
.. ..
..
.
مجد: سمعي يا بنت الناس.. كفي شرج عني احسن لج.. انا ان انفج لساني انتي الي بتخسرين..
جواهر: اخبرج انتي لا تقعدين تهددين تراج ماتعرفين جواهر منو..
مجد: ليش منو تكون جواهر... بنت ضايعه ماتعرف الله وين فارنها..
فجت جواهر عيونها منغاضه من رمسة مجد: اسكتي .. ماسمح لج ترمسيني بهالطريقة..
مجد: انتي الي خليتي عمرج فهالموقف.. الي ماينحسد عليه الصراحة..
جواهر: بخليج تندمين على هالرمسه..
مجد: اوه اوه .. خوفتيني تصدقين..
سليمان كان نازل من الدري فهالوقت وسمع حشرتهم..
جواهر: اخبرج مب وحده شراتج تمثل علي دور شريفة مكة.. انا اراويج..
مجد: احمدي ربج مافضحتج يدام المدير يوم اتصلت البيت وقالت لي امج انج فالدوام وانتي اصلا من ذاك الصوب ولا فالدوام ولا شي.. ولا الظهر شفتج نازله من سياره واحد عفان الله .. وعقب تميتي تتريين ابوج.. تتحرين الناس اغبيا مايفهمون هالحركات.. اعقلي يا بنت الناس وخافي على سمعتج وسمعة هلج.. هاي فرصة مني لج تعيدين النظر فيها في سواياج..
جواهر: جب لااااااااااه.. هاللي ناقص انتي على اخر زمن تنصحيني.. نست عمرها راسمه حروف على ايدها وعاشقه اونها.. نسيتي سواياج؟
مجد: انا ان حطيت حرف على ايدي مب دليل اني احب او عاشقه.. مجرد حركات ويا رباعتي ومزح.. الحمد لله عمري ماسويت سواياج..
جواهر: وهي تمشي صوب الباب عشان تطلع: ترا دايما تطلعاتج للأعلى من جي.. معذورة..
انغاضت مجد من رمستها.. ويودت عمرها وضربت بريلها بالقو على الأرض.. انا شو الي يخليني اسكت عن هالأشكال.. والله ماعندي سالفه.. مب ويه حد يستر عليها ..
سمع سليمان الموضوع كله .. كان شاك في جواهر من البداية .. لكن هالمره تأكد بعد الي سمعه عن حركات جواهر وسواد ويهها.. وقرر انه مايسكت .. نزل من الدري وكمل دربه.. مجد ماعرفت منو الي نزل لأنها كانت معطه ظهرها له.. وهو خطف بسرعه وطلع..
.. ..
.
شما: السلام عليج امايه..
ام عمّار: وعليكم السلام .. بسرعه بدلي ونزلي عشان احط الغدا..
شما: اسميني يوعانه اليوم..
هزاع: حتى أنا يوعان.. اليوم أول يوم داوم لي واحس ماكلت من سنه..
عمّار: بل .. خريط .. من سنة.. ههههههههه
هزاع: تشبيه بليغ ياريال لا تفشلنا عاد..
ام عمّار: الله يوفقك يا ولدي.. الا هزاع ماسرت عند ابوك..
هزاع: ناوي ازوه اليوم ان شاء الله وابشره اني قمت اشتغل وبسجل فالجامعه عشان اكمل دراستي..
أم عمّار: الله يصلح الي بينكم ان شاء الله
هزاع: هيه دخيلج كثري من هالدعوات احتاجها..

الجزء العاشر

الفصل الثاني
-=-=-=-=-
حمدان: انت مينون والله .. ناوي على موتك..
هزاع: يا حمدان هذا مهما يسوي يتم أبويه الي رباني.. وماعتقد ان الي سويته شي يفشل.. اعتمتدت على نفسي.. (سكت شوي ونزل راسه) والصراحة.. أبوي له دور في ضياعي.. دلعني وخلاني على كفوف الراحة.. ولا سأل عني وين اسير وين اروح.. منو ربعي وأمشي ويا منو.. بس غرقني بالبيزات .. لكن مادرى ان هالبيزات بتنجلب ضده فيوم
حمدان: الله يهديه ويهدينا جميعاً.. المهم انت ارجع من وين ماييت الحين.. وخلني امهد كل شي له وعقب تعال..
هزاع يرفع حياته ويطالع حمدان: انت شو قاعد تقول.. تمهد له وماتمهد له.. انا برمس ابويه وماعلي منك ولا من حد..
وتعدى حمدان اخوه ودخل البيت .. تم يمشي فالحوي ويشوف زوايا البيت والحوي.. اشتاق لهالبيت مهما يكون هذا هو البيت الي ضمه وحضنه من صغره .. فتح باب الصاله كانت مها يالسه اتدرس نوف بنت سلامه .. من سمعت مها صوت الباب شافت هزاع.. نشت من مكانها وربعت صوبه..
مها: إطلع برع قبل لحد يشوفك..
هزاع معصب: انتوا شو سالفتكم تروغوني..
مها: حمدان قالي كل شي.. وانت تريا علينا بنرمس ابويه ليش جي مستعيل..
هزاع: انا ابا ارمسه بنفسي..
مها: والله ياخوي ولهنا عليك وامي ولهانه عليك وايد.
هزاع: اشوفها تتصل ولا تسأل عني..
سكتت مها ونزلت راسها.. لأن فعلا امه ماسألت عن هزاع أصلا.. ولا همها هو وين.. مسافره مع مجموعه حريم سايرين فرنسا كعادتهم كل سنه يتشرون .. : لا بس تدريبها مسافره وانت بعدين مغير رقمك
هزاع يتبسم لها: دومج تبين تبينين الكل زين فهالبيت.. وانتي وانا عارفين كل شي وواضح لنا.. قصي على هندي مار فالشارع.. ولا على عيال الجيران.. بس انا لا.. كبرت فهالبيت وشفت كل شي فيه .. وتبين اتدافعين..
مها افتشلت وتمت ساكته..
هزاع: خوزي خل اسير الميلس عند ابويه..
مها: لا عمي زايد هناك..
هزاع: عمج زايد هذا كرهته.. وخير ياطير لو هو هناك
مها: مادري كيفك.. اذا فشلك أبوي يدامه لا تقول انا ماقلت لك..
تخطاها هزاع ومشى صوب الميلس.. ودق الباب .. ودخل على طول..
هزاع: السلام عليك ابويه..
صد بوهزاع يطالع هزاع بنظرة من فوق لتحت..
تقرب منه هزاع وتوه بيود راس أبوه عشان يحبها.. مسك بوهزاع ايده وابعدها..
بوهزاع: سلامك مانباه.. وإنت اطلع برع مابا اشوف رقعة ويهك..
هزاع تغصص .. بس يود عمره وسار صوب زايد وحب راسه : اشحالك عمي؟
زايد تم يطالعه مستغرب منه.. ورد عليه: الحمد لله..
وقعد هزاع على الكنبه الي مجابله ابوه.. : ابويه انا ياينك اليوم اقولك ان ..
قاطعه بوهزاع: اطلع برع.. مابا اشوف رقعة ويهك.. صدق ان عينك قوية .. ماكفاك الي سويته فيني.. واليوم ياي تيلس جبالي.. اظهر برع ..
هزاع يود عمره ونزل راسه: ابويه انا مب طالع لين ما أقولك كلمتين..
زايد صد صوب بوهزاع: ماعليه هدي نفسك واسمعه شو بيقول وخلاف بيظهر..
تم ساكت شوي بوهزاع وصد صوب هزاع: قول شو عندك..
هزاع: أبويه انا ياي اقولك واثبت لك اني تغيرت .. واني ان شاء الله برفع راسك وهزاع الي كنت تعرفه بطالي وفالبيت مات.. توظفت الحمد لله في اتصالات.. بفضل بنت عمي.. ساعدتني وتوسطت لي عشان احصل شغل.. والحمد لله لقيت.. وحاليا ساكن عندهم لغاية..
قاطعه بوهزاع والشراره تطلع من عيونه ووقف مجابل هزاع: شووووووووووو.. بنت عمك؟؟ أي بنت عم هاي الي ترمس عنها؟؟ ومسودة الويه بنت الهنديه قدرت تقص عليك أونها حصلت لك شغل ومن الي سمح لها تشتغل اصلا.. ماعنا بنات يشتغلن.. قوم زايد ويايه بسير اشوف بنت الهنديه الي ناويه على فضيحتنا .. لاحول ولا قوة إلا بالله.. من وين الاقيها ولا من وين.. من عيالي.. ولا عيال الهنديه.. الله يسامحك ياخوي ماعرفت تختار لك حرمة ووهقتنا بالعلة هاي..
تضايق هزاع من اسلوب ابوه.. وتقرب زايد من بوهزاع يهديه : ياريال مب زين عليك الإنفعالات.. إنت هدي اعصابك وايلس .. وبالتفاهم كل شي بينحل..
بوهزاع: اي تفاهم الي ترمس عنه.. بنت الهنديه تشل اسم عايلتنا .. وبتفضحنا بين العرب.. وولدي المصون قام يلجأ لهم..
هزاع: أبويه الله الشاهد انهم يحبونك ..ودوم يوصوني اني ارضيك.. و..
قاطعه بوهزاع: جــــــــــــــــب ولا كلمة.. قدروا يقصون عليك بعد.. انا يوم طردتك من البيت بغيتك تستوي ريال من نفسك.. مب تروح للهنديه وعيالها..
هزاع عصب وماقدر يمسك أعصابه أكثر: أبويه انت متبري منهم ولا سائل عنهم.. وألحين مسوي عمرك مهتم بهم ومتضايق لأن البنت تشتغل؟؟ يوم انك عمها وليها تخليت عنها.. وين تروح البنت .. توقف عند باب المسيد إطر.. ولا تشتغل لها شغلة شريفة تكسب من وراها وتكد عشان بيتها .. ؟؟ الله الشاهد ماشفت منهم أي شي....
زايد تم يطالع بوهزاع .. وفي خاطره يقول .. الله يالدنيا.. ولدك الي ماترد له طلب.. وترضخ لكل طلباته اليوم واقف بويهك ويا الناس الي طول عمرك عطيت ظهرك لهم.. بسك ريال على حافه القبر ريلك وبعدك تظلم وتنهب فلوس حرام.. الله يهديك بس..
هزاع: صد صوب أبوه: انت تبريت عني وعنهم.. تذكر هالشي.. (دخل ايده في مخباته وطلع بطاقته البنكية ومفتاح السياره وحطهم على الطاوله الي مجابله ابوه) هذي البطاقة .. وماسحبت ولا فلس من البنك من اليوم الي رغتني فيه.. وهذا مفتاح السياره الي شريتها لي.. ومب محتاي شي منك.. خلك اهتم بهالبيت (يأشر على الميلس) تحفظ عليه.. عن يطير عنك... والشركة والحلال والبيزات.. خلهن لك ولباقي عيالك.. انا في غنى عن هذا كله.. الله يلعن البيزات الي فرقتنا عن بعض.. لو كانو عيالك في مكان عيال أخوك جان مارضيت علينا .. لكنهم مب عيالك فمب حاس فيهم..
ومشى صوب الباب بيطلع.. فتح الباب وتم ماسك المقبض.. وكان حمدان واقف عند الباب يسمع .. رفع راسه هزاع وابتسم لأخوه: بس للأسف حتى عيالك تبيعهم عشان البيزات.. والأموال.. وأنا أولهم..
وطلع من البيت.. حمدان تم واقف وزايد وبوهزاع من صدمته لكلام ولده يلس على الكنبة مصدوم ومنزل راسه.. مشى زايد صوب حمدان: أخوك قدر يقول الكلام الي انا من سنيييييين مب قادر اقوله لأبوك عشان ما أخسر علاقتي وياه..
طلع هزاع من البيت متضايق.. لحقه حمدان تم يزقره بس هزاع مارد عليه..
حمدان: وين ساير تعال..
هزاع: مالي مكان فهالبيت.. منبوذ.. لا تلحقني عن يروغك ابوي من عقبي..
حمدان: الله يهديك شو هالرمسه تعالي..
هزاع وقف وتنهد وصد صوب حمدان: نعم..
حمدان: انزين خلني اوصلك دام ان مب راد بموترك..
هزاع ابتسم لأخوه: تسوي خير الصراحة لأن ماعندي ولا فلس للتكسي..
حمدان ابتسم ومشى ويا هزاع صوب موتره .. وركبوا الموتر ومشى صوب بيت عمه..
حمدان: شوف ياخوي.. خذ مني هالمبلغ مشي فيه أمورك لغايه ما أسحب من البنك وأعطيك.. لأن حاليا هالمبلغ الي عندي اياه فالبوك..
هزاع: لا تسلم خيرك واصل..
حمدان: ليش جي اتحسسني اتصدق عليك.. هزاع انت اخويه .. افا عليك بس.. اذا اليوم انا وقفت وياك.. باجر انت الي بتوقف وياي..
هزاع: الحمد لله ماطلعت طينتك شرات ابويه..
حمدان وهو يبتسم بحزن: ابويه.. الله يهديه بس.. ابوي يا هزاع محد طلع شراته غير سلامه اختك.. اللي مايهمها غير الفلوس والكشخه .. ولاهيه عن بيتها وعيالها..
هزاع: أمك هاي ماتشبع سفر.. عمري ماحسيت بها أم.. طول عمري أحس انها مب موجودة فالبيت.. لكن شوف مرت عمي.. من الصبح تنش تريق عيالها... وقبل لا يظهرون تقرا عليهم وتدعي لهم.. كم يسوى انها تهتم بهم.. عمري ماحسيت بهالشي من أمي..
حمدان صد صوب هزاع واطالعه بنص عين: يا ريال ... أمك يابتنا ونستنا.. وحالها من حال سلاموو اختك.. انزين شو رايك تعيش في بيت عمك بشكل رسمي..
هزاع صد صوب حمدان مستغرب: كيف يعني رسمي؟؟
حمدان: بنت عمك انت اولى فيها.. ليش ماتخطبها..
هزاع : انت مينون مب صاحي.. شقايل بترضى فيني بعد الي شافته مني..
حمدان: بس هيه اول وحده تعرف انك تغيرت..
هزاع: يا ريال.. انسى .. انا ان فكرت فالزواج فـ شليت بنت عمي من بالي.. لأني طايح من عينها..
حمدان: كيفك.. انا قلت لك..
هزاع: اقول.. اكرمني بسكوتك ووصلني بلا ماتعور راسي..
.. .. .. ..
.. .. ..
.. ..
..
.
العنود: ماما .. بابا وين لاح؟؟
نوره تمت تتطالع العنود وعيونها مليانه دموع.. : بابا راح عند الله ..
العنود: ابا الوح هناك؟..
نوره وادمعت عينها.. وخلود تتطالعهم من بعيد ومنهاره من الصياح.. : كلنا بنروح ويا بعض ان شاء الله..
العنود مشت صوب خلود ويلست على ريولها.. ومسكت تليفون خلود.. وقعدت تلعب فالأرقام.. عقبها مدت التليفون صوب خلود: خالوو.. ابا اكلم بابا؟
خلود وهي تصيح.. : مايستوي تليفوني خربان..
نشت العنود وقفت مجابلة خلود: خالو منو ضربج؟؟ ليش اتصيحين؟
خلود حضنت العنود وقعدت تصيح .. ونوره نشت سارت صوب الحمام تتوضأ وتصلي لها ركعتين..
دخل علي غرفه نوره .. وتم يدور على نوره .. ماشافها.. وصد صوب خلود: في حريم يايين تحت.. أمي تقول تعالو..
خلود: ان شاء الله..
تم ساكت علي منزل راسه: خلود..
دخل الغرفه وصك الباب وراه: نوره متى بتيلس ويانا وتضحك شرات قبل..
نوره كانت وراه وتسمع رمسته .. تلومت لأن كل الي فالبيت متضايق عشانها..
نوره: ان شاء الله من يروحون الحريم بقعد وياكم وبسمع سوالفكم وبسولف وياكم.. شو تبا اكثر من جي..
صد علي صوب نوره .. وتلوم لأنها سمعته.. ومشى صوبها وحضنها: نوره اذا فيصل راح .. ترا نحن مارحنا.. كلنا هني وياج ونحبج..
نوره: وانتوا الي مصبريني فهالدنيا..
علي رغم صغر سنه.. إلا إنه ساعات يببين أكبر من عمره.. ويحب نوره وايد ومتعلق فيها.. طيبه ويا الكل.. وكل من عرف زعل عليها..
لبست شيلة الصلاة.. وشلت مهره بنتها والعنود ويا خلود.. ونزلت تحت عند الحريم.. وعزوها.. وتمت قابضه نفسها يدامهم.. بس يوم شافت دموع امها ماقدر تيود عمرها.. بدت تصيح.. وكلهم صاحو وياها..
منى: خلود جاسم برع يترياج..
تنهدت خلود: ها اخوج عنيد.. قلت له ماروم أظهر فهالوضع...
منى: احين انتي بتحرمين ريلج من قعدته وياج.. سيري..
خلود: انزين امسكي العنود وشوفيها خل استأذن من امي وأروح..
ومشت خلود صوب امها وصاصرتها في اذنها .. وطلعت من البيت وركبت السياره عند جاسم :السلام عليكم..
صد صوبها جاسم ابتسم : وعليج السلام.. وأخيرا شفت هالويه..
صدت صوبه خلود ابتسمت له بهدوء.. : انت ادرى بالظروف..
تغيرت ملامح جاسم من شاف ويه خلود.. وقرب ايده ومسك ويهها: خلود.. شو مسويه في عمرج يالظالمه.. حرام عليج.. شفتي حالج كيف.. عيونج مسودة تحتهن..
خلود: حالنا مب حال يا جاسم.. هم نوره في صدورنا كلنا..
جاسم: يا عمري ياخلود.. كلنا متضايقين لحالها .. بس بعد أنا لي حق عليج وأشتاق لج..
خلود: سامحني جاسم ادري وايد مقصرة في حقك.. الا وينها فطوم ماتيينا؟
جاسم: مشغوله ويا الدراسه .. تدرين مابقى شي على امتحانات الثانويه..
خلود : وشخبار ريلها وياها؟
جاسم: فيصل.. عندها فالبيت .. لأن نحن هني وماعندها حد فالبيت.. فهو وياها يوم المدرسين ايونها..
خلود: يالله ربي يوفقها ويعطيها على قد نيتها..
جاسم: ويوفقني وياج..
خلود: جاسم .. بعد الي صار شو رايك نأجل عرسنا؟
جاسم: هيه انا بعد بغيت ارمسج في الموضوع.. عشان تعدي عدة اختج على الأقل.. يعني نأجل لعطلة الربيع اليايه..
خلود: هيه خير ان شاء الله ... وشو عن عرس فطوم؟
جاسم: فيصل ما رضى نأجل.. فقرروا يخلون العرس سكيتي.. بدون دق..
خلود: زين بعد.. الله يكتب الي فيه الخير ان شاء الله
.. ..
مجد كانت ياسه في مكتب غرفتها وترسم وسرحانه.. وتلعب بشعرها بإيدها الثانيه.. وتحايس بثمها وتتذكر أحمد وتبتسم وترد تكمل الرسم..
دخلت غرفتها وقعدت تشوفها كيف مندمجة فالرسم ومب حاسه فيها انها دخلت الغرفه .. تقربت من مجد ولوت على جتفها.. : الله .. وايد حلوة الرسمة

فزت مجد من حست بإيد على جتفها وصدت.. شافت بطن حور مجابلها.. رفعت راسها تبتسم لها.. : شو هالمفاجئة..
حور وهي تبتسم وفي داخلها حزن كبير.. : ليش مب حلوة؟
مجد وهي تنش وتلوي على حور وتحضنها بحراره كأنها ماشافت اختها من فتره طويله..: بالعكس احلى مفاجئة..
تحط مجد ايدها على بطن حور وتتطالع بطنها: ياي متى بيطلع البيبي ابا استوي خالو..
حور خنقتها العبره ويودت عمرها.. : ان شاء الله مابقى شي .. توني داشه الخامس.. يعني اممم يبالي 4 شهور..
مجد وهي تناقز: ياي يعني بستوي خالووو..
حور تتطالع مجد وتحس بألم في ظهرها.. : ان شاء الله .. وينها أمي ماشفتها تحت؟
مجد: بعدها مايت من بيت عمو شيخة؟
حور: وانتي ليش ماسرتي هناك؟
مجد: تبين الصدق.. ضيجة المكان هناك.. أشوف الكل يصيح والكل متضايق.. أشوف حالة نورة.. والله يحليلها غامضتني.. فراق الحبايب صعب والله ..
حور نزلت راسها وسرحت.. اااه لو تدرين اني بروح عنكم شو بيكون حالج وحال أمي وابوي..
رن تليفون حور فهالوقت وماحست به..
مجد: حووو تليفونج يرن؟
حور انتبهت لنفسها ابتسمت وشافت التليفون كان عبيد الي متصل..
حور: هلا عبيد..
عبيد : وينج ؟؟ أنا فبيتكم ولقيت البيت فاضي مافيه حد؟؟ انتي وينج؟
حور: فوق عند مجد.. أمي وابوي في بيت عمتي شيخه..
عبيد: هيه .. انزين انزلوا يلسو وياي .. يالس روحي..
حور: خلاص يايين.. ولا تزعل..
عبيد: فديتج.. شوي شوي حاسبي على عمرج ..
حور: تخاف علي بس.. والبنت؟
عبيد سكت.. : نزلي يلا اترياكم..
حور تضايقت يوم حست ان عبيد مايبا الياهل.. حست به متغير مب مستانس شرات ماكان قبل بالحمل.. بندت الخط وصدت صوب مجد: يلا لبسي شيلتج وخل ننزل عبيد يالس روحه..
مجد: خلاص انتي سبقيني وانا يايتنج..
حور: اوكي..
طلعت حور من الغرفه وتحس بدوخه .. من الصبح ماحطت لقمة بحلجها من الضيج.. تحس بألم في كل جسمها.. مب قادر تمشي بتوازن.. تساندت على الدري وتمت تنزل شوي شوي.. عبيد تم يطالعها.. حس بها تعبانه.. راح بسرعه صوبها عشان يمسك ايدها ويساعدها.. وقبض ايدها وابتسمت له.. ومشت وياه كم درجه.. بس ماقدرت تتحمل زود.. حست بدوخه وطاحت على جتف عبيد.. ومجد توها تعدل شيلتها.. ومن وصلت للدري شافت عبيد شايل حور ويويدها صوب الجلسة الي فالصاله.. صرخت.. : شو استوابها؟
عبيد: رفع راسه صوب مجد: هاتي ماي بسرعه..
ربعت مجد ويابت كوب الماي ودموعها أربع أربع.. وعطت الكوب لعبيد الي قعد حذال حور.. ورفع راسها شوي .. وصب شوي من الماي على كف ايده ومسحه على ويهها وهو يقرا عليها في خاطره.. وقلبه معورنه.. وشربها الماي..
فتحت حور عيونها.. وشافت مجد واقفه ورا عبيد وهي موخيه تتطالعها .. وعبيد نفس الشي.. ابتسمت لهم : شو فيكم تتطالعوني جي؟
عبيد: سلامتج الغاليه..
اما مجد ماقدرت تيود عمرها فرت عمرها فحضن حور : فديتج اختي ماتشوفين شر.. (صدت صوب عبيد) عبيد قوم خل نوديها المستشفى..
حور من سمعت طاري المستشفى نشت واعتدلت بيلسها مع ألم بسيط.. : لاااااا.. مستشفى لا..
عبيد حس بها وتقرب منها: خلاص لا لا.. هدي انتي بس مب زين عليج..
مجد: انتي ليش ماتشوفين لج مستشفى زين يسوي لج فحوصات نعرف شو سبب هالتعب الي كل كم يوم اييج..
حور: مافيني شي .. بلاكم انتوا غصب تبون اتطلعون فيني شي.. انا مافيني شي.. واي حرمه حامل تتعب بهالطريقة..
مجد استغربت من اسلوب حور وعصبيتها الا عبيد الي كان شرات الي ايديه مربوطه مب قادر يسوي شي.. يطالع ويتضايق زود.. مابيده يسوي شي..
وبعد دقايق صمت.. دخلت لطيفه البيت ومعاها جلثم وعبدالعزيز.. استغربوا من شافو وضعيه حور على الجلسة.. وعيون مجد المحمرات من الصياح.. وعبيد ..
جلثم: شو فيكن؟؟ عبيد .. شو مستويبهن.. ليش مجد تصيح؟؟ وحور اشبلاها..
حور وهي تبتسم لهم ولا كأنها من لحظة كانت معصبه.. : يعني مب مستانسه لأني فالبيت؟
جلثم وهي تقرب من حور: يعل ربي لا يذوقني حزنج.. أكيد هالإثنين لعوزوج ولعوزو ولدي (تحط ايدها على بطن حور)..
تتطالع حور بطنها وترد صوب يدتها وتحب راسها: لا خليت منج يارب..
ولا والله لا زعلوني ولا لعوزوني.. بالعكس
لطيفه: اشحالج امييه ان شاء الله احسن؟
حور: الحمد لله امي..
عبدالعزيز: حي الله نسيبي الغالي..
عبيد وهو يحب راس عمه: الله يحييك عمي..
.. .. ..

شما : مابغينا نشوفك عيل يا حمدان.. بس تصدق هزاع وايد يرمس عنك
حمدان: ادريبه يحش فيني..
هزاع: افا عليك بس انا احش فيك؟ شو هالرمسه
حمدان: هههههه ... وينها مرت عمي ماشفتها؟
شما: سايره عند الجيران حريم متيمعين ويبن يشمن عطورها وبخورها..
هزاع: شما ماتشوفين هالشغله اتعب امج .. قولي لها تودر عنها ترا ماشاء الله انتي تشتغلين .. وانا وباجر عمّار بيدخل الكلية العسكرية شرات ماقال وبيمشون له راتب.. وخلي امج ترتاح ..
عمّار: لااااااا دخيلك لا تييب لها طاري انها تودر هالشغله.. صارت هوايه عندها
شما: شرات ماقالك عمّار وبعدين يشغلها شوي.. وتتسلا به
حمدان: عيل انا بعد ابااجرب من عطورها؟
هزاع: ياريال والله لو تشم ريحه هالعطور بتتخبل .. ولا المخلطات ودهن العود... شي عجيب الصراحة..عاد اخوك يتعطر مجانا هههههههه
عمّار: لا تستانس هذا لأن بعدك ماكملت شهر .. والأوفر يقولك سكن مجاني طول العمر مع تعطير وتكشيخ لمده شهر مجاناً
هزاع: لحوول يعني عشان جي شما ساعدتني احصل شغل بسرعه .. اثاريها تعرف اني بكد من الشهر الياي على العطور
الكل هههههههههههههههههههههه
حمدان: عيل انا شو الأوفر مالي...
شما: اخبرك ارمس ويا مدير اعمال امي السيد عمّار.. انا اسير اسوي لكم عصير ابرك لي..
ونشت عنهم شما وهي تضحك على سوالفهم... يحليلك يا هزاع طلعت طيب وقلبك ابيض بعكس الصورة الي كنت حاطتها عنك في بالي.. الله لا يغير حالك ويبعد عنك عيال الحرام .. وتذكرت شكله يوم شافته فالمزرعه كيف كان يبا يمسكها.. حست بجسمها كله يقشعر وهي تتذكر الحاله الي شافتها فيها هزاع وحالته اليوميه وهو ايي بيتهم.. سبحان مغير الأحوال .. منو يصدق ان هزااااع الصايع الي ماهمه شي فالدنيا يتغير بهالطريقة في يوم وليله...
ويلست تعابل وتسوي لهم العصير وهي مبتسه.. فجأة حست بإيد تلامس جتفها فزت
صدت وراها شافت اخوها عمّار: الله يخس ابليسك زيغتني..
عمّار: كنتي سرحانه ساعه اشوفج تحركين العصير.. لبن مب عصير ها
ضحكت شما لآخوها: يلا عاد... لا بس كنت افكر شوف كيف هزاع تغير.. كل شي تغير فيه سبحان الله
عمّار: تعرفين كنت افكر بذات الشي البارحه واقول نفس الكلام سبحان الله ... يالله الحمد لله يوم انه اهتدى وتغير..
...

فالميلس عند هزاع وحمدان
حمدان: هزاع شو رايك تفاتح بنت عمك .. لأن والله البنت وايد زينه وماتفوت... مابتلقى احسن عنها
هزاع: لا مابا... خلاص انا شليتها من بالي
حمدان: ياهزاع اسمع رمستي وكلم البنت والله انت الي بتخسر
هزاع: يصير خير بس مب الحين
حمدان: توعدني تفكر فالموضوع..
هزاع: وعد بس فكنا من هالسالفه واسكت لأنها يايه عن تسمع شي مافينا
..
.
تقربت منه ولوت عليه.. : يعل ربي لا يحرمني منك من بعد اليوم..
عيسى تقرب من أمه وحب راسها: الله يخليج لي ذخر الغاليه..
أم خليفه: طول هالسنين وانا اقول عيسى قلبه ينبض وحي.. محد يصدقني.. واليوم اشوفك يدامي..
عيسى : الحمد لله.. أميه.. اشحالها؟
فهمت أمه انه يطري سوسن.. سكتت ونشت من عند عيسى وعدلت قعدتها شوي..
عيسى: بعدها تترياني << الأخ يستهبل..
أم خليفه: عيسى ان غبت 5 سنين.. والكل تحسب انك خلاص.. مابا اقول هالكلمة.. بس طالت غيبتك.. والبنت لين متى اتم تتريا على أمل ردتك.. لازم تعيش حياتها مايستوي..
عيسى وهو يمثل انه مصدوم: شوووو.. عرست؟؟ ..
أم خليفه: هدي عمرك.. عيسى فكر بعقل.. لو اختك بترضى انها تنتظر ولد عمها الي مايندرى به وين سنين يا انه يرجع او مايرجع..
عيسى نزل راسه.. وده يضحك بس ميود عمره عشان امه ماتكشف لعبته..
أم خليفه: سوسن توفى ريلها في حادث طياره وترملت والله رزقها من ريلها ياهل.. ومابا هالحرمه تعيش روحها.. قلت لأخوك خليفه ياخذها.. وماعنده مانع وخوله موا..
قاطعها عيسى ونش من مكانه وعاقد حياته: شوووووو.. امي انتي شو تقولين.. هاي سوسن .. الإنسانه الي طول عمري حلمت بها.. الإنسانه الي كنت العب وياها وكبرت وربيت وياها.. طول عمرنا ونحن محيرين لبعض.. واليوم اتيين تقولين لي خليفه ياخذها؟؟ اسمحي لي امي.. ان خليفه خذا سوسن .. فأنا مابتم هني.. يكفي اني غبت هالسنين وانا افكر فيكم.. يوم اني طلعت.. كل تفكيري ارتبط فيها واعوضها هالسنين.. وانصدمت بخبر زواجها.. ولكن الحين زوجها توفى.. يعني أروم اتزوجها.. تبين تعطينها لخليفه.. كيف تبيني اتحمل اشوف هالإنسانه مرت اخويه..
ام خليفه ابتسمت له: خلاص دامك موافق وتباها.. ماعنا أي خلاف..
عيسى تقرب من أمه: نشي اخطبيها لي..
أم خليفه: بس هي ماتدريبك رجعت..
عيسى: اتصلي فيها خل اتيينا البيت..
انفتح باب الصاله ودخلت خدامه وهي شاله بيبي .. وشنطه البيبي ..: سلام ماما..
أم خليفه ابتسمت: وعليكم السلام.. هاتي مريوومه فديتها..
عيسى صد صوب أمه: أميه منو مريومه؟
أم خليفه وهي تشل مريومه من ايد الخدامه وتعطيها لعيسى.. : بنت سوسن..
عيسى ماتردد لحظة وشلها بسرعه وتم يطالعها بإبتسامه شاقه الويه .. كانه يشوف ملامح سوسن فيها.. وحبها على راسها ويلس يمشي إيده على ويه البيبي وايدينها ويمسكهم .. حس بحراره تسري في جسمه.. كأنه حاضن سوسن في هالوقت.. قرب مريم منه وحضنها بقوة أكثر واحمرن عيونه من الدموع والشوق الي يحس به.. نزل خليفه وياه خوله من الدري شافو سوسن داخله الصاله وهي تشوف عيسى ومبهته ودموعها تنزل بدون لا تحس.. كأنها تحس نفسها في حلم .. أكيد انا احلم.. معقوله اشوف عيسى بعد هالسنين.. رفعت راسها شافت خليفه مجابلها.. لا صدق عيل هذا عيسى مب خليفه.. دققت على البدله الي كان لابسنها.. تذكرت البدله
.. ..
سوسن: خلاص زعلت مابا لا تراضيني..
عيسى: يلا عاد سوسن شو بلاج.. انزين مب عايبني لونه ماقدر اخذه..
سوسن وهي تتطالع وتحايس بثمها وتصك باب السياره بقوة..
عيسى: كسرتي الباب..
سوسن: وصلني البيت لو سمحت.
عيسى: ياربي على الدلع ماروم انا .. اااااااه بشتاق لج بشتاق لج..
سوسن: لا تحاول .. احين البدله الي كان خاطري تاخذها عشان كل ماتلبسها هناك تتذكرني
عيسى وهو يقرب ويهه شوي صوبها وهي تبعد ويهها: ليش انتي متوقعه اني بنساج.. شوفي عيوني..
سوسن منزله راسها ومستحيه
عيسى وهو يصرخ عليها: شوفي عيوني.. (ترفع سوسن نظرها) .. هالعيون ماتعرف غير سوسن .. وانتي شرات الملاك الي يحجب نظري عن كل شي ويخليني ماشوف غيرج يدامي..
سوسن وهي تبعده بصبعها: سوق يلا ردني البيت..
سافر عيسى من عقبها لكن سوسن خذت هالبدله وحطته له فالكبت مع شوية هدايا ثانيه ... لأنه كان مقرر سفره ماراح يزيد عن 3 شهور.. لكن غربته طالت 5 سنين.. وكل شي تم فالغرفه مثل ماهو
.. ..
رجعت بذاكرتها ومن فتحت عيونها شافت عيسى مجابلنها يطالعها: حوو وين سرتي من الصبح ازقرج..
سوسن بصوت متقطع وضحكة ماليه الويه لأول مره الكل يشوفه على ويهها: عـ.. عـ. عـيسى..
عيسى يطالعها ويتحايس بثمه ويشوف فالصاله وراه خوله وامه شايله مريم الصغيره .. : نو.. انا خليفه.. نسيتي اني بكون ريلج عما قريب..
سوسن تتطالعه وعيونها تقول له اشتقت لك.. اشتقت لك.. طالت غيبتك عني وايد.. واااااايد يا عيسى..
عيسى يشوف عيونها ومب قادر ايود عمره اكثر من جي.. وده يصرخ ويقول لها وحشتيني الغاليه.. لكن يبا يلعوز سوسن شوي.. : شوفيج عفان الله بلعتي لسانج ماتعرفين تسلمين.. أميه قولي لها تسلم..
توه بيصد صوب سوسن ومالقى الا صفعه خفيفه من سوسن على خده.. رجعت له الذاكره ل5 سنين قبل.. تذكر حركتها وكلامه وياها يوم تسوي له هالحركة.. فج عيونه وابتسم لها.. حط ايده على خده مكان الصفعه (طبعا كان معطي ظهره لأمه وخوله .. وكانو شوي بعيد من مكان يلسة خوله .. ماكانو يقدرون يشوفون حركات عيسى عدل.. ) لمس بإيده مكان الصفعه وعقبها باس إيده وبصوت واطي .. : فديت هالإيد الناعمه..
سوسن وقتها تأكدت فعلاً هو عيسى صاحت غصبن عنها وربعت صوب ام خليفه .. ولو ان كان ودها ترمي عمرها في حضن عيسى بس ماتقدر طبعا.. وحضنت ام خليفه وقعدوا يصيحون في حضن بعض (فلم هندي) ..
أم خليفه: رجع ولدي يا سوسن.. رجع لي ضناي الي الكل تحسبه ميت..
سوسن نشت من حضن أم خليفه وابتسمت لها: الله لا يحرمنا منه..
عيسى ابتسم لهاوتقرب منهم وقعد مجابلها: ولا يرحمني من هاللمة الحلوة..
أم خليفه صدت صوب خليفه: شو رايك نملج بكم اليوم ..
عيسى: صدق.. (بفرحة عامه ويهه) ماعندي مانع..
اما سوسن نزلت راسها وشلت مريم من عند خوله ودشت داخل صوب الغرف..
خوله: فشلتو البنت حرام عليكم..
أم خليفه: دخيلكم ابا افرح بولدي خلوني استانس.. الروح ردت لي وابا الوناسه ماتفارق هالبيت..
تقرب خليفه وهو ياي من صوب المطبخ من امه ولى عليها.. ياه عيسى وطبطب على ظهر خليفه: احم احم لو سمحت يعني انا محروم من هالحضن سنين.. انت حصلت وايد بسك..
.. ..
..
.
الخميس الصبح
الساعه 10
سلطان: أميه.. ناوليني دله الجاهي..
ناولته امه الدله وردت تشرب من كوب الجاهي الي يدامها..
خلود وهي نازله من الدري بصوت عالي: تراراااااا..
الكل صد صوبها مستغرب بلاها استخفت على الصبح..
خلود: قولو منو بينزل وياي لأول مره على الريوق..
الكل ابتسم عرف انها تقصد نوره.. وفعلا شافو نوره وهي نازله وشايله مهره في حضنها والعنود يدامها.. : ليش هالحشره كلها يعني..
خلود: نوره الغاليه بتتريق ويانا .. لازم فرحة.. ولو بيدي بفرش الأرض فرش أحمر.. بس ما باليد حيلة..
سلطان: ياهلا والله بالنور كله..
نوره: هلا بك زوووووود..
يلست وياهم عالسفره .. وبعد لحظات صمت..
العنود: ماما.. ابا خبز وجبن..
خلود: انا بسوي لج..
العنود وهي تضرب ريلها على الأرض وتصيح: لا لا لا لا.. ابا ماما تسوي لي..
نوره: خلاص بس عاد بسوي لج.. (صدت صوب سلطان شافته يصب له كوب شاهي وعقبها حط السكر ويلس يحرك بسرعه) سلطان..
سلطان: لبيه..
نوره: ماشاء الله عليك عرفت تنقي..
الكل استغرب .. شو تقصد نوره.. ينقي شو؟
سلطان: كيف!!
نوره: شو بلاك فهمك مستوي بطئ.. ترا خلود قالت لي قبل السالفه ويوم شفتها الصراحة ارتحت لها وايد وحبيتها.. صدق صدق انسانه تدخل القلب.. وحليلها هونت علي وايد.. وابتسامتها فيها شي غريب يخلي الواحد يرتاح .. جد ارمس لا تضحك ..
سلطان: انا اضحك لأني مب فاهم شي..
خلود وهي تاكل الخبز وترمس بثم مليان: امم اققــص امم ايدي لو..
قاطعتها امها: خلدوو.. خلصي لقمتج عقب ارمسي.. ههههههه يوزي عن حركاتج بتغصين..
سلطان: مب منها.. من مجوود الي تماشيها علمتها الخبال..
نوره: سلطان لا تغير السالفه.. انا ارمس عن شما..
تأيد شيخه: هيه والله صدقج .. وايد حبيت هالبنت ماشاء الله عليها.. وحتى شفت امها .. حرمه طيبه وع نياتها.. الصراحة عرفت تنقي لك حرمة..
سلطان وهو يحرك حياته : احم احم عشان تعرفون ولدكم مب هين..
شيخه: ربي يوفقك ياولدي..
نوره: وانا اقول أميه لو نخطب البنت قبل لا اتطير عنا لأن ماشاء الله عليها مب ياهل .. كبيره يعني بيونها خطاب فهالعمر اكيد.. وبنت مثل هاي ودام ان سلطان يباها ليش انفوتها من ايدنا..
سلطان وهو يتنهد وفي خاطره يقول ياريت اليوم قبل باجر..: ماعليه لاحقين لاحقين.. انتي لا تستعيلين بس..
خلود: بس احسها وايد مستانسه من يوم ما اشتغلت .. قبل كنت احس فيها ضيج وكاتمه في نفسها .. بس احين احس نفسيتها وايد تحسنت
سلطان: شي طبيعي ترا اوضاعهم اكيد بتتحسن..
نوره: لا تغيرون موضوعي.. انا ادري انت رافض انك تخطبها ألحين عشان خاطري لأن بعدني فالعدة.. انا اقولك ماعليك مني انا الي فالعدة مب انت... واخطب البنت قبل لا اطير منك.. وهذا الكلام اقوله لأمي بعد..
شيخه: بس أميــه..
تقاطعها نوره: اميه لا بس ولا شي.. فيصل توفى والله يرحمه.. لكن ترك لي ملاكين اربيهن واخليهن يرفعن راس ابوهن من بعد عينه.. يعني حالي ألحين هو حالي بعد شهور العدة.. مافي شي بيتغير.. ليش تحرمين ولدج من فرحته.. وبعدين تراه لا حرام ولاشي.. انا الي يحرم علي الزواج في هالفتره .. هب سلطان..
خلود: نوره شو تقولين تبين الناس ترمس عنا.. بيقولون مافتكرو في عدة بنتهم وخطبو لولدهم..
نوره: انتو ليش تعطون الناس اهميه كبيره.. ترا الناس ماعندها غير الرمسة.. وهذا حالهم .. فلان سوى وفلانه سوت.. وفلان قال وفلانه قالت.. سلطان ماعليك من امي وخلود.. متى ماحسيت عمرك مستعد تخطب بنسير انا وامي..
شيخه: يا نوره انتي..
قاطعتها نوره: اميه دخيلج تبين تشوفيني مستانسه ومرتاحه؟؟ خلي سلطان يخطب على الأقل.. دخيلكم ابا شي يونسني ويفرحني.. فيصل وحزنه مابيروح من قلبي لو بعد عشر سنين. يعني لا العدة بتفرق ولا بتزيد بشي..
شيخه: خير ان شاء الله انتي لا تستعيلين..
نوره وبدت عينها تدمع: ليش تبون اتحسسوني اني مصدر شفقه.. ماباااااا والله مابااااااا.. ابا اعيش الجو الي كنت عايشتنه من قبل.. وايد بيساعدني ارتاح نفسياً.. دخيلج أمي .. لا يهمج الناس.. اهتمي في بيتج وسعادة بيتج.. وسعادتي من سعادتكم
خلود حست ان نوره فعلا محتاجة لتغيير .. تطلع من جو الكآبه هذا صدت صوب امها: أميه صدقها نوره مايهمنا كلام الناس.. قبل كنت يمكن اعارض نوره.. بس اقتنعت بكلامها.. فعلا محتاجين نظهر من جو الكآبه.. واذا خطبتي لسلطان ترا مافيها شي خطبه سكيتي المهم نحير البنت
نوره: هو انا ابا اقول شي بتقولون مصختها وايد اتشرط..
شيخه تبتسم لبنتها: لا تقولين هالرمسه انتي العودة ومقامج من مقامي من عقب عيني
نوره: دخيلج امييه لا تيبين طاري الموت.. الله يطول بعمرج.. يميييه اذا ان شاء الله اهل شما وافقوا واستوا نصيب.. نخليها ملجة .. عشان سلطان يقدر ياخذ راحته وياها فالطلعه والدخله.. وتكون حليلته رسمي وشرعي
شيخه صدت صوب سلطان.. ونشت خلود يلست ورا سلطان ولوت على ظهره وحبته على خده: اخوي الغالي مابيقول لا صح..
سلطان ابتسم: الي تشوفونه..
نوره: ياربي فدييييييييييت اخويه انا الي مايردني في شي..
خلود: بس انا استوى لعين وياي كله يردني..
سلطان يطالعها بطرف عينه: ترا عندج ريل بعد شو تبين مني..
خلود نشت عنه وسارت يلست عند امها: ماباك .. خلاص.. ماتستاهل البوسه ردها..
وفي هالوقت دخلت عليهم جلثم ومعاها مجد ..
مجد: السلااااااااااااااااام عليكم.. يه يه يه .. يدووه شوفي الخيانه متريقين كلهم قبلنا.. وشوفي هالنور كله الي هناك.. اثاري نوره يالسه هني..
جلثم وهي تدز مجد بالعصا من يدامها: خوزي خليني اشوف (تغمض عيونها بحيث انها تبا تدقق على الي تشوفه) منو هالغرشوبه الي ياسه هناك..
نوره تتطالعهم وهي تضحك وميلسه مهرو على ريولها.. : فديتج الغاليه اقربي..
مجد وهي ترز بويها وتقرب صوبهم: فديييييت روحج انا..
تسلم على عمتها وخلود الي ناقعه من الضحك على مجد... ومن عقبها سلمت على نوره ويلست حذالها..
نشت شيخه ومعاها خلود.. عشان يسلمن على جلثم.. وتحط نوره مهره على ريول مجد.. ويصد سلطان يطالع مجد: انتي اييه ماتعرفين تسلمين علي؟
مجد وهي تتطالعه ورافعه حياتها وتطلع طرف لسانها: اننننن.. لا ماعرف غياض..
جلثم وهي تضرب عالخفيف على راس مجد بالعصا: عنبوج من بنت حشمي ولد عمتج تطلعين له لسانج شو من مذهب هذا..
مجد: عادي نمون ..
جلثم: اشووووو.. نون..
خلود: لا يدوو تقول انها تمون عليه..
جلثم: نشي يلا.. يوم قالت اقربي ماطرتج انتي ويه العنز.. تطريني انا..
مجد وهي تحايس بثمها وتتطالع نوره.. : عيل شلي بنتج ماباها.. بروح عند حبيبتيه خلود..
خلود: تعالي فديييييييت روحج..
جلثم: فداج الند انتي وهي.. يلا قومن من يدامي .. ويوه العنز..
خلود: يدووه بلاج على العنز..
جلثم: انتو الهنتين اتذكرني بالعنز.. يلا طلعن من الميلس .. اشم ريحه من اول ماحدرت الميلس اثاريكن انتن الي هني..
مجد وتتطالع يدتها بنص عين: ماكانت هاي رمستج يوم طلبتي مني اخاويج لبيت عمتي..
جلثم: مصلحه بس لا اكثر...
خلود: شوفي انا كنت ناويه اخبرج خبر.. بس هونت خلاص.. شوفي منو بيقولج الخبر غيري..
جلثم: ههههه مانبا اخبارج بايته كلها..
خلود: انزين قولي شو الخبر الي كنت ناويه اقوله .. ؟؟
جلثم: اخبرج بنت الشبر ونص.. ترادديني بعد ياللي ماتستحين..
خلود تقرب من يدتها وتحب راسها: لا فديييييتج انا الا انا اسوي وياج سوالف..
جلثم: وع وع.. بوسه عنز مانباها..
سلطان: هههههههه ... يالله روحي بس من الصبح ويدوو طايحه فيج ويا طبجتج.. صدق انكن لوح ولا يأثر فيكن اي شي..
مجد: بلا يأثر يأثر شوف.. ساكته ومارمس ... زعلت خلاص..
جلثم: احسن افتك من حشرتج الي ماتخلص..
خلود: اوووووب يدو وايد مستقويه علينا اليوم .. والعاده ماتروم علينا..
جلثم: يلا روحن .. ولا تباغمن ظهرن قبل لا امرغكن بالعصا واخليكن تصطلبن..
مجد: تعالي خلينا نروح نيلس فالحديقه برع..
جلثم: احش ريولكن ان طبيتن برع باب البيت..
خلود: حشى ليش عاد كل هالكره عالصبح؟
جلثم: نسيتن ان شي عمال برع.. تبن تفضحونا عند العرب..
مجد: نسيتي قلتي عني وعن طبجتي عنز.. والعنز وين يقعد فالميلس..
خلود: كفج.. يبتيها.. هيه وين يقعد فالميلس؟
جلثم: ههههههه صدق انكن شياطين ماينرام عليكن.. ماعلي منكن.. الا نوره رمستي ويا امج فاللي وصيتج عليه..
الكل استغرب وصد صوبهم.. شو السالفه؟؟
نوره: هيه توني رامسه وماعندهم مانع..
جلثم: عيل شيخه اليوم بنروح للعرب وبنخطب البنت..
خلود: اثاري الإخت متفقه ويا الأمم المتحده ومخلصه.. ونحن الي بايتين ونايمين على اذونا ولا ندري بشي..
جلثم وهي تنزل البرقع شوي وتحرك حياتها: يوم قلت لج اخبارج بايته
الكل ضحك .. هههههههههههههه
سلطان: عاد يدتي الله يهديج اليوم..
جلثم : خير البر عاجله.. وانتو الشباب لازم نربطكم بحرمه عشان تصطلبون..
خلود وهي حاطه ايدها على خصرها: والله فديته اخويه مصطلب وماشي احسن عنه .. شيخ الرياييل كلهم..
جلثم: اقول نش اسطرها طراق عني الله يخليك.. يوم اقول عنز.. ماتروم تسكت..
مجد: اقول خلود مسحوا فينا الأرض قومي دخيلج نصعد فوق... بلا قوم يأجوج ومأجوج ما يذلونا زود..
الكل هههههههه
جلثم: لا تزعلون مني يا عيالي والله اني احب اسولف وياكن ماقصد شي.. واليلسه وياكن كم تسوى وبلياكن مالها اي طعم..
صدوا مجد وخلود لبعض وابتسموا ابتسامه عريضه وسارو قعدوا مجابلنها ويضحكون: اصلا نحن مانزعل نتغلا بس..
شيخه: ههههه ماصدقن مدحتي فيهن تيلسو..
.. .. ..
.. ..
..

جاسم: انزين وانت ليش ماترمس عمي.. اكيد بيوافق.. اصلا مابيلقى ريال احسن عنك لمجد..
أحمد: برمسه بس ان شاء الله اخلص هالكورس وبرمس وعدي.. الصراحة مافيه اصبر زود
جاسم: الله ع الحب مانروم..
أحمد: مب بس حب.. انا تغيرت والله عشان هالإنسانه .. دشت خاطري قبل لا اعرف انها بنت عمي.. من شفتها يوم عرس عبيد والبنت دخلت خاطري وكنت حاط في بالي استكشف بنت منو هي.. بس طبعاً كنت حاط في بالي اني اقردن البنت واييب راسها واكون علاقة حب ومن هالخرابيط.. بس يوم اني عرفت انها بنت عمي احترامها انزرع في قلبي.. واتذكر نظرات الإستنكار الي كانت في عيونها يوم العرس.. ومن عقب ماشافت سوالفي وسمعت مني من حرمتك المصون.. الي شخلتني يدامها..
جاسم: ههههه ادرييبها ماتروم تيود شي في بطنها.. كمل..
أحمد: البنت كرهتني.. قامت تكره مجرد وجودي وياهم... يعني كيف اقولك .. حبيت ابين لها اني عشانها بتغير وبسوي كل شي بس تحسن نظرتها فيني.. فالبداية كانت امي دوم تقولي.. انت بتاخذ بنت عمك عبدالعزيز.. وقلت لها ليش ماتقولين لي عن خلود وتيبين لي طاري وحده ماعرف حتى شكلها.. كانت تقولي لا خلود محيره لولد عمها.. وهو أولى بها... بس انا متأكده من بتشوف مجد بتحبها.. فعلا من شفتها حبيتها.. جمالها غير .. طبعها شفافيتها.. دلعها.. كل شي في هالبنت جذبني وحبيته..
جاسم: الله يخليكم لبعض ان شاء الله
أحمد: آمين يارب..
وتقرب منهم واحد ومن شافه جاسم نش سلم عليه وتم يرمسه بالإشارات.. استغرب احمد.. تم يطالع جاسم بإستنكار.. ليش يرمس ويا الريال بإشارات.. ليش جي؟
جاسم: أحمد هذا واحد ويانا فالدوام.. اسمه سعيد الفلاني...
نش احمد ومد له ايده.. : اشحالك؟؟
هز له الريال راسه واشر له بصبعه الإبهام..بمعنى انه بخير..
أحمد وقتها عرف ان الريال ابلم..
جاسم: سعيد ايلس ويانا..
سعيد سمعه ضعيف شوي.. بس مركب سماعات في اذنه لكن مايسمع منها وايد اوكي.. حرك راسه بمعنى شو مافهمت؟
جاسم يوده من ايده وتقرب منه : ايلس ويانا..
سعيد أشر له.. انا مروح مابغثكم..
أحمد: ياريال تردنا.. ايلس افا عليك..
ابتسم سعيد لأحمد وارتاح له ويلس وياهم.. وطلب له كوفي.. وفهالوقت ين شلة بنات اعوذ بالله من لبسهن.. وحده فيهن لابسه برمودا لتحت الركبة.. وبودي لونه اصفر فسفوري ضيج مبين ملامح جسمها.. وعباتها طبعا مفتوحه.. والشيله ولا كنها موجوده.. والي وياها على نفس الإستايل.. وقعدن فالطاوله الي ورا أحمد وجاسم وسعيد..
جاسم: وين يتحرن اعمارهن عالبحر؟؟
أحمد: اسكت ياريال من شفت لبسها بغيت انطر من الضحك..
وسعيد يطالع وحده فيهن وداشه خاطره صدق.. كانت جميله.. الا طرررر... اشر لجاسم وطلع تليفونه وكتب مسج في تليفونه وراواه لجاسم
(( خاطري اتعرف على ام الشنطة البيضا.. داشه خاطري))
جاسم: ياريال شو تبابهن.. بنات مضيعات المذهب مايعرفن الله وين فارنهن.. يولن..
أحمد: شو بلاه..
جاسم: يقول في خاطره يرمس وحده منهن..
أحمد: ياريال شو تبا فالبنات وعوار الراس..
سعيد تم يطالع جاسم واحمد بسكوت وكل شوي يختلس بنظراته ويطالع البنت.. وهي تشوفه وتبتسم له.. والباقي يتساسرن..
دشوا شله شباب ثانين ويلسو على الطاوله الي حذال البنات من الصوب الثاني.. شاف جاسم واحد فيهم وعرفه..
وتقرب منه ربيعه من بعد ماستئذن من باقي ربعه.. : يا حي الله بومحمد.. شو يايبنك هني؟؟ وغمز له بعينه .. اثاريك مب هين ياي عشانهن.. اوه سعيد بعد هني.. سلم على سعيد
جاسم: ياريال شو هالرمسه.. تدريبي انسان مرتبط ومالي بهالسوالف.. ياي ويا واحد من الأهل سرنا السينما ومن عقبها يينا الكوفي..
أحمد: منو الريال جاسم ماعرفتني عليه؟
وافي: ويا وافي الفلاني.. وانت
أحمد: والنعم والله.... انا احمد الفلاني.. اشحالك عساك طيب؟
وافي: بخير.. تعالو يلسو ويانا ع الطاوله..
أحمد: لا ماعليه ماتقصر
جاسم: ماعليه مره اليايه ان شاء الله
طبعا سعيد ولا مهتم بربعه .. كل باله على الغرشوبه الي يدامه... ومشغول يطرش لها مسجات بالبلوتوث ويرمسها..
وافي: ياريال والله حلفت عليكم عيل تقعدون ويانا.. مايستوي تونا متعرفين على أحمد وتبانا مانعزمه..
جاسم صد يطالع احمد.. ابتسم له احمد بمعنى موافق. وساروا الطاوله الثانيه وسلموا على الشباب ونش سعيد.. وعيا الا انه يقعد مكان مجابل البنت عشان يقدر يشوفها..
جاسم: والله ماعندك سالفه..
وافي: ليش بلاه؟
جاسم: مصر الا يقردن وحده من الي قاعدات هناك..
وافي: هههههه من حقه والله يوم دخلنا الكوفي وشفناهن وكل واحد فينا حاط في باله يقردن وحده منهن.. (تقرب من جاسم ووطى صوته) بس كيف بيتفاهم وياهن .. تراه ابلم...
جاسم تضايق من رمسة وافي مايرضى على سعيد.. : قلنا له خلك منهم بس هو مصر.. شو نقوله لا ترمسهن لأنك ابلم.. ع راحته وليش الأبلم ماله قلب..
وافي تلوم من رمسته : ياريال مب قصدي والله .. بس يعني تعرف بنات اليوم كيف..
جاسم:ماعليك انت..
وتموا الشباب يسولفون..
واحد من ربع وافي الا يبا يقردن نفس البنت الي سعيد حاط عينه عليها..
نهيان: انتي ام الشنطة البيضا.. يا بنت الحلال عاد فجي الويه شوي علينا.. شو بلاج جذا..
تمت تتطالعه البنت وهي تستحقره..
سارا: لا انت ولا الي وياك يسوون عشان اعطيكم ويه.. فالكوفي هذا بكبره واحد بس الي يسوى اني ابتسم له..
نهيان: ومنو هذا سعيد الحظ..
سارا وهي تحط ريل على ريل وتقرب من الطاوله اكثر.. وتأشر بصبعها وهي رافعه وحده من حياتها صوب سعيد: هذا..
نهيان صد يطالع سعيد وفيه ضحكة بس ميود عمره...
وسعيد قفط من حركة البنت.. وجاسم وأحمد تموا يستحقرون البنت ووقاحتها وجرأتها..
نهيان: الله يعينج عيل..
سارا: ليييييش؟؟ هو الوحيد الي هادي فيكم.. مايرمس ولا ينطق بشي.. عيبتني هيبته وهدوءه..
نهيان بإستهزاء: يالهبله هذا ابلم مايرمس أصلا.. ماتشوفين ان رمسنا نرمس وياه بالإشارات ويرد علينا بالإشارات..
نشت سارا وهي معصبه وحالتها حاله.. : شوووووو.. هاللي ناقص بعد ارمس لي ابلم.. اقول عذووب.. وحصوص.. نشن يلا.. من الصبح يالس يطرش لي مسجات وحالته حاله.. اثاريه ابلم.. اخبرك انت ايييه ..
وتوها بتكمل رمستها وماحست الا بغرشة ماي تنصب عليها من فوق لين تحت..
أحمد: عشان مره ثانيه تتأدبين في رمستج.. بنت شوارع.. زباااااااااااااله المجتمع.. اصلا مايشرفه انه ينزل من مستواه لحثاله مثلج.. وكلمة ثانيه صدقيني ايرج من شعرج وامسح فيج فالمركز بكبره.. يلا اطلعن من هني يالزباله..
نهيان: هههههههههههههه...
جاسم نش وقف مجابل نهيان: وانت ويا هالويه على شو تضحك.. على احترامك ولا تربيتك؟؟ يالخام.. هذا سعيد الي تستهزأ به.. أحسن منك ومن امثالك.. ولو تعرف هو ولد منو.. جان ماتجرأت ولا رمست..
وصدوا صوب مكان سعيد شافوه محد..
جاسم: وافي سعيد وينه..
وافي تم يتصدد وراه وحذاله: مادريبه كان يالس وراي مانتبهت..
والبنات طبعن من فشلتهن طلعن من المركز بكبره..
أحمد: نش خل نسير ندور على الريال .. احسن لنا من مجابل هالويوه الي ماتعرف الإحترام ولا الإنسانيه..
وطلعوا من الكوفي.. ونهيان تم يالس مكانه مفتشل من الي سواه..
وافي: دواك يالهرم.. صدق انك طحت من عيني.. هاي رمسة ترمس بها عن الريال ..
نهيان: فكنا انت بعد..
..
تموا يدورون عليه كل صوب من مركز صحارى بس مالقوه.. جاسم استهم عليه.. عن يطلع وهو بهالحاله ويسوق وشي يستوي به الريال..
ولقوه فجأة ياي من صوب الحمامات (عزكم الله) ارتاحو ومشوا صوبه..
أحمد: عفان الله شو هالناس.. يجرحون المسكين..
جاسم: ادريبه سعيد انسان اكبر من جي.. وفالدوام ياما سمع رمسات من ناس.. بس كان اقوى منها.. لكن موقف اليوم الصراحة احس كان وايد قوي.. لأن البنت الصراحة ماتستحي وبردت فوادي فيها
أحمد: بنات اخر زمن.. لو كان هيه الي فيها عوق جان مارمست هالرمسه..
جاسم: بس والله ان سعيد احسن عن وايد شباب صاحين ومافيهم شي..
أحمد: خلاص غير السالفه عشان انسي الريال..
وراحوا صوبه كان يبتسم لهم..
جاسم: لا تضايج بعمرك ماعليك منهم.. يهال هاييل.. مايثمنون رمستهم
سعيد هز راسه بمعنى ان شاء الله..
أحمد: عيل تعال اليوم معزوم عنا فالبيت..
سعيد هز راسه .. لا..
أحمد: افا هب من شيمة العرب يردون دعوة غيرهم..
سعيد افتشل ووافق.. وقال جاسم لأحمد يسبقه ويروح البيت وهو بيلحقه خلاف مع سعيد
.. .. ..
.. ..
..
.
خذت الكوب وشربت لها من الجاهي وابتسمت له.. : تدري.. من بعد الي سمعته منك وعن سوالفك.. ودي اعترف لك بسالفه بس مادري شو بتاخذ فكرة عني..
هزاع: ههههه افا عليج بنت عمي.. لو اشك بالدنيا ماشك فيج.. قولي ولا تهتمين.. شرات ما انا رمست وصارحتج
سكتت شوي شما وحطت الكوب ورفعت راسها تتطالعه: تعرف واحد اسمه سلطان الفلاني..
هزاع فجأة رفع راسه وتذكر سلطان فج عيونه: هيه .. هذا واحد من الي كانو ايون المزرعه بس ودرها من عقب مامس..
وسكت..
شما: من بعد مامسكو عفرا.. ليش ماكملت؟
هزاع تفاجأ: وانتي شو دراج؟
شما: عرفت سالفه عفرا انت؟
هزاع: الي سمعته انها طلعت تقص على البنات واتييبهن عنا فالمزرعه.. بس ماعتقد لأن البنات الي كانن اين.. معظمهن كان عندهن الإستعداد لأي شي..
شما: وانا كنت بكون وحده منهن..
هزاع غص وتم يكح.. ويابت له شما ماي بسرعه.. : حلو حلو..
هزاع: انتي شو تقولين؟؟
شما: اسمع السالفه
ويلست تخبره بكل شي استوى من اللحظة الي قصت عليها عفرا.. لغايه اللحظة الي مسكوها فيه..
تم هزاع منزل راسه مفتشل.. يعني خسرتج زود يا بنت عمي.. الغريب قدر يحميج وانا الي ولد عمج واقرب الناس لج ماقدرت اسوي شي.. ااااااااااخ يالقهر.. وكنت ناوي اسحبج وشفتيني بحالتي الخايسه... ابتسم وهز راسه..في خاطره.. وتقول يا حمدان اخطب بنت عمك وانت اولى بها.. كيف تبا البنت توافق وهي شافتني بأسوء حالاتي .. هالمنظر اكيد مابيغيب عن بالها..
شما لاحظت عليه السرحان.. : هزاع.. هزااااااااااااااع..
فز هزاع ورفع راسه شافها ورد نزل راسه: والله اني مب قادر اشوفج في عيونج بعد الي قلتيه..
شما: هزاع هذا كان ماضي.. ومافي انسان ماغلط في حياته.. وانا نسيت الي صار.. بس يوم اعترفت لي توه بكل الي سويته وندمك .. قلت اقولك هالسالفه عشان تخليك تتذكر ان بنت عمك كان ممكن تروح فيها لولا ان سلطان كان ريال ولد حلال وستر علي.. وانقذني..
هزاع: صدق انه ريال هالسلطان.. تصدقين من زمااااان مادري عنه شي..
شما: عندهم عزا.. توفى ريل اخته في حادث بعيد عنك..
هزاع: لا والله.. لا حول ولا قوة إلا بالله.. وكيف عرفتي؟
شما: ترا مو قلت لك اخته بعد دخلها في سالفه عفرا.. تميت على تواصل وياها من عقب السالفه..
هزاع: هيه . عيل لازم نعزيه واجب..
شما: هيه زين تسوي..
وشوي رن تليفون شما... كان الإتصال من خلود
شما: عمرها طويل اخته متصله.. : الووووو
خلود: اشحالج الغاليه؟
شما: بخير انتي اشحالج؟؟ شو هالمفاجأة والإتصال الغريب؟
خلود: ماشي وحشتيني وقلت اسلم عليج
شما: هههه الله على الكلام الحلو مانروم.. شخبارج وشخبار اختج وامج؟
خلود:كلهم بخير ويسلمون عليج..
شما سمعت حشرة عند خلود.. : اقول منو هاي؟
خلود: هاي بنت خالي محتشره تبا ترمسج..
شما: عطيني اياها
مجد: هاااااااي اشحالج؟
شما: هههه الحمد لله انتي اشحالج؟
مجد: بخير.. ماعليه لا تزعلين من خبالي وحشرتي بس جي احب اسوي سوالف..
شما: ههههه يحليلج..
وتمت تسولف وياهن وخبرتها عقب خلود ان امها ويدتها ولطيفه وميثا وخلود ومروه بيون البيت عندهم.. استغربت شما من هالزياره ولا بعد كلهن حريم.. شكت فالموضوع.. بس ماحبت تفكر فيه وايد.. : حياكم الله نترياكم عيل..
خلود: الله يحييج تسلمين.. عاد اسمحي لي بنغثكم اليوم..
شما: لا افا عليج.. بتنورونا بالعكس..
خلود: تسلمين .. يالله عيل برايج ان شاء الله بعد صلاة المغرب بنييكم..
شما: على خير..
وبندت عنهم ..
هزاع: منو الي بيي؟
شما: اهل ربيعك.. يبون يزورونا..
هزاع: غريبه.. مب بنتهم فالعدة.. وتوه عزاهم .. كيف لهم بارض يتزاورون بيت حد؟
شما: مادري هاللي استغربت منه..
هزاع قلبه نغزه.. وحس ان السالفه ممكن يكون فيها خطبه او ماشابه..

مرت الساعات وتزهبت شما .. وتعدلت..
عمّار: يعني لازم نحن الرياييل ننطرد برع البيت؟
شما: هيه لازم تعرف ماعنا ميلس رياييل.. واذا تبا ايلس في حجرتك..
عمّار: لا لا مابا انحبس..
هزاع: ولا انا .. قم نطلع سوى..
عمّار: خلاص عيل.. بظهر ويا هزاع امري لله..
هزاع: جنها الظهره وياي مب عايبتنك؟؟
عمّار: ههههههه يعني مو وايد
هزاع: عنلاتك..
وظهر عمّار مع هزاع..
وشما كملت الترتيبات وجهزت الفاله والمكسرات والعصير وكل شي.. ودله القهوة والجاهي..
ع الساعه 8 وصلو كلهم بيت شما
استقبلتهم شما مع امها..
جلثم: ماشاء الله .. شو هالبيت الغاوي المرتب..
ام عمّار: هذا كله ذوق بنتي..
شيخه: ماشاء الله عليها ذوقها غاوي شراتها..
استحت شما..
وتيلسو الحريم وقعدن يسولفن.. ومن بعدها نشت شما تييب الفواله.. ونشت خلود ومعاها مجد عشان يساعدونها لأنهن يدرون البيت مافيه شغاله..
شما: والله اني مستانسه لهالزياره..
خلود: ماشكيتي ان هالزياره فيه من وراها شي
شما في خاطرها لا عيل جي تخليني اتأكد ان في شي.. : لا ليش اشك في شو؟
مجد: شوفي بالمختصر زيارتنا هاي خطبة...
شما من صدمتها طاح الصحن من ايدها وتكسر.. ربعت ام عمّار للمطبخ: شو صار؟
شما وهي فاجه عيونها مصدومه: ها ماشي.. بس طاح الصحن بالغلط..
مجد وخلود ميودات ضحكتهن..
أم عمّار: حاسبي ماما.. خرعتيني..
وردت أم عمّار الصاله عند الحريم..
مجد: اشفييييج اخترعتي من سالفه الخطبة؟؟ ماقلنا اختطاف نحن..
خلود: ماعليج حركات اونها مستحيه..
شما: ويا ويهكم.. لا بس صدمتوني صدق..
خلود يلست تشرح لها السالفه.. وشما تسمع ومبهته.. ومانتبهت الا على صوت امها تناديها عشان الفاله.. وبسرعه شلن الصحون والأكل وكل شي وتمن يحطنها فالصاله يدام الحريم..
جلثم: ماشاء الله عليها حرمة بيت.. الله يحفظها يارب..
لطيفه: من تربيه امها اكيد..
شيخه: هيه ماشاء الله عليج يا أم عمّار.. صدق عرفتي تربين ..
ام عمار وهي رافعه راسها ومستانسه: تسلمين.. مشكور..
شما وهي تقرص امها وبصوت واطي: مشكورة اميييييه مب مشكور..
مجد حست بالغلطة بس سكتت ماحبت تحرج ام شما..
وطبعن في الوقت الي كانن فيه البنات فالمطبخ.. جلثم رمست عن سالفه الخطبة.. وام شما وعدتهن انها تشاور البنت وترد عليهن خبر من بعد مايتخبرون عن الولد .. وهم عطوها كامل الحريه لأن من حقها تسأل عن الولد..
.. ..
..
من عرفت وشما مابين الفرحة والربكة.. عايبنها سلطان من زمان وشخصيته وايد ارتاحت له شما.. والود ودها تقول لأمها موافقه بس مستحيه وقالت تاخذ بالروتين احسن..
رجع هزاع البيت وشاف الصاله مافيها غير ام عمّار.. دخل وراه عمّأر
عمّار: اميه وين شما عنج ماشوفها؟
ام عمّار: سارت فوق تعبانه شوي
عمّار: اكيد من مجابل الضيوف تعبت.. عيل انا بعد بروح غرفتي..
أم عمّار: لا تعال انت وهزاع اباكم في موضوع وايد مهم
هزاع استهم يوم سمع كلمة وايد مهم.. ونفس الشي عمّار.. بسرعه راحو يلسو حذالها.. ويلست تقولهم عن سالفه الخطبة.. هزاع طول الوقت سرحان ومتضايق.. ااااااااااه خسرتج لا محال يا بنت عمي.. كنت حاس ان هالزياره وراها شي.. وماخاب ظني..بس الصراحة سلطان ريال وان عطيته بنت عمي مابندم لأني اعرف انه بيصونها .. الي سوى سواة سلطان ريال يعتمد عليه.. لأن لو كنت انا مكانه كنت مخلص على البنت.. بس سلطان قدها.. والنعم فيه.. الله يوفقج يا بنت عمي
عمّار: شو رايك هزاع؟
هزاع انتبه ان عمار يرمسه: ها.. شو
عمار: ها شو... تم في سرحانك..
هزاع: ههههههه لا مب سرحان.. والله مادري انت اخوها وهاي امها.. تشاورو وسوو الي تشوفونه في مصلحتها
ام عمّار: افا والله .. انا قلت انت اخوها العود الي بنعتمد عليه.. ماتوقعت ان بعدك ماتعتبر نفسك من اهل البيت
تلوم هزاع وفي نفس الوقت استانس يوم عرف انهم مسوين له قدر فهالبيت وهو ماكمل كم يوم عندهم..
هزاع: تسلمين والله .. مادري بس شما مب صغيره يعني الشور بيدها
ام عمّار: شما قالت لي نسأل عن الريال .. ونشوفه اذا زين ماعندها مانع...
عمّار: خلاص عيل نسأل عنه
هزاع: بس الريال انا اعرفه.. والصراحه ريال والنعم فيه.. ينشد الظهر فيه
أم عمّار: ماعليه بعد خل نسأل.. ترا ماعندي غير بنت وحده.. ومابا بنتي تتبهدل اباها تعيش مرتاحه مع ريال زين
هزاع: افا عليج عموو.. انا حريص على اختي اكثر منج..
استانس عمار يوم حس في حد يشاركه مسؤوليته على اخته.. ونشوا يروحون غرفتهم... واما هزاع فطول الليل
.. .. ..
عدى اليوم وكل شي نفس ماهو.. الروتين اليومي... لكن في بيت أم خليفه.. تحدد يوم ملجه عيسى وسوسن يكون فيوم السبت فالمحكمة.. وعقبها يتوكلون على الله ويعيشون ويا بعض..
حور قاعدة على اعصابها هي تتريا النتايج.. مايهدا لها بال.. وعبيد نفس الشي..
عبيد: حور مب زين عليج التفكير..
حور وهي تبتسم لعبيد وتبا تبين له انها ماتفكر في شي.. : لا حبيبي..بالعكس انا مافكر في شي اصلا..
عبيد: حور.. لو تخبين على الدنيا كلها .. انا ماتقدرين..
حور وهي تنش وتييب غرشة دهن العود وتمشي صوبه بثقل وتضحك له.. : الله يهديك بس.. يعني ماتصدقني (ويلست تعطره وتدهنه بالعطر) .. يلا سير عند ربعك عن تتأخر عليهم..
عبيد: انتي متأكده ماتبيني اتم وياج؟؟
حور: لا فديتك روح الله يحفظك..
عبيد: يا بنت الحلال خليني اتم..
حور: عبيد عاد مايستوي جي عطيت الريال كلمة انك تتلاقى وياه واحين تهون..
عبيد: ايا منكر الحريم مانروم عليكم..
حور: سير يلا ربي يحفظك..
تقرب منها عبيد وحب راسها.. وطلع من البيت وهو متضايق.. يحس عمره يبا يتم معاها مايفارقها ولا لحظة.. احساسه يقول انه بيفقد هالإنسانه.. وهالشي متعبنه وايد.. وطلع من البيت سار يتلاقى ويا الدكتور محمد وربيعه سليمان..
.. .. ..
فهالوقت.. كانت الساعه 6:57 العصر.. توجه هزاع بموتر حمدان الي كان شايلنه.. ( حمدان عنده سيارتين وخذ هزاع وحده فيهن لأنه رد سيارته لأبوه ويحتاج سياره يروح فيها ويرد) .. حاس بضيج.. من الصبح من نش من بعد صلاة اليمعه.. تغدى ويلس فالحجره .. يحس بضيق مب عارف سببه.. سار صوب البحر.. وقف وتم يطالع الشمس وهي تغرب.. ويتأمل.. وكأنه يشوف ابتسامه شما يدامه..
ياربي لو عاشت وياي بتنحرم من هالإبتسامه.. لا ابوي ولا هلي بيستقبلونها الإستقبال الي اهل سلطان استقبلوها فيه.. ويحبونها ويقدرونها.. ااااااااااااه .. وتم يضرب بإيده على السكان وهو صدق متضايق.. حس عمره فقدها خلاص.. انا بغبائي .. وبإيدي هاي الي علها الكسر.. خسرت هالإنسانه.. ورفع راسه ويشوف الأمواج وهي تتلاطم


يالله ياربي توفق شما وتسعدها.. والله ابا لها كل الخير.. من قلبي..
صد شاف ياهل صغيرونه يايه صوب موتره.. نزل من الموتر وشلها.. : انتي شسمج؟
حمده: حمدووو الحلوة الأمورة
هزاع: والنعم والله .. وينهم هلج عيل؟
حمده وهي تأشر صوب أهلها.. هزاع شافهم وكان شكل واحد فيهم مب غريب عليه.. شاف الريال يقرب صوبه..
حمده: اويه بابا ياي.. خشني فالسياره بسرعه بسرعه
هزاع يضحك وهو يشوفها كيف تبا تشرد من حضنه عشان تركض.. وتقرب منهم ابو حمده..
بوحمده: تعالي .. وين بتشردين.. (رفع راسه صوب هزاع واطالعه وابتسم له ابتسامه عريضه) سبحان الله.. صدق ان الصدف تلعب دور..
حمده وهي اتطلع راسها من ورا كندورة هزاع: وين الصدف دورت ماحصلت..
يودها يمعه وشلها .. : مسكتج..
* حمده عمرها 5 سنين.. ويمعه الي ساعد هزاع يوم شافه فالمسيد*
هزاع: اظني انت يمعه الي..
يمعه: هيه ياريال وينك غبت ولا دريت عنك شي.. افا والله ماهقيتها منك..
هزاع: اسمح لي والله حقك علي.. وضيعت رقمك في تليفوني الجديم .. وكنت حاط في بالي يوم امر عليك البيت واشكرك .. بس مالقيت فرصة..
يمعه: ماعلينا الا اشحاله الوالد وانت اشحالك؟
هزاع: والله بخير الحمد لله نشكر الله .. وابويه بخير.. بخير..
يمعه: اشفيك احسك تقولها وانت متضايق قول الي في خاطرك وانا اخوك..
هزاع: والله شو اقولك.. ولا اقول.. خلها يوم ثاني.. هلك يتريونك ومب حلوة تأخر عليهم والشمس بدت تغرب..
يمعه: خلاص عيل.. وخذ رقمي عندك عن تقول بعد ضاع..
هزاع: ههههههه لا افا عليك..
وخذ هزاع رقم يمعه وسلم عليه وروح يمعه مع بنته صوب هله.. وهزاع ركب موتره.. وحس براحه شوي لأنه لقى له شخص يرمس وياه ويقوله الي في خاطره
.. .. ..
منى : ياربي انزين جابليني شوي.. مليييييت شو هالعالم الي ماتحس..
فطوم: يوم بتكونين ثانويه عامه وفي ناس يتريون منج النسبه العاليه مابتقولين هالرمسه..
منى: لحوووووول.. (يلست تصاااااارخ وتناقز وتسوي حشره جنها ياهل بو سنتين) ..
فطوم تمت تهز راسها: لا إله إلا الله.. وبعدين يعني..
ورن تليفونها فهالوقت.. كان فيصل..
فطوم: هلا والله .. المنقذ تعال فكني من هاي الحشرة ماتخليني اذاكر..
منى: يالله مكبر الكلمة الي قالتها.. احين انا استويت حشرة.. انا منوووووووووووه الي تنشر البسمة في ويه الكل..
فيصل: خليني من اختج.. كان عندج خط توه ترمسين منو؟؟
فطوم فجت عيونها: خــــــط؟؟ ..
منى: اووه قصه الخـــــط.. ذلنا راعي القصه للحين مانزل بارت.. اذا يعرفه ريلج قولي له يقوله ينزل البارت ترا مليت..
فطوم: انجبي انتي خليني ارمس.. فيصل ماكان عندي خط ياسه اذاكر ومعاي منى اسألها..
فيصل: مايحتاي اسأل حد سألتج انتي بس.. انزين منو فالبيت؟
فطوم: أمي.. لأن جاسم طلع ويا خلود..
فيصل: عيل زهبي عمرج انا ابا اعزمج عالعشا اليوم..
فطوم: صدق.. يااااااااي وناسه واخيرا بطلع من جو الدراسه.. خلاص بس عطني ساعه اتجهز..
فيصل : هههههه فديتج عساج دوم مستانسه.. خلاص اوكي.. كوني جاهزه ترا بغير رايي..
فطوم: صارووووووخ
منى: وين وين .. انا بعد ابا ايي.. شو هالعالم..
فطوم: ممنوع اصطحاب الأطفال..
منى: ياربيييي هاي تقتل الطفوله الي فيني.. مجرمه.. بخبر عليج جمعيه حقوق الأطفال.. وبعدين يا هادمة الملذات عداااااال وايد كبيره انتي..
فيصل: قولي لها خل تجهز بنطلع سوى..
فطوم: لا هاي حشرة .. وذا..
منى: لا لا لا.. خلاص بسكت بكون مؤدبه.. نسيتي حسي مرهف ولازم اعبر عن احساسي .. ماقدر اسكت..
لاتجرح احساسي.. انا انسان حساسي..
فيصل: اقول خبريها وخليني افتك من صوتها الحلو..
فطوم: هههههههه اوكي..
وبندت الخط ونشت عشان تتلبس وقالت لمنى.. بس منى يلست تناقز وحالتها حاله ومستانسه.. دشت عليهم أم جاسم: بلاكم مخبل.. صوتكم وصل لين تحت..
فطوم: بنتج تخبلت مادريبها...
منى نقزت صوب كتب فطوم: انا ياسه اذاكر وفطوم ماتخليني.. شو هالحاله.؟.
فطوم: يالجذابه.. ترا هالكتب كتبي اميه مب كتبها..
ضحكت ام جاسم على حركات بناتها وطلعت من الغرفه..
ومنى يلست تتطالع كتب فطوم وتتطالع الي فيهن.. بل بل موادهم صعبه.. مابكمل دراستي بستوي شاعره وبحضر امسيات وبلقي .. بس يسد .. هههههه
فطوم: مصدقه عمرها.. تتحرين عمرج نجاح المساعيد..
منى: وععععع ماتعرف تشعر.. قولي حامد زيد.. قولي خالد المريخي.. قولي ..
فطوم وهي تقاطعها: قولي ان بنروح عنج ومابنوديج..
منى: افففففف.. لازم لازم تقطع حسي المرهف..
حد علمي بالغلا يوم كنت اسوى كثير
يوم كانت ضحكتي طبع وعنادي سما
وحد عملي بالعنا يوم خفاقي ضرير
قبل هدم العيش وابنيه وارجع اهدمه
وحد علمي بالبكا يوم لي قلب وضمير
قبل اشوف المسلم يموت بإيد المسلمة
اااااااااااه عذاب يا حامد عذاااااااب
تمت تكتب هالكلمات على كتاب فطوم وتبدل فالصفحات .. بس للأسف ماتلقى مكان ينفع تكتب فيه


عبيد: ههههههه اسميك يا سليمان راعي سوالف... بس ياريال بالنادر نشوفك تيلس ويانا..
سليمان: مشاغل الدوام والله.. تعب ياريال..
الدكتور محمد: ياريااااال الشغل يخلص والعمر مايخلص..
عبيد: محمد شو صار على الفحوصات..
محمد: باجر ان شاء الله بشوف وبرمسك ان طلعوا او لا..
عبيد: ان شاء الله .. اترياك..
سليمان: شو من فحوصات؟؟ سلامات ؟؟
عبيد: ماشي الحرمة شوي تعبانه
سليمان: هيه الله يشافيها يارب..
عبيد وهو يتنهد وحس فيه محمد.. : آمين يارب..
وفي هالوقت مرن شله بنات يدامهن.. ووحده فيهن يلست تتطالع طاوله عبيد وربعه.. وغمزت لمحمد ومشت.. سليمان ماشافها لأنه كان معطنها ظهره.. بس عبيد شاف..
عبيد: مسودة الويه.. شو هالحركات بعد..
محمد عرفها واحتقرها.. وفجأة فز سليمان.. : شو هاليوم الي مابيمر على خير..
عبيد ومحمد استغربوا بلاه.. : شو صار.. خير؟
سليمان: شفت ويه عفن .. عفان الله..
عبيد: اي ويه؟
سليمان: ياخي وحده فالدوام ودي اروغها اليوم قبل باجر.. بنت الذينه عينها قويه تشرد من الدوام وتواعد استغفر الله مابا ارمس عنها بس مقهور.. الله يستر عليها..
محمد شك ان الي يطريها سليمان هيه نفسها جواهر.. : ليش هيه فالمركز احين؟
سليمان وهو يتأفف: ياريال توني شفتها تقول شايف شبح عفان الله ..
محمد: وين ابا اشوفها؟
عبيد: شو بلاك شو تبابها.. الله يستر عليها..
محمد: عبيد توني شفت الي قلت لك سالفتها من فتره وطلبت مشورتك فيها.. يمكن الي يطريها سليمان هيه نفسها؟
عبيد: قول والله.. اعوذ بالله زين يوم الله فكك وكشفها..
سليمان: شو السالفه؟
محمد: مب الحين بس قولي هاي الي اتداوم عندكم.. تشتغل ولا تدريب؟
سليمان: لا يايه تدريب.. وياها ربيعتها.. والصراحة ربيعتها بنت اخلاق وادب وكل شي.. لكن هاي يلست تهدد الثانيه يوم بدت تنصحها انها تودر سوالفها.. اونه انتي ماتعرفيني انا منو ومادري شو.. فقلت ماعليه انا الي بأدبها.. بس مب عارف شو اسوي بالضبط..
عبيد تذكر ان مره حور رمست تقول ان مجد تتدرب في شركة نفس شغل شركة سليمان.. وطفرانه من الي معاها.. : لحظة لحظة.. انا بديت ادخل الأمور في بعضها .. ممكن تفهمنا ..
سليمان: بلاكم انتوا جلبتوا السالفه وماعندكم شي غير طاري هالزباله..
محمد: انت مب فاهم اهميه هالسالفه بالنسبه لي.. بس رد على سؤالي.. اسمها جواهر؟؟
سليمان فج عيونه: وانت شعرفك بإسمها؟
محمد ضرب بإيده على الطاوله مقهور: اخخخخخخخ ليتني قلت لأهلها ليتني.. هاي مب ويه حد يستر عليها.. شفت يا عبيد..
عبيد تم يهز راسه: عفان الله.. اللهم لا تبلينا بس..
سليمان: فأنا ابا اتصرف قبل لا تسوي مشاكل للبنت الثانيه وتوهق اهلها لأنها ماتستاهل...
محمد: تهبي تأذي اي وحده.. والله لأوقف انا في ويهها..
سليمان: ممكن اعرف السالفه..
عبيد: يا ريال هالبنت كانت بتصير حرمته .. لكن كشف سوالفها وشاف كل شي بعينه وانفصل عنها..
سليمان تم يطالعهم متفاجئ..
محمد: عنلاتها الخام.. انا اراويها..
سليمان: لا ماعليه لا تستعيل .. انا بس خل ارمس مجد واتفاهم وياها واعرف منها كل شي.. وعقب بفكر وياك شو نسوي..
عبيد فز : شوووووو.. اسم الي وياها مجد.. هاي بنت عمي..
محمد من سمع اسم مجد ارتفعت حرارته زود.. وتذكرها.. ويوم عرف ان جواهر تبا تمس سمعه مجد .. ارتفع ضغطه زود..
سليمان: ياريال لا تستعيل.. وماعليك مجد مابييها اي شي.. وزين يوم انك واحد من اهلها .. عشان اقدر اخبرك الي صار..
وقعد سليمان يقولهم عن الي سمعه وكيف.. والمواقف الي صارت.. وعبيد يحس وده يروح احين يسطر البنت ويدوسها .. ومحمد اكثر عنه.. وقعد يتفق وياهم شو بيسوي..
.. ...
..
.
يوم السبت..
عيسى من طلع من المحكمة ركب الموتر وركبت وياه سوسن : مسك ايدها ..
عيسى: والله اني مستانس .. مب متصوره اشكثر.. وأخييييييرا ..
سوسن دمعت عينها : عيسى دخيلك لا تسافر بعد.. طالت غيبتك وايد..
عيسى: بس هالمره غير.. بتم وياج مجابلنج لين ماتملين..
سوسن: ماظنتي امل..
عيسى: وين خاطرج نقضي شهر العسل..
سوسن وهي تضحك: تدري احس عمري كبيره على كلمة شهر عسل..
عيسى من النوع الي خبل شوي.. عليه حركات غبيه..
نزل الجامه وقف شيشه البترول.. وقعد يطالع الهندي : طاع هاي تقول كبيره على شهر العسل.. من كبرها عشان تقول هالرمسه هههههههههههههههه
وسوسن تتطالعه وتضحك على هبالته..
والهندي المسكين مب فاهم شي.. وقاله يعبي له بترول .. ورفع الجامه..
عيسى: شفتي حتى الهندي بلم ماعرف شو يقول..
سوسن: من حركاتك.. ماتيوز انت..
عيسى: ليش ايووووز.. هذا انا.. لا الأسر غيرني ولا حبج تغير..
سوسن: الله لا يغير علينا طول العمر..
وبدت مريوم الصغيره تصيح..
عيسى: هادمة الملذات صاحت.. سكتيها.. خل اتفرغ للغزل..
ضحكت سوسن: لا تقول عن بنتي جي.. ترا ما ارضى..
عيسى: الله يصبرني.. شكلها بتاخذ من غلاتي..
سوسن: غلاتك ماشي يضاهيه..
وعيسى كان وقتها معبي بترول ومخلص.. ومن سمع رمسة سوسن اخترش. وداس على البترول مسرع.. وسوسن تيبست من الزيغه: شوي شوي..
عيسى: انتي مره ثانيه حاسبي في رمستج .. خبلتي فيه..
.. .. ..
فالمستشفى..
طيف: دكتور يبت التقارير الي طلبتهم..
محمد بسرعه نش من مكتبه

من شاف الأوراق وقرا النتايج.. فر عمره على الكرسي ويلس متضايق.. وتمت طيف تتطالعه ساكته مب عارفه شو تقوله..
محمد: كيف برد على الريال.. شو اقوله.. ياربي ليش خليتني فهالموقف مع اعز ربعي..
طيف: هاي ارادة ربنا دكتور..
محمد: اللهم لا إعتراض.. عيل يوم بظهر من الدوام بمر عليه البيت وبرمسه.. هني ماينفع..
طيف: انا بعد اقول جي



الجزء الحادي عشر
الفصل الأول
=-=-=-=-=-=
خذتي غلا القلب كله.. مابقى باقي.. خذتيه من أوله لين آخر سنينه.. صرتي بحياتي وغرامي كل عشاقي.. يابخت قلبي متى قلتي تحبينه
..
.
تم يطالع تليفونه وهو مستااااااانس على الآخر.. حاس ان الفرحة مب شايلتنه.. تم يدندن هالكلمات ويعطر كندورته وسفرته.. وادهن بدهن العود ولبس ساعته وشل تليفونه ونظارته الشمسيه وطلع من الغرفه ..
ميثا: فديت هالويه .. ربي يبلغني فيك معرس ان شاء الله.. شو هالكشخه والرزه كلها.. ع وين بتضوي؟
أحمد وهو يطالع أمه بكل حب.. يحس مافي شي يحس به فهاللحظة غير الحب.. وحب راس أمه.. : الغاليه الزين هذا ورثته منج يا أم الزين كله..
دش حميد أبوه على رمسة أحمد: عنلاتك.. ماتقول بعد طالع على ابوك..
أحمد: هههههههه .. حرام الي يجذب يدخل النار صح أمايه..
ميثا وهي تتطالع ريلها تبا تقهره: صح اميي فديييييت طلتك.. ماقلت لي وين ساير؟
أحمد: بسير عند عمي عبدالعزيز متصل فيني قالي يباني أمر عليه..
حميد: أحمد انت مارحت الكلية اليوم؟
أحمد: لا أبويه لأن نحن نشتغل على بروجكت التخرج فدواماتنا تغيرت شوي..
حميد: الله يوفقك.. اباك ترفع راسي فاهم...
أحمد وهو يلقي تحيه عسكرية لأبوه (بو عبيد ريال متقاعد من الجيش برتبه لواء).. : حاضر سيدي..
رد له ابوه التحيه وظهر احمد وهو مستانس.. ومشى صوب الكاراج.. وشاف عبيد يالس في سيارته ومتساند على السكان.. استغرب.. تقرب منه وفتح الباب .. : بووو.. بوفيصل؟
عبيد: من سمع صوت أحمد ماحس بعمره إلا يفر عمره في حضن أخوه وعيونه محمره من الصياح والضيج..
أحمد زاغ لحظتها .. : عبيد شو بلاك أخويه.. شو مستوي.. ليش هذا كله؟؟ أول مره اشوفك جي..
عبيد: خلاااااااص بتودرني الخايسه .. وبتروح عني... أكرهها أكرهها..
أحمد تم مستغرب من رمسة عبيد.. : اخبرك سير ايلس هناك وانا بسوق.. وبنظهر وبنشوف شو سالفتك لأني مب فاهم شي ومابا حد يشوفك بهالحاله.. خصوصاً حور.. تدريبها حامل ومب زين عليها التعب
عبيد رضخ لرمسة أحمد وانزاح للكرسي الي حذاله وركب أحمد الموتر وطلع به برع البيت.. : ممكن تهدأ وتقولي شو الي صاير.. ومنو هاللي بتودرك؟؟ لا يكون عبيد عندك سوالف بطاليه.. يا ريال تراك معرس..
عبيد: روح زيييييين انا فاضي حق هالسوالف..
أحمد: عيل شو سالفتك لأني مافهمت شي من كلامك..
رن تليفون عبيد فهالوقت.. وشاف ان الي متصله حور.. : رد عليها أحمد قولها إني مت.. هلكت.. اي شي.. اتعذر بأي شي..
شل أحمد التليفون وهو ساكت ورد على حور..: حي الله مرت اخوي..
حور: اوه احمد.. اشحالك؟
أحمد : بخير دامج بخير.. ماتبينين ولا جنج في نفس البيت..
حور: تعبانه تدري ماروم انزل وايد..
أحمد: معذورة..
حور: خذتني بالسوالف وابا ارمس عبيد وينه؟؟
عبيد يأشر لأحمد اشششش أنا مب هني..
أحمد استغرب وتم يرمس: عبيد مب وياي.. مادريبه وين اتصلي على تليفونه..
حور وهي مستغربه: بس أحمد انا متصله على تليفونه إنزين..
أحمد توهق وماعرف شو يقول. تدارك عبيد الموقف ورمس: غناتي.. انا عندي مشوار صغير ويا أحمد وبرجع البيت ان شاء الله..
حور تضايقت وايد .. ليش مايبا يرمسني.. ليش قال لأحمد يقول عبيد مب وياي.. ليش يجذب.. أكيد النتايج طلعت شرات قبل ومب قادر يناقشني..
عبيد: حور.. ألووو..
حور انتبهت لعمرها: هلا.. خلاص اوكي.. مع السلامه
وبندت الخط بدون لا تتريا رمسة من عبيد..
شل أحمد التليفون من الإسبيكر.. وصد صوب عبيد: ليش رمست وطلعتني جذاب؟؟
عبيد بصوت حزين: ماروم أشوفها متضايقه.. ماروم احس اني السبب في ضيقها..
أحمد: عبيد شو اللي صاير ياخوي فهمني..
عبيد والدمعه تنزل على خده بكل حراره.. : اليوم طلعت نتايج فحوصات حور للمره الثانيه بعد ما طلبت اعادة الفحوصات.. وطلع ان فيها سرطان فالمعدة.. ومنتشر في الأمعاء بعد.. قالي الدكتور محمد إن أمل العلاج جداً ضعيف.. خصوصاً إنها حامل.. ومايقدرون يبدأون بأي علاج لحد ماتربي.. (أحمد يسمع عبيد ويحس راسه يفتر عليه .. الكلام صعب عليه يتحمله ويصدقه) .. وبيولدونها قيصري في نهاية السادس.. وبيخلون الياهل فالحضانه لمدة شهرين لحد ما يكبر شوي ويكتمل نموه ..
أحمد: خل يولدونها ألحين.. ماعليه الياهل يموت.. بس حور أهم من الياهل..
عبيد وتزيد ضيقته: وهذا الي فكرت فيه.. بس حور مابتوافق.. لأنها يوم عرفت عارضت اي فكرة تأذي الياهل..
أحمد: سفرها برع وصدقني بيظهر ان مافيها شي.. مستشفيات هني فاشلين مايعرفون شي..
عبيد: وهذا الي قلت بسويه.. رمست واحد من ربعي يداوم في ديوان الشيخ محمد بن راشد.. بودي له تقارير حالة حور.. وعشان نسافر على حساب الديوان نعالجها برع..
أحمد: زين تسوون.. ولا تضايق بعمرك.. ان شاء الله بتقوم بالسلامه وبترد لها صحتها ماعليك..
عبيد: أحمد تقص علي ولا تقص على عمرك.. تذكر إليازيه بنت خالوو.. كم كان عمرها ؟؟ 12 سنه يوم توفت بسبب سرطان المعدة.. تحيد شو كانو الدكاتره يقولون؟؟ من أصعب السرطانات هو سرطان المعدة..
أحمد وقف موتره عند باب بيت عمه عبدالعزيز.. وهو مب عارف شو الي يابه هني مع انه قرر انه مايروح ويتم مع عبيد.. رفع راسه عبيد وشاف باب بيت عمه.. تضايق زود..
عبيد: ليش يايبني هني..
أحمد: مادري انت من قلت لي عن السالفه قمت اسوق بلا حاسية..
عبيد: ماتخيل ان حور تروح عني أحمد والله اني مالي حياة من عقبها..
أحمد: خل إيمانك بالله قوي.. ولا تحاتي شي أبد.. ان شاء الله مابيكون فيها الا العافية.. واثق من هالشي..
عبيد: الله يسمع منك.. عيل خلنا ننزل نسلم على عمي
أحمد: مينون تنزل وانت بهالحاله.. شوف عيونك كيف محمرين؟؟
عبيد: شو اسوي والله من الضيج الي فيه..
أحمد: قم بنرد البيت ..
عبيد فز فجأة: لا البيت لا.. أرجووووك ماقدر اواجهها واقولها حور النتايج طلعت متشابهه.. ماقدر..
أحمد: مب لازم تقولها.. قول النتايج بتتأخر.. الجهاز خربان.. وانت بتسافر معاها عشان تسوي فحوصات شاملة وتتطمن..
عبيد: مايستوييييييي انت شو بلاك.. حور ماينقص عليها..
أحمد تم يضرب بأصابعه على السكان وهو متضايق من داخله وايد.. تذكر مجد .. كيف بيكون موقفها اذا شافت اختها على فراش الموت... أو انها تعرف ان حور مريضه.. حس بضيج أكثر .. ماوده يشوف في لحظة مجد تحس بضيج.. وخصوووصاً اليوم بعد الي صار له..
سرح ورجعت له الذاكره لورى وتذكر الرمسه الي دارت بينهم فالمسجات..
..
أحمد: (( يعني بتنتظريني؟))
مجد: (( أنتظرك ليش لا... إنت ولد عمي وعمري مابلقى أحسن منك))
أحمد: (( تقولينها عن قناعه ولا مجرد تسايرين التقاليد!))
مجد: (( كلي قناعه ان سعادتي بتكون وياك))
أحمد: (( تسمحين لي اقولج كلمة من كل خاطري ماقلتها لج من قبل!!))
مجد: (( قول!!!!!))
أحمد: (( أنا أحبج.. ماباخذج لأنج بنت عمي وبس.. لأني اباج انتي وبس وأحبج))
تمت مجد مبهته وتقرا المسج مره وثنتين وثلاث وعشر.. ومن الفرحة يلست تناقز على السرير وتيبب وترقص.. الي يشوفها يقول هاي تخبلت شي ياها.. وردت ع ورى وفرت عمرها على الفراش.. وحضنت التليفون.. وأحمد مالقى منها أي رد.. تطمن ان رمسته عيبتها لأنها لو عصبت كانت بتدق ولا بتطرش مسج..
..
عبيد: أحمد بتم ساكت جي..
أحمد انتبه لعبيد يزقره صد صوبه: هلا .. شو بلاك..
عبيد: يعني مابننزل عند عمي نسلم عليه؟
أحمد: ها.. هيه يلا خل ننزل..
ونزلوا سوا عشان يسلمون على عمهم عبدالعزيز..
بعد ما دقوا الجرس.. استقبلهم عمهم ودخلوا عنده الميلس .. وقعدوا وياه.. من عقبها تذكر عبيد سالفة مجد وجواهر.. قال هاي فرصة إنه يرمس مجد ويتأكد منها ويعرف كل شي..
عبيد: عمي.. بغيت مجد اذا موجودة فالبيت..
أحمد صد صوب عبيد مستغرب.. في خاطره: لا يكون يبا يقول له عن حور.. صدق مينون..
عبدالعزيز: هيه ابويه .. مجد هني.. خلاص بسوي لك درب وبزقرها عشان ترمسها فالصاله..
ونش عبدالعزيز وطلع من الميلس ودخل البيت.. صد أحمد بسرعه صوب عبيد: انت تخبلت تبا تخبر مجد .. انت تعرف شقايل مجد متعلقة في إختها..
قاطعه عبيد: انت شو بلاك ماتركز وياي.. منو قال اني بقول لمجد عن حور.. السالفه الي برمسها فيها غير
أحمد: هيه ريحتني ياريال اتحراك بترمسها.. قلت اكيد تخبل..
عبيد ابتسم له بحزن ونزل راسه.. وزقره عمه ونش دخل الصاله شاف يدته ومرت عمه قاعدين.. قرب صوبهم وسلم عليهم..
جلثم: عبيد ولدي بلاه ويهك مصفر جي؟؟ لا يكون بنت عبدالعزيز ما تأكلك ؟؟
عبيد ضحك على رمسة يدتها : لا امييييييه.. حور حاطتني في عيونها والله.. بس انا هاليوم تعبان شوي..
جلثم: لا لا انت مب تعبان وبس.. انت شي مضيق خاطرك ومستهم به
عبيد تم يطالع يدته فاج عيونه.. في خاطره: لا صدق ان ماينقص عليج يا جلثم بنت سعيد..
جلثم نشت وقربت صوب عبيد وحطت ايدها على راسه: امي انت شي فيك بسم الله عليك.. تعال خل اقرا عليك.. مب طبيعي اليوم..
عبيد يتهرب ويمشى صوب اليلسه ويقعد: لا اميي صدقيني مابلاني شي.. انتي تعالي يلسي حذالي ولهت عليج..
جلثم: شوف انا بسوي عمري مصدقة بس مب معناته اني ساكته عنك؟..
عبيد يبتسم لها وفي خاطره: شكلي بنفضح جي.. مب سهله ماينرام عليها هالعيوز..
ونزلت مجد فهالوقت: شو السالفه اكيد تحشون فيني؟
لطيفه: ياربي من هالبنت .. كله شاكه في عمرها..
مجد: طوووووط.. تصحيح.. مب شاكه في عمري.. قولي واثقه من عمري اني حديث الساعه.. لالالا.. حديث كل ساعه..
جلثم: انتي شو سالفتج اليوم ضحكتج شاقة الويه ؟؟ ليش هالكثر مستانسه..
مجد تحط ايدها على خصرها وتتطالع يدتها: لا إله إلا الله.. قل أعوذ برب الفلق.. من شر ماخلق.. حرااام استانس.. ماعرفنا لكم .. اذا زعلنا.. ليش زعلانه؟؟ شوي ضحكنا؟ ليش مستانسه..
عبيد يطالع يدته بنص عين.. : هيه والله صدقج مايعيبهم شي..
مدت جلثم عصاتها وتمت اتدز عبيد فيها: اطلع من هني.. هب هبابك من ريال..
عبيد: هههههههه .. انزين تعالي مجد نروح الحديقه برمسج هناك.. مانبا حد يسمعنا..
جلثم: شو عندكم؟؟ بينكم أسرار اشوف؟؟
عبيد: مب قايل.. كيفي..
جلثم: لا تقول.. بس مصيري بعرف كل شي..
عبيد: هههههههه..
وطلعوا وساروا الحوي وقعدوا على اليلسه الي برع..
عبيد: مجد الموضوع الي برمسج فيه وايد مهم.. وصدقيني بيتم من بيني وبينج بس؟
مجد وهي مستغربه من اسلوب عبيد وياها ومب قادره تستوعب شي..
عبيد: شو بلاج تتطالعيني جي؟
مجد: مادري بس احس اول مره ترمسني في موضوع ..
عبيد: انزين سمعي.. جواهر الي اتداومين وياها شو تعرفين عنها؟
فجت مجد عيونها ووقفت: انت شو عرفك بجواهر؟.. من وين تعرفها؟؟ لا يكون ..
قاطعها عبيد: جب انتي خليني ارمس وردي على سؤالي بالأول وعقب ارمسي..
مجد: ماشي .. ماعرف عنها شي.. مجرد وياي فالكليه والتدريب ماعرف عنها شي..
عبيد يطالعها بنص عين: متأكدة؟
مجد بدت ترتبك شوي.. لأنها من النوع الي ماتعرف تجذب .. ويوم تجذب يبين عليها.. : ها.. هيه متأكدة..
عبيد: مجد الموضوع الي برمسج فيه بيتم بيني وبينج ومحد بيدخل فيه.. ارمسي وقولي ولا تخافين من شي..
مجد: عبيد انت عن شو ترمس بالضبط انا مب فاهمه؟؟ شو يخص جواهر فالموضوع؟؟ وليش اخاف؟
عبيد: شوفي انا بفهمج كل شي وركزي وياي..
وقال لها عبيد عن سليمان يوم سمعهم يرمسون ... وعرف كل شي.. وغير جي.. انها كانت خطيبة الدكتور محمد في يوم من الأيام وشافها بهالموقف...
تمت مجد تسمع ومب قادره تصدق شي.. اتحس راسها بدأ يعورها من الكلام الي تسمعه.. معقوووله ان هاي كانت بتستوي حرمة الدكتور.. ااااااااخ يالقهر.. بس صدق ان الله يحبه وماتورط وياها وانفضح يدامها ولا بعد بعدها مستمره ولا هامنها.. صدق ان عينج قوية..
عبيد: فهمتي ألحين.. عشان جي اباج تقولين لي كل شي تعرفينه عنها؟
مجد: بس انتوا شو الي تبون وناوين تسوونه؟
عبيد: سليمان ناوي يتفق مع سيكيوريتي الشركة انه يحط كاميرا صوب الباركنات.. يصور كل شي ويسجله.. وبيصورونها يوم تنزل من سياره ابوها عساس انها بتدخل الشركة.. ومن ذاك الصوب هي تركب سياره ثانيه.. ومن عقبها بيستدعون ولي أمرها... والمدرسة المسؤولة عنها فالكلية.. وبيراوونهم الشريط.. وهو بينهي القضية من صوبه انه بيطردها من التدريب.. وعاد البقية بتكون مابين الكليه وأهلها..
تمت مجد فاجة عيونها... وفي نفس الوقت ماتبا مستقبل جواهر يضيع: بس عبيد الكليه بيفصلونها فهالحاله؟
عبيد: تستاهل..
مجد: انا اقول بس خل اهلها يدرون.. والكليه لا.. عشان تكمل دراستها؟؟
عبيد: الدكتور وانا وسليمان اتفقنا نبا نبعدها عنج.. وشي ثاني .. سليمان مايبا هالأشكال عنده فالدوام.. يقول من أول يوم شافها ما إرتاح لها.. فكيف بعد الي سمعه؟
مجد نزلت راسها: الله يستر..
عبيد: المهم لو تسهلين علينا وتخلينا نعرف متى هيه بتغيب؟
مجد: باجر..
عبيد: شو دراج؟
مجد: لأنها اليوم مرت علي المكتب جان تقولي.. حطي في بالج اني باجر بغيب.. اذا سألو عني.. قولي مريضه عندها موعد .. ولو قلتي غير جي.. انتي الي بتخسرين؟
عبيد: انتي الي بتخسرين!!.. شو تقصد بهالرمسة؟
مجد: مادريبها..احسها ترمس وتخربط ولا تدري معنى الكلام الي تقوله..
عبيد: ههههههههه خربوطه هالبنت..
مجد: هههههه..
كان فهالوقت أحمد يطالعهم من جامه الميلس كانت مجابله هاليلسه.. ومقهور.. يشوف مجد ترمس وتاخذ وتعطي ويا عبيد.. وتضحك وياه.. وهو محروم من هالشي .. ماقدر ايود عمره.. طلع من الميلس .. ومشى صوبهم..
أحمد: السلام عليج بنت عمي؟؟
كانت مجد معطتنه ظهرها.. تيبست من سمعته .. حست بحراره غير طبيعيه في كل جسمها.. يودت ضحكتها ونشت وقفت.. : وعليكم السلام..
وبسرعه دخلت البيت.. كانت مستحيه ومحمره صدق.. ومشت صوب الدري بدون لا تسمع رمسة يدتها ..
..
أحمد: بلاها شردت..
عبيد: دفش ياريال.. تدخل لا هود ولا هدا.. زاغت البنت..
أحمد: هههههههههه ..

حمدان: والله انك مينون.. رمسها .. إنت اولى بها..
هزاع: ياخي بس دوخت راسي بهالرمسه.. قم خل ندخل عن حد يسمعنا..
حمدان: قاهرني صدق..
هزاع: والله يا حراااااااااام..
حمدان ضرب ع جتف أخوه بالقو وهو يضحك وسبقه صوب ميلس بيت شما.. ودخل.. ومن عقبه هزاع..
أم عمّار: هلا والله ولدي.. اشحالك؟
حمدان قرب منها وحبها على راسها: الحمد لله بخير.. انتي اشحالج وعلومج؟
أم عمّار: بخير دامي اشوفكم بخير..
شما دخلت الميلس ووراها عمّار: أنا اقول شو بلاه بيتنا منور اليوم؟؟ اثاري حمدان هني؟؟
حمدان: تسلمين بنت عمي ..
عمّار: خلاص نحن ماقمنا إنّور البيت..
اتطالعته شما بكل حب وحنيه: انت النور كله.. بس جنك وايد قمت تلعب هاليومين وأهملت دراستك؟؟
عمّار: تبيني افوت هالقعدات الحلوة..
هزاع: لا أصلا القعدات هاي ماتكمل الا بوجودك.. بس بعد نباك ترفع راسنا..
حمدان: هيه كون أحسن من هزاع.. هههههه .. ياب 61..
هزاع يطالعه بنص عين: اسكت اسكت.. عالأقل انا مايبت دور ثاني شراتك..
حمدان تم يحج راسه ويتهرب: الا شو اخبار الدوام شما؟؟
الكل ضحك على تهرب حمدان.. ولما نشت شمّا تحضر الفاله وتييبهم.. بدت أم عمّار ترمس فالموضوع.. موضوع خطبة سلطان لشما..
أم عمّار: ها امي هزاع سألت عن الريال؟
هزاع: أميه الريال مايحتاي أسأل عنه.. لأني اعرفه .. ريال والنعم فيه الصراحة وفي أهله عمري ماسمعت عنه شي..
أم عمّار: وانا قلت من الواجب أرمس أبوك فهالموضوع .. لأنه عمها وموافقته مهمه..
حمدان وهزاع صدوا صوب بعض .. كأنهم يعرفون شو بيكون رد أبوهم..
حمدان: عموو تبين الصدق.. مايحتاي.. أبوي ماقام يسأل عنهم .. ولا داري بعيال اخوه.. بيهتم فهالموضوع؟
أم عمّار: لا يا حمدان ولدي.. من الواجب نرمسه.. راس مالها هالعم..
استانس هزاع من رمسة أم عمّار.. صدق انهم ناس اصيلين.. رغم الي سواه ابوه فيهم.. الا انهم يحترمونه ولا يرمسون عنه بأي سوء.. وفي هالوقت سمعوا صوت الجرس..
هزاع: منو ياينا؟
عمّار: أكيد حد من زباين الوالدة.. يبون شي..
أم عمّار: سير أمي عمّار افتح الباب شوف منو ياي ..
مشى عمّار فالحوي وفتح الباب انصعق.. حس ان الدنيا دارت في عينه.. يحس كأنه يحلم.. لا إراديا صك الباب شوي ورد فتحه.. حس ان لسانه انربط مب قادر يرمس ولا يقول أي شي.. من الصدمة..
بوهزاع: يعني ماتبا تسلم على عمّك؟؟
عمّار لا إراديا قرب من عمه وحب راسه.. وهو ساكت..
بوهزاع استانس لأن اول شي سواه عمّار حب راسه .. مع انه كان متوقع استقبال غير عن جي.. وفي هاللحظة سمع صوت هزاع من باب الصاله.. : منو عند الباب.. عمّار.. ؟
عمّار صد صوب هزاع مب قادر يرمس.. يحس لسانه مربوط.. لا محال يرمس.. ودخل بوهزاع الحوي.. وشافه هزاع انصدم.. : أبوي؟؟
بوهزاع: هيه ابوك الي نسيته وماقمت تسأل عنه من كم يوم.. ولد عمك طلع احسن عنك من شافني حب راسي..
هزاع مشى صوب أبوه وحبه على راسه: شو هالزياره الغريبه؟؟
بوهزاع وهو صاد صوب عمّار ويضحك على شكله.. بعده واقف مكانه يطالع وهو ساكت.. : ماغريب الا الشيطان.. ياي بيت اخوي فيها شي؟
هزاع: لا مافيها شي.. بس..
بوهزاع: بس سو لي درب أدخل البيت..
هزاع تقرب من أبوه: دخيلك ابوي اذا ياي تتضا..
قاطعه أبوه.. : هزاااااااااع.. عيب عليك.. وسو لي درب أقولك..
سبق عمّار هزاع ودخل البيت.. وشاف امه وشما وحمدان قاعدين .. يبا يقولهم بس بعده مب قادر..
شما: عمّار.. شو بلاك.. منو ياي عند الباب..
عمّار يأشر صوب الباب ويبا يرمس بس ماحس إلا ودمعه نزلت من عينه.. شما وأم عمّار زاغو.. نشوا بسرعه يشوفون منو الي ياي.. من فتحوا الباب وايهوا بوهزاع .. انصدموا.. وحمدان نش من مكانه وقف وخايف من الي بيصير ألحين..
بوهزاع: شو بلاكم مستغربين.. اول مره تشوفون عم ياي بيت عيال أخوه؟؟
حمدان: لا بس أبويه انت ماييت الا في شي صاير..
تم يضحك بوهزاع بصوت عالي والكل يطالعه وقلبه في إيده من الزيغه: الله يسامحك يا حمدان.. هذا وانا ابوك تظن فيه هالشي.. انزين وان شاء الله مب ناوين تسلمون علي ولا تخلوني واقف عند الباب وايد..
تقربت أم عمّار ومن وراها شما وتلف ورا تتطالع حمدان وترفع حياتها بمعنى شو السالفه؟؟؟!!
أم عمّار: حيا الله بوحمدان.. تفضل البيت بيتك..
بوهزاع: تسلمين.. دومج راعية واجب وأصيله...
الكل صد يطالع بعضه.. ومستغربين من اسلوب بوهزاع وياهم.. ولا ورمسته ويا أم عمّار بالذات..
تقربت شما وحبت راس عمها : اشحالك عمي؟
بوهزاع: بخير ولو اني زعلان منج؟
شما: مني أنا؟؟ ليش عمي..
مشى بوهزاع ويلس حذال ولده حمدان وعطاه نظره يقوله ايلس يعني.. وقعد حمدان حذال ابوه.. : ليش؟؟ عيل تبين تعرسين بدون لا تقولين لعمج؟؟
الكل سكت وانصدم زود.. كيف عرف.. صدت شما تتطالع هزاع..
هزاع: لا تتطالعيني والله ماقلت له شي..
بوهزاع: يلسوا بتمون جي واقفين.. وتطمني الي قالي مب هزاع..
وقعدوا كلهم وعمّار للحين مصدوم أكثر من الباقي..
أم عمّار: لا والله يا بوهزاع قايله لبنتي ماتعرسين الا بحضور عمج.. وموافقته..
بوهزاع: وأنا متأكد من هالشي.. بس عتبان من بنتي..
حمدان: مها ولا سلامه؟؟
بوهزاع وهو يضربه على راسه عالخفيف: بلاه راسك مستوي خفيف ماقمت تفهم.. بنتي شما..
شما اتطالعت هزاع ويلست تشلق عيونها .. بمعنى انها بيغمى عليها من هالرمسه مب قادره تصدقك..
بوهزاع: لا تيلسون تتطالعوني جي.. بخبركم السالفه؟؟ .. الي خاطبج صدق انه ريال والنعم فيه.. ياني الشركة ورمسني.. قالي بما إنك وليها من الواجب اخطب البنت منك.. والحريم كلموا أمها.. كبر في عيني.. لو واحد ثاني جان ماهمه الا انه ياخذ البنت بدون لا يفتكر فهالعم المسكين..
استانست شما من الخاااااااااطر إن سلطان سوى هالشي وكبر في عينها أكثر من قبل.. والكل استانس.. وفهاللحظة هزاع اجزم انه فقد شما لا محاله.. لأن بعد الي سواه سلطان مايقدر انه يحرم سلطان انه ياخذ بنت عمه.. لأن الي سواه سواة رياييل يعرفون الأصول..
بوهزاع: ها يا بنتي شو رايج انتي؟؟ انا طلبت من الي اعرفهم يسألون لي عنه.. بس اللي شفته منه يخليني احس به ريال يعتمد عليه..
هزاع ابتسم لشما وهي نزلت راسها بحيا.. : ابويه سلطان ربيعي واعرفه من أيام الثانويه.. وانت تعرف يده من صوب أمه.. عبدالله فلان الفلاني الله يرحمه توفى طبعاً.. بوحميد..
بوهزاع: والله عبدالله عمه.. الله يرحمه كان ريال والنعم فيه الصراحة.. وهو الي ربى ولد مرته ماذكر اسمه..
هزاع: هيه ابويه هذا يده من صوب امه..
بوهزاع: لا دام ان جذوره تمتد لبو حميد.. هذا الشي يخليني ماستغرب من الي سواه.. بس هذا مايمنع ان نسأل
أم عمّار: هيه شي أكيد.. وترا الشور شورك يابوهزاع.. الي تشوفه في مصلحة شما موافقه..
بوهزاع: لا يا أم عمّار.. هالرمسه كانت رمسة أيام امج وابوج.. وامي وأبويه.. بس ألحين كل شي تغير.. راي البنت هو الأول..
شما: بس يا عمي انا واثقه انك ما بتختار لي الا الزين..
استانس بوهزاع لثقه بنت اخوه له رغم كل شي صار.. : الله يخليج.. خلاص عيل بنسأل عن الريال وبنتشاور.. وماشاء الله البيت ماتغير شرات ماهو.. أحيد هو نفسه الفرش؟
أم عمّار: من أيام ريلي الله يرحمه ماحبينا نغير البيت..
هزاع: بالعكس عموو لازم تغيرون.. عشان نفسيتكم تتحسن.. ومنها تغيير..
بوهزاع: وانا مابا بيت اخويه يكون اقل من بيتي.. رمست لكم شركة تأثيث مع مهندس ديكور ممتاز نتعامل معاه دايما للبيت عندنا عشان يمر عليكم اليوم العصر ويغير فرش البيت كامل.. هذي هديه مني..
الكل فج عيونه مستغرب.. شو صاير فالدنيا.. بوهزاااااااااااااااااع يتغير بهالطريقة.. مب معقول..
بوهزاع: شو بلاكم تتطالعوني بهالطريقة؟؟ .. ادري مب متوقعين مني أي تصرف.. (صد صوب هزاع) بس هزاع فتّح عيوني عن أشيا وايد كنت غافل عنها.. وزايد ماقصر وعطاني من الزين.. وحسيتي بقصوري وياكم.. واني ظلمتكم وايد من اليوم الي توفى فيه اخوي.. وقلت لازم اعوضكم عن كل شي.. لأن لو كنت انا الي ميت اعرف ان اخوي مابيقصر على عيالي.. بس انا الي قصرت.. وكل الي خذته عنكم بينرد لكم بفوايدة.. مابا على اخر عمري آكل مال حرام.. ترا بيني وبين القبر خطوات..
تقرب هزاع من ابوه مستانس ومفتخر فيه وحبه على راسه: الله يطول بعمرك أبويه..
الكل: آمين يارب..
فرح بوهزاع لـ لمتهم وخصوصا يوم شاف الإبتسامه على ويوهم.. تقرب عمّار من بوهزاع وماقدر يقاوم رغبته في انه يحضن عمه.. مهما يكون يحس بريحة أبوه فهالإنسان.. رغم كل الي سواه لكن يحبه.. تقرب من عمه ودمعته في عينه .. وحضنه بقوة.. ويلس يصيح والكل تأثر من الموقف .. خصوصاً شما يلست تصيح وأمها طبعاّ..
دخل الغرفه وهو حاس بضيق.. شو يقول لها...
حور من شافته نشت من مكانها وتقربت صوبه وتتطالعه في عيونه تشوفهم محمرين .. مبين انه كان يصيح...
حور: عبيد؟؟ ليش هالدموع؟؟ اذا انا رحت عنك فالدنيا ترا بنلتقي فالآخره..
ماقدر يمنع نفسه عبيد من انه يحضنها.. وحضنها ويلس يصيح في حضنها.. وحور ميوده عمرها يدامه ماتبا تبين نفسها ضعيفه ولا يحس بضيقها.. : عبيد ماحيدك انسان ضعيف الإيمان؟؟ .. انا الي مفروض اصيح..
عبيد: حور والله الود ودي اسوي أي شي .. دخيلج اجهضي.. عندج عذر ربج مابيحاسبج..
حور ابتعدت عن حضنه وبإنفعال: لااااااااا.. البيبي لا.. لا لا.. مستحيييييل.. دخيلك اذا انا رحت من الدنيا مابيتم مني شي.. خلني على الأقل واترك مني شي يذكركم فيني..
عبيد: دخيلج حور اسكتي لا تقولين هالكلام.. بتعيشين ان شاء الله.. انا بودي اوراقج الديوان وبأقرب وقت بنسافر..
حور : عبيد لا .. ابا اتم بين اهلي ومعارفي والي يعزون علي واعز عليهم.. مابا اطيح هناك بعيدة عن الكل وأموت بروحي..
عبيد تم يصارخ وهو معصب: لااااااااااا تقولييييييييييييييين اموت.. مابتموتين ان شاء الله فاهمه.. وانا بكون وياج يكفي..
سكتت حور مابغت حالة عبيد تزيد.. ويلست .. وتقرب منها عبيد.. ومسح على راسها: اسف حبيبتي بس انتي عصبتي بي.. ماتحمل اسمع هالرمسه..
حور: عبيد خلنا نكون واقعيين.. دخيلك لا تعذبني.. دخيلك عبيد.. خلني بين اهلي..
عبيد: انا لو تميت ورا مستشفياتنا هني مامنها فايدة.. بوديج هناك كل شي متطور عندهم احسن..
حور: خلاص على رايك ماعندي أي مانع.. بس هدي نفسك..
هدا شوي عبيد وحط راسه على السرير.. ولحفته حور وطلعت من الغرفه.. وسارت صوب غرفه المكتب..وقعدت فيها يلست تصيح.. : يااااااااارب دخيلك.. ابا هالياهل يطلع من بطني سليم.. دخيلك ياربي.. مابا شي يصيبه.. تعبت عليه ولا تضيع تعبي.. انا راضيه باللي كتبته لي.. وراضيه بمشيئتك.. اللهم لا إعتراض..
دخلت عليها ميثا (أم عبيد) .. استغربت يوم شافت دموع حور.. بسرعه قربت صوبها: حور حبيبتي شو بلاج أميه؟؟ .. شو فيج؟؟ ليش هالدموع؟؟
حور: ها .. لا ماشي بس اتذكرت شي ودموعي نزلت.. (ابتسمت لها)
بس ميثا ماتطمنت من رمستها حست ان شي فيها.. بس ماحبت تضايقها وتصر عليها زود.. وطلعت من المكتب خلتها روحها..
.. .. ..
شيخه: يمي هدي عمرج.. شو بلاج جي.. انتي روحج مب ناقصه عوار قلب..
نوره: بنتي هاي.. ريحة فيصل فيها.. وهاييل مايحسون .. ماخذين البنت من الصبح وأحين صارت الساعه وحده فليل ومايابوها للحين..
شيخه: يا نوره شو بلاج تراها بيت يدها ويدتها..
يلست نوره على السرير وتصيح: يوم فيصل كان بينهم.. عايروه في بناته.. والحين يوم راح يبون بناته..
شيخه: الله يهديج نوره هدي نفسج
دخل سلطان عليهم الغرفه.. وكانت العنود في حضنه راقده.. : بنت وصلت..
نوره: شوفي.. هاي حالتي.. ويوم اييبون بنتي تكون راقده.. منو أمها أنا ولا هم.. هاي حالتهم كل يوم يشلونها .. يعني مالي حق يوم اقضيه ويا بنتي..
يلست تصيح أكثر.. وسلطان تضايق يوم شاف اخته بهالحاله وتقرب منها.. : نوره دخيلج عشان خاطري لا تسوين بعمرج جي..
نوره وهي محرجه .. : باجر ماتعطونهم بنتي .. ماتطلع العنود من البيت.. يبونها ايون هني.. ها بيتها..
شيخه: خلاص ان شاء الله من عيوني.. انتي هدي بس..
سكتت نورة شوي.. وكلهم طلعوا عنها وساروا الصاله..
سلطان: صايره وايد عصبية؟؟
شيخه: وايد.. وفات فيصل مأثر عليها وايد.. ماتتحمل فراق عيالها دقيقه..
سلطان: من حقها امي.. مابقى لها غيرهم ..
شيخه: هيه بس هم بعد لهم حق بالعيال .. تراهم اهله..
سلطان: صح امي .. بس الصراحة مصخوها .. يومياً يشلون البنت من الصبح وماييبونها الا تالي الليل يوم ترقد.. نوره وين تلقى وقت تقضيه ويا بنتها؟؟ وخصوصاً العنود دلوعه فيصل.. اقرب وحده لفيصل ..
شيخه: الله يعينها بس ويصبرها..
سلطان: وفي شي بعد رمسوني فيه ماحبيت اقوله يدام نوره..
شيخه: خير أميه شو السالفه؟
سلطان: أم فيصل رمستني وتقول انهم بيطرشون المصروف الي يسد اليهال.. 500 درهم فالشهر.. وباقي راتب فيصل ( لأن راتبه راح يستمر حتى بعد وفاته للأيتام والأرمله زوجته).. بيحتفظون فيه للعيال يقولون عشان مستقبلهم..
شيخه: شو هالرمسه الماصخه بعد.. وين ألحين 500 يكفون .. هالأيام لو الراتب كله بعد مايسد... وبعدين بنتي كانت على ذمة ولدهم ليوم وفاته .. يعني من حقها يكون لها مصروف بعد..
سلطان: ترا الرمسة انا بعد مادخلت راسي.. كيف بيحتفظون فالبيزات.. يعني اليهال يعيشون حياة إقتصاديه عشان خاطر مستقبلهم .. شي مايدخل الراس..
شيخه: خلهم .. مابنيلس نضاربهم عشان بيزات.. يزاهم الله خير يوم فكروا ب500.. والله أعلم جان صادقين أو لا.. انا أم فيصل من يوم الي خذت فيه نوره فيصل وانا ما أبلعها كانت على كل شي نصرفه للعرس تتحرطم.. وتقول ليش هذا وليش هذا.. وبنتنا نحن مب عيزانين على صرفها والصرف على عيالها..
سلطان: وانا بعد أقول جي.. وشي ثاني امي.. اليوم ترا سرت عند عم شما وخطبت شما منه..
شيخه: زين سويت عشان مايقول عمه سوينا شي من وراه..
سلطان: بالعكس حسيت عمها طيب وايد.. رحب فيني واستانس علي.. وقالي بنسأل عنك وبنشاور البنت وبنرد عليك.. يعني ماحسيته متضايق او شي..
شيخه: يجوز شي مشاكل من بينهم نحن ماندري عنها او انه ماحب يبرز يدامك ان بينهم خلاف عشان مايطيح من عينك..
سلطان: والله كل شي جايز.. عالعموم انا بسير ارقد.. وراي دوام باجر.. شي تامريني امييه؟
شيخه: روح امي.. ونوم العوافي...
سلطان: الله يعافيج..
ومشى صوب غرفته بس سمع أنين من غرفه خلود.. دق الباب ودخل.. شاف خلود يالسه على السرير وملتمه على عمرها والتليفون عندها وتصيح.. خاف وبسرعه سار صوبها..
سلطان: شو فيج؟؟ خلود شو مستوي..
من شافته خلود فرت عمرها في حضنه ويلست تصيح وتشهق من الخاطر.. سلطان خوفه زاد.. حس ان السالفه جايدة..
سلطان: لا تخرعيني اكثر قولي شو الي صاير..
بس ماشي استجابه تصيح بزيادة.. يودها سلطان ويلس يهزها: خبريني شو الي صاير ذبحتيني قولي؟
خلود بصوت متقطع: جاســـ م .. من سار عند ربعه المغرب للحين ماعندي خبر عنه.. اتصل فيه مغلق.. خايفه سلطان خايفه..
سلطان يهز راسه: لا حول ولا قوة إلا بالله.. شو بلاج متشائمه.. خلج متفائله يابنت الناس مب زين جي.. اذكري الله..
خلود: لا إله إلا الله.. غصبن عني سلطان.. من بعد الي صار لفيصل الله يرحمه.. قمت اخاف.. صرت حتى ماباه يطلع من البيت..
سلطان: خلوووووووود.. بس عاد.. عن هالرمسات الماصخه.. واذكري الله.. وتلاقينه ناسي تليفونه مكان ومخلص الجرج عنه.. ولا مكان مافيه ارسال.. لا تخلين الشيطان يأثر عليج..
وفي هالوقت رن تليفون خلود.. فزت من مكانها وردت على طول.. : الووو..
جاسم: هلا بهالصووووووت الي ولهت عليه..
خلود يلست تصيح.. وجاسم استغرب..
جاسم: شو فيج غناتي؟؟ ليش تصيحين؟؟
سلطان اتطمن وطلع من الغرفه يخليها ترمس على راحتها..
خلود: انت وينك من المغرب.. والله خايفه عليك.. اتصل كله مغلق.. حرام عليك ذبحتني..
جاسم: فديت الي يخافون علي والله.. ماشي غناتي كنت في ميلس واحد من الربع وتليفوني فضى.. وتوني راكب الموتر قلت احطه فالجرج واتصل في اغلى انسانه فهالكون..
خلود: عالأقل طمني تعرفني احاتيك..
جاسم: امممممم يعني افهم انج تحبيني؟
خلود: أحبك ليش ماحبك؟
جاسم: هههههههههه منو قدي.. اسف وحقج علي اني خليتج تحاتين..
خلود: آخر مره فاهم..
جاسم: فاهم يالشيخه..
خلود: شيخه أمي..
جاسم: ههههههه سخيفه بس حلوة منج..
خلود يلست تضحك والدموع في عينها..
.. .. ..
..
.
اليوم الثاني
سليمان كان فهاليوم على اعصابه من بعد ما قال له عبيد ان جواهر اليوم بتطلع.. ويالس هو في غرفه السيكيوريتي يبا يشوف كل شي بعينه.. شاف بالأول مجد وهي نازله من سياره ابوها وداخله الشركة.. وتعب من كثر مايتريا.. وتوه بيطلع من غرفه السيكيوريتي.. انتبه لشي فالشاشه .. تقرب من الشاشه وتم يطالع.. شافها نازله من سيارة كروزر بيضا.. وتمشي شوي شوي صوب البوابه بس كل شوي تتصدد وراها كأنها تبا تتأكد ان الكروزر راح خلاص.. وعقب وقفت شوي ترمس فالتليفون.. وهي تعطي ظهرها للشارع وتتغشى.. وعقب تمشي صوب الرنج السودا.. وتركب السياره بسرعه .. من شاف سليمان الي صار.. بسرعه طلع من الشركة من الباب الجانبي الي يوديه لباركن سيارته وركب سيارته مسرع يبا يلحق الرنج يشوف وين تروح.. واتصل فهالوقت في الدكتور محمد..
الدكتور: وين انزين؟؟
سليمان: مادري انا وراهم ألحين.. شوف انت سير ييب اخوها وانا بتصل فيك من يوصلون للمكان وانت تعال...
الدكتور: خلاص أوكي..
وبند الدكتور الخط.. وصد صوب طيف: أخبرج طيف.. انا بستأذن اليوم دام ان ماعندي مواعيد فالعيادة اليوم.. عشان عندي شغلة ضروريه لازم اسويها.. يلا مع السلامه..
طيف مستغربه من حماسه كأنه يبا يسوي شي ماسواه في حياته.. وابتسمت من تحت النقاب: مع السلامه..
وطلع الدكتور وخذا اذن من المدير وطلع من المستشفى سار المكان الي يداوم فيه أخو جواهر العود.. اسمه سهيل..
سهيل: شو السالفه ؟؟ وين تباني أروح وياك..
الدكتور: انت تعال وياي وبلاها هالرمسه.. وفالدرب بشرح لك كل شي..
سهيل: خلاص بستأذن وبييك.. ترياني تحت..
وبسرعه نزل الدكتور واتصل فيه سليمان وقاله عنوان المكان الي هم فيه.. وكان سهيل في هالوقت واصل.. وبسرعه ركبه السياره ومشى صوب المكان الي دله عليه سليمان..
سهيل وهو يحط ايده على السكان.. فز الدكتور : انت مينون تباني انحرف عن الدرب.. شو بلاك؟
سهيل: ياريال دوخت راسي من كثر ما مسرع.. فهمني شو السالفه؟؟
الدكتور: سهيل الي بسويه ماباك تزعل مني فيه.. ترا في مصلحتكم .. وشي ماينسكت عنه... وانتوا تدرون به احسن من الفضيحة تكبر وتوصل لأماكن ماتتمنون انها توصل لها..
سهيل: محمد انت عن شو ترمس بالضبط؟؟
الدكتور: يوم بنوصل وتشوف كل شي بعينك بتفهم..
وبعد ربع ساعه وصلوا للمكان الي قاله سليمان ونزل من السياره بس سهيل تم يالس.. راح له الدكتور : شو بلاك ماتبا تنزل؟
سهيل: وين انزل؟؟ وين يايبني؟
الدكتور: الي يدامك بنايه وفيها شقق.. بنروح شقه من الشقق..
وقرب سليمان صوبهم.. : محمد.. محمد..
صد محمد صوبه : ها عرفت أي شقه؟
سليمان: سألت حارس العماره وقالي شقه رقم 308
سهيل: منو هذا وشو السالفه؟؟
سليمان: انا سليمان الفلاني..
سهيل: والنعم .. بس ممكن افهم شو الموضوع؟؟
سليمان تقرب منه: بسألك سؤال واحد.. عندكم سياره كروزر بيضا رقمها ****..
سهيل مستغرب كيف سليمان يعرف موتره: هيه هاي سيارتي؟
سليمان: نزلت وحده في شركة (----) ..
سهيل: هيه اختي تتدرب هناك..
سليمان: وصلنا خييييير.. انا مدير الشركة هناك.. والمسؤول عن اختك المتدربه.. ومن فتره اكتشفنا انها ماتحضر الدوام ويوم اتصلو على البيت.. الأهل قالو انها سارت الشغل.. يعني بالمعنى هيه تقولكم انها اتيي الدوام ومن ذاك المكان هي تطلع..
سهيل معصب وشوي بيضرب سليمان: شو قصدك يعني؟؟ .. انا بنفسي منزل اختي شو هالرمسه؟
سليمان: ونحن مصدقينك انك انت الي بنفسك منزلنها.. واختك المصون من انت روحت ركبت هالسياره (أشر على السياره الي فالباركات).. تعرفها؟؟
سهيل ودمه بدا يفور.. : لا ماعرفها.. بس فهمني شو الي صاير..
الدكتور: اختك فهالبنايه.. وفي شقة 308..
سهيل مشى صوب باب البناية بسرعه وسار صوب المصعد عشان يروح للشقة الي يقولون عنها ويشوف بعينه لأنه مب قادر يصدق لغايه مايشوف بعينه كل شي..
ولحقه الدكتور..أما سليمان فتم فالموتر تحت..
محمد: سهيل.. شوي شوي.. عن يسمعونك او شي..
سهيل: بكسر الباب عليهم.. والله ان الي في بالي يدور الحين يطلع صح يكون اخر يوم في حياتها.. تعرف يعني شو اخر يوم في حياتها..
محمد: سهيل اذكر الله.. محد يعرف بالسالفه غيرنا.. وسليمان ريال والنعم فيه مايحب يرمس في اعراض الناس.. وانا بعد نفس الشي.. وعشان جي انا ماخذتها وقلت لها تنسى فكرة ملجتنا..
سهيل: بسسسسسسس.. اسكت.. وخلني اشوف كل شي بعيني..
دق سهيل جرس الشقة وغطى بإيده العدسة السحرية عن يشوفه حد ويعرفه.. وكان يسمع حشرة أغاني
.. ..
فالشقة
كان صوت الأغاني عالي.. الي يسمع يقول عندهم حفلة.. وجواهر لابسه لبس فاضح وترقص.. وهو يالس مجابلنها ويطالعها بنظرات غريبه..
وقتها سمع صوت الجرس وسار صوب المسجل وخفض صوته
جواهر: ليييييييييييييييييييش كنت مندمجة؟
جابر: حد يدق الجرس..
جواهر تفج عيونها: منووو؟؟
جابر: يمكن مال اللاندري.. لأني معطنه كناديري عشان يكويهن..
جواهر: اها اوكي..
ويلست على الكنبه بلبسها الفاضح وشعرها الطويل الأسود مفتوح ويايبته على جتفها من يدام وياسه تلعب فيه وهي حاطه ريل على ريل..
فتح جابر الباب.. وماحس الا بإيد تيوده من رقبته واتدزه صوب اليدار.. : وينهااااااااااااااااااااا مسودة الويه؟؟
جابر يحس نفسه بيختنق وعيونه بتطلع من قبضة سهيل القوية.. ويوده وسحبه وياه صوب الصاله.. وانصدم يوم شافها واقفه مصدومه وتتطالع.. تم يطالعها من فووووووق لين تحت.. أما محمد فمن لمح جواهر بهالمنظر من صدمته ماقدر يقعد.. سار صوب الغرفه وشاف عباتها مفروره على السرير.. شل العباة ونزل راسه.. وفره على جواهر عشان تتغطى فيه.. وجواهر بسرعه تغطت فيه.. وسهيل ماحس بعمره الا ينقض عليها ويضربها بكل قوة .. كسرها من كثرالضرب..
جابر من شاف هالمنظر خاف.. توه بيشرد من الشقه وبيطلع يوده محمد ودزه بكل قوته على الكنبة.. وطاح وكانت جواهر قريب منه.. من انتبه له سهيل .. يوده وقعد يدوسه بريله ويضربه.. : يالجلب.. يالخااااااااااام مالقيت غير اختي تقص عليها..
جواهر كانت فهالوقت منهاره من الصياح والصدمه وقاعده في زاويه تتطالع الي يصير.. صد صوبها الدكتور واطالعها بحقاره..
جابر: شو اقص عليها.. اختك اصلا يتني وهي خالصه.. سير دور على الي خلصها مب انا..
وماكمل رمسته الا يته ضربه على ويهه كسرت له خشمه وتم ينزف.. وفهالوقت سمع حارس العماره الحشره وصعد.. دخل الشقه.. وطرده محمد من الشقه بسرعه وبند الباب..
محمد: سهيل هدي نفسك.. وسلمه للشرطة..
سهيل بكل عصبيه: مينوووووووون انت اكيد مب صاحي.. تباني اكبر الفضيحة..
محمد: انزين انت هدي ألحين.. عن تذبح الريال من الضرب وتكبر المشكلة ويموت..
سهيل: نفااااااااد .. مابندم على موته.. ولا بتحسف اني جتلته.. هو ولا جواهر..
جواهر ربعت صوب سهيل وهي ميوده ايده: لا دخيلك .. سهيل سامحني..
دز سهيل ريله وفرها: يالوصخه لا تيوديني..: لا تقربين مني.. عنلاتج.. ان ماذبحتج بإيدي..
صدت جواهر صوب سهيل شافته مغمض عينه وينزف صرخت: سهييييييييل .. مااات.. جابر مااات.. وراحت صوبه يلست تهزه: جابر.. جابر..
يودها سهيل من شعرها ويرها .. : وبعد سايره عنده وتزقرينه يدامي.. صدق انج ماتستحين..
توه بيقرب يضربها .. ربع صوبه محمد وقبضه من ايده وسحبه.. : ياريال استهدي بالله.. وقم خل نودي الريال المستشفى..
سهيل صد صوب جواهر: شوفي هالمره في حد قدر يوقفني .. بس المره اليايه جاتلنج لا محاله.. تعالي يلا.. يودها من ايدها وزقروا الحارس عشان يساعدهم يشلون جابر ويودونه المستشفى.. والدكتور طبعاً قال انه بيسوي كل شي بواسطته بدون تدخل الشرطة..
سليمان بعد الي صار .. رجع الشركة وهو فيه ضيق غير طبيعي.. : الله يحفظ بناتنا يارب ..
..
سهيل: محمد ممكن طلب؟
محمد: آمرني..
سهيل: هالجلبة بعد ابا اسوي لها فحص عذرية..
جواهر من سمعت رمسة سهيل تغيرت ملامح ويهها: شووووو.. لا مابا.. يعني لهالدرجة تـ..
ماوحالها تكمل رمستها الا ياها سهيل بكف على ويهها.. سهيل كان يالس ورا ويا جواهر.. وجابر محمد يلسه حذاله عشان يقل النزيف وهو في حاله اليلسه بس كان مغمى عليه من الضربه الي يته عالراس يوم طاح عاليدار..
سهيل: بعد لج ويه تنطقين؟؟ بعد الي شفته بعيني تبيني ما اسوي لج فحص.. تحلمين ومب بكيفج..
تمت جواهر منزله راسها وتصيح... محمد كان متضايق من الموقف الي صار.. يحس كبير على عليه انه يستوعب مثل هالمشاكل..
وصلوا المستشفى وبسرعه دخلوا جابر الطوارئ للعلاج.. وراح محمد رمس دكتوره يعرفها فالطوارئ وفهمها السالفه وانه مايبا الموضوع يوصل الشرطة.. ويبون يفحصون جواهر.. الدكتورة وافقت.. وراحت جواهر مع الدكتورة لغرفة الفحص.. يلست الدكتورة تتطالعها بحقاره ..
جواهر يودت الدكتوره ويرتها صوبها: شوفي ان قلتي لهم الصدق صدقييييييني ويهج هذا بشوهه لج؟؟
الدكتورة: نعم؟؟ .. اصلا انتي تستاهلين يبلغون عليج.. ماعنده سالفه الدكتور مايبانا نوصل السالفه للشرطة.. بعد لج عين تهددين..
جواهر وهي تقبض ويه الدكتورة بإيد وحده وترص على خد الدكتورة بظفورها والدكتورة متألمه من الوضع.. : صدقيني ويهج الحلو هذا مابيتم على حاله..
ابعدت الدكتورة ايد جواهر عندها وطلبت منها تقعد الوضعيه الي تسهل على الدكتورة الفحص.. جواهر توحشت وضربت بريلها بطن الدكتورة خلتها تطيح وفي هالوقت كانت السستر توها داخله.. ومن شافت المنظر يلست تصارخ..
ربع سهيل من سمع الصريخ صوب الغرفه ودخل.. شاف الدكتورة طايحه وجواهر يالسه على السرير..
الدكتورة وهي تتألم: اقول خذ هالمتوحشه من يدامي.. قاعده تهدد... شل اختك الله يستر عليها بس..
سهيل صد يطالع جواهر بنظره غضب الي كانت بس تتطالع الدكتورة كأنها تتوعد لها بإنتقام... بس ماحست الا بأخوها ايودها من شعرها وإيرها وراه وهي تمشي وتصارخ: شعري.. اااااااااااااي .. هد شعري .. ااااااااااااي ..
الكل يطالع ومستغرب منهم.. ويودها وفرها صوب اليدار وطاحت عالأرض يلست تصارخ بصورة هستيريه غريبه .. ولا كأنها وحده مسويه شي وندمانه عليه.. وراح صوبها يلس يصفعها.. قرب الشرطي المناوب في قسم الطوارئ وفرق سهيل عن جواهر.. ويلس يهزب سهيل..
الشرطي: وين تتحرا عمرك فالبيت ..
سهيل تمالك نفسه يوم شاف الشرطي.. ماوده يزيد فعصبيته ويغلط على الشرطي ويتورط زود.. سكت ويود جواهر ومشى صوب الباركات تذكر انه ماياب سيارته.. اتصل في محمد عشان ياخذ سيارته.. وعطى سويج سيارته لمحمد عشان يروح باركات دوام سهيل وياخذ الموتر..
وركب جواهر السياره.. : انا اراويج وان ماخبرت ابويه والي فالبيت كلهم عشان يجتلونج..
جواهر وهي تصيح: لا دخيلك بس.. بس يكفيني..
سهيل: مابرتاح غير يوم اشوفج مشلوله وطايحه..
جواهر: ليش هالكره كله نسيت اني اختك..
سهيل يصرخ بأعلى صوته: جــــــــــــــــــــــــ ـــــــــــــب.. انا ماعندي اخت اسمها جواهر فاهمه.. انسي هالشي.. وبعدين مابا اسمع حسج تمي ساكته قبل لا افرج فالشارع وادوسج بالسياره لأن مايهمني لو ادخل السجن من وراج عادي عندي.. وهذا الي تعرفينه للأسف مامات.. بس صدقيني موته بيكون على ايدي..
تمت جواهر ساكته وخايفه ماتعرف شو المصير الي يترياها..
.. ..
عبيد فهالوقت كان يخلص الإجرائات الي عليه بخصوص السفر.. وقدم على اجازه اضطراريه له ولحور .. ووافقوا عليها لأنه استلم ورقه من الديوان بخصوص العلاج.. وراح يتكفل الديوان بكل شي ويحجزون بأقرب وقت ويبلغون عبيد بموعد السفر..
تمت تتطالعهم ومب متخيله نفسها انها تفترق عنهم.. تشوف ضحكاتهم وسوالفهم.. تتخيل كيف بتكون تعابيرهم يوم هي تختفي من عندهم.. يلست تتطالع بطنها وتتأمل ... بس بيتم مني شي عندهم بيذكروني فيه.. وابتسمت...
مجد: حووور.. ريلج وينه ؟
حور مستغربه: ليش؟
مجد: لا بس كنت بسأله عن شي..
حور: قال بيي العصر عنده اشغال بيقضيها..
مجد: هيه زين..
حور: لا بس شو السالفه..
مجد يلست تشرح لهم الموضوع.. وجلثم تسمع وهي فاجة ثمها
جلثم: وينها هاي خل اشوفها واعطيها من الزين عشان تصطلب..
الكل ضحك..
جلثم: اقول امي مجد .. وين بيتهم اتدلينه وديني ..
مجد: وين اوديج يدووه الله يهديج بس.. مايستوي..
لطيفه: الله يستر على بناتنا.. والله الزمن يخوف..
حور سرحت.. يارب كيف بتتربى بنتي من عقبي.. يارب احفظها من كل شر يارب..
.. .. ..
من سمع ابو جواهر عن السالفه ماقدر يمنع نفسه من ضربها.. يلس يضربها من كل خاطره.. ونفس الشي سهيل..
سهيل: شوفي.. من اليوم وساير هالباب ماتخطين خطوه فااااااااااهمه.. وكليه انسي.. ماشي كليه..
جواهر وهي تصيح بإنهيار وتترجى ابوها: ابويه دخيلك لا تدمر مستقبلي.. دراستي لا.. خلاص توبه توبه ماعيدها ولا اكررها..
بوسهيل: بعد شووووووووووووووووووووووو.. بعد ما نزلتي راسنا القاع.. ؟؟ بعد ما فشلتينا؟؟ بعد ما فضحتينا؟؟ ليش نخليج تدرسين.. انتي لازم تموتييييين اصلا..
ام سهيل يالسه تتطالع مب قادره تتقبل وضع ان بنتها سوت مثل هالشي.. حطت ايدها على قلبها وطاحت عالأرض.. الكل ربع صوبها.. وسهيل اكثر واحد يحب امه وقريب منها.. ويخاف عليها.. شلها وحطاها فالموتر وبسرعه سار بها صوب المستشفى.. وبوسهيل يلس على الكنبه ومغطي ويهه بإيده وهو متضايق..
نهاية البارت

الجزء الحادي عشر11
الفصل الثاني
=-=-=-=-=-=

قضية جواهر والقبض عليها بالجرم المشهود... تغير بوهزاع المفاجئ.. دخول أم سهيل للمستشفى " سهيل اخو جواهر"... قرار سفر حور وعبيد للخارج للعلاج.. انتظار سلطان لراي شما بموضوع الزواج
سهيل شرات المينون رايح راد صوب غرفه الإنعاش.. طلع الطبيب وربع سهيل صوبه..
سهيل: ها دكتور بشر؟؟
الدكتور: الحمد لله زال الخطر.. تطمن.. بس لازم ننقلها لقسم العناية الثانوية ننتظر حالتها تستقر بالكامل.. ونسوي لها قسطرة قلب..
سهيل: شو الي صار بالضبط؟
الدكتور: سكته خفيفه جداً الحمد لله عدت على خير وما أثرت وايد على القلب..
سهيل: الحمد لله.. يزاك الله خير دكتور..
الدكتور: هذا واجبنا.. أجر وعافيه.. عن اذنك ..
سهيل: ماقصرت ..
بسرعه صد عن الدكتور ومشى صوب الغرفه .. منعوه بس قالهم بيشوفها وبيطلع.. ودخل شافها راقده .. مسح على راسها وحبها على يبهتها.. في هاللحظة شاف جواهر.. لأنها وايد تشبه امها.. تذكر انها السبب.. طلع من الغرفه بغضب شديد .. وصل بسرعه لموتره ورد البيت.. رن تليفونه بهالوقت..
سهيل: نعم..
الدكتور محمد: السلام عليك سهيل..
تم ساكت سهيل مفتشل من محمد لأنه شاف كل شي..
الدكتور محمد: خير ياسهيل شو صاير شفتك تطلع من المستشفى تربع..
سهيل: هيه الوالدة هناك ..
الدكتور: افا.. سلامات ماتشوف شر ان شاء الله..
سهيل: الشر ماييك..
ساد الصمت فتره ورمس سهيل مره ثانيه ..
سهيل: الا اقولك وين جابر؟
محمد: مرقد فالمستشفى .. سهيل قبل لا تكمل رمستك.. خلني اقولك شي.. جابر الله بيراويه .. والضرب الي ضربته يكفيه.. الغلط من اختك.. لا تزعل من رمستي بس هذا الصدق.. لأن اختك بنت كبيره وتعرف الصح من الغلط.. وكان بإمكانها تصده.. وجابر شرا اي ريال .. بنت تتجاوب معاه مابيقول لا.. سهيل انا ياخوي والله اني خايف على هالحرمه العوده المرقدة عندنا هني.. وعليك انت .. مابا يستويبها شي زود يوم تطلع من المستشفى.. لأني والله حاس بإحساسك وعارف تفكيرك ودك تجتل جابر.. بس جتل جابر مابيفيد .. بيضر اكثر.. واذا عني انا وسليمان.. لا تحاتي .. نحن نعرف الله ونخافه.. مستحيل نرمس من وراكم.. لا تكبر الفضيحة زود.. مب حلوة في حق الشيبه والوالدة ربي يطول بعمرها ..
سهيل تم يسمع رمسة محمد وهو واقف على ينب من الشارع .. وحاط راسه على السكان ويفكر..
محمد : انت وياي عالخط.. سهيل.. سهيل..
سهيل: هيه نعم وياك.. خلاص عيل السموحة منك انا وصلت البيت ألحين .. برمسك خلاف..
محمد حس ان سهيل متضايق.. وافتشل حس ان مو وقته كان يرمس بهالرمسه.. بس في نفس الوقت يحس ان هالكلام ضروري يقوله عن يتصرف بتهور ويندم العمر كله بسبب لحظة غضب.. : خلاص عيل في امان الله..
بند الخط.. وسهيل تم يطالع حواليه .. ويشوف الناس تمشي.. وكل مايشوف شخص يعبر الشارع يدامه .. يتخيله يضحك عليه .. ويشوف اثنين واقفين على طرف يرمسون بعض يتخيل انهم يرمسون عنه وعن الي سوته اخته.. تم يطالع حواليه شرات المينون مب عارف شو الي صاير بالضبط.. وده يصرخ ويصيح بس حاس نفسه مخنوق.. نزل من السياره وتم يمشي ويبي يعدي الشارع.. ماحس الا بصوت هرن سياره .. يوم صد شاف ان السياره واقفه يمه.. الظاهر كان بيندعم بدون لا يحس..
راعي السياره نزل الجامه : انت عمي ماتشوف؟... عفان الله .. هاييل هم يسكرون ويبلشونا..
صد سهيل يطالعه بغضب ومشى صوبه يوده من ثيابه ويسحبه من الجامه: شو قلت.. انا سكران يالـ..
وانتبه لنفسه وشو قاعد يسوي.. ودر رقبته واعتذر.. : سامحني ياخوي بس راسي مشوش شوي..
راعي السياره من شاف هالتناقض .. خاف.. قال اكيد هذا واحد مينون.. بسرعه حرك سيارته يشرد عنه..
.. .. ..
عبيد: حصلت حجوزات ليوم الخميس.. يعني عندج 3 ايام تجهزين فيهم اغراضج
رفعت حور راسها بترمس.. بس ردت نزلتها فضلت السكوت على انها تقول اي كلمة..
تقرب منها عبيد وقعد حذالها .. وتم يطالعها ..حس بدمعتها الي تنزل.. مسح الدمعه بصبعه وابتسم لها: هالعيون الحلوة ماباها تدمع دامي موجود..
ابتسمت له حور عالخفيف.. ونشت عنه وسارت صوب الكرسي الهزاز الي عند الدريشه ويلست عليه .. وتمت تهزه وتتطالع عبيد..
عبيد: ليش ابتعدتي عني؟
حور: مابتعدت بس كان خاطري ايلس على هالكرسي..
عبيد وهو يطالعها بنص عين: بحاول اني اصدق..
حور: هههههههه لا صدق صدق
عبيد: الله لا يحرمني منج..
تيمدت حور وقفت الكرسي عن الحركة من سمعت هالرمسه.. : عبيد الله مابيحرمك مني تعرف ليش؟
عبيد وهو يحاول يتمالك أعصابه .. : ليش؟
حور وهي تبتسم له: هالياهل الي في بطني بيذكرك فيني طول العمر..
عبيد: انتي بتكونين وياي طول العمر ان شاء الله .. شلي فكرة الفراق من بالج أرجوج..
حور: بس عبيد انا عندي طلب.. وإعتبره آخر طلب في حياتي..
عبيد: وشو هالطلب..
وتوها بترمس.. الا سمعوا دق على الباب.. نش عبيد وفتح الباب.. كانت أمه..
ميثا: وبعدين انتوا ماشبعتوا من بعض..
ضحكت حور ونشت لعمتها بس ماحست بعمرها الا دايخه وبطيح على الأرض.. ربع عبيد صوبها ويودها ووداها على السرير..
ميثا ارتعبت من المنظر.. وبسرعه سارت تييب كوب ماي اتشربه حور..
عبيد: حور.. حور.. ردي علي؟
حور تحاول تفتح عينها بس تحس براسها ثجيل..
عبيد: يوم اقولك كلي تقولين لي شبعانه.. شفتي احين شو صار فيج..
حور: دخيلك عبيد .. تحاول تقص علي ولا على عمرك.. الي فيني مب من الأكل.. انت عارف السبب المرض متمكن من كل جسمي..
فهالوقت كانت ميثا واقفه عند باب الغرفه وفي ايدها كوب الماي.. وسمعت الحوار.. وعرفت بمرض حور.. تيبست في مكانها.. راحت صوب غرفتها قبل لا يحس بها عبيد ويدريبها انها سمعت الحوار.. ودخلت الغرفه يلست تصيح..
..
مروه: أحمد وين أمي؟؟
أحمد: توها صعدت فوق.. سارت غرفتها اظني..
مروه: أحمد شو بلاك؟؟ شكلك مب طبيعي؟
أحمد: ها.. لا ماشي بس تعبان شوي من أمس مب راقد تدرين..
مروه: مب راقد ؟؟ والله انا قلبي ناغزني ويقولي غير جي..
أحمد: سيري لا انتي بعد.. ناغزنج اونه.. دبور مب قلب هذا.. هههههه
مروه: سخيف.. بسير اشوف امي وايد احسن
احمد: اقول انا بعد
مروه صعدت الدري ويلست تتطالع احمد بنص عين: ماعليه براويك
ابتسم لها احمد ويلس يتعبث بتليفونه .. وصل له مسج فهالوقت من مجد..
" انت وينك مختفي؟؟ لا حس ولا خبر.. "
تلوم أحمد.. لأنه من اليوم الي سمع فيه رمسة عبيد وهو حالته حاله.. مب داري الله وين فارنه..
" ادري والله اني مقصر وايد .. بس مشغول في بحث التخرج .. تدرين مابقى غير اسبوعين وبنخلص"
وشوي لقى رد ..
" هيه وانا عشان جي مستانسه .. بخلص عالإسبوع الياي.. الله يوفقك يارب"
ابتسم احمد من المسج وانتبه لصوت شي ينكسر.. وقف قلبه من الزيغه.. ويت على باله حور.. بسرعه ربع فوق يشوف شو الي صاير.. يوم وصل شاف عبيد وايده منجرحه.. وحور مب عارفه كيف تتصرف تحوم حول نفسها ولا تدري شو لازم تسوي.. بسرعه طلع غترته ولف فيها ايد عبيد عشان يوقف الدم..
أحمد: الله يهديج يامرت اخوي .. بلاج مب عارفه شو تسوين..
حور وهي مرعوبه : مادري شو ياني ارتبكت..
أحمد: قم خل نوديك يمكن تحتاج خياطه..
عبيد: لا لا مايحتاي.. الا هو جرح بسيط
حور: اي جرح بسيط.. شوف الدم اشكثر.. روح الله يخليك..
وفهالوقت وصلن مروه وميثا ( أم عبيد) .. : مامن شر شو صار؟
عبيد: ماشي .. كنت ميود الكوب وايدي مبلوله .. زلق الكوب من ايدي وانكسر ويوم ييت اشل القطعه المكسوره انيرحت ايدي..
مروه: سلامات.. ( وهي عينها على حور ودها تروح وتصيح في حضنها .. مب متخيله انج ماتكونين في هالبيت.. دخيلك يارب يطلع كل الفحوصات غلط يارب)..
حور: ههههه. مروه شو بلاج ارمسج ماتسمعيني؟
مروه: ها .. لا ماشي بس سرحت شوي..
حور: الي ماخذ عقلج يتهنى به..
مروه ابتسمت حاولت ماتبين لحور انها عرفت بالموضوع.. ونزلوا تحت يتيمعون وعبيد سار مع أحمد المستشفى ..
..
حور: عمتي انا وعبيد بنسافر الخميس هذا..
ميثا: شووو.. بس عبيد ماقالي شي..
حور: مادريبه والله.. بس كل شي صار بسرعه بسرعه..
ميثا: وليش تبين تسافرين ؟؟ ووين؟؟
حور هني حست انها متوهقه مب عارفه شو من سبب تألف.. : لا ماشي حسيت ان نفسيتي تعبانه شوي من الشغل وابا اغير جو.. بنسافر حق اسبوعين ورادين ان شاء الله ..
ميثا: عيل كلنا بنسافر رباعه مب مقررين نروح شمال إيران.. ماباقي شي.. كلهن اسبوعين..
حور: ها .. لا لا مابا اسير شمال ايران .. الكل يقولي سيري ألمانيا وايد احلى..
مروه تقربت من حور ماقدرت تيود عمرها زود.. وحضنتها ويلست تصيح.. : حور امي سمعت كل شي دار بينج وبين عبيد وعرفنا انا وامي الموضوع..
حور انصدمت.. ماكان ودها تكون السبب في حزن الأهل.. وما كان ودها حد يدري بهالموضوع.. وانجلب الحال فالميلس لمناحة.. مروه وميثا يصيحن .. وحور الي تواسيهن وهي الي محتاجة من يواسيها ..
.. .. ..
.
..
فيصل: ذاكرتي عدل؟
فطوم: والله الحمد لله ذاكرت بس بعدني خايفه.
فيصل: لا تحاتين ان شاء الله بيكون سهل..
فطوم: افف متى بتمر الأيام عشان اخلص الإمتحانات وافتك من الهم..
فيصل: ماعليج ترا باجر بتبدين .. وان شاء الله بيمرن الأيام صدقيني بدون لا تحسين..
فطوم: ان شاء الله خير يارب..
فيصل: اباج اتبيضين ويهي فاهمه
فطوم: ههههه ان شاء الله .. عن اسوده بس..
فيصل: بذبحج..
فطوم: ماظني اهون عليك؟
فيصل: هو انج ماتهونين علي في هالشي غلبتيني .. فعلا ماتهونين علي..
فطوم: فديتك..
دخل جاسم الغرفه عليها وشافها ترمس تليفون حرج.. : انتي وبعدين يعني.. مب جنه باجر امتحان ؟؟ والي اعرفه انه ثانويه عامه مب امتحان تقويم؟؟
انصدمت فطوم وبندت الخط في ويه فيصل بسرعه .. : ها .. ذاكرت والله خلصت مذاكره..
جاسم: فطوم حبيبتي لو انا ماخاف على مصلحتج مابحرج.. التليفون لاحقة عليه.. تفرغي للدراسه.. اباج ترفعين راسي..
فطوم: أكيد ان شاء الله برفع راسك وبشرفك لا تحاتي..
جاسم: الله يوفقج يارب.. تبين شي..
فطوم: هيه دخيلك قول حق الشاعره العاشقة لا تدخل غرفتي.. ماعندها غير هالi pod وتتسمع لي شاعر ورا الثاني.. وترد وراهم.. اونه ابا اتعلم الألقاء شراتهم
جاسم: هاي خبله لله الحمد ..
فطوم: هههههه.. توك دريت.. انا من زمان اقول بس محد مصدقني المشكلة..
دخلت منى وهي تشعر: على شوف الحبايب حاسبوها
خذوها وابعدوها غصب عني
وعن وجهة طريقي جنبوها
وشالوها عن عيوني غصيبه
عواذل واغصبوني واغصبوها
خذوها من ايديني شوف عين
وعن عينيـ...
قاطعها جاسم: حوووه.. منى حامد زيد..ممكن تكرمينا بسكوتج..
نزلت السماعات من اذنها وتحرطم: لا حول ولا قوة إلا بالله .. اموت واعرف شي واحد.. انتوا على منو طالعين جي قلوبكم حجر مافيكم ذرة رومانسيه ورقة..
جاسم غمز لفطوم وسحب منى وياه وطلع من الغرفه وبند الباب.. وفطوم تضحك وردت اتصلت في فيصل..
فطوم: الوو.. حبيبي..
فيصل وهو محرج: انتي ماتستحيت تبندين التليفون في ويهي؟
فطوم: سوري والله بس جاسم خرعني..
فيصل: اخبرج هالحركات مب علي انا .. حرج علي ماحرج علي.. بس ماتبندين في ويهي فاهمه.. ماتيين انتي على اخر عمري تبندين في ويهي
فطوم: فيصل مايحتاي تكبر السالفه هالكثر.. اسفه خلاص..
فيصل: لا والله .. تاخذيني على قد عقلي يعني وتسكتيني بكلمة آسفه؟؟ ماعليه يصير خير..
وبند في ويهها.. ويلست فطوم تصيح. : ليش انت جي متقلب المزاج.. فهمني ارجوك
(طبعاً كانت ترمس التليفون .. كأنها تحاور التليفون هو نفسه فيصل)
.. ..
..
.
دخل البيت وهو منهد حيله ومتضايق.. شافه ابوه استغرب.. حتى انه مر صوبه ولا سلم.. بس زقر على الخدامه..
هزاع: سيري شلي الأغراض من السياره وييبيهم فوق..
بوهزاع: يعني مابتسلم على أبوك ولا شو؟
هزاع سار صوب ابوه وحبه على راسه: اسمح لي ابوي بس مانتبهت عليك.. اشحالك؟
بوهزاع: بخير.. هزاع شو بلاك ولدي.. شكلك ميهود؟
هزاع: هيه شوي..
بوهزاع: متضايق لأنك ودرتهم ورديت البيت.. !!
هزاع: تعودت عليهم يابويه.. القعده وياهم غير والله.. تحس بالقعده ويا الأهل.. كلهم حوالين بعض وملتمين.. حتى اني قمت اعوف الطلعات واحب اقعد وياهم بس.
بوهزاع: دوم كنت اتحسب اني املك كل شي.. بس طلع الي املكه مايي شي صوب الي هم يملكونه .. الي عندهم هم.. نفقده نحن في هالبيت..
تنهد هزاع وسمع صوت وراه.. صد شاف اخته سلامه..
سلامه: ابويه.. صدق الي سمعته من مهووووي؟
بوهزاع: وشو الي سمعتيه؟
سلامه: انك رحت عند عيال الهنديــ..
توها بتكمل رمستها وقف هزاع وصرخ في ويهها: انتي ايييييه .. تحرينهم من الشارع عشان ترمسين عنهم بهالطريقة.. عيال عمج هاييل؟
سلامه: سير زين.. تراك صرت واحد منهم.. سحروك..
بوهزاع لأول مره يعلي صوته على بنته.. : جــــــــــــب.. اخر مره اسمعج تطرين هالرمسه يدامي فاهمه.. هاييل عيال عمج .. عيال اخويه الي مات وخلاهم امانه في ذمتي بس انا اهملتها طول هالسنين.. غروري الي مادري لين وين كان بيوصلني.. يابنتي.. خلي عنج الغرور هذا .. تعلمي من ابوج..
سلامه: لا والله .. تصرخ في ويهي عشانهم.. صلاح.. صلاح..
طلع صلاح من غرفه الصلاة الي في زاويه الصاله.. : اشبلاج يا حرمه حسج واصل للشارع... اسمعج انا شو تبين؟
سلامه: قم خل نسير البيت.. لأن الي فالبيت هني كلهم صار لهم غسيل مخ..
بوهزاع: ياحسافه اني ربيتج هالتربيه.. هالهنديه الي تعايبينها.. تراها عرفة تربي بنتها تربيه انا وامج ماعرفناها..
صلاح: شو بلاكم؟؟
هزاع: مرتك المصون تعيب على عيال عمنا.. مادري على شو شايفه عمرها.. ترا الدم الي يمشي في عروقهم هو ذات الدم الي في عروقج
سلامه: اتخسى.. دمي هب دم هنود..
صلاح انسان مؤمن .. ومايرضى بالظلم.. وقف في ويهها: انتي ايييييه.. تعرفين منو الي واقف يدامج؟؟ اخوج وابوج.. والثالث هو ريلج المصون.. متى اتحيدين اني اسمح لج اتعلين صوتج؟؟ وبعدين كلامهم صح انتي الي غلط ولازم تسكتين فاهمه
فجت سلامه عينها ويلست تتطالع حواليها.. وشافت مها واقفه على الدري تتطالعهم.. : كملت.. الكل ضدي
بوهزاع ودر الصاله وصعد فوق.. ولحقه هزاع.. صلاح يود ايد سلامه وسحبها: تعالي يدامي.. لي رمسه وياج فالبيت.. مافي شي يغيضني فيج غير غرورج الي مادري لين وين بيوصلج؟؟ تروحين فوق ولا تنزلين تحت.. مصيرج للطين.. الي مب راضيه تنزلين راسج حتى تتطالعينه..
..


مها تقربت من ابوها: ابوي.. ليش جي قسيت عليها .. حرام ..
بوهزاع: ماشفتي طولة لسانها.. ليتها طلعت شراتج.. انتي وهزاع وحمدان.. من طينه .. وهي الوحيدة الي من طينه امج..
مها: انت هدي نفسك.. روحك صحتك على قد حالك.. مب زينه لك العصبيه.. الله يطول بعمرك ويخليك..
هزاع: صدقها مها ابويه.. هدي نفسك.. وسلامه الله يهديها..
بوهزاع: مها ابويه ماودج تشوفين عيال عمج؟
هزاع: تبيني اوديج؟ ..
مها: ههههههههه ليش تقولها بحماس جي.. مب جنك توك ياي من عندهم.. ماشبعت منهم شو..
بوهزاع: الا خوفي انك مودر قلبك هناك وياي..
ضحك هزاع على رمسه ابوه.. وتذكر شما في هالوقت.. ااااااه يا شما.. ضيعتج بطيشي ..
هزاع: وين اودر قلبي؟؟ هناك.. جان ميت لو قلبي هناك.. قلبي عندكم .. بس اتونس وياهم
مها: يلا عاااااد شوقتوني ابا اشوفهم..
بوهزاع: يالله عيل يا هزاع ود اختك لهم... انا بسير الحجره اريح.. ودخيلك تخبر من شما اذا فكرت في الموضوع ولا بعدها.. لأن الريال اليوم متصل بي يتخبر عن الجواب
مها: شو السالفه؟؟
هزاع: لازم ترز ويهها ماترتاح هالبنت..
مها: هيه بنت عمي ولازم اعرف عنها .. ولا شو رايك ابويه؟
بوهزاع: أكيد.. ماشي خاطبنها ريال الصراحة سألت عنه الكل يتمدح به .. واهله ناس والنعم فيهم.. واتريا منها الجواب
مها: يالله ودنييييييي ابا اشوفها اتعرف عليها ايلس وياها واسولف وياها..
هزاع: خيبه خيبه .. كل هذا مره وحده.. عيل بطفرين البنت من اولها.. ترا اخبرج.. شما عصبيه على الدقه بتضاربج.. ومتوحشه.. وماتحب اللقافه والرمسه وايد..
مها: والله صدق؟؟
بوهزاع: هزاع شو تسوي بإختك انت.. مايسوى عليك.. سيري ابويه تلبسي خل اخوج يوديج
مها يلست تتطالع هزاع بنص عين وتوها بتدخل غرفتها زقرها هزاع: اخبرج انتي.. استأذنتي من ريلج؟
مها: ريلي مايمانع ..عادي يخليني اروح وين ما ابا..
هزاع: مايخصني اذا ماكلمتي مانع انا مب موديج..
بوهزاع: هزاع بسك وانت تلعوز اختك .. مايسوى عليها
مها: هيه والله ..
ابتسم لها هزاع.. ودخلت غرفتها وهي تضحك على حركات اخوها.. صدق تولهت عليه.. وحسته تغير اسلوبه وتعامله نوعاًً ما.. زاد فضولها .. تشوف هالناس الي قدروا يغيرون اخوها بهالطريقة
بعد ساعه في بيت شما
.
مها: والله انج سوالف يا بنت عمي وانا مادري..
شما: والله اني كنت اتمنى اشوفكم كلكم .. والحمد لله اليوم شفتج وتحقق مناي..
مها: شفت عاد .. طلعت مهمه وانا مادري..
هزاع: لحوووووووول اخبركم هاي محد يمدحها تنتفخ علينا بسرعه
ام عمّار: خلها من حقها.. شوفيك انت..
هزاع: لا دام الغاليه رمست مانروم نقول شي.. منو قدج.. الكل يدافع عنج
مها: تراني مهوووي.. مب أي حد
عمّار: لحووووووول وانتي يا مهوي ماحصلتي اتيينا غير اليوم.. باجر عندي امتحان .. مابين نارين لا ابا افوت هالقعدة.. وفي نفس الوقت احاتي الإمتحان
مها: ويديييييييه جنك إلا رغتني يا ولد العم؟
عمّار: لا محشومه.. بس والله ودي اقعد واستانس وياكم..
هزاع: اخبرك عمّار.. اذا مافهمت شي تراني كنت شاطر فالمدرسة.. قولي وانا بفهمك..
مها: ههههههههه.. آينشتاين زمانك .. اصلا انت مافي شهادة كانت خاله من الكيكات الحمر..
هزاع يبا يغير السالفه: شما بغيتج في موضوع اذا ماعليج أمر..
نشت مها ويودت ايد شما.. : يلا نشي خل نسير نشوف شو عنده..
صد هزاع صوب مها ويطالعها بنص عين: انتي اظني اسمج مها.. مب شما..
عمّار: يلسي وين سايره.. خل نسولف وياج.. خلهم هاييل طول عمرهم اسرار ..
شما: هههههههههه .. خل العذال يموتون..
مها: ماعندي سالفه جان بموت عشان هزاع.. ولا بغار منه..
هزاع: ماعليه حسابج بعدين يالدبه..
نشت شما ويا هزاع وطلعوا برع..
هزاع: شو هاي بلادكم بسرعه اتحر.. عنبووو فليل وجي حر ورطوبه
شما: عدال عاد مادري انت من وين عشان تقول بلادكم..
هزاع: ههههههههه.. ماعلينا .. شما انا ابوي رمسني اليوم وقالي ان الريال يتصل به يبا يعرف الجواب (يقولها وفي خاطره يدعي انها تقول لا.. وقلبه يتقطع).. فماعرفنا شو رايج في الموضوع
شما: أي موضوع
هزاع: شما عاد لا تبدين سوالفج هاي.. قولي يلا عاد..
شما: ههههههه.. مادري يا هزاع.. مب هاين علي اودر امي بعد هالفتره كلها..
هزاع في خاطره: قلت احين بتقول مو هاين علي اخلي ولد عمي الي اولى بي.. مالت عليك ياهزاع
شما: شبلاك تسمعني انت؟
هزاع: هيه كملي
شما: شو اكمل ترا قلت لك رايي مارديت علي
هزاع: ها قلتي رايج شو مب موافقه؟؟
شما: انت شو بلاااااااااك لا بالله مب صاحي اليوم.. اقولك مب هاينه علي اميه اودرها
هزاع: هييييه امج.. شما الزواج شي لابد منه.. كل بنت مصيرها تعرس وتعيش حياتها.. وانتي لازم تشوفين حياتج وتعيشينها.. بس اهم شي تكونين مقتنعة بالريال قبل..
شما: سلطان ريال والنعم فيه الصراحة... انا ماسمعت منه الا كل خير.. محترم ومافي شي يعيبه.. بس قلت لك همي هيه امي..
هزاع في خاطره: ياربي انا محد بيجلطني في هالكون الا هالبنت مافي احساس موووول..
شما: بس امي وايد متشجعه واحسها مستانسه على اهل سلطان.. وحتى عمّار رمسني في الموضوع وقالي وده ان سلطان يكون نسيبه.. وانا صليت استخاره ومب حاسه إلا بالراحة
هزاع يطالعها ويقول في خاطره: لا بالله رحت وطي يا هزاع انت مشطوب من اللسته
هزاع: خلاص يا شما.. مايحتاي اللف والدوران هذا كله.. انتو البنات لواته قسم بالله.. اونكن مستحيات ومن ذاك الصوب تبن..
شما: هزاع عاد لا تحرجني جي..
مشت عنه ودخلت البيت.. تم يطالعها ومبتسم من اختفت من نظره ضرب على ريله بالقو من القهر الي فيه.. وتم يقلدها : هزاع عاد لا تحرجني.. اففففففففففف قهر والله قهر.. ياربي شو الي فيه زود عني.. احين يعني كان لازم هاي اتم على تواصل وياها بعد سالفه عفرا.. اففففففففف .. ليش كنت يومها فالمزرعه عنلاتي والله انا يبت المصايب لنفسي انا الي خسرت كل شي بقله عقلي.. يارب انك اتوفقها واتهنيها في حياتها وتهديني والقى البنت الي تناسبني..
..
يوم الثلاثاء
تمت اتدق على الباب بالقو.. كل الخدم فزوا من نومهم زايغين من الصوت القوي الي يسمعونه..
بوسهيل وسهيل نشوا نفس الحاله.. مستغربين من الصوت والحشرة الي يسمعونها.. ظهروا من الغرفه..
بوسهيل: شو هالصوت؟
سهيل: انا احين عرفت وين هالصوت.. أكيد هاي جواهر ماغيرها..
بسرعه مشى صوب الغرفه وطلع المفتاح من الدرج الي عند الغرفه وفتح الباب.. ودزها على الأرض.. : شو بلاج انتي؟؟ مب صاحية؟؟ ناويه تجلطين الي فالبيت كلهم وهم رقود.. على شو ناويه انتي بالضبط؟؟
جواهر تصرخ: بسير الكليه .. خلوني اطلع من هالغرفه حابسيني فيها.. شو بتستفيدون .. خلوني اسير الكليه ليش تكرهوني بهالطريقة..
سهيل عصب ومشى صوبها ويودها من شعرها ورفعها .. : شوفي.. لو تصيحين وتترجينا وتكسرين 100 باب من الدق مب مخلينج تخطين خطوة برع هالبيت.. وخل اسمعج تقولين شي ثاني.. لا أوديج السجون واقولهم انا مسكت اختي في خلوة مع ريال غريب.. احبسوها وصلبوها.. والله اني بسويها ان ماشفتج اصطلبتي
يوم سمعت جواهر هالرمسه زاغت.. لأن نظرات اخوها تقول فعلا انه بيسوي هالشي.. :ها.. خلاص توبه توبه .. مابسوي شي.. احبسوني.. اذبحوني .. سوو الي تبونه بس لا تودوني اي مكان ثاني..
فرها سهيل على السرير: رقدي .. رقدت عليج طوفه..
وطلع من الغرفه وقفل الباب.. يلست تصيح جواهر على الي صار لها.. عمرها ماتخيلت عمرها في هالموقف.. الي فعلا ماتنحسد عليه.. ماكان ودها هاي تكون نهايتها..
لا دراسه .. لا مستقبل.. ولا شي.. انحرمت من كل شي..
تذكرت محمد في هالوقت.. كيف ضيعت انسان شرات الدكتور من ايدها نتيجة طيشها.. اختها الي دوم معاها .. من سمعت باللي صار وهي ماتصد صوب جواهر.. كله فالغرفه تصيح على حالهم.. وماتبا تروح المدرسه .. تخاف الكل يعايرها بإختها.. حالتهم حاله ماينحسدون عليها..
..
رد سهيل غرفته والدنيا دايره في راسه.. صد يطالع الساعه .. شاف الساعه 5:30 الفجر.. تنهد .. طرى في باله صورة الإنسان الي تسبب في هذا كله.. فكر انه في لحظة يغلط وينتقم..بس كلام محمد يرن في اذنه.. سار توضى وصلى الفير وقعد يقرا قرآن للساعه 7:00 مر على المستشفى وزار امه .. ومن عقبها سار الدوام..
.. ..
..
الشركة الي تتدرب فيها مجد
سليمان: صباح الخير مجد..
مجد صدت صوبه ابتسمت له: صباح النور.. ها استاذ سليمان اليوم بتفتك مني خلاص.. اخر يوم .. بستلم الريبورت منك وخلاص
سليمان: حليلج والله.. بنفتقدج..
كمال: القسم كلوو راح يشتاق لها..
مجد: لا دخيلكم انا جي استحي..
الكل: ههههههههههههه..
مجد: استاذ سليمان.. جواهر مابداوم خلاص
سليمان: تتوقعين انها اتداوم؟
مجد: لا
سليمان: خلاص عيل.. هذا الي بيصير.. بيسحبون اوراقها من الكليه
مجد: فكه..
كمال: ليش شو صاير..
سليمان: انت اخبرك.. لين متى بيتم طبع الفضول هذا فيك.. مابتودره عنك ولا شو..
كمال: ماتواخزني استاز.. بس انتو كنتو بتحكو بصوت عالي وانا سمعت طئاطيش حكي..
سليمان: حتى الطشاطيش هاي لا تسمعها
كمال: لك مو طشاطيش.. طئاطيش..
سليمان: لحوول الظاهر اليوم مابنداوم نحن بيقعد يعلمني رمسته.. سر جابل شغلك وانا بسير اجابل شغلي
ابتسمت مجد ويلست مكانها..
وشوي جان يرن تليفونها..
كانت مروه الي متصله فيها.. صدت صوب كمال ابتسمت له بخبث
كمال: ممنوع لا تتطلعي فيني هيك
مجد: بليييييز كمال خلك طيب على اخر يوم.. مكالمة مهمه..
كمال: بعدين انا المسؤول اذا شافوني سامح لك تحكي
مجد: يلا عاد لا تستوي وغد على اخر يوم
كمال: اوكي بس ماتطولي..
مجد: اوكي..
ردت على الخط
مجد: ألووو
مروه وهي تصيح: مجد انتي وين؟
زاغت مجد : شو بلاج.. ليش تصيحين؟
مروه: مجد دخيلج تعالي ابا ارمسج في موضوع
مجد: انا ماروم احين عندي دوام عقب الدوام بييج.. بس شو صاير.. فهميني راسي افتر..
مروه: ماروم ارمس فالتليفون اترياج يوم تخلصين دوام
مجد: انزين
بندت مجد عن مروه بس ما هدالها بال.. يلست طول الوقت تفكر فالموضوع.. شو هالموضوع الي خلا مروه تصيح.. ماكانت قادره تركز في شغلها وكل همها وتفكيرها تعرف شو الي صاير.. لاحظ كمال حالتها.. وذهنها الشارد.. اتصل في سليمان وقاله عن حاله مجد.. نزل سليمان من مكتبه وسار عند مجد..
سليمان: مجد ..
كانت سرحانه وماسمعته.. تأكد ان الي قاله كمال كان صح..
سليمان: حوووه ماتسمعين..
مجد فزت من شافته: اسمح لي مانتبهت عليك
سليمان: لازم تراج سرحانه.. شوفيج احسج مصفره.. كلتي شي؟
مجد: ها.. هيه كلت كلت
سليمان: تقصين على منو.. شو بلاج؟ شي صاير
مجد: الصراحة استاذ سليمان ابا استأذن اروح البيت.. بنت عمي متصله تصيح مادري بلاها.. وانا مخي قام يوديني مليون مكان..
سليمان: خلاص عيل مرخوصه افا عليج.. الساعه 12 .. باقي على الدوام ساعتين واليوم انتي اخر يوم لج عادي اظهري
مجد: نشت مستانسه: صدق.. والله .. يزاك الله الف خير ان شاء الله
سليمان: سيري لا تغدين لي شرات العيايز.. يوم يفرحن يقعد نص ساعه يدعن
مجد: طالعه على جلثم مارحت بعيد تراني
سليمان: منو جلثم؟
مجد: يدتي.. يبالي يوم اعزمك اتيي بيتنا واتشوفها..
سليمان: خلاص صار..
مجد: عيل خلني اطبخ الطبخه فالبيت وعقب بتصل المكتب وبقولك
سليمان: اوه زين بناكل شي من ايدج..
مجد: هههههه عن تصدق اني اطري طباخ الي هو اكل.. لا اطبخ مقلب في يدتي مب أكل .. ويني انا ووين المطابخ.. جانك تبا تسمم حاضرين
سليمان: لا دخيلج مافينا.. يلا عيل انا بسير المكتب.. وبالتوفيق..
مجد: تسلم استاذ.. واسمحلنا على القصور..
وبسرعه مجد سلمت على الموجودين كلهم.. ونزلت.. بس تذكرت كيف بترد البيت.. غبيه صدق ولا اتصلت في حد يمر عليها.. جان تتصل في عبيد..
عبيد: هلا والله بالطش..
قاطعته مجد: ماشي وقت للتراحيب.. انا الي اعرفه ان دوامك قريب من هني.. ممكن تمر علي يا ولد العم
عبيد: ليش خلصتي؟
مجد: هيه رخصوني من وقت اليوم..
عبيد: خلاص عيل.. كلها ربع ساعه وانا عندج..
مجد: اوكي.. يسلموو ابن عمي..
عبيد: ههههه الظاهر الي وياج فالدوام مأثرين عليج..
مجد: بالقو بعد..
عبيد: هههههه يالله عيل عن الهذرة خل اوصل لج..
وبند عنها .. ويلست تفكر.. عبيد صوته عادي مافيه شي.. يعني مافي شي صاير.. امممم.. عيل ليش مروه تصيح.. لا يكون مقلب.. بذبحها لو مقلب والله بجتلها بعد.. لا يكون شي عن البزنس.. اففففف الله ياخذ ابليسج يا مروو جانج مب مرقعتني اليوم
..
..
.
وصلت مجد بيت عمها وعلى طول ربعت صوب غرفه مروه ..
مجد: شو صاير خرعتيني..
من صدت مروه صوب مجد.. انصدمت مجد من شكلها .. صدق يزيغ من كثر ماعيونها منتفخات.. : شو صار خبريني الله يخليج وبدون مقدمات..
مروه سكتت شوي.. : مادري اذا كنتي تعرفين ولا لا.. انا زاقرتنج عشان اسمع الموضوع منج واتأكد..
مجد: تأكدين في شو..
عبيد: مروه.. بس عاد يكفي ان نحن نعرف مانبا الموضوع الكل يدري به..
مروه: انت شو تقول.. ليش الموضوع هالكثر هين عندك.. ولا حور ماتسوى شي عندك.. الكل لازم يعرف.. نحن لازم نكون اقرب من قبل وياها..
مجد: فهموني شو الموضوع لأني ضايعه شو بلاها حور..
مروه قالت لمجد الموضوع انصدمت .. كانت في حاله صدمة كبيره مب قادره تنطق بشي.. عبيد غمضته يوم شافها بهالحاله.. : انتي دومج جي.. ماترومين اتيودين شي في لسانج..
مروه: عبيد هاي اختها ولازم تعرف عيل تباها تنصدم ..
مجد: الله يخليكم قولو غير هالكلام.. انتي تعرفين شو معناة الي تقولينه..
مروه: مجد انا متفهمه احساسج.. دخيلج نحن روحنا في حاله من عرفنا السالفه..
عبيد: انتو شو فيكم؟؟ حور مابلاها شي مابلاها شي..
مجد راحت صوب الجامه ويلست تتطالع الحوي تحت وتتأمل.. والدمعه تنزل من عينها بدون لا تحس.. ماحست الا يوم دمعتها نزلت على ايدها .. صدت تتطالع ايدها .. انتبهت لشخص عورها قلبها يوم شافته.. حور.. ياسه ترمس إيمان بنت مروه.. بسرعه ركضت صوب الباب وطلعت من الغرفه .. الكل استغرب من تصرفها.. توه مروه بتلحقها.. يودها عبيد ومنعها..
عبيد: خليها يمكن لها كلام خاص بينها وبين إختها..
مروه : عبيد مب رايمه اتحمل الخبر الي سمعته احسه شرات الصاعقه علي..
دخلت عليهم نوره : صدق الي قالي اياه خالد؟
عبيد: نحن مابغينا حد يدري وانتو ماشاء الله ماخليتو حد ماقلتو له الخبر؟
نوره: نحن مب حد يا عبيد.. هاي بنت خالي فاهم يعني شو بنت خالي..
خلود دخلت وعيونها منتفخة من الصياح: وين مجد ادور عليها؟؟ اتصل فيها ماترد علي..
مروه: نزلت عند حور اظني..
خلود: عبيد دخيلك قول ان الي سمعناه اشاعه ومب صح..
عبيد يلس على الكرسي وتم يطالعهم كلهم حواليه .. بنات عمته.. واخته.. كلهم ينتظرون منه اجابه.. وحاس راسه داير عليه مايعرف شو يرد عليهم.. علا صوته غصبن عنه: بس.. بــــــــــــــــــــــــ ـــس دخيلكم لا تزيدوني هم.. والله انتو مب حاسين فيه.. ولا شخص فيكم فيه ربع الي فيه انا.. لا تسألوني شي.. الود ودي يكون الشي هذا غلط وانتوا تقولون لي اشاعه ومب صح.. ليته.. حالي من حالكم.. تعباااااان ومنهد حيلي.. لولا طلب الموت ماكان حرام.. جان طلبته من ربي.. لأني تعبان فاهمين يعني شو تعبان.. مب متخيل الموضوع.. ولا كنت اتمنى اعيش فيه..
مروه تقربت من اخوها ولوت عليه.. وعبيد شرات الياهل تم يصيح في حضنها جنه الا كان يتريا هاللحظة الي شخص يخفف عليه..
دخلت عليهم حور ومعاها مجد.. يلست تتطالعهم وقلبها يتقطع على دمعة كل شخص يدامها أولهم عبيد.. ماكان ودها تكون يوم من الأيام سبب في حزنهم.. : انتوا شو بلاكم جيييه؟؟ عبيد.. عيب عليك شو خليت للحريم.. وبعدين ليش هالصياح وهالمناحة كلها.. تراني مابروح مكان انتوا مابتوصلون له.. كلكم بتيون هالمكان في يوم من الأيام وقتها بتكونون وياي ولا حد فينا بيخلي الثاني.. والي صار قدر من الله .. ماباكم تكونون جي.. بهالطريقة اتبينون انكم ماتحبوني.. تبوني في اخر ايامي..
ماحست في هاللحظة الا بكف حار ايي على خدها.. انصدمت يوم شافت عبيد الي صفعها.. والكل انصدم من حركته..
عبيد وهو راص على اسنانه ودموعه تنزل.. تقرب منها وعيونه في عينها.. : اخر مره اسمعج تقولين هالرمسه.. (ماقدر يتحمل يشوف عيونها اكثر من جي) .. لا انت رب ولا إله عشان تحكمين ان هذي اخر ايامج.. ومافي شي يأكد هالشي ولا يأكد مرضج.. مجرد أوراق مايندرى صحها من جذبها..
حور ماقدرت تشوف حال العايله كلها كيف صايره بسببها.. راحت صوب عبيد بسرعه ويرته من ايده صوب غرفتها .. والكل يطالع الي يصير بصمت ولا قادرين يحركون شعره فيهم.. كلهم في حاله صدمه.. مجد كل حالها انها سرحانه الله العالم في شو تفكر هالبنت..
حور: تعال وياي.. براويك ورقة كم مستشفى أكدت هالشي .. عيل ليش هالتذكره(خذتها وفرته صوبه) يوم اني ماحتاجها.. يوم ان مافيني شي.. ليش تتهرب من شي واقع..
مشت عنه وسارت صوب الصاله وجابلت كل الي يدامها..
(مروه.. نوره.. خلود.. مجد.. أحمد طلع من غرفته بعد هالحشره كلها.. أم عبيد وبوعبيد كان تحت فالصاله)
حور: انتو ماتحبوووووووووووني والله ماتحبوني.. خليتوني احلف بهالشي الله يسامحكم.. تعرفون ليش؟؟!!.. لا تتطالعوني بهالطريقة.. ولا واحد فيكم يفكر في راحتي انا.. محد يفكر انه يخليني انسى اني بترك وراي بنت الله العالم شو بيصير فيها ومنو بيربيها؟؟ .. محد فيكم فكر بالهم الي انا فيه.. فكرتوا في فراقي.. بس نسيتو بنتي من قبل لا تنولد... يالله كيف بتفكرون فيها وهي على هالدنيا كيييييييف؟؟ .. ليش انتوا انانيين؟؟ انا راضيه بمكتوب ربي.. بس همي هو بنتي .. ماهقيت ان حبكم لي ينسيكم جزء مني وهو هني (تأشر على بطنها) ..
مارامت اتكمل رمستها الا واغمى عليها.. يودها عبيد قبل لااتطيح على الأرض ويروها صوب الغرفه.. مجد من شافت هالمنظر صرخت صرخة هزت قلوب الكل.. تميت اتصيح بهستيريه.. ربعت صوب حور ويودت ريلها ويلست تبوسها..: دخيلج حوووووووور لا تروحين.. ماعندي اخت غيرج في هالدنيا.. كلهم عندهم الا انا.. حووور.. انتي اختي وامي وابوي وكل شي .. لا تروحين عني.. انا اباج وابا بنتج.. وانتي عارفه بهالشي..
تقربت صوب ويهها ويلست تبوس راسها وخدودها وتلوي عليها: انا هني.. بربي بنتج .. وبحط بالي عليج.. وبسوي كل الي تبينه.. دخيلج لا تزعلين روحج.. (صدت صوب الباب ويلست تصارخ) انتو مايخصكم في اختي.. اختي بترد بيتنا وبتم عندنا.. محد له خص في اختي.. محد محد..
عبيد تقرب منها: مجد هدي نفسج الإنفعال مب زين لإختج.. خوزي خليني ارش شويه ماي على ويهها..
مجد صدت صوب عبيد وعطته نظرة غضب الي تخليه يفهم معناها.. وصدت صوب حور.. شافتها فاتحة عينها.. ابتسمت لها.. : كل ها دلع؟؟
حور ردت على مجد بإبتسامه ويلست تتطالع عبيد وتتطالع مجد.. : انتو الوحيدين الي واثقه من حبكم لبنتي..
استانس عبيد يوم سمع منها هالرمسه.. وتقرب منها على الصوب الثاني من السرير: شوفي انا اعرف ان هالشريره اختج مشربتنج شي خلتج اتدوخين واتطيحين..
مجد: لا والله.. اصلا عمرها اختي ما اغمى عليها وهي في بيتنا.. هذا دليل انك ماتهتم بها..
عبيد: لا انا شفتج اصلا يوم شربتيها العصير بإيدج..
مجد: فعييييينك.. اقول حور لا تصدقينه خريط ريلج تراه وايد
حور مبتسمه مستانسه انهم يحاولون يخففون عنها بطريقة ما .. ولو انها مب راكبه على ويوهم..
عبيد: اقولج.. نشي من يدام حرمتي بتشوف عيونج المنتفخات من كثر السهر على النت والمغازل بتتخرع وعقب البيبي بعد بيتخرع..
مجد: حوووووووور.. شوفي ريلج شو يقول عني.. احين انا اغازل واخرع؟؟
عبيد: هيه تخرعين بلد بكبرها..
مجد: اشوف امريكا زاغت مني وشردت من العراق
حور: هههههههههه بس يسدني جي .. بتذبحوني انتو..
عبيد: مب انا.. بس هاي..
مجد: حسابك مب ألحين بعدين..
عبيد: ههههههههه.. بعد تهدد هاي الي طولها شبر ونص..
مجد: طاعووو هذا بعد عيب علي.. واختي ولا ادافع عني.. احين شو ذنبي يوم انخلقت بهالطول..
حور: ماعليج منه اصلا من غيرته .. دومه يقولي اتمنى بنتي تطلع شرات مجد حلوة وشيطانه وبطولها
عبيد: هو اباها تكون حلوة وشيطانه.. بس بطولها ماقلت لا تجذبين
مجد يلست تتطالعه بنص عين وحور تضحك.. تمت تحاول تعتدل في اليلسة.. ساعدتها مجد ويلست..
حور: ممكن تسكرون الباب .. عندي رمسه ابا اقولها لكم..
مجد زاغت .. وعبيد بعد.. نشت مجد توها بتصك الباب.. كانت مروه واصله..
مجد: يلا برع.. الأميره حور تقول عندها سالفه تبا ترمسني انا وعبيد فيها.. please bring one cup of capatchino
مروه: ماعليه انا براويج .. حسابج عسير..
مجد: ياكثرهم الي بيراووني اليوم هههههههههه..
اطمنت مروه ان الأمور طيبه دام مجد ياسه تضحك وتسولف..
..




وانتشر الخبر بين الكل في العايله تقريباً .. إلا لطيفه أمها وجلثم مايدرون.. عبدالعزيز من عرف جاسه حزن بس إيمانه بربه قوي هو الي خلاه يصبر على مابلاه رب العالمين..
دخل الفيلا وشاف لطيفه وجلثم يالسات..
جلثم من النوع الي بسرعه تحس بالشخص اذا تغيرت ملامحه.. وكان مبين على عبدالعزيز التعب والحزن .. وعيونه منتفخة من الصياح.. مهما يكون ولدها العود بتحس به اكثر من الباقي..
جلثم: عبدالعزيز اميه شو بلاك..؟؟ مب على بعضك أحسك..
اطالعها عبدالعزيز وتم ساكت وتقرب صوبهم ويلس وشبك صبوعه وقعد يلعب بإبهام كل صبع يدورهم على بعض مرتبك مب عارف كيف يبدأ بالموضوع وكيف راح تكون ردة فعلهم لا عرفوا..
جلثم: عبدالعزيز.. لا تيلس ساكت جي قول شفيك تراك كلت قلبي بعيونك
عبدالعزيز: انتوا ايمانكم بالله قوي صح؟
لطيفه: اكيد شو هالرمسه بعد عبدالعزيز .. شو الي صاير الشركة شي استوى فيها؟
عبدالعزيز: لا الشركة مافيها اي مشكلة الحمدلله.. والي انا ياي اقوله مب مشكلة لكنه امتحان من رب العالمين .. ترا هالدنيا كلها امتحانات ولا لكم راي ثاني
جلثم: اكيد نحن عايشين فهالدنيا عشان نعبده سبحانه.. بس قول وخلصنا انت رمستك الي بتخلينا نموت قبل لا نسمعها
لطيفه: بعد عمرن طويل امييه.. عبدالعزيز قول وريح قلوبنا
عبدالعزيز: حور..
لطيفه: بنتي .. بلاها..
عبدالعزيز: شوفو انتو هاي الردود الأفعال الي تخليني ماقدر اكمل رمستي
جلثم نغزت لطيفه بالعصا: اسكتي وخلي الريال يكمل رمسته نطيتي فزوره من طرى اسم بنتج مافيها الا العافيه .. قول ماعليك منها
عبدالعزيز: حور الله بلاها بالخبيث..
ماكمل رمسته الا ولطيفه مغمى عليها من صدمة الي سمعته.. وجلثم قلبها قوي.. يمكن فراق ريلها الأولي والثاني خلاها تقوى على فكرة الموت والفراق.. بس لطيفه ماقدرت تتحمل الصدمه.. بسرعه يابو ماي ورشوه على وويهها قطرات منه . ويلست جلثم تقرا عليها وتهمزها عشان الدم يسري في جسمها .. ونشت لطيفه من فتحت عينها شافت عبدالعزيز.. فزت ويلست تصيح في حضنه: قول ان الي سمعته كان كابوس.. دخيلك قول ان الي سمعته جذب ومزحه..
عبدالعزيز: لطيفه انتي اقوى من هذا كله.. قبل لا تكون بنتج تراها بنتي بعد واحبها واخاف عليها كثرج ويمكن زود هيه البجر وتعرفين غلاتها عندي.. لها فضل عليه كبير.. بس ارادة رب العالمين محد يعترضها.. نحن مانباها تعرف ان انا وانتي ندري بهالشي لأن هالشي بيضايقها يوم بتشوف الضيق في عيونا.. لازم نخليها تحس بلمتنا وحبنها لها وشوقنا للي في بطنها ..
جلثم: صدقه ريلج .. (دمعت عينها) هاي غناتي قطعه مني .. بس ربج اكبر من هذا كله .. يمكن الله يكتب لها عمر ويشفيها ونحن نتوقع العكس .. نحن لازم نفكر كيف نهتم بها..
لطيفه ماكانت طايعه تسمع لحد.. تمت تصيح بصوت عالي وتنوح.. وقتها ماقدرت جلثم تيود عمرها زود.. يلست تصيح وياها .. وعبدالعزيز راح لمكتبه وتم يصيح بروحه .. الكل في كل بيت كانت حالتهم حاله.. كلن يفكر باللي صاير وشو لازم يسوون .. كلن يحس عمره في حلم وكابوس ووده ينش منه ...
كانت صدمة هزت كيان العايله كلها.. ودهم ينشون منها بسلام.. بس محد بيده يسوي اي شي..
.. .. ..
..
.
بوهزاع كان يرمس سلطان في التليفون..
بوهزاع: اشحالك عساك بخير؟؟
سلطان: بخير طاب حالك انت اشحالك وشحال حمدان وهزاع..
بوهزاع: كلهم بخير .. المهم ياولدي انا بدخل في الموضوع مباشرة.. تقدرون تحددون يوم للخطبة الرسمية متى مابغيتو..
سلطان طار من الفرحة من سمع هالرمسه: صدق.. بشرك الله بالخير ياعمي.. وان شاء الله اكون عند حسن ظنكم فيني .. وماقصرت
بوهزاع: الله يخليك .. عاد هالله هالله ترا هاي بنتنا الغاليه مالنا غيرها..
سلطان: في عيوني والله.. بس ..
بوهزاع: بس شو يا ولدي..
سلطان شرح لبوهزاع حالة حور وحاله العايله كلها مع حور.. عشان جي يمكن يتأجل الموضوع فتره ..
بوهزاع: لا حول ولا قوة إلا بالله.. ان شاء الله تقوم بالسلامه ومايكون فيها شي.. ماعليك يا ولدي احنا عطيناك رمسة ومابنرد فيها.. وانتوا عندكم ظروف معذورين.. ونحن مب مستعيلين على شي
سلطان: تسلم والله عمي اقدر لك هالشي..
بوهزاع: خلاص عيل تمام سلم على الوالد والأهل.. وان شاء الله نلتقي جريب
سلطان: ان شاء الله..
بند سلطان الخط وتنهد.. ودخل عليه أحمد ومعاه عبيد .. وحالتهم حاله..
سلطان: شو بلاكم..
أحمد: شو بتكون حالتنا وحاله البيت بكبره منجلب فووق تحت..
سلطان: هيه والله.. ربي يرحمنا برحمته ان شاء الله وتمر هالأزمه على خير..
عبيد يلس على القنفه وساكت مايرمس .. ومتضايق وده يصرخ من ضيقه بس مو قادر
سلطان بصوت واطي: محد غامضني غير عبيد الله يعينه
أحمد: هيه والله صدقك حالته ماتسر بالمره من يوم ماشفته وانا متضايق عشانه.. الله يصبره..
نش عبيد عنهم وطلع.. وسلطان وأحمد ماقالو له شي.. وفجأة سمعوا صوت سيارته وهو طالع من البيت..
سلطان: وين سار اخوك..
أحمد: مادريبه.. خله يمكن يبا يقعد روحه..
سلطان: وينهن خواتي بعدهن فوق.. لازم يبتعدون عن المكان شوي.. مب زين لحور تشوفهم بهالحاله..
أحمد: لا ماعليك الوضع هدا شوي.. لو تدخل الميلس وتشوفهم ضحكتهم واصله للشارع بس في كل وحده فيهن حزن مايعلم به غير الله..
وسمع صوت امه تزقره ونش.. : عن اذنك سلطان بسير بشوف اميه شو تبا مني..
سلطان: خذ راحتك افا عليك..
نش أحمد وطلع من الميلس ومشى صوب الفيلا شافها.. قلبه عوره .. حس بها حتى وهي متغشيه.. كيف تذرف دموعها.. تقرب صوبها: اشحالج بنت عمي..
رفعت راسها مجد وشافته ماقدرت تيود عمرها زود.. انهارت من الصياح وربعت صوب الموتر وركبته تتريا الباقي ايونها.. استغرب أحمد من تصرفها وفي نفس الوقت عذرها.. بس اللحظة الي رفعت فيها راسها طاحت الغشوة وشاف في عيونها نظرات غريبه .. اول مره يشوفها .. كأن هالنظرات كانت موجهة له.. وتقوله اشيا هو مو قادر يفهمها.. كمل دربه يوم سمع امه مره ثانيه تناديه..
أحمد: نعم امييه شو بغيتي..
ميثا: وينه عبيد؟؟
أحمد: مادريبه طلع بدون لا يقول لنا شي.. خليه اميه يمكن يبا يقعد روحه..
ميثا: يمكن.. المهم .. خذ الخدامه وياك وسيروا عشان توصلون مجد بيت ابوها..
أحمد: وليش الخدامه؟
ميثا: مايوز اتكون بروحك وياها..
أحمد: ماهو عبيد يابها الظهر ماقلتوا شي اشوف
ميثا: شو تقول انت .. عبيد ريل اختها .. وانت ريال عزابي..
أحمد: انزين وينها هالعله خل اتيي..
ميثا: هههههههه يحليلك يا أحمد.. هذي سايره صوب السياره..
مشى احمد صوب السياره وهو يلعن ويسب في الخدامه لأنه بهالطريقه حتى مابيقدر يسألها ولا يرمسها .. ركب الموتر وحركه .. وطول الدرب هم ساكتين.. وصلها البيت وقال بينزل يسلم عليهم..
ومن دخلوا اثنينهم البيت كان الجو هادي.. ويخوف في نفس الوقت.. صدت مجد صوب أحمد تتطالعه وساكته.. واحمد يطالعها مستغرب .. : وينهم محد في البيت؟
مجد: لا فالبيت موتر ابويه برع..
أحمد: سيري شوفي..
دشت مجد الصاله وشافة يدتها يالسه روحها ومتساندة ع عصاتها وسرحانه... تقربت منها .. وحضنتها ويلسن يصيحن هنتينهن.. أحمد قلبه عوره على الي صاير.. ماقدر يتم .. الجو في كل بيت يدخله كئيب.. طلع من المكان بسرعه وركب موتره ورد البيت.. تذكر انه ماقال لسلطان انه طلع وسار يلس وياه فالميلس..
.. ..
اليوم كان اول يوم امتحانات للثانويه العامه وعدى على خير..
عمّار وفطوم كلن راجع ومتفائل للورقة الثانيه من الإمتحان ومتأملين خير..
..
جاسم: يعني تتوقعين لازم نأجل كل شي..
خلود بعصبيه: جاسم .. يعني مايبالها رمسه وبعدين نحن وين وانت وين..
جاسم: سوري حبيبي بس تفهمي موقفي والله مب عارف مخي يفكر في شو ولا شو
خلود: شو صاير بعد... لا تقول بعد شي يديد صاير .. لأن مخي خلاص ماقام يستوعب .. وفاة فيصل.. وألحين حالة حور.. ونهاية الكورس
جاسم: الله يعينكم ويعينا.. خلود انا حاس ان فطوم وفيصل شي بينهم؟
خلود: ليش شو بينهم بيكون غير كل خير؟
جاسم: مب عن شي.. بس مادري مره تراوالي سمعتها تصيح وهي ترمس وياه.. مادري يمكن غلطان
خلود: لا لا يمكن كانت تشتكي عشان الثانويه العامه وزايغه وتصيح عادي تستوي هالحالات
جاسم: ها رايج يعني؟؟
خلود: هيه نعم هذا رايي..
جاسم: بنمشي على رايج وبنشوف.. الأيام شو مخبيه
خلود: ياربي جاسم هالرمسات تعور لي قلبي.. مافي الا كل خير..
جاسم: خلاص خلاص حبي هدي انتي بس .. دخيلج
خلود: هديت..
جاسم: انزين احبج..
خلود: وانا بعد يا جاسم والله العالم اشكثر اتوله عليك بس ..
جاسم: مايحتاي تشرحين اي شي انا فاهم ومقدر كل شي..
وتموا يسولفون شوي وبندوا عقب من بعض.. وكلن رقد ويفكر شو الي تخبيه الأيام لهم..
..
حور: عبيد شو رايك باللي قلت لك عليه اليوم ؟؟ تراك انت ومجد وعدتوني ..
عبيد معطنها ظهره وساكت..
حور: عبييييييد ارمس منو انا
عبيد: شو تبيني اقولج.. تراني وعدتج واختج وعدتج خلاص عاد طبي هالسالفه
حور: انزين عندي طلب صغير.. مابا امي وابوي ويدتي يعرفون
عبيد: هذا الي صاير اصلا.. محد بيخبرهم
حور: وطلب ثاني
عبيد صد صوبها يبتسم لها: انتي تامرين لو تبين عيوني تفداج
حور: تسلم لي عيونك ربي يحفظهن لي.. اسمع.. اباك تتفق ويا المعاريس.. خلود وجاسم وفيصل وفطوم وسلطان اذا خطيبته موافقه.. انهم يسوون عرسهم بيوم واحد بعد امتحانات الثانويه ممكن؟؟ هاي امنيتي احضر عرسهم كلهم...
عبيد تم يطالعها وعيونه مليانه دموع: من عيوني برمسهم واكيد مابيعارضون دام الشيخة حور طلبت هالشي..
حور: علني افدااااك قول امين..
عبيد: فديتج انا ياروووح عبيد وقلبه
حور: طلب ثاني..
عبيد: ياشين الحريم يوم يستغلون المواقف هههههه..
حور: بس انا مو اي حرمه انا حرمتك وام عيالك..
عبيد: في هاي غلبتيني .. قولي شو تبين؟
حور: خاطري نطلع رحلة.. يقولون نازل مطر صوب الفجيره..
عبيد: هيه سمعت انا بعد في الأخبار.. سبحان الله في مناطق ربنا ينعم عليهم بالمطر حتى فالصيف..
حور: انزين دخيلك رمس الكل ودنا نسير رحلة سوى..
عبيد: بعد ولايهمج.. غاليه والطلب رخييييص
حور: الله يخليك يارب..
..
كانت الساعه 9 فليل يوم حور قالت لعبيد هالشي.. وبسرعه عبيد اتصل في سلطان وقال لأحمد ومروه وانتشر خبر بين العايله ان حور ودها بطلعه صوب الفجيرة.. والكل ماصدق خبر .. حور شي في خاطرها .. مستحيل يرفضونه لها.. وبسرعه الكل تزهب ويمعوا ع أساس يظهرون باجر (اللي هو يوم الأربعا) يشلون غداهم صوب الفجيرة.. وخلود ماكان عليها شي فالجامعه ولا مجد.. فكانو مستعدين ..
..
لطيفه: ماقدر اشوف بنتي وايود عمري
عبدالعزيز: لازم تيودين عمرج اذا تبين مصلحة بنتج
لطيفه: بس..
جلثم: لطيفه بس خلاص.. سمعي كلام ريلج .. صدقه باللي يقوله..
مجد: مانباها تحس ان نحن نشفق عليها.. نباها اتحس ان نحن نحبها ونسعدها..
تمت تصيح لطيفه ماقدرت تيود عمرها.. ولوت عليها جلثم وتمت تهديها..
مجد: اذا بتمون جي نحن بنتأخر عليهم.. التجمع في بيت عمي ولا نسيتو..
لطيفه وهي تمسح دموعها: لا يالله خلنا نروح عيل..
والكل ركب الموتر وتوجه صوب بيت حميد (بوعبيد).. وشافو ماشاء الله الكل متزهب.. كان سلطان في موتره ومعاه خلود وعلاوي .. وأمه ونوره وعيالها .. وخالد ومروه وإيمان بنتهم في موتر.. وعبيد وحور في موتر.. وميثا وحميد وأحمد في موتر..
نزلت مجد: انا مايخصني تسوون لي مكان..
عبيد: يلا يلا.. انا متعمد حاط الأغراض عندي عشان ماتخربين علي القعدة ويا حرمتي.
الكل يضحك على حشرة مجد.. ولو انهم يحسونها مب شرات قبل وحشرتها مصطنعه..
بس محد يقدر يلومهم.. وتحركوا كلهم صوب فجيره وكانت الساعه وقتها 10 الصبح
..


في موتر سلطان.. كان الهدوء سيد الموقف..
خلود هاديه ونوره وشيخه امها وعلاوي.. كلهم ساكتين.. يطالعون الدرب.. وسرحانين.. وسلطان يفكر في شما.. الي خذت عقله.. كل تفكيره لا يكون انها تتحراه بيتهرب من الخطبه لأنه أجل الموضوع..

وماصارت دقايق.. الا كأن قلب شما حاس فيه.. وصل له مسج منها ..
( الله يصبركم على مابلاكم.. ويهون عليكم .. )
هالمسج ريح قلبه شوي.. ابتسم .. وتم يقول في خاطره.. : سبحانك يارب.. حست فيه وانا في حاجة لها.. ربي لا يحرمني منج يا شما
...
السياره عند أحمد..
كان يمشي بمحاذاة سيارة عمه عبدالعزيز.. وكانت مجد في هالوقت منزله الجامه وتتطالع تليفونها .. في هاللحظة صدت صوبه وشافته وشافها في نفس الوقت.. قفطت ورفعت الجامه على طول.. ابتسم أحمد لحركتها.. بتمين طفوليه مهما كبرتي.. ربي لا يحرمني منج ان شاء الله يابنت عمي..
وصارت الساعه 12:30 وصلو المكان.. وكان الجو روووعه .. مغيم لكن شوي حر.. بحكم انه الصيف.. ونزلو وفرشوا الحصير وبدوا يوزعون الشغل فيما بينهم.. وحور تتطالع ومستانسه.. والكل حواليها.. لطيفه كل ماتشوف حور تتضايق وتروح مكان بعيد تنخش وتصيح وترد تيلس وياهم.. مهما يكون الضنا غالي..
نشن الحريم كلهم يتمشون صوب الوادي.. ومجد صعدت فوق معاها خلود..
خلود: انتي ناويه تذبحينا شوفي اشكثر نحن مرتفعين..
مجد: الحياة مغامره..
خلود: فعينج مغامره .. ناويه تنفدينا وتقولين مغامره.. وراي ريل انا اذا انتي ماوراج شي..
مجد: ههههه شوي شوي بس بلاج انتي جي خوافه.. بس خليني اصورهم من فوق..
خلود: بذمتج جاسم مب احلى منهم كلهم.. لو كان موجود كان بيقطعهم كلهم بحلاته..
مجد: ههههههه لا والله .. انزين استريحي وخليني اصور..
خلود: مب مصدقه يعني ان جاسم أحلى.. برايج اصلا.. ادريبج ودي اقول أحمدوو احلاهم بس مب قايله..
مجد اطالعت خلود بطرف عينها وتنهدت من سمعت طاري احمد .. وتغيرت ملامحها.. وصورت الصورة ومشت وهي ساكته..

خلود: حوووووو انتي نسيتي اني واقفه هني ولا تتناسين..
مجد: تعالي وراي وانتي ساكته ولا تحرطمين وايد مب زين صوتج بيغدي شرات .. خلني ساكته احسن..
خلود: دبه انا براويج خل اوصلج بس..
مجد: ههههههه محد دب غير ريلج ..
خلود: فديته..
مجد: وينج يا جلثم تسمعييييينها تتفدى ريلها الي ماتستحي.. ماتراعي شعور انسانه عانس يدامها.. تهيجين مشاعري الرومانسيه..
جلثم: جني الا سمعت طاري.
فزن خلود ومجد من سمعن صوت يدتهن..
خلود بصوت واطي: من وين طلعت .. اشك ان يدتج ساحره..
مجد: اسكتي شو يفكني من لسانها ألحين..
خلود: الشرده عيل..
وبسرعه كل وحده فيهن رفعت شوي من عباتها وربعن بسرعه يشردن.. يلست تتطالعهن جلثم وتضحك..: الله يحفظكن يا بنيات ..
ردوا الحريم صوب المكان الي فارشين فيه ويلسو..
ويلست مجد تتطالع صوب الرياييل.. الكل ملتهي.. الا عبيد.. حالته ماتسر.. يالس يدام الشوايه.. وسرحان.. معذور الحاله الي هو فيها ماينحسد عليها الصراحة.. تذكرت مجد الي قالته لها حور.. وتضايقت.. يلست تتخيل بس مب قادره تستوعب الي بيستوي.. تدعي في قلبها ان حور مايكون شي بلاها عشان مايسوون الي طلبته حور.. صعب عليهم يسوون هالشي.. ولا حد يقدر يتقبل هالفكرة..


صدت مجد صوب الموتر شافت عيونه .. شافت نظراته لها.. تحاول تتفاداها بس ماتقدر.
. تقربت منها خلود: شو بلاج؟
مجد: ماشي قومي خلينا نسير نيلس عندهم..
خلود: عند منو بالضبط (وهي تغمز لها)
مجد تتطالع خلود وتتنهد.. ليتج تقدرين تعرفين.. يالله رحمتك..
خلود: مجوووووود شو بلاج؟
مجد: ها لا ماشي.. قومي خلينا نسير عند اميه ويدووه..
خلود: لا احس بنتصفع ..
مجد: ليش؟
خلود: مسرع مانسيتي.. بسم الله عليج.. يدوو..
مجد: لا تلاقينها نسيت خلاص..
خلود: اشك انها تنسى..
مجد: هيه والله .. يالله لازم نواجه مصيرنا المحتوم..
توهن نشن انتبهت عليهم جلثم .. نشت بسرعه .. ومن شافوها ربعن.. ماقدرت تكمل خلود خطوتين الا تخرطفت ويودت مجد عن اطيح.. جان يطيحن سوى صوب الماي.. اسميهن كانن مصخره يدام الكل بأشكالهن وهن طالعات من الماي وعبيهن تخيست..
جلثم: دواكن.. يايات تشردن.. جان الله يراويكن..
أحمد غمضته مجد بس ماقدر ايود ضحكته لأن صدق شكلها كان يضحك من الخاطر
نهاية البارت..

الجزء الثاني عشر
الفصل الأول
=-=-=-=-=-=
الملخص : انتشار خبر مرض حور بين العايلة.. طلب حور من مجد.. موافقة شما على الزواج وتأجيل الموضوع لحين استقرار امور حور في العايله.. بدء إمتحانات الثانويه العامة.. تعرف مها على عيال عمها.. الحاله العصبية لجواهر.. كلام الدكتور لأخو جواهر..
..
نشت وهي معصبه: ضحكت من سرّك بلا قول آمين
خلود وهي تضحك على حالهم وتصد صوب مجد: شو بلاج ياحرمه تحرطمين
مجد: طاعيه ويا هالضروس يضحك علي اونه.. مادري شو فاكر عمره.. اتمناااااه يطيح في الماي
خلود: هههههه حرام عليج يسولف وياج وبعدين صدق اشكالنا تضحك.. تعالي
يودت مجد من جتفها ومشت صوب الموتر وقفتها يدام الجامه: شوفي شكلج الله يخليج
مجد تمت تتطالع يودت عمرها في البداية بس ماقدرت يلست تضحك على شكلها.. وعلى جامه الموتر شافته.. يالس يتمشى ويرمس تليفون .. سرحت شوي مجد وتداركت دمعتها بسرعه وصدت عالصوب الثاني ومشت صوب الحريم وهي تبتسم لهم.. شافت عيون حور كيف طايره من الفرحة وتضحك وتسولف..
مجد في خاطرها.. ليتني اتعلم كيف اكون قوية مثلج يا اختي.. الله يطول بعمرج يارب..
..
..
خليفه دش البيت وهو متضايق على الآخر.. استغربت خوله من ملامحه.. الي موول ماتريح القلب مبين ان هالإنسان مهموم في شي بس الله العالم شو هو.. تقربت منه..
خوله: خليفه شو بلاك..
خليفه: اليوم سمعت خبر كدرني وايد..
خوله: خير شو السالفه؟
خليفه: ماعرف شو بتكون ردة فعلج يا خولة لو دريتي..
خوله: الله يخليك خليفه لا تسوي لي هالحركات ترا الي فيني كافيني ارجوج ترا قلبي مايتحمل .. قوووووول بسرعه لا تم تتطالعني بهالطريقة؟؟ شو صاير..
خليفه: حور.. ربيعتج.. فيها الخبيث..
خوله تمت تتطالع خليفه ساكته.. ومن عقبها ضحكت: اقولك خليفه مره ثانيه يوم تبا تسولف دخيلك لا تسولف بهالسوالف.. تفاول على الحرمه امس كلمتها مابلاها شي..
خليفه: انتي شو فييييج ماتفهمين.. اقولج حور فيها الخبيث وهذا شي يتسولف به؟؟
يلست خوله تصيح ومب مصدقه وخليفه يهديها.. : ابا اشوفها الله يخليك..
خليفه: ان شاء الله بوديج لها .. بس مب الحين لأنهم مب موجودين..
خوله: الله يعينج على مابلاج يا حور.. ويعينك ياعبيد..
.. ..
.
.
.. عبيد رمس ويا جاسم عن موضوع العرس.. وجاسم ماعارض أبداً بالعكس من الله يباها ان عرسه يتجدم وخلود من لها اغلى من بنت خالها حور.. مارفضت فكرة الزواج الجماعي.. وسلطان رمس ربيعه فيصل وفهمه بالظروف.. فيصل كانت المشكلة ويا أهله ماودهم ان ولدهم يتزوج زواج جماعي خصوصاً انه اخوهم العود.. واول عرس بيكون في بيتهم وودهم يفرحون به بروحه.. رمس سلطان عبيد بهالموضوع وعبيد تفهم الموضوع وماجبرهم طبعاً.. كان الباقي بس سلطان وشما..
سلطان: اشحالك عمي عساك بخير؟
بوهزاع: بخير عساك طيب ان شاء الله.. الا اشحالها الي من اهلك شو صحتها؟
سلطان: والله يا عمي تغمضنا تحاول ماتبين الي فيها .. والأهل كلهم حالتهم مختبصه
بوهزاع: الله يعينكم ويسهل عليكم ياولدي.. الله وياكم يارب..
سلطان: عمي انا بغيت ارمسك في موضوع والصراحة ماعرف شو بتكون ردة فعلك..
بوهزاع: خير يا سلطان قول ارمس يا ولدي ولا تستحي وانا عمك.. افا عليك
سلطان فهم بوهزاع الموضوع كله الي تم ساكت وهو يسمع السالفه..
بوهزاع: شوف يا سلطان يا ولدي. الموضوع هذا انا ماعندي مانع فيه.. بالعكس حلو يوم نجمع فرحتين في ليلة وحدة.. وبعدين العروس الثانيه اختك يعني هب غريبه عن شما.. بس الراي راي البنت.. تعرف كل بنت ودها بعرس ويمكن شما يكون لها راي ثاني.. خلني ارمس البنت واشاورها واشوف.. وبعدين لا تنسى البنت ماجهزت شي.. وانتو تبون كل شي خلال هالشهرين.. يعني تعرف الحريم وسوالفهن..
سلطان: عمي حتى لو حفلة ملجة بس.. مب شرط عرس ادريبها بعدها مب جاهزة للعرس لكن الملجة على الأقل..
بوهزاع: خلاص مره لا تحاتي ان شاء الله باجر برد عليك خبر بس ارمس البنت..
سلطان: يزاك الله خير عمي وطول الله بعمرك ماتقصر والله..
بوهزاع: افا عليك نحن اهل وانت ولدي وشما بنتي.. ربي يوفقكم يارب
سلطان: آمين يارب العالمين..
بند سلطان عن بوهزاع وهو مستانس.. سلطان كان بإمكانه يرمس شما نفسها لأن يعرف رقمها لكنه معاهد نفسه مايرمسها الا يوم تكون هالبنت حليلته...
..
..
تقربت منها شافتها سرحانه وهي تتطالع الوادي ومتضايقه.. لوت عليها وتقربت منها..
حور: مجد انتي متضايقه من الطلب الي طلبته منج؟
مجد: ها .. شو متضايقه؟.. هههههه تمصخرين انتي.. ماشي شغل اتضايق من ولا شي
حور: مجد انا بسألج سؤال.. وجاوبيني بصراحة؟؟ انتي تحبين أحمد؟؟ انا الي حسيته انج تعتبرينه شرات اخوج بس ماتفكرين ترتبطين فيه شرات ماكنتي دوم تقولين لي..
مجد ودها تصرخ وتقولها احبه.. رفعت عينها شافته وهو مبتسم ويشوي ويا سلطان وعبيد.. قلبها عورها.. بس حور اختها الي ماعندها اغلى عنها.. ودها ان حور تكون مرتاحة لآخر لحظة: لا شو ماشي شغل احب احمدوو الياهل.. هههههههههههه والله انتي اليوم مستخفة يختي
حور تبتسم لها: ريحتيني الله يريح قلبج.. تدرين ليش اخترتج انتي بالذات؟؟ كان بإمكاني اختار نوره مثلا ولا اي وحده من الأهل.. مجد انا عارفه محد بيكون حنون على عيالي اكثر منج.. وابا اخوان عيالي يكونون منج.. لأن الحرمه الثانيه من بتييب عيال ثانين.. بتنسى ولدي ولا بنتي.. اما انتي لا متأكدة انج مابتسوينها
مجد في خاطرها ااااه يختي يعني بعيش طول عمري بعذاب.. بس كله عشان هالدمعه الي في عينج تهون والله كل شي يهون.. حضنت اختها ويلست تصيح..
حور: لا لا نحن ماتفقنى على صياح.. مجد انتي تحبيني وان شاء الله ربي بيلقانا ببعض في الجنه .. انا مب زعلانه للمرض لأن كل دقيقه تمر اكسب اجر فيها تعرفين؟؟ كل ألم احس به يطيح خطا من خطاياي.. مجد اختي حبيبتي خليني ارقد في قبري وانا مرتاحة.. كم يسوى الواحد يرقد في قبره مرتاح..
كل ماتقول حور هالرمسه كل ما مجد ترص على اختها زود وتحضنها بقوة.. وتصيح بحرقة أكثر.. الكل تم يطالعهم وماقدر.. خصوصا لطيفه بسرعه سارت صوب السياره ويلست تصيح وتصارخ عشان محد يسمعها..
ومر الوقت على الكل بصعوبة..
=-=-=-=-=-=-=-=
يلست تتطالع الغرفه حواليها وتحس بصوت أمها في كل زاوية من البيت.... تحس بقطرات من الماي على ايدها.. كأنهن دموع أمها نازله على ايدها.. تصيح وتصرخ بس محد يسمعها.. اااااااااااه يمي وييينج .. وينج اباج تسامحيني انا السبب.. اناااا.. يلست تضرب عمرها وتكسر كل شي يدامها..
مابا اعييييييييييش والله مابا اعييييش ياربي.. من بعد عين امي مابا اعييييييييش.. انا ليش جي استويييت لييييييييش .. ليش دمرت حياتي بهالطريقة... ااااااااااه ياربي..
كان سهيل واقف ورا الباب يسمعها وقلبه معورنه عليها .. ومتضايق واااايد بس مابيده يسوي شي... مووووتي اخير لنا موووتي ... فحياة امي ماهمتيتي فيها وسويتي سواتج.. وألحين من عقب عينها تبين تهتمين... الله يرحمج يا أمي
همسة: أم جواهر توفت إثر جلطة دماغية صابتها في المستشفى
ماسمع الا صريخ في الغرفه ... خاف .. قلبه نغزه... أكيد شي صاير.. لا اكيد في شي...
سهيل: جواهر.. جواهر افتحي الباب جواهر..
جواهر وهي تصرخ: مابااااااااااااااااا.. مابا اعيييييش مابااااا.. ماودي اتم بعد الي صااااار.. انا السبب انا ..
تم يحاول وياها سهيل بس ماشي فايدة.. دز الباب بقوة وكسره وقدر يدخل .. شاف الغرفة فاضيه .. مشى صوب الحمام وشاف الي ماكان يتمناه.. مهما كان تبقى جواهر اخته مايبالها الضرر..
..


يودها وشلها بإيديه وداها بسرعه اقرب مستشفى.. وطبعاً أمن المستشفى ماراح يمشون السالفة بهالطريقة..
لأنها حالة إنتحار.. جواهر طول الوقت تصيح
جواهر: ليش خليتني اعيييييش لييييش؟؟؟ حرام عليك مابا اعيش بعد الي صاااار مابا..
سهيل: اسكتي .. جب... الحين بس فكرتي انج السبب في موت امج.. خلج عايشه جييي طول عمرج حاسه بالذنب هذا احسن شي يستوي لج..
يلست تصارخ وتحاول تشل الجلوكوز الي مركبينه لها والدم الي ينقلونه لها.. لكن الممرضات ربطوا ايدها وريولها بالسرير وعطوها إبره مهدئة تهديها..
الشرطية دخلت عشان تحقق مع جواهر بس الممرضات منعوها.. وطلع سهيل يرمسهم..
الشرطي: ممكن تشرح لنا ياخوي كيف استوى الموضوع
يلس يقولهم سهيل عن كل الي صار.. من اول يوم لقى اخته فيه فالشقة لليوم
الشرطي: بس ياخوي كان لازم تبلغنا بهالشي عشان نتخذ الإجرائات مع هذا الريال.. هالأمور فيها قضية شرف..
سهيل: شو تباني اسوي ياخوي من واول يوم صار هالموضوع وامي طاحت المستشفى وانشل انا تفكيري.. سمعتنا بين الناس وحالة امي ومليون شي في راسي مب قادر افكر في شي.. لين ما امي توفت الله يرحمها بسبب هالخايسه..
الشرطي: ماعليه ياخوي بس انا مجبور اني احول القضية للجنائيات لأنها حالة إنتحار..
سهيل: ياخوي حاول الله يخليك مانبا فضايح
الشرطي: بس ياخوي هذا الي يمليه علي الواجب وماقدر اخالف القوانين اسمح لي... وبالعكس انت بهالطريقة بتستر على الموضوع بزواج اختك بهالإنسان.. مرت علينا مثل هالحالات وايد وحليناها.. أحسن طريقة تحصنون نفسكم فيها من رمسة الناس تزوجون البنت لنفس الشاب.. وكلن يتحمل غلطته.. وانتوا عاد بطريقتكم حاولو تسترون الموضوع بين معارفكم
فكر فيها سهيل وشاف رمسة الشرطي صح.. وهذا الي لازم يسويه.. ابتسم وطبطب على جتف الشرطي : يزاك الله خير ياخوي.. خلاص عيل موافق..
الشرطي: عيل عطني معلومات هالريال وانا ان شاء الله بتكفل بالباقي ومايصير خاطرك الا طيب..
وكمل الإجرائات مع الشرطي.. وفي هالأثناء شاف الدكتور محمد سهيل في مكتب الشرطي في قسم الحوادث.. تردد انه يروح له.. وفضل انه يسأل الباقي عن سالفته .. وعرف منهم انها عملية انتحار جواهر.. هز راسه.. هاي نهاية الإستهتار..
تقربت منه نوف.. : دكتور محمد بلاك مستهم..
محمد يبتسم لها: ماشي بس شفت واحد من الربع ومسكين عنده حد من اهله تعبان
نوف : يحليله الله يشافيه يارب... انزين عيل انا سايره لأنهم يزقروني اكيد حالة نسائيه..
محمد : الله يعينج ,,
=-=-=-=-=
همسة: محمد خطب نوف رسمياً وهم على وشك الإرتباط الرسمي والزواج
=-=-=-=-=
وافقت شما على القرار طبعاً وماقدرت تردهم في شي.. وبدت تحضر للملجة.. وفي كل يوم تظهر فيه عشان تتشرى هزاع يحس بطعنه في قلبه.. يهون على نفسه بدعائه لها ان الله يوفقها .. ويسهل عليها..
شما: وينه؟؟
مها: منوو؟؟
شما: اخوج بعد منو غيره..
مها: واقف برع شو تبين فيه؟؟
شما: ابا اخذ رايه في هالساعه ..
مها: اخوي ماعنده ذوق خليني اشوف انا بقولج رايي..
شما: اوهووو مهوووي عاد ابا اخذ ذوق ريال فيها لأنه لـ سلطان وعادة الرياييل بعرفون ذوق بعض..
مها: اانا الي ماعندي سالفة ويايه وياج..
شما: ههههههه مب من قلبج ادري.
طلعت مها من المحل وراحت عند هزاع الي كان سرحان ولا حاس بنفسه.. حطت ايدها على جتفه تزقره فز.. وفزت مها..: عنلاتك لو حامل جان طيحت الياهل من الخوف.. زيغتني وين وصلت بأفكارك؟؟
هزاع: انجعمي.. ماوصلت مكان شو عندج؟
مها: شما تزقرك..
هزاع من سمع طاري شما طنش مها ومشى صوب المحل.. تغصصت مها.. : اوكيييي التطنيش.. انا اراويك..
هزاع.. : شما قالت لي مها انج تزقريني خير؟؟
شما: تعال هزاع ساعدني.. شوف هالساعة شو رايك فيها؟؟
كانت حاطة صبعها على الفترين ومأشرة على الساعه .. وهزاع كل تفكيره في صبعها.. هالإنسانه بتخبل بي.. وراح تصير لغيري ياناااس ظلم شو هالحاله..
شما: هزاااااااع..
هزاع: هلا..
شما: شو بلاك.. انت واختك مامنكم فايدة والله لو عمّار ماعنده امتحانات جان ظهرت وياه..
هزاع: افا عليج والله .. وين الساعه اشوفها..
يلس يطالع الساعه.. : وايد حلوة .. بتعيبه اكيد .. طلعتي ذويقة بنت عمي..
شما ابتسمت له .. وراح هزاع عند مها الي كانت الصوب الثاني تتطالع الساعات النسائية..
مها: هزاع عايبتني هالساعه مابتاخذ لي اياها؟
هزاع يطالع مها بنص عين.. : واشعنه ريلج الدب ماياخذها لج..
مها: ريلي مب مقصر علي.. بس غير يوم تطلع منك..
هزاع: لا والله عملية نصب واحتيال يعني
مها: لحوووووول هالإنسان طالع كنجوس (بخيل) على منو مادري..
هزاع: انا كنجوس.. ماعليه.. لو سمحت اخوي بغينا هالساعه..
مها تتطالعه وتضحك بخبث.. فديتني والله وقصيت عليك
هزاع: نعم
مها: ها .. لا ماشي اقول ربي لا يحرمني منك يارب..
وكملوا شرواتهم وطلعوا من المركز هلكانين تعب.. وصلوا شما بيتهم وراح هزاع ومها لبيتهم..
عمّار: هييييه يعني ماترومين تتريين اخلص دراستي وعقب تتشرين ..
شما: فديتك ياخوي..وين بلحق الله يهديك.. ماهو الملجة بتكون بعد امتحاناتك بإسبوع
عمّار : ماعليه سامحتج.. بس تعالي اقري علي عشان ارقد وانا مرتاح واستعد لإمتحان باجر..
شما: تعال فديتك
يلست شما تقرا على اخوها وتدعي له ... وسار غرفته وراحت هيه غرفتها..
.. .. ..
=-=--=-=-=-=-=
تحولت القضية للجنائيات وطلبوا جابر ويابوه المركز.. وواجه سهيل الي كان ميود عمره من الغيض الود وده ينقض عليه ويذبحه يدام الكل..
جابر واقف ويطالع الضابط: نعم يقولون طالبيني خير شو مستوي..
صد يطالع سهيل بنص عين كأنه واثق ان سهيل مابيقدر يسوي له شي يدام الأمن العام ..
الشرطي ماعيبه اسلوب جابر .. لأن جابر بعد غلطان وبيتعاقب.. : اخبرك انت عدّل رمستك تراك في المركز..
جابر: اسمح لي الحشيمة لك سيدي.. بس ممكن اعرف ليش يايبيني
الضابط: اظني انت عندك فكرة ليش يايبينك.. الموضوع يا أخ جابر من لعب لعبته واستمتعت به.. دفعت ثمه موت أم.. وحالة انتحار بنت..
جابر بلع ريجه من سمع هالخبر بس تم صامد: اوكي وانا شو يخصني.. الله يرحم الأم ويهدي بنات اليوم..
سهيل ماقدر يمسك نفسه اكثر من جي.. توه تقرب بيضربه مسكه الشرطي ومنعه
الضابط: هدي يا سهيل .. مايجوز هالتصرف.. نحن جامعينكم هني عشان نلقى حل للقضية بشكل ودي..
جابر: تعالو تعالو اي ودي اي خرابيط.. شوف الموضوع خالص.. البنت يتني برضاها واعتقد انها كبيره كفايه عشان تعرف الصح من الغلط.. وانا ريال ماقدرت ايود نفسي يدام اغرائات بنت.. مشكلتهم يوم ماعرفوا يربــــ---
توه ماكمله رمسته الا يته صفعه قوية من الضابط: احترم نفسك واحترم المكان الي انت فيه.. ولا تقعد تغلط لأن مب لصالحك.. ع قولتك البنت كبيره كفايه.. اعتقد انت كبير كفاية اكثر عنها عشان تقدر تفرق بين الصح والغلط.. والزنا وسواد الويه الي سويته غلط اكبر يدام ربك.. اشوفك ماقدرت تمنع نفسك؟؟
جابر سكت لأن ماعنده شي يقوله ويعرف ان الموضوع اذا وصل لأبوه بينحره.. أبوه في هالسوالف شديد وايد وماعنده تفاهم ويخاف من ابوه بشكل كبير..
جابر: انزين ممكن نختصر الوقت والكلام هذا كله ونعرف المطلوب..
الضابط: هذا هو الحل الي اقترحناه على سهيل ووافق.. وانت ماعندك خيار ثاني غير هالحل.. لأن قاضي المحكمة الشرعية بيطالب بنفس الحكم بعد لو القضية تحولت للمحكمة.. الي هو تتزوج هالإنسانه..
جابر اشتعل من الغيض: شووووووووو.. انت شو تقول.. تباني اخذ وحده بايعه نفسها.. دخيلك هاي وين مال زواج.. وين الواحد يأمنها على بيت وعيال.. تعرف يعني شو زوااااج.. مب لعب هذا..
سهيل: وانت يوم انك قدرت تفرق بين اللعب والزواج.. شلك تقص على بنات الخلق وتسحبهن في شقق وتسوي مشاكل.. تتوقع كل مره الله بيسترها عليك ومابتنفضح ويا البنت.. احمد ربك اني انا كنت اخو البنت الي انفضحت.. لو واحد ثاني جان ذبحك انت ووياها.. واتخسي تنطق وتمنعني.. القضية فيها شرف وماكنت بفكر لا في عواقب السجن ولا غيره.. بس الناس الي وقفوا وياي وماقصرو قدروا يهدوني .. ورضيت بحل يرضي ربنا والطرفين..
جابر ساكت لأن فعلاً كان الفترة الي طافت خايف يطلع من بيته يلقى سهيل يترياه.. كان كل يوم يطل من غرفته ويشوف برع اذا سهيل واقف برع يترياه او شي.. ماينسى قبضة سهيل القوية الي ماقدر يفلت عنها بسهولة في الشقة لولا محمد سحبه..
جابر: خلوني افكر وبرد عليكم
الضابط: اقولك .. تتحرانا ياييين خاطبينك البيت ونترجاك عشان تقول بفكر.. عندك شي قوله في هاللحظة.. وكون ريال قد كلمتك.. جان موافق على الزواج .. خلنا نحل القضية بشكل ودي ومحد يدري بالموضوع.. ونستر على الأطراف كلها.. تبا القضية تكبر وترفض الزواج.. بتتحول السالفة للمحكمة وقتها عاد بنشوف المحكمة شو بتقضي وبتحكم عليكم
جابر: بس مابا هلي يدرون ليش انا بتزوج هالإنسانه
الضابط: محد بيقول لهلك.. الي فهمته انك موافق وبتخطب البنت عساس اي خطبة طبيعيه ثانيه.. لكن هلك مايدرون بحقيقة الزواج هذا
جابر: هيه نعم
سهيل: اسمح لي حضرة الضابط انا شو يضمني ان الريال فعلاً يملج عليها ومايشرد..
الضابط: سمعت رمسة الريال شو ردك..
جابر حس بمسؤولية كل كلمة يقولها... وان الموضوع جاد فعلاً.. صد صوب سهيل ويطالع بنظرة جادة: كلمة رياييل..
فرح سهيل في داخله ان هم وبينزاح عنه قريب.. : خلاص انا اعتمدها..
الضابط: حط في بالك يا جابر.. كل كلمة قلتها ان مسؤول عنها.. وهني مكان رسمي يعني ماتقدر تلف وتدور.. وراح اتواجد يوم الخطبة الرسمي عشان اتأكد من سير الأمور..
سهيل: بس مانقدر الفترة الحالية عشان وفاة الوالدة الله يغفر لها ويرحمها..
الكل: آمين
سهيل: فيعني الموضوع خلوه يتأجل شهر تقريباً لين ماتهدأ اوضاع البيت من وفاة الوالدة..
جابر: وانا في هالفتره بكون قدرت افهم هلي
الضابط: خلاص .. حلاته يوم تطلع القضية من عندنا وهي محلولة بهالطريقة الودية.. نعتمد ورجاء وقعوا على هالأوراق
تقربوا من مكتب الضابط ووقعوا على الأوراق المطلوبة وكلن طلع من المكتب في باله اشيا مب عارف شو نهايتها
=-=-=-=-=
في بيت بوعبيد
مجد: انتي هبله ولا تستهبلين.. اقولج ابا جاهي بالنعناع تييبين لي جاهي خالي..
البشكاره: سوري مدام والله نسيت.. سوري..
مجد مشت صوب البشكارة ويودتها من شعرها ويلست تير شعرها: انتي غبيه ولا تستغبين علي.. اقولج ابا جاااااهي بالنعناع.. كم بنيلس نعلم فيج.. غبية انتي غبيه..
يلست البشكارة تصيح وتصارخ في المطبخ.. سمعها أحمد وربع صوب المطبخ ويود مجد من ايدها وسحبها: مينونه انتي..
مجد من شافت مجد كأنها شافت يني يدامها.. نشن زيارينها كلهم.. : انت كيف تتجرأ وتمسك إيدي؟
أحمد: وانتي كيف تتجرأين وتمدين ايدج على البشكارة.. مب حرام عليج.. مينونه انتي..
مجد: بخبرك إنت شو فاكر عمرك؟؟ شو تتحرى عمرك عشان تمد ايدك علي وتصارخ ؟؟ مايخصك فيه فاهم.. شي بيني وبين الخدامة انت اشلك تدخل عصّك بشي ما يخصّك..
أحمد: اقولج انتي على شو شايفة عمرج علي؟؟ هااا خبريني؟؟ شو هالمعاملة الي تعامليني فيها؟؟ تحريني خادم عندج ولا بشكار؟؟ اقولج اصحي انا ولد عمج فاهمه.. وحسني رمستج لا اييج شي ماترضينه..
مجد: واااااااااااي خوفتني تدري..
دخلت عليهم مروه وهي تشوف هالحاله استغربت.. : أحمد اطلع برع شوي..
أحمد احترم رمسة اخته وطلع .. وهو مقهور حدّه.. هاااااي اكيد استخفت..
مروه: مجد شو بلاج؟؟ شو هالحشرة الي اسمعها منج؟؟ اول مره اشوفج جي..
مجد من شافت مروه مالقت عمرها الا طايحة في حضنها ويالسه تصيح.. : مروه مادري بلاني مستوية عصبيه والله احس اني بختنق بمووووت..
تمت تمسح مروه على راس مجد وتخفف عليها.. صدت مجد صوب الخدامه: سوري حبيبتي والله ماكان قصدي ..
البشكارة: ماعليه انا اعرف انتي وايد زييين وايد حبي مشان أنا.. بس مشان مدام هوور انتي في شوي تعبان..
مروه: صدقها .. انتي حالة حور مأثرة فيج وايد.. قومي ندخل داخل البيت وريحي شوي عشان تهدأ أعصابج..
دخلت مجد البيت وهي منهارة حدها.. وعلى طول فرت عمرها على سرير مروه ومن التعب رقدت.. وطلعت مروه من عندها وسارت غرفة أحمد..
مروه: أحمد ممكن ادخل..
اطالعها احمد ونزل راسه: ادخلي اختي..
مروه: احمد لا تزعل من بنت عمك اعذرها على الحاله الي هيه فيها.. تعرف موضوع حور مأثر علينا كلها ومجد أكثر وحده متأثرة فينا..
أحمد: ماعليه ماقلنا شي.. بس شوي تثمن رمستها.. نحن كلنا زعلانين عشان حور مب بس هيه..
مروه: ماعليه اخويه اعذرها
أحمد ابتسم لها وطلعت مروه من عنده مرتاحة ومتضايقة في نفس الوقت من الأحداث الي صايره عندهم في البيت
=-=-=-=-=-=-=
همسة: اسمحوا لي ماراح اوصف حالات البقية في القصة عشان مايسود الحزن على القصة وتستوي كئيبة.. بس اكيد انتو متصورين حالة الكل شو بتكون عشان حور.. راح تمضي الأيام ليوم قبل حفلة ملجة سلطان وشما
-=-=-=-=-=-=-=-=-=-=-
واقفه تتطالع عمرها في المنظرة.. واقف وراها ويطالعها ومبتسم..
حور: عبيد احس تحت عيوني وايد اسودن.. وغير اثار الأدوية مخلية شعري مستوي خفيف... ومصفرة..
عبيد: وين انا ماشوف غير احلى ويه مورد شفته في حياتي..
حور: عبيد لاتيلس اتجامل وايد.. وين ويه مورد انت شوف قرب..
تقربت منه حور : شوف تحت عيني كيف مسود.. وشوف عظمة ويهي ظاهرة.. ضعفانه ..
عبيد: لا تيلسين تتوهمين انتي احلى وارق انسانه في قلبي بعد شو فيج..
حور تتطالع: افففففففف انت كله اتجامل.. انزين ماراويتك الفستان الي بلبسه باجر للملجة..
عبيد: وينه خل اشوفه..
طلعت حور الفستان من الكبت .. لونه اخضر غامج.. فيه تطريز بسيط بالفضي.. وكريستالات متوزعه.. كان شكلة أنيق وايد وحلو... خذته جاهز من محل في وافي..
عبيد: احسج بتظهرين عروس بهالفستان
حور: بس تعرف بطني الي بيخرب..
عبيد: بالعكس احسج محلوة وااااايد بهالكرووشه.
حور: هههههههه قص علي انت ..
عبيد: اوووووووه شو فيج انتي كل ما قلت شي تقولين قص علي..
حور: فديييت هالبوز يوم يزعل...
عبيد كان وده يصيح بس ميود حزنه يدامها..
الكل كان يستعد بس مو من خاطره..
كل شخص في قلبه هم مب قادر يحكيه للثاني.. كلن حزين على حاله.. ومب عارف الأيام شو تخبي له..
كلن يرقد على فراشه ويفكر ياترى باجر بيكون شرات اليوم.. او احسن من اليوم...
... ... ... ...
يوم الحفلة
..
مجد: اخبرج انتي متأكده ان اليوم ملجة شما وسلطان؟
حور: هههه ليش؟
مجد: اشوفج مستويه عروس..
حور: فديتني دوم في عين ريلي عروس..
مجد ابتسمت بس من ورا خاطرها.. وانا شو بكون في عين عبيد.. اااه ليش افكر في هالشي اصلا..
ومشوا عسب يروحون صوب الصاله الي حجزوها للحفلة..
..
هزاع كان متضايق حده اليوم.. يكفي انه من يومين بس فقد شما نهائياً يوم ملجوبهم في المحكمة.. واليوم حفلتهم.. تم يتمشى صوب البحر وهو يفكر في نفسه وفي حياته وفي كل شي صار له الفتره الي طافت.. شاف نفسه كيف تغير خلال هالفتره الي سكن فيها عند البيت الي استقبله في عز حاجته..
---- : تعرف انت شو مشكلتك بالضبط.؟؟ تنسى الناس الي يهتمون بك.. وأخر شي تلقى نفسك وحيد..
استغرب هزاع من الصوت الي سمعه.. صد وراه شاف وحده واقفه على الحاجز الي عند الكورنيش ومجابلة البحر.. كانت حرمة متغطية من راسها.. مايبين غير عيونها..
هزاع: انتي الي رمستيني توه..
مشت عنه ولا عطته مجال.. وراحت صوب عايلة يالسة وانتبه لياهل صغيره من شافت هالحرمه ربعت صوبها .. كأن هالياهل امها.. ماقدر يستوعب.. يبا يفهم منو هاي.. وشو الي صاير.. غمض عيونه ورفع راسه وتنهد ورد فتحن وفز.. : الله يغربك ابليسج زيغتيني..
مها: هههههه اعتقد ألحين لازم نكون في الصالة مب هني..
هزاع: انتي الي توج رمستيني..
مها: تعال ويايه ماشي وقت.. ترجيت زايد اييبني البحر عشان ايرك واييبك العرس.. لأني اعرف انك مب ناوي تحضر..
وهزاع: وانتي ليش قلتي الرمسة الي قلتيها توه شو تقصدين..
مها: انت فاهم قصدي بالضبط شو اطري.. تحيد منال..
هزاع استغرب.. شو الي صاير.. منال.. شو ياب طاريها في هاللحظة: شو بلاها منال..
مها: منال رابع واحد يخطبها وترفضه.. وتعال امشي ويياي مب وقته هالكلام..
مشى هزاع وراها وهو يحاول يجمع افكاره.. ويسترجع منال ..
هاي بنت عمه الي خطبها وفي ايام الخطوبة فسخ الخطبة قبل الملجة.. بدون سبب.. انهارت منال وتعرضت لصدمة نفسية على اثرها تمت تتعالج.. كانت صغيره في العمر 18 سنه بس.. لكن للحين متعلقه فيه.. مرت على هالسالفه جريب ال4 سنين.. معقولة منال بعدها تفكر فيني؟؟
وركب الموتر ونسى حتى انه مبركن موتره عند الكورنيش..
زايد: شو يايبنك هني؟
هزاع: اشم هوى..
زايد: هههههه والله انك حركات ..
وراحوا صوب الصاله الي كانت زحمه .. حريم داخلات الصاله ويلسمن .. ودخلت وراهن مها.. الي كل من يشوفها يتحسبها ياهل.. شكلها كيوووت وصغيره.. كانت منال موجودة في الحفلة.. (بنت خالتهم)..
مها من شافت منال بسرعه راحت صوبها.. : هلا والله بهالويه وينج يالقاطعه
منال: جب انا قاطعه ولا انتي من ملجتي تخققتي علي ونسيتيني
مها: افا والله ماعاش من ينساج
..
مرت الليله حلوة وهادية على الكل.. كانت العروس طالعه جميله ببساطة فستانها الوردي ومكياجها الهادي.. كانت مسويه تسريحة شنيون.. وطالعه جدا أنيقه..
دخل سلطان ومعاه عمّار وبوهزاع..
داخل وهو مبتسم ومطمّن لحياته .. الله رزقه ببنت مؤمنه وتخاف الله .. ويقدر يأمنها على بيته وعياله.. انسانه شرات شما يقدر الواحد يسلمها حياته وهو مطمن عليها..
الكل ارتبش.. خصوصاً خلود.. كان الود ودها تقضي الوقت كله ترقص لأخوها .. بس ماخلتها أمها لأن عقب العرس ب5 أيام راح يكون عرسها..
خلود: شو صاير حرقت تليفوني؟؟
جاسم: خلوودوو مستعيل ماصدق ان باقي 5 ايام معقوله..
خلود: هههههه ليش مب معقولة..
جاسم: مادري جي احساس حلو..
خلود: بس تعرف جاسم انا خايفه.. شكل حور اليوم أبد ماطمني.. كل شوي اشوفها تروح الحمام وترد وويها مصفر .. خايفه وايد
جاسم: لا لا ان شاء الله مايكون فيها الا العافيه .. خلوها ترتاح لا تتعب وايد
خلود: هذا الي بوصي عليه..
... ... ...
من تفرغ الكل من ملجة سلطان.. تفرغ الكل لتحضيرات عرس خلود وجاسم.. الكل متملكنه خوف لأن حالة حور مب طبيعيه.. قاعد يزيد التعب عليها ويبين على ويهها..
نوره: تعرفين خلود ..
خلود: هلا..
نوره: حاسه في عبيد والله.. فراق احد الزوجين لبعض وايد صعب..
خلود: دخيلج نوره دخيلج.. خلينا نفرح شوي.. يكفينا.. عرسي بعد يومين.. وانتو كل رمستكم حور وحور.. نسيتوني انا.. انا العروس الي لازم تستانسون لي.. هالفتره الي مضت كله مشاكل وحزن وكآبه خلاص مو قادرين نتحمل.. خلونا ننسى شوي ونعيش اليوم بيومه..
نوره تقربت من اختها وحبتها وشلت الطرحة وحطتها على راسها: تدرين محد محلي الطرحة غيرج...
خلود حضنت اختها ويلست تصيح..
نوره: لا احين الطرحة أحلى منج..
ابتسمت خلود ودش عليهم علاوي مشتط
علي: وانتي ليش ماتاخذين لي بشت على قياسي مايخصني ابا البس بشت
خلود: انا هالولد بييب لي جلطة في يوم من الأيام.. انت دووم جي دفش لا احم ولا دستور.. تدخل جي عرض
علي: اختصر وقت.. انزين شو قلتي عن البشت
نوره: افا عليك انت بس.. شيخ الرياييل ناخذ لك ليش لا..
علي: هيه جي اباكم
وفجأة سمعوا صوت واحد صغير ثاني على عمر علي..
----: تعال يلا خلنا نلعب دور ثاني سوا..
علي: اوكيي..
خلود ونوره اطالعو بعض ويلسوا يضحكون..
خلود: توه سامت ومسوي عمره والحين يبا يلعب
نوره: الله يحفظه ويبلغنا فيه معرس..
خلود: أمين يارب.. انزين نشي خل نسير عشان الحنايات بيوصلن ونتحنى..
وصلت الحناية من صالون قمر.. وحنت العروس والبنات كلهم.. ماكنو متحنيات على ملجة سلطان.. حور بعد يت وتحنت وياهم.. بس ماكانت قادره اتم يالسه زود .. بسرعه غسلت ايدها..
مجد: ليييييش بعده مانشف؟
حور: أدري بس ظهري يعورني ماروم..
مجد: قلت لج انتي حامل ومب زين لج القعدة وايد قلتي لا لازم اتحنى
حور ابتسمت لها وتحس بآلام في بطنها.. بس يودت عمرها عشان ماتخرب الفرحة وهي تشوف الكل يتحنى ويسولف ويضحك.. وهي الي تتألم.. بس فرحة العرس كانت مهونتنها عن الألم
..
جاسم كان مشغول يودي خواته الصوالين والتوصيلات والإتصالات.. مليون شي على راسه وهو المعرس مسكين..
أحمد: ههههه شو بلاك يا ريال مهدود حيلك..
جاسم: لو الله معطني اخو جان ساندني في هالأيام.. اما انا الي قايم بأشغال البيت كله.. مب عرس هذا هد حيلي.. اقولك شي لا تعرس..
أحمد: ههههه لا بويه انا بعرس مابتريا شورك
جاسم: طاع.. ماعليه احين مب فايج ارد عليك..
أحمد: هههههههه هيه والله يبا يستانس بالعرس ونحن مايبانا نستانس شو هالناس الأنانيه
ابتسم له جاسم وسار يسلم على الرياييل الي داشين الصاله ..
وماشاء الله الكل مرتبش وكانو ياييبين فرقة الحربيه عسب يرزفون ..

..
اما عند الحريم
جو الصالة كان ربشه صدق..
الإضائة .. وألوان الفساتين..
والكريستالات..
والصالة والكوشه
كااااان رووووعه المكان.. كل من دخل ينبهر بجمال وترتيب المكان..
دخلت خلود وكانت رووووعه بالفستان الأبيض وحناها الرقيق.. على انغام موسيقى كلاسيكيه..
الكل يطالعها ويقرا عليها عن العين .. لأنها كانت طالعه مختلفه تماما عن ملجة سلطان
الي يشوفها مايقول هي نفسها الي شافوها في ملجة سلطان
يوم أقبلت أحلى عروس صابت الصاله سكون عم الهدوء كل المكان والكل يناظر زينها

الناس من كثر الجمال ماهي مصدقه العيون يحسبون أنها ملاك يوم رمشت في عينها

لولا خوفها على الحضور يصيبهم عشق الجنون كآن ضحكت بشفاتها أو أشرت بيدينها

منى: الله رووووووعه كلمات القصيدة الي قالوها مع الموسيقى
فطوم يلست تتطالع منى بنص عين: انتي بس هذا الي همج في العرس كله.. انتي شوفي مرت اخونا اشحلاتها
منى: ادري انها حلوة بس انتي سمعتي شو قال.. قال.. يوم أقبلت أحلى عروس صابـ...
سكتتها فطوم وامهم تتطالعهم وتضحك..
ام جاسم: متى ربي يبلغني فيج عروس يارب..
فطوم وهي تبتسم بخجل.. وفي خاطرها.. بس يغير طابعه وياي ويصير شرات ما اتمناه.. الله يهديه..
وارتبش الكل في العرس لحين دخلة المعرس..
حور كانت تحس بتعب اكثر من قبل في هاليوم والسبب انها مارقدت عدل وكل تشتغل وياهم لتجهيزات العرس الي خذ من جهدها اكثر..
........
..
..

عد يومين من عرس خلود وجاسم
.
مجد: وانت ليش ماتقولنا؟؟
عبيد: شو اقولكم؟؟ مادري شو صار فيها فجأة.. انجلبت حالتها وطاحت علينا وانا ماعرفت كيف اوصلها المستشفى..
مجد: والله ان صار في اختي شي واقسم بالله..
يودها عبد العزيز ويلسها: بس عاد .. شو هالرمسه..
دخلت خلود المستشفى شرات المينونه اتدور عليهم.. من شافت مجد ربعت صوبها: ها شو الأخبار..
مجد وهي تصارخ: ماااادري مااادري.. دخلوها غرفة العمليات.. يقولون ولادة مبكرة..
خلود صدت تتطالع جاسم وودها تصيح.. تقرب منها: هدي نفسج حبيبتي ان شاء الله كل خير.. قولي يارب انتي بس..
خلود: الله يعينج يابنت عمي ويسهل عليج
جلثم كانت اكثر مره في حياتها هادية وساكته... ميودة المسباح وتسبح وتدعي.. ولطيفة لاويه على عبدالعزيز وتصيح وحالتها حالها.. ومجد واقفه عند باب غرفة العمليات ومتساندة على اليدار وتدعي.. وعبيد رايح راد صوب الفتحة الزجاجية يتريا حد يمر او يخطف عشان يسأل عن مرته.. بس ماشي فايدة.. الكل في حالة توتر.. وساير راد صوب الغرفه والي يهدي الثاني ويهون عليه.. ومر الوقت على الكل شرات السم... بس الي يكون تأثيره بطيئ على الجسم .. كلن يحس بألم ومب قادر يقول آه....
طلعت الدكتوره وهي تبتسم.. كانت اول بشارة خير يشوفونها بس بعده الخوف موجود
الكل تقرب وتيمع حوالين الدكتوره يبون يسمعونها شو بتقول..
عبيد: شو ..
قاطعته مجد: وينها اختي؟؟
الدكتوره: الحمد لله على سلامة المدام.. الله رزقها ببنت زي القمر بس لأنها ولدت في السابع راح نخلي البيبي كمان اسبوعين او ثلاثه في الغرفة الزجاجية مشان النمو..
مجد: انتي بلاج تستهبلين.. انقولج اختي.. يعني مدام حووور
الدكتورة سكتت يوم سمعت اسم حور...
مجد تقربت من الدكتورة ويودتها: وبعدين يعني مابتنطقين
تقربت خلود وسحبت مجد شوي بعيد..
الدكتوره: المريضه بخير بس المرض متعبنها وايد .. خلوها ترتاح كمان ساعتين في الملاحظة عندنا وبعدين راح ننقلها للجناح فوق
الكل سكت ... كأن الدكتورة تقولهم ان حور خلاص بدأ المرض ينفيها من الوجود.. حور مابقى لها وايد...
عبيد: والجنين وينه نبا نشوفه؟؟
الدكتورة: راح يطلعونها ألحين ويودونها الحضانه فوق..
ومشت عنهم الدكتورة وراحت .. والكل يتريا باب الغرفة ينفتح تطلع فيه الملاك الصغير.. وانفتح الباب وطلعت الممرضه وهي تجر معاها سرير الصغيرونه والكل يطالعها ويبتسم .. سبحان الله النور طالع من هالبنت وروعه.. مجد نزلت دمعتها يوم شافت البيبي من فرحتها.. الكل تم يمشي مع السرير ويروحون صوب الحضانه
كانو مغطين عيون البنوته عشان بوصفار الي فيها وحطوها تحت الجهاز الخاص بهالشي

..
.
جابر وهو يعقّم (أي انه يسكر فصم كندورته) كندورته.. تقربت منه جواهر
جواهر وهي تبتسم: خلني انا بعقمهن لك..
جابر مسك ايدها ودزها بعيد: لا تتقربين مني كم مره اقولج
جواهر والدمعه في عينها: جابر بس انا مرتك ألحين..
جابر: عمرج ماكنتي ولا بتكونين.. مرتي بالإسم بس.. وانتي تعرفين اتفاقنا ما اقرب منج لحين ماتمر فتره ونطلق وينتهي الموضوع
جواهر: بس ..
جابر يقاطعها: لا بس ولا شي.. تحملي الي ييج لأنج تستاهلين
جواهر: عبيد انا صح الي سويته غلط .. بس الله الشاهد ماغلطت هالغلطة مع غيرك من يومي وكنت معاك انـ..
طلع جابر من الغرفه وبند الباب وراه.. انقهرت جواهر ويلست تصيح.. دخلت عليها عمتها: شو بلاج امييه.. ليش طلع جابر معصّب من الغرفة
جواهر مسحت دموعها: ها لا ماشي .. خلاف بسيط.. وتذكرت امايه من جي صحت
ام جابر: افا عليج وانا وين سرت مب انا امج..
جواهر حضنت ام جابر وتمت تصيح من الخاطر.. ليتج امي جان رمت اقولج الي انا فيه .. اشاورج فيه.. لا اخو يسمع لي..ولا ابو.. ولا ريل.. من لي غير ربي في هالدنيا.. يااااااارب
.. ..
ركب جابر موتر ربيعه وتحركوا..
حسن: شو بلاك ياريال شايل هموم الدنيا ع راسك وياي..
جابر: حسن الله يخليك الي فيني كافيني لا تزيدني.. قم حرك صوب المزرعه ابا اسير استانس شوي
حسن: انت ماكفتك المصيبة الي صارت لك وبعدك تبا تروح هالأماكن
جابر: اسمع انت منو يرمس.. حسوووون نسيت انت الي كنت تشجعنا
حسن: هيه مانسيت.. بس من يوم ما الله رزقني بهالبنت والله اني قمت اخاف عليها.. وكل شي كنت اسويه في بنات الناس قمت اتخيله فيها.. والحمدلله ودرت عني طلعات المزارع هاي
جابر: انت ودرت برايك ابويه .. انا ماودرت وصلني وخلاف سير وين ماتبا..
حسن: جابر انت ريال معرس وكلها فتره والله بيرزقك في ياهل ان شاء الله
جابر: هههههههههههه ثرك يا ريال ماتعرف شي .. اسكت الله يخليك
حسن: لا حول ولا قوة إلا بالله .. شو السالفة؟
جابر: ياخي من يوم ماخذتها ماهبشتها (مسكتها او لمستها) كيف بتييب عيال ..
حسن: وليش ان شاء الله هب حرمتك هاي؟؟ اما انت امرك عجيب.. يوم كان بالحرام كنت كل يوم تراكض لها عشان اتييك ويوم يتك مابغيتها
جابر: للعب منو مايباها حتى انت يمكن كنت تباها..
فتح حسن عيونه وهو يسمع رمسة جابر وماحس بعمره الا ريله على البريك فجأة يوقف..
جابر: شو بلاك بتموتنا وياك
حسن: انت سمعت الرمسة الي قلتها.. تراك ترمس عن عرضك حرمتك..
جابر: حرمت عيشتها يارب.. حسن دخيلك بلا فلسفة زايدة.. انت تدري بالظروف الي خلتني اخذها.. لو ما اني واثق فيك جان ماخليتك انت الي تشهد على زواجي لأني اعرفك مابتقول لحد
حسن: جابر انتوا الإثنين غلطتوا وتحملو قيمة غلطتكم خلاص.. هاي حرمتك وصدقني يمكن هالزواج فيه خير انت ماتعلم به.. كل شي صار بإرادة ربك.. ياما بنات ظهرت وياهن..ليش هاي بالذات من بين الكل صارت لك المشكلة وياها.. اكيد في شي ربك رايدنه انت ماتعرف به
جابر: اخبرك زين انك وقفت بنزل من الموتر ابرك لي..
نزل من الموتر ولا عطى مجال لحسن انه يرمس.. وحسن كان محرج وايد من رمسة ربيعه وتصرفه.. رد البيت والضيجة فيه من الي صار.. وجابر تم يمشي صوب بيتهم.. وصد وراه شاف موتر حسن مو موجود.. تضايق.. حسن ربيعه من ايام المدارس .. وعمرهم ماتفارقوا وفي كل شي كانو سوى.. واليوم.. صار الي صار وراح عنه زعلان.. دومه اذا زعل منه حسن ماتمضي دقايق الا وهم يتراضون.. يعرف ان محد يخاف عليه كثر ما حسن يخاف عليه.. تلوم من عمره.. كانت رمسة حسن في اذنه طول ماهو ماشي صوب البيت.. ودخل البيت امه استغربت
ام جابر: ماشاء الله رديت من وقت
جابر: لا بس حسيت عمري تعبان قلت لحسن ردني البيت
ام جابر: شو بلاكم اليوم.. انت وحرمتك شي فيكم
جابر: اوهوووووووو مافينا شي..
ومشى صوب غرفته .. ام جابر استغربت.. لا اكيد في شي خاشينه علي .. بس مصيره بينكشف
جابر دخل الغرفه وشاف جواهر ترمس في التليفون.. سحب عنها التليفون..: ترمسين منو..
جواهر تتطالعه: ارمس اختي..
جابر شل التليفون: الووو.. الوووو
اخت جواهر: الوو
جابر: منو انتي..
همسة : نسيت اسم اخت جواهر ولضيق الوقت ماقدرت اراجع
جميلة: انا اخت جواهر.. جمووول..
جابر: اشحالج؟؟
جميلة بخوف: بخير الحمد لله..
جابر: يالله مع السلامه
وفر التليفون على جواهر ودخل الحمام..
جواهر: برمسج عقب باي باي
جميله: ريلج هذا الله يعينج عليه..
جواهر: شو بتقولين كل يوم على هالحاله..
جميله: ربج بيفرجها ان شاء الله .. كل يوم ادعي لج ياختي..
جواهر: الله يسمع منج ..مع السلامه .. سلمي على سهيل وابويه
جميله: يبلغ حطي بالج ع عمرج .. مع السلامه
بندت جواهر الخط وتنهدت.. : يااااارب محد يسمعني غيرك.. غلطت وعزتك وجلالك ياربي اني ندمانه واستاهل كل الي يصيرلي.. احمدك واشكرك يارب على كل حال..
نشت من مكانها وسارت طلعت ثياب ريلها وحطتهن على السرير وعطرتهن بعطره الي يحبه. وطلعت من الغرفه..
طلع جابر من الحمام استغرب يوم شافها محد.. صد يطالع وين تليفونها .. شافه على الطاوله.. ليش اهتم يوم اني ماباها ولا اعتبرها زوجة.. ماعندي سالفه.. توه بيمشي صوب الكبت انتبه على ثيابه على السرير شلهن ولبسهن.. وحس بريحة العطر فرش.. يعني توه معطرين ثيابه.. ابتسم وسرح شوي.. وبسرعه تدارك احساسه وطلع من الغرفه وراح صوب غرفة اخوه..
كانت جواهر قاعدة في الصالة.. مانتبه عليها جابر.. كانت تتوقع يقولها مشكورة او شي.. تنهدت.. : صبرك يارب..
.. .. ..
..
اليوم الثاني من الصبح الكل في غرفة حور.. متيمعين حواليها..
الأجهزة مركبة عليها.. كان لونها متغير والتعب ظاهر عليها.. الدكتور رمس عبيد وقاله ان حالته صعبه وايد.. لأن المرض مبين متمكن منها.. وفي اي وقت ممكن انها تموت.. تضايق عبيد لكنه كان يعرف ان هالواقع الي كان الكل جازم عليه من عرفوا بحالتها .. يمكن هالشي الي مخلنه يصبر شي.. وجود بنته سليمة عطاه دافع اكبر انه يرتاح شوي..
فتحت عيونها وتدور حوالينها .. كأنها تبا تشوف شخص مب فالغرفه.. الكل تقرب منها لكن بعدها تدور على شي مفقود..
مجد وهي ميودة عمرها: اكيد تبا تشوف البنت..
بسرعه راح عبيد وطلب من الممرضات اييبون البنت الصغيره .. من يابو البنت ابتسمت حور لكن بألم.. قربوها وحضنت البنت ودمعت عينها ويلست تصيح..
الكل تأثر وماتحمل الموقف والي طلع من الغرفة.. الا عبيد ومجد ولطيفه وجلثم..
حور كان لسانها ثجيل ماتقدر ترمس عدل.. بس بطريقة ما أشرت لعبيد ومجد انهم يتقربون منها على جهة وحده من السرير واشرت لهم يشلون البنت..
شلت مجد البنت..وتمت تتطالعهم حور كأنها تقول هاي بنتكم من اليوم.. جلثم فهمت الي صاير.. مهما كان لها خبره في الحياة وهالامور تقدر تفهمها بسرعه.. ولطيفه تفاجئت.. حركت حور صبوعها تدور على ايد عبيد .. وعبيد بسرعه قرب ايده وضمها.. متضايق من خاطره وحرقه في صدره بس مب قادر يقول او يسوي شي.. وابتسمت لهم حور.. ومحد حس انها كانت اخر ابتسامه لها.. من بعد هالإبتسامه بوقت قصير بدت اتيي تشجنات غير طبيعيه لحور.. الكل فز.. ومجد صرخت.. ان البنوته يلست تصيح من الزيغه.. دخلت الممرضه وشلت الياهل وطلبوا الدكاتره..
كانت حركة الممرضات والدكاترة صوب غرفة حور سريعه.. الكل حس ان في شي صاير..
مجد: حووور.. حور لا تروحين.. حور لالالااااا.. يالخاييييييييييييييييينه لا تسوين هالحركات.. ادريبج تقصين علينا قولي شييي.. انطقي..
ولطيفه تصارخ وتكفخ عمرها.. راح عبيد صوب عمته ويودها وطلعها من الغرفه.. وجلثم تقربت من مجد ويودتها وطلعت وياها..
جلثم انسانه قوية.. شافت من قبل وفاة زوجها يدامها وصمدت.. صح ان اليوم حفيدتها تموت يدام عينها بس ايمانها بربها قوي.. وهالشي الي مصبرنها
..
همسة: ماراح أوصف اكثر.. اعتقد بهالطريقة يكفي وصلت لكم فكرة وفاة حور... لأن الحزن شي صعب على الفرد انه يتحمله او حتى يتخيله.. ربي يجعل حياتكم كلها أفراح يارب
..
بعد 3 أيام من العزا..
كانت مجد يومياً تروح المستشفى عند البيبي..
في يوم سارت فيه هناك.. شافت أحمد واقف يطالع البيبي من خلف زجاج الحضانه قلبها يودها بس تمالكت شعورها ومشت ودخلت الحضانه.. استغرب أحمد كيف مجد تشوفه ولا تسلم ولا تقول شي.. ودخل وراها
أحمد: اشحالج مجد؟
مجد بدون نفس: بخير..
أحمد: شو قررتوا تسمونها؟
مجد: اتريا ابوها بعدهم ماسموها..
أحمد: وانتي خالتها يعني لج راي بعد في تسميتها..
مجد صدت تتطالعه بعين مليانه دموع ومحمره: انا أمها مب خالتها.. وعبيد أبوها..
وحطت البنت مكانها وطلعت من الغرفه..
كانت هالرمسه شرات الصدمة لأحمد الي ماقدر يستوعبها.. معقولة الكلام الي سمعته.. او الي قاعد افكر فيه الحين معقوله يكون صح.. لا لا.. أكيد هي بعدها مصدومه من وفاة اختها انا متأكد.. لا متأكد مجد ماتقصد شي.. أكيد بتكون ام البنت اصلا.. شي طبيعي.. تراها .. انا بلاني صاير جي مادري كيف..
وتوه بيطلع وايه عبيد يدامه..
أحمد: شفت مجد في دربك..
عبيد: مجد يالسه برع..
أحمد: هيه انا سألتها شو بتسمون البنت ماردت علي.. ماقلت شو بتسميها بإسم مرتك الله يرحمها ولا؟
عبيد: لا بسمها ريم..
أحمد: حلو اسمها.. عبيد شو ناوي تسوي ألحين بتخلي البنت عند منو..
عبيد: عند حرمتي..
استغرب أحمد: شو تقول انت .. اي حرمه.. ؟؟
عبيد: مجد.
وقتها استوعب أحمد رمسة مجد وفهم شو كانت تقصد.. بس .. أنا.. والحب.. كل الأمور متخربطة في راسي..
أحمد: بتتزوج مجد؟؟
عبيد: هيه بتزوج مجد.. بس يمر فتره على العزا وراح أرمس ابويه.. عشان يرمس عمي..
أحمد بعده مب مستوعب: ومجد تدري؟
عبيد: هيه متفقين ومجد موافقه ماعندها مانع..
احمد تغصص وطلع من المكان معصب.. ومشى صوب غرفة الإنتظار كانت مجد ترمس تليفون وقتها.. : انتي يوم انج مب قد الحب ولا كلام الحب ولا قد رمستج لا ترمسين وتلعبين بمشاعر غيرج.. اذا انتي عديمة احساس لا تحرين الكل عديم إحساس شراتج.. انسانه بوقاحتج ماشفت في عمري..
كانت غرفة الإنتظار فاضيه ومافيها غير مجد.. الي وقفت تتطالعه متصنمه .. وخلود على الخط تسمع..
أحمد: سمعيني.. هذا اخر يوم تشوفيني فيه.. لأن المكان الي انتي تكونين فيه مابا اجتمع وياج فيه فااااااهمه.. عنلاتج من بنت لا بركتن فييييييج ولا فالساعه الي شفتج فيها..
وطلع من المكان ومجد يلست مكانها تصيح..
خلود: مجد هدي نفسج تلقينه معصب ..
مجد: انا استاهل كل الي اييني.. قلت لج خلود مابا احبه.. قلتي لي هذا ولد عمج الي مابتاخذين غيره.. وصار اني باخذ غيره.. باخذ اخوووه فاهمه هالموقف اخوووووه يا خلود اخوووه..
خلود: ماعليج احين تلقينه معصب.. وبعدين مب شرط تاخذين عبيد انتي شو بلاج كم مره افهمج.
مجد: وحور.. ووصيتها شووو..
خلود سكتت ماعرفت شو ترد على مجد..
مجد: تبيني اخلي اختي مب مرتاحة في قبرها..
خلود: وانتي شو؟؟ ماترتاحين في حياتج.. تخيلي كيف بتكون حياتج مع عبيد تتصورين هالشي انتي ولا لا؟؟
مجد: بس دخيلج خلود..
.. ..
خليفه: بس يا خلود مب حاله هذي.. وانتي متضايقه.. الله يرحمها ترحمي عليها..
خلود: انا باقي لي شهرين لين ما أربي... كان مفروض نربي سوى لأن مواعيدنا تقريباً متقاربة..
خليفه: ترحمي على الحرمة انتي الحين..
خلود : انش احط لك الغدا
خليفه: لا اليوم معزومين على الغدا برع
خلود: منو الي عازمنا؟
خليفه: عيسى .. بمناسبة حمال سوسن..
خلود: ماشاء الله شو هالأخبار الحلوة.. سوسن حامل ماشاء الله
خليفه: انتي شوفي فرحة عيسى بس.. تقولين هو الي حامل مب مرته
خلود: هههههههههههه
خليفه: هيه جي اباج تضحكين فديت هالويه..
خليفه: فديت روحك والله..
.. .. ..
..
فطوم: فيصل بس لين متى بتم على هالحاله ويايه..
فيصل: سيري زييييين اي حاله الي ترمسين عنها..
فطوم: فيصل مليت من معاملتك لي.. كل يوم نتضارب.. خلصت الثانويه وقلت بتفرغ لك بس انت ولا تتفرغ لي.. ويوم ترمسني كله تضاربني..
فيصل: شو بلاج انتي ماتفهمين الرمسة.. تعرفين شي.. أنا.. أكــــــــــرهج.. ماحبج يابنت الناس..
فطوم سمعت هالرمسه من الصدمه ماتحملت وطاحت مغمى عليها.. تم فيصل يرمس بس ماترد عليه فطوم.. ماحس إلا بصوت منى تصرخ..
منى: أمييييييييييييه فطوم طاحت ..
فيصل بند الخط على طول.. وراح صوب بيت فطوم عشان يشوف شو بلاها.. ركب موتره مسرع
بس يوم وصل كانو مودين فطوم المستشفى.. قرر يروح المستشفى..
.. ..
فالمستشفى..
جاسم: هالخسيس انا براويه.. شو فاكر نفسه..
ام فطوم ساكته وتتطالع بنتها مب قادره تقول شي لأن منى وياهم وماتعرف شي.. ودها تقول لبنتها هاي نهاية الي مايسمع النصيحة ويركض ورا اللعب والخرابيط.. تحملي يابنتي وتصبري..
جاسم: سمعيني من اليوم وساير تقطعين علاقتج فيه ماترمسينه لين مانشوف لنا صرفه وياه
خلود: جاسم.. مب بهالطريقة تنحل الأمور..
جاسم بعصبيه: انتي اسكتي وخليني اتصرف مع هالوغد..
وصل فيصل ودخل الغرفه.. من فتح الباب وشافه جاسم دزه على برع .. يت خلود تلحقهم بس ام جاسم منعته: خليه رياييل يعرفون يتفاهمون ولا تخافين على جاسم مب مال ضرايب ولدي واعرفه
..
جاسم: انت وبعدين وياك.. شو الي تباه بالضبط.. ييتنا اونك من خاطرك وجاد ومقتنع انك تباها.. واليوم تقول اكرهج.. ليش يابوي منو الي غصبك تاخذ اختي؟؟ .. ولا منو قالك اختي طايح حظها.. بالنسبه للي صار نسيناه.. كانت مراهقه وعقلت وثمنت غلطتها.. ليش لا يكون انت الله عشان تحاسبها؟؟ ترا ان هي غلطت .. انت غلطت غلطة أكبر.. لعبت بعقل قاصر.. تعرف يعني شو قاصر..
فيصل: انت هدي وخلينا نتفاهم
جاسم: شو نتفاهم عليه قولي. في شي نتفاهم فيه؟
فيصل: جاسم افهمني انت ريال وتقدر تفهم.. انا الشك ذابحني.. كله يتهيأ لي انها ترمس غيري.. وانها وانها..
ماحس الا بإيد جاسم تقرب صوب ويهه تصفعه يود فيصل ايده: شوف يا جاسم لو ماعديتك ريال جان ماتعنيت وييت عشان اتفاهم وياك..
جاسم: اسمعني جانك ماتبا اختي ومب واثق فيها .. طلقها ابرك لنا ولها من شرك.. اختي غلطت انا وامي سامحناها.. جانك ماتبا تسامح اختي برايك انا مب بايع اختي لواحد شرواك..
فيصل مشى عنه وراح..
جاسم بصوت عالي: تذكر .. طلقها .. ماعنا غير هالرمسة..
صد اطالعه فيصل وكمل دربه ومليون فكرة في راسه.. كان وده يطمن على فطوم غامضتنه بس منعه جاسم ويحترم رمسة جاسم لأنه لو كان مكانه جان سوى شراته..
.. .. ..
..
ميثا: على وين امي..
أحمد: واحد من ربعي في البحرين متصل بي وملزّم علي أييه.. وعاد انا تخرجت الحمد لله وماعندي شي..
ميثا: كم بتم هناك؟
أحمد: مابتأخر وايد .. ليش هالكثر بتشتاقون لي..
ميثا: من بعد الي صار.. قمت اشتاق لكل صغير وكبير ماتحمل بعد حد..
أحمد: أمييه اشحالها عمتي لطيفه؟
ميثا: لطيفه الله يصبرها يارب.. صاكه الباب على عمرها ماتشوف حد ولا ترمس حد..
أحمد: اميي لا تودرونها خلكم وياها.. ويدوو جلثم
ميثا: الله يعطينه قوة قلبها.. احسها متضايقه يمكن اكثر عنا كلنا بس قوة قلبها تهون علينا كلنا
أحمد: دوم اليدة قلبها على الكل وحنانها يلم الكل..
ميثا: لا تنسى تسلم عليها قبل لا تروح..
أحمد: افا عليج ..
وخطف احمد عند ابوه وسلم عليه ..
حميد: ماتحتاي بيزات؟
أحمد: لا ابوي انت الخير والبركة.. الخير موجود
حميد: احتجت شي قولي بطرش لك..
أحمد: لا ماعليك.. يالله في امان الله
وحب راس ابوه وسلم عليه وراح عند يدته في بيت عمه عبدالعزيز..
جلثم: ماعليه يالغاوي بتودرني وبتروح
أحمد ابتسم لها: افا بس افا.. وين ساير من بعد الديار.. إلا هي البحرين فرة حصى..
جلثم: ماعليه.. بس تراني يدتك ماتروم تخش علي.. عيونك تقولي انت شارد من شي ماودك تواجهه..
أحمد ارتبك شوي: شارد من شو الله يهديج يدتي.. ساير اتكشت ويا ربعي.. (يتقرب منها يهمس لها) اشوف المزايين
جلثم: عنلاتك .. ماعليه انا اراويك.. هنف عليك من ريال..
أحمد: هههههههه افا عليج انتي هني(ويأشر على قلبه) ..
جلثم تضحك له: فديتك والله محد يبرد على قلبي الي فيه غيرك.. واليوم بتروح عني..
أحمد: ماعليه احسن عشان اسير هناك واشتاق لج وارجع بسرعه..
جلثم: يعل ربي يحفظك ويييين ماسرت .. صلاتك يا ولدي ماوصيك عليها
أحمد: افا عليج.. لا توصين حريص.. انا ساير شي ثاني تامرين به؟؟ بييب لج حلوى ومتاي والي في خاطرج
جلثم: وين تو الناس
أحمد: امييه باقي على الطياره ساعتين.. خل الحق ..
جلثم: سير ربي يحفظك
طلع أحمد من غرفة يدته وسلم على عمه عبدالعزيز.. وطلب عمته لطيفه بس عيت انها تطلع له.. ظهر من البيت شافها يالسه في الحديقة.. ركب موتره ولا سوالها سالفه.. استغربت منه مجد شو يايبنه عندهم.. بس في خاطرها متضايقه من كل شي بس مو عارفه شو تسوي.. دخلت البيت تسأل عن سبب وجود أحمد
جلثم: ماشي فديته بيسافر الله يرده بالسلامه..
مجد بصدمة: شووووووو.. وين بيسير..
عبدالعزيز: يقول عند ربعه في البحرين..
مجد ميته قهر .. حتى ماسلم علي..
جلثم تحس بعيالها وتعرف كل شي بنظراتهم اكثر من امهاتهم.. حست ان في شي بين مجد وأحمد.. وفي ضيج صاير ألحين لكنها بعدها مب فاهمه السالفه عدل..
..
جابر تتوقعون يسمع رمسة ربيعه؟؟
تتوقعون فيصل يطلق فطوم وينفذ رمسة جاسم؟؟
تتوقعون أحمد يرجع؟؟
شو موقف العايلة من زواج عبيد ومجد؟؟

همسة أخيرة: قصة منال بنت خالة هزاع حقيقيه.. مع بعض التغييرات اللازمه فيها

الجزء الثاني عشر
الفصل الثاني
=-=-=-=-=-=-=-=
مخلص الجزء السابق: (( وفاة حور.. زواج خلود وجاسم.. ملجة سلطان وشما.. زواج جواهر وجابر بأمر من الشرطة لحل الخلاف.. وفاة أم جواهر إثر الصدمة.. سفر أحمد بعد معرفته خبر نية عبيد بالزواج من مجد.. الخلاف بين فطوم وزوجها (فيصل) .. ))
=-=-=-=-=-=-=
..
مجد: حتى ماسلّم علي تخيلي..
خلود: الله يخليج خلج ساكتة وايد أحسن.. تبينه يسلم عليج وهو يعرف انج بتصيرين مرت اخوه وكان هو في يوم من الأيام يتمناج له.. كبري عقلج يابنت الناس..
مجد: حتى لو عالأقل يسلم...
خلود: بس تدرين مادري ليش احس انه مابيرجع..
مجد : كيف يعني مابيرجع..
خلود: تذكرين شو قالج في المستشفى.. هذا اخر يوم تشوفيني فيه..
مجد: بس..
خلود: مادري خلي الأيام تثبت.. انزين وانتي بعدج على رايج بتضحين بنفسج وتاخذين عبيد..
مجد: خلود قلت لج هاي وصية حور ولا يمكن اخذل وصيتها
خلود: بس والله حرام.. عبيد اكبر منج بوايد.. وغير جي كان ريل اختج كيف تتخيلين حياتج مع ريل اختج
مجد: ماعليه بتعود على هالفكرة صدقيني
خلود: والـ..
توها بتكمل رمستها سمعت صرخة ..
مجد: شو صار..
خلود بخوف: مادري بسير اشوف شو السالفه.. بدق لج عقب
طلعت خلود وسارت الصالة شافت نوره تصيح... تقربت منها : شو بلاج؟؟
نوره: ذبحووووني هالناس.. ليش مايحسون بي .. أنا أم يا ناااااس أم.. ماقدر اصبر عن عيالي.. من امس عيالي عندهم يقولون لي ماشي خليهم عندنا لنهاية الإسبوع ماشبعنا منهم.. خذوا عيالي يومياً قلت ماعليه من حقهم.. بس عاد يخلون عيالي كم يوم وماشوفهم هذا الي مايوز..
خلود تمت ساكتة مب عارفة شو تقول.. دخلت عليهم شيخة..
شيخه: شفيج اميييه.؟؟ شو صاير؟
وقالت خلود السالفة لشيخة.. : لا حول ولا قوة إلا بالله .. ماعليه انا برمس أم فيصل وبتفاهم وياها..
خلود بعصبية: والله شو هالأوادم مايحسون ولا يحشمون ..
شيخه: ماعليه انتو هدوا اعماركم انا بتصل فيها وبتفاهم وياها..
ورن تليفون خلود كانت مجد متصله..
مجد: هااا شو السالفه طمنيني..
خلود: ماشي اهل فيصل الله يرحمه.. يلعوزون اختي..
مجد: لا حول ولا قوة إلا بالله.. ونورة شو حالتها ألحين
خلود: بخير ياسة امي تهديها.. انزين اقولج جاسم متصل على الخط الثاني شكله وصل لازم اروح
مجد: انزين عيل سلمي عليه.. مع السلامه
خلود: مع السلامه
بندت خلود عن مجد وردت على جاسم الي كان عند الباب يترياها عشان يروحون
.. .. ..
نزل الجامه يلس يتطالع الشارع برع وهو يسمع هالمقطع
من غلاك اتخيلــك دوم ف عيونــي
شوف حالي كيف عقبــك مخطــرا
لك غلا لك حب في دمــي مخــزوني
يا لزيمــي حتى في نومــي ترا
وتبندت الإغنيه .. صد صوب السايق محرج
أحمد: وانت ليش تبند الإغنيه ماتشوفني يالس اسمع؟
فواز: شو فيك؟؟ اشوفك ملتهي وماتسمعني قلت اسكر الإغنيه احسن..
أحمد تندم من تصرفه وطبطب على جتف ربيعه يستسمح منه..
فواز: والله يا أحمد لو اني ماعرفك عدل واعرف طبايعك زين مازين.. جان شفتني ماسامحتك بس لأني اعرف ان بالك مو معاي غصبن عنك مو بيدك .. بس صدقني بخليك تنساها.. ياخي خلاص عيش حياتك.. الي مايبانا .. مانباه..
أحمد صد يطالعه وهو سرحان في شي: بس تعرف فواز.. انا قلبي يقولي ان السالفه فيها شي.. ياخي قبل وفاة اختها بشهور قالت لي انها تباني وتحبني كيف مو معقوووول هالتغيير في يوم وليله
فواز: ياخي انت ليش مو راضي تقتنع البنت ماتباك خلاص
أحمد: شوف يا فواز انا ممكن اصدق لو انها كانت بتاخذ اي واحد ثاني غير عبيد.. اخووووووي.. تعرف يعني شو اخوي..
فواز وقف موتره ونزل وفتح الباب لأحمد: تعال ياريال وخل عنك هذا الكلام.. الشباب يتريونا فالشاليه ..
نزل احمد وهو يمشي وسرحان.. ومن شاف الشباب ابتسم لهم وتقرب منهم يسلم..
.. .. ..
مجد وهي ماسكه ريم الصغيره وتلاعبها..
جلثم: شوي شوي عالبنت .. هاييل انتوا بنات هاليوم ماتعرفن في اليهال..
مجد: ههههه يدوو اشبلاج عليه من يبت البنت وانتي على كل شي تسوينه اتعلقين.. خليني اتدرب شوي شوي بتعلم كيف اعابل لليهال.. وينها امي بوديلها البنت
جلثم: امج بعد تطلع من غرفتها عشان تشوف شي.. سيريلها..
مجد: لا هالمره اكيد غير وبتفتح الباب.. يوم بتسمع صوت هالصغيرونه مابتيود عمرها وبتطلع
نشت مجد ومعاها البيبي .. وتمت اليدة يالسه في الصالة مع عبيد وميثا أمه..
عبيد: زين انكم متيمعين هني.. ابا ارمسكم في موضوع..
ميثا: خير امييه شو فيك؟
عبيد: طبعاً ألحين مره على وفاة حور اسبوعين.. وفي شي حور وصتني عليه وانا مستعيل انفذ وصيتها عشان تنام وهي مرتاحة في قبرها..
جلثم: بشو وصتك؟
ميثا منزله راسها وتدمع عينها من تذكرت حور..
عبيد: حور وصتني انا ومجد ان نتزوج من عقبها عشان نربي البنت.. واعتقد اخر يوم لها فالمستشفى لاحظتوا هالشي..
جلثم: عبيد انت تخبلت ولا شو.. انت مثمن الرمسة الي تقولها.. كيف تبا البنت توافق تاخذ ريل اختها ؟؟
ميثا: عبيد انت مقتنع تاخذ مجد؟
عبيد: هيه يا أمي.. انا طول هالفتره افكر فالموضوع بجدية.. ولو ماكنت مقتنع ماشفتوني بستعيل هالكثر..
جلثم: لا يا عبيد هالرمسه ماتيوز..
ميثا: عمتي .. وليش ماتيوز؟؟ تراها بنت عمه واخت مرته الله يرحمها.. هي اولى انها تكون حرمة لولدي وتربي الياهل من اي وحده ثانية غريبة..
جلثم نشت وهي معصبة وشلت برقعها وتساندت على عصاتها: سمعوني هالزواج انا مب موافقه عليه وانتوا بكيفكم..
ومشت صوب غرفتها وهي تهاذي ولا هم فاهمين عليها شو تقول.. ودشت غرفتها ورقعت الباب بقوة..
نزلت لطيفه وفي حضنها ريم الصغيرة ومجد وراها..
لطيفه: شو بلاها أمييه؟
ميثا: خرفت وإقعدت.. اسمعني عبيد ماعليك منها انت شاور اولياء الأمور وتوكل على الله..
عبيد: بس أمي..
ميثا: لا بس ولا شي.. وهاي البنت يدامنا خلنا نسألها..
مجد حست ان الموضوع عن الزواج.. وتضايقت يوم حست ان يدتها معارضة
لطيفه: شو الي صاير ممكن افهم؟
ميثا: لطيفه انتي لو دريتي بوصية بنتج الله يغفر لها يارب.. بتنفذينها ولا؟
لطيفه: مايبالها رمسه بنفذها اكيد
مجد تمت تتطالع امها ودها تقولها دخيلج اميه لا ..
ميثا: عبيد يقول ان حور موصيتنه ومجد انهم يعرسون من عقبها عشان يربون البنت ..
لطيفه: وبنتي وين بتلقى واحد احسن من عبيد..
ميثا: قلت لك ماعليك من يدتك وخلك على اولياء امرك.. عيل باجر اتييب لي وحده من هاييل الي ماينعرف لهم راس ولا ريل يربون حفيدتي ..
مجد توها بتروح زقرتها ميثا..
ميثا: ماسمعنا رايج يا مجد..
اطالعتهم بنظرة ونزلت راسها: ليش انتوا خليتو الموضوع فيه راي وغيره .. مابقى الا اتييبون المليج ويملج بنا..
وطلعت فوق غرفتها وهي روحها مب عارفة كيف عقت هالرمسة.. وكيف قالتها.. وصعدت وهي تصيح.. عبيد كأنه حس بنغزة إني انا ماباك ولو خذتك تراني باخذك غصبن عني.. وهو ماوده في هالشي لأنه بيعيش مع انسانه العمر كله..
لطيفه: ماعليكم منها تلاقونها زعلانه لأن احرجناها ورمسنا بالموضوع يدامها.. خلوها عليه انا برمسها..
ميثا: خلاص عيل نحن بنترخص وبنخلي البنت عند امها.. (ابتسمت لها) .. وسايره البيت لأني من الصبح في المستشفى يلا اميه عبيد نش خلنا نروح
نش عبيد وحب راس لطيفه وسار ولا نطق بأي كلمة .. طول الدرب وهو ساكت مايرمس..
عبيد: اميه اذا البنت مب موافقه لا تجبرونها علي..
ميثا: قالت لك عمتك هذا دلع بناتة وماعليك منها..
رد سكت عبيد ونزل ميثا البيت وراح .. ومايدري وين يدق براسه.. ولا وين يروح.. يحس كل الأمور مشوشة يدامه.. تم يمشي ومالقى نفسه الا فالقصباء.. نزل يتمشى ويرفه عن نفسه شوي.. هناك شاف خلود وجاسم يتمشون..
جاسم: ها شو يايبنك هني؟
عبيد: مادري حسيت نفسي مخنوق قلت اتمشى شوي..
خلود: جاسم يبتوا البنت من المستشفى ولا بعدها؟
عبيد: هيه البنت عند مجد ..
خلود تنهدت واطالعت جاسم بنظرة وحس فيها جاسم لأن خلود شرحت له السالفه..
جاسم: تشبه منو؟
عبيد: ماتبين ملامحها بعدها صغيرة..
جاسم: يلا عقبالنا..
خلود ابتسمت.. ومن عقبها توادعوا وراحوا..
خلود: يحليلج يا مجد..
جاسم: وليش انتو ماقلتوا لأحمد عن الوصية..
خلود: هاي العنيدة مجد ماتباه يعرف.. وهو بعد مايعطي الواحد فرصة على طول شرد..
جاسم: من حقه.. تخيلي انتي الموقف..
خلود: اسكت الله يخليك لا ابا اتخيل ولا شي.. انت بس قلت عقبالنا انا يودت قلبي.. جي حسيت بخوف..
جاسم: لا تقولين هالرمسه يا خلود دخيلج..
خلود: انزين خلنا من هالموضوع.. شو الي بتسويه في موضوع فطوم..
جاسم: قلت لج مايبالها رمسه.. تطلق منه يعني تطلق..
خلود: انا بعد اقول جي.. لأن هذا بيتم يشك فيها.. علاقتهم غلط من البداية.. وتبا الصراحة حبيبي ماكان لازم توافق على زواجهم أصلا..
جاسم يلس يطالع خلود بطرف عينه: دخيلج لا تذكريني انا متلوم بإختي أكثر..
خلود: بس ..
جاسم: لا بس ولا شي.. قلت لج يطلقون وانتهى الموضوع.. ويكون درس لها ماتنساه طول عمرها.. وفطوم بعدها صغيره والحياة يدامها..
خلود سكتت وكملت دربها صدت وراها شافت عبيد يالس على وحده من الكراسي وسرحان.. : معور قلبي والله بس حتى مجد معورة قلبي.. الله يعينهم..
جاسم: لا تصورين الموضوع يكون سهل على عبيد .. ترا الصعوبة على اثنينهم..
خلود: الله يعين..
.. .. ..
لطيفه: يا أميه ليش انتي مب راضية تقتنعين.؟؟
جلثم: انتو ولا حد فيكم فاهم عياله كثر ما انا افهم عيالكم؟؟ حور ماتت الله يرحمها.. ليش اتموتون مجد وياها؟؟ حالها حال اي بنت.. انتي تعرفين انها مابتقدر تسوي حفلة شرات اي بنت في عمرها وتفرح بعرسها .. قلبها مابيطاوعها..
لطيفه: ووصية حور..
جلثم: لطيفه انتي بنتي واقرب وحده لي.. يوم توفى أبو عبدالعزيز .. انتي وقتها كنتي وايد صغيرة فماظني تذكرين.. بغوا ايوزوني أخوه عشان عبدالعزيز مايتربى بعيد عن عينهم.. وكنت وقتها 18 سنه وهالرضيع في حضني.. ماخليتهم يمج ايوزوني اخوه لأني ماقدرت وياهم عمي وقف بيوهم وقال لهم البنت ماتاخذ غير ولدي.. وخذت ابو حميد .. وشوفة عينج بوحميد عامل حميد شرا باقي عياله .. ولا في عمره قصر عليه بشي..
لطيفه: بس أميه هاي وصاة بنتي.. الميت مايرتاح لين ماتنفذ وصيته كيف تبيني اخلي بنتي هب مرتاحة..
جلثم: والله انتو الرمسة ضايعة معاكم..
نشت ومشت وماعطت مجال للطيفه ترمس..
دخل عبدالعزيز البيت ميهود.. سمع صوت الياهل وهي تصيح فز قلبه.. تذكر حور يوم صغيره كيف كانت تصيح.. قلبه انقبض.. : وينها بنتي وينها؟
لطيفه وهي تنادي على ريلها: هني تعال انا فالميلس..
مشى عبدالعزيز صوب الميلس وشاف لطيفه تهز المنز الي حاطين فيه الياهل .. وشل البنت وقعد يبوسها ويحبها ويحضنها.. ولطيفه ادمعت عينها.. وكانت مجد توها يايه وفي إيدها مرضعتها.. هي بعد ادمعت من شافت المنظر هذا يدامها: ابويه عطني اياها خل اشربها الحليب
عبدالعزيز: شوي شوي عليها
وشلت مجد الياهل ويلست ع صوب وقعدت ترضعها.. يلست لطيفه تتطالع مجد وكيف مهتمه فالبنت.. وصدت صوب عبدالعزيز: تعال اباك في كلمة راس ..
عبدالعزيز نش وراها: خير ..
لطيفه: كل خير
رفعت مجد اطالعتهم بنظرة وردت نزلت راسها.. كأنها عارفة كل شي يدور في هالبيت عنها.. دخلت عليها يدتها الميلس.. وقعدت حذالها..
جلثم: زين انج بروحج بروم ارمسج ع راحتي
مجد: خير يدو شو السالفه؟
جلثم: مجد انتي من خاطرج مقتنعه من الي بيسوونه
مجد وهي تحاول تهرب من نظرات يدتها لأن عيونها بتفضحها أكيد.. : هيه يدو وليش ماقتنع ترا في النهاية انا لازم اخذ حد من عيال عمومتي... وعبيد ريال ماينعاب بشي ..
جلثم: وأحمد بعد ولد عمج واخير لج
مجد: يدو احمد بعده صغير مايعرف للحياة عدل .. اما عبيد فاهم ماشاء الله عليه
جلثم تطالعها بنص عين وتهز راسها.. : مجد انتي تحريني بنت 18 سنه تقصين علي؟؟ خوزي من يدامي عنلاتج انتي وامج وابوج ..
نشت من مكانها معصبة وسارت صوب غرفتها.. حست مجد ان يدتها معارضه وكأنها عارفه باللي بينها وبين أحمد.. بس مابيدها تسوي شي.. لازم ترضى بالواقع المر الي انحطت فيه..
.. ..
عبدالعزيز: شوفي يا لطيفه.. لا رايي ولا راي اي حد بيأثر في هالموضوع كثر راي البنت نفسها.. اذا مجد موافقه بطيب خاطر ماعندي مانع.. وان ما وافقت فـ والله محد يقدر يجبر بنتي على شي ماتباه دامي حي..
لطيفه ابتسمت.. : يعني اللي علينا نحن بس نشاور البنت ألحين؟
عبدالعزيز: انا بسير ارمس بنتي بروحي واسمع رايها بإذني عشان اصدق..
لطيفه: زين تسوي
نش عبدالعزيز وسار عند مجد الي كانت يالسه عالنت ..
عبدالعزيز: أقدر ادخل وأرمس بنتي؟؟
صدت مجد صوب أبوها مبتسمه: هيه أكيد تروم.. بس اششش شوي شوي.. ريم راقدة..
عبدالعزيز: عيل تعالي برع خليني ارمسج براحتي..
مجد نشت وطلعت من الغرفه وقعدوا فالصاله.. وخلت باب الغرفة شوي مفتوح عشان تسمع صوت ريم اذا نشت وصاحت..
عبدالعزيز: مجد حبيبتي انتي بنتي الغاليه الي ماشوف غيرها في هالدنيا.. واليوم امج كلمتني عن موضوع عبيد.. وقلت لها لازم أسمع شور بنتي بإذني واصدق.. اهم شي عندي بنتي تكون موافقه ومقتنعه
سرحت مجد للحظة وهي تتذكر أحمد.. وفي هالوقت قطع صوت ريم أفكارها.. ماقدرت وقتها غير انها تقول : ابوي انا مقتنعه .. وعبيد ريال ماينعاب بشي .. يكفي انه ولد عمي..
ونشت سارت الغرفه تشل ريم.. بس عبدالعزيز يحس ببنته ويعرفها.. كانت ترمسه وماتحط عينها بعينه.. كأنها تبا تتهرب من عيون ابوها عشان لا يشوف شي ماتبا حد يعرفه في عيونها.. قلبه يقوله ان هالبنت مو موافقه .. ما ارتاح لردها.. ونزل سار صوب غرفة أمه يشوفها..
عبدالعزيز: ام عبدالعزيز زعلانه يقولون؟
جلثم تتطالعه وعاقده حياتها.. وهي اتطلع برقعها وتحط على الكنبة..
عبدالعزيز تقرب من امه وحب راسها..
جلثم: تحب الكعبة ان شاء الله..
عبدالعزيز: شو بلاج امي.. مب عايبني شكلج اليوم؟
جلثم: عبدالعزيز يا ولدي انت اكثر واحد يخاف على بنته في هالبيت واعرف اشكثر انت تحبها.. ماتعتقد ان الي تسوونه تظلمون البنت به.. ريم مابتربى غير في هالبيت.. ماعلي من عبيد يعرس منو مايبا بس الريم تتربى في بيت يدها .. لكن مانظلم مجد عشان شي حله بإيدنا.. فكّر في بنتك.. كيف بتعيش ويا ريال كان في يوم من الأيام زوج اختها..
عبدالعزيز: بس انا رمستها وتقول انها مقتنعه
جلثم: اقولك لو تيلس تقول لكم كلكم مقتنعه وتحلف انا مابصدقها.. بنتي وانا اعرفها اكثر منكم.. برايكم يابوي جانكم تبون تظلمونها بكيفكم.. روح خلني اريح..
عبدالعزيز تلّوم وفي نفس الوقت محتار.. يحس كلام امه صح .. ونظرات مجد تثبت هالكلام.. بس مايبا ان الريم تعيش بعيد عن ابوها.. وده يكون لها اسره وحياة وام وابو.. احتار عبدالعزيز.. وطلع من الغرفه ومليون فكرة في راسه..
.. .. ..
..
فطوم: منى عاد عن العبط.. نشي خليني اشوف..
منى: اووووووه خليني الحين ياسه انزل اشعار بعدين بعدين
فطوم: لا إله إلا الله.. يا بنت الناس نشي شوي بس بجيك على موقع الوزارة وبشوف متى بتطلع النتايج ..
منى: مادري الحين يقول من اوائل الدولة بتطلع هالكثر مستعيله..
فطوم: دبه انزين..
منى: كيفي دبه عندج مانع خليني ايلس عاد..
دشت خلود عليهم وهي تضحك..: ههههههههه والله انتو بعدكم جنكم يهال..
فطوم: محد ياهل غيرها ذبحتنا بهالأشعار.. بنت المتنبي وانا ماعرف..
منى: هع..
فطوم: اسمع انت.. نشي عطيتج ويه وايد انا الصراحة
خلود: شو السالفه انزين
فطوم: ابا اجيك على تاريخ النتايج متى بيكون.. لأن ربعي متصلين بي يقولون بيكون باجر ابا اتأكد
خلود: منى شوي بس..
افتشلت منى ماقدرت ترد خلود.. بس صدت صوب فطوم تتطالعها بنص عين: شوفي انا بنش بس مو عشانج.. عشان هالقمر مرت اخوي..
خلود: احم احم.. اشكر ذوقج الصراحة..
فطوم: جب..
على طول يلست فطوم على الكرسي ويلست تتعبث على الكمبيوتر وخلود تسولف ويا منى.. وفعلاً النتايج بتطلع اليوم الثاني الصبح..
فطوم: شكلي مابرقد اليوم..
خلود: ماينخاف عليج شاطرة..
منى: هههههههههههههه.. منو شاطرة.. فطوم؟؟ اشك..
فطوم فرت منى بـكرتون الكلينكس ويلسوا يضحكون.. دخل جاسم عليهم مستانس..
جاسم: ماشاء الله شو هالضحكة الحلوة..
خلود: تعال ايلس ويانا..
جاسم: بيلس ليش لا.. خبروني شو السالفه؟
فطوم: جاسم باجر النتايج الصبح
جاسم: والله.. عيل ماشي رقاد اليوم
منى: اصلا هاي من اول يوم خلصت فيه الإمتحانات لليوم ماترقد .. طول الليل تحشرني.. تعتقدين اني بنجح.. تتوقعين اني بييب نسبة عاليه.. افففف تعور راسي.. بس تكسر خاطري اسايرها..
هالمره فطوم روحها نشت وضربتها على راسها وتموا يضحكون ..
.. .. ..
-==-=-=-=-=-=-=-
شما: سلطان اليوم كنت ارمس خلود وقالت لي شي ضايقني..
قرب سلطان ايده من ايدها: اول شي ممكن اضم ايدج بإيدي؟؟ ولا ممنوع..
استحت شما واحمرت.. وسلطان استغل الفرصة ويود ايدها.. : احين قولي لي شو الي ضايقج؟
شما: سمعت ان مجد وعبيد بيتزوجون صدق؟
سلطان: هيه حتى انا سمعت هالشي واستغربت..
شما: بس انا احس مجد تحب احمد؟
سلطان: كيف عرفتي هالشي؟
شما: اصلا هالشي باين من غير لا أحد يقولي.. تحيد يوم العزيمة الي سووها بعد ملجتي .. كانت مجد في كل فرصة تستغلها وتتطالع احمد.. وغير نظرات احمد لها.. احس شي بينهم ..
سلطان: بس انا الي اعرفه ان أحمد يباها ويحبها.. وحاط في باله يرتبط فيها..
شما: ماتحس ان ظلم لو خذت عبيد
سلطان: يقولون وصية حور الله يرحمها..
شما: سلطان انا مب مفتيه بس الي اعرفه الوصية في شي له مضرة ماتجوز .. قال تعالى : ( غَيْرَ مُضَارٍّ وَصِيَّةً مِنَ اللهِ وَاللهُ عَلِيمٌ حَلِيمٌ) (النساء:12).. وبعد شي ثاني الزواج اذا كان احد الطرفين مب راضي من كل خاطره وشي غاصبنه عليه بعد ما يجوز.. والله أعلم .. بس حسب معلوماتي الشخصية
سلطان: وانا وياج بهالشي.. لكن ماعتقد خالي ومرته يوافقون معقولة..
شما: شو اقولك ترا انهم موافقين هالشي الي خلاني اتضايق اكثر يوم سمعت السالفه من خلود
سلطان: عيل احمد عشان جي سافر
شما: تخيل انت تباني وانا اخذ اخوك.. شو بيكون موقفك
سلطان: صعب وايد
شما: الله يعينهم الصراحة .. بس تعـ..
سلطان: اشششش..
استغربت شما ليش سلطان يسكتها..
سلطان: ممكن نرمس عني وعنج وننسى الي حوالينا شوي..
استحت شما ..
سلطان: ياربي من هالبنت على كل شي تستحي..
شما: ههههه خلني امثل دور البنت الخجولة انزين
سلطان: هااا يعني هذا كله تمثيل
شما: اممممم تقريباً
سلطان: عنلاتج..
شما: ههههههههههه
=--=--=--=--=--=
اليوم الثاني
اليوم الي كان عمّار يترياه .. وفطوم..
يوم الي بيحصدون فيه مقدار تعبهم الي تعبوه ايام الإمتحانات..
عمّار: يالله بلاه الموقع مايشتغل
شما: ههههه هدي اعصابك بلاك..
هزاع: تريا شوي ضغط على الموقع
شما: انزين واتصالات متى بيطرشون المسج
عمّار: بيتأخرون ماعتقد الحين..
هزاع: الله يعينك ياريال حالتك صعبه
شما: الا مب صعبة شوف ويهه كيف مستوي.. وعيونه كيف مسودة تحتهن
عمّار: احس عمري تعبت وايد هالسنه واذا يبت اقل من 85.. مادري شو بيستوي بي..
شما: لا احساسي يقول انك بتييب اكثر بعد ان شاء الله
عمّار : هذووه فتح الموقع
ويلس يكتب رقم جلوسه وعلى اعصابه شوي بيصيح من الخوف.. وضغط على الإنتر.. وقعد يتريا الصفحة تفتح
شما: ها بشر
عمّار: انتي شو بلاج بعده مافتح
هزاع: هههههه احين شما الي مستعيله
وشوي فتح الموقع وعمّار من فرحته تمت عينه تدمع مستانس مب مصدق العلامة الي يشوفها..
وشما مستانسه حضتنه على طول ..
والكل مستانس في البيت.. وهزاع نش ايول ويرقص..
وام عمّار اكثر وحده فرحت في هالبيت..
ياب 92 ..
ام عمّار : هذا ولدي الي صدق افتخر به
شما: ماقلت لك ماينخاف عليك
عمّار: قولي ماشاء الله
هزاع: ههههههههه بنت عمي لو سمحت عينها مب حاره..
شما: عاش ولد العم المحامي..
رن تليفون شما في هالوقت عشان يسأل عن نسبة عمّار.. : ها بشري.. اييكم اليوم عشان اكل الحلاوه؟
شما بصوت واطي وهي تضحك.. : انت اتدور على العلثة عشان اتيي بيتنا..
سلطان: جكتني.. انزين خبريني كم ياب؟
شما: 92 ماشاء الله..
سلطان: اووووب طلع النسيب مب هين.. عيل ان شاء الله عيالي يطلعون عليه.. مبروووك تستاهلون فرحته..
شما: الله يبارك فيك.. الا قولي تعرف شي عن فطوم كم يابت؟
سلطان: يابت 89..
شما: ماشاء الله .. زين النسبة بتأهلها تدخل صيدلة عيل.. شرات ماكان ودها..
سلطان: ان شاء الله يارب.. وربي يبارك لنا في حياتنا يارب..
شما: انت لازم كل شي اتدخل فيه حياتنا
سلطان: ههههههه انزين عطيني اخوج خليني اسلم عليه..
شما: يرمس في التليفون اتصل به عقب انت..
سلطان: خلاص تمام عيل.. بس اقول.. تراني اليوم ياينكم مالي خص لازم اسلم على النسيب وأدي الواجب..
شما: قول الا لواته منك..
سلطان: هههههههه عندج مانع؟
شما: عندي سلطان..
سلطان: بعد تعرف تنكت والله..
شما: احم احم عيل شو تتحرى..
=-=-=-=-=-=-=-=
الريم كانت في ايد جلثم وترقدها..
مجد توها يايه من المطبخ وفي إيدها المرضعه.. : ويه فديتها رقدت..
جلثم: هيه انتوا ماتعرفون لليهال.. غنيتها لها أغاني اول ورقدت
مجد: ياربي محلاتها.. خليني اصورها..
..
..

مجد: بذمتج يدووه .. هالبنت ماتستاهل الواحد يفديها بعمره..
جلثم صدت صوب مجد تتطالعها وتضحك.. ومجد مستغربة من نظرات يدتها.. : شبلاج تتطالعيني جي؟
جلثم: وتبين تقصين علينا اونج مقتنعه.. ومن خاطرج.. تراني شايفه الدنيا وعارفتها وخابزتها وتبين انتي بنت اليوم تقصين علي انا العيوز..
مجد سكتت بس مارامت تيود عمرها يلست تضحك.. وقتها جلثم تأكدت ان فعلا مجد ماتبا عبيد.. فهالوقت رن تليفون البيت..
نشت مجد بسرعه ترد على التليفون قبل لا تسمع الريم الحشره وتنش..
مجد: ألووو.. ألووو.. (محد يرمس) ألوووو..
جلثم: منو عالتليفون امي
مجد: مايردون.. ألووو..
أحمد: الوو السلام عليكم..
مجد عرفته على طول.. حاولت تيود عمرها خصوصا ان يدتها يالسه تتطالعها: وعليكم السلام منو؟
أحمد: عطيني يدوو..
مجد شلت التليفون وعطته ليدتها وهي معصبه.. وشلت الريم شوي شوي من حضن يدتها وصعدت فوق.. : عفاني الله.. شو هالإنسان.. عنبو هالكثر كارهني.. حتى ماسلم علي ولا سأل عني.. عنلاته .. يتحراني ميته عليه.. ولا ميته على سلامه
.. ..
جلثم: هلا بشيخ الشباب.. الي من سافر ماسأل عن امه..
أحمد: افا .. تاج راسي انتي.. وانا اروم اصلا ما أسأل عنج..
جلثم: هيه قص علي بكلمتين.. انت وينك الحين ممكن اعرف؟؟ ومتى بترجع..
أحمد: اناا فالبحرين عند واحد من الربع.. وشو تبين بي ارجع.. مستانس هني وسط هالمزايين..
جلثم: عنلاتك.. بند مابا اسمع حسك..
أحمد: افا افا.. تبين تحرميني من حسج الغاوي الي ماروم على فراقه..
جلثم: هاي سوالفك دومك اتسكتني
أحمد: يعني ينفع اقردن..
جلثم: ههههههه... المهم زين انك اتصلت لأن كنت ابا ارمسك في موضوع
أحمد: خير يدو.. امي وابوي شي بلاهم؟؟ توني رمستهم.. شي صاير خبريني..
جلثم: يوم انك هالكثر تحاتينا اشله مسافر ومودرنا..
أحمد افتشل ويلس يضحك على عمره.. لكن تذكر السبب الي خلاه يسافر وتغيرت ملامح ويهه: بعد تغيير.. المهم شو الي صاير حيرتيني قولي لي أمييه..
جلثم: أحمد انت مسافر عشان مجد..
توه احمد بيرمس قاطعته يدته..
جلثم: اسكت وخلني اكمل رمستيه للأخر وبعدين ارمس.. انت مسافر لأن مجد بترتبط بعبيد وهذا الي عرفته ألحين.. لو كنت اعرف به قبل لا تسافر جان ماخليتك تشبر برع البلاد.. بس اسمعني.. مجد ماتبا عبيد لكنها غاصبة نفسها اونه شو.. حور موصتنهم.. الله يسامحها فكرت في نفسها بس والياهل ونست سعادة اختها.. أحمد انت اقرب لمجد من عبيد.. انا متأكدة انهم مابيستمرون .. اعرف عبيد عدل واعرف مجد عدل.. حتى لو ماكان عبيد ماخذ حور قبل.. ماكنت بخليه ياخذ مجد.. اعرف بنتي ومربتنها بنفسي اعرف انها تناسبك أكثر.. أحمد انت لازم ترد البلاد وتوقف هالمهزلة الي قاعدة تستوي.. الكل قاعد يتحجج بالوصية الي مادري على اي اساس يمشون عليها.. على حساب تعاسة انسان وسعادة ميت؟؟ اي عقب يتقبل هالشي.. وعمرها الوصية ماتكون بمضرة.. اذا اتحبني وتعتبرني امك صدق.. بتيي البلاد و... بس ماعندي شي ثاني اقوله
أحمد: بس اميه عبيد يباها..
جلثم: اسكت الله يخليك.. شو يباها بعد.... وانت شو نسيت عمرك؟؟
أحمد: وعمي وعمتي موافقين؟
جلثم: عمتك موافقه لأنها ماتبا الريم تتربى بعيد عن عينها وتخاف عبيد ياخذ حرمه ثانيه ويشل البنت.. وهذا الي انا مابخليه يصير.. بنتي تربى تحت عيني .. ومحد يقدر يمنعني.. ولا تيلس تهذرب وايد.. وبلاها هالرمسه الماصخة
أحمد حس بأمل واستانس وقتها بس استوعب كل نظرة كانت من مجد صوبه.. وكل كلمة كانت تقولها له.. تفهم حبها لإختها وتعلقها الكبير فيها يخليها انها تضحي بأي شي عندها.. صح ضايقه انها تخلت عنه لكن يظل حبه لها اقوى..
أحمد: يعني توقعين اذا رديت في شي بيتغير..
جلثم: انت ارجع بس وماعليك من شي انا بتصرف
أحمد: على اول طيارة ..
جلثم: علني ماخليت منك يارب.. وربي يبلغني فيك انت ومجد معاريس ان شاء الله
نهاية البارت

الجزء الثالث عشر
النهاية
=-=-=-=-=-=-=-=

دخلت شيخه البيت نفسها في خشمها.. خلاص يا قاتل ما مقتول في هالسالفه ..
أم فيصل: مرحبا بأم خالد (خالد الي هو زوج مروه والإبن الأكبر لشيخة) تو مانور البيت.. وينج يا حرمه ماتنشافين ؟
شيخه: موجودة فديتج.. بس تدرين هالفتره شوي صارت لنا ظروف صعبة شوي..
أم فيصل: محشومة فديتج.. الا بنتج وينها؟؟
شيخه: نوره فالبيت تعبانه شوي
أم فيصل وهي تتطالع شيخه بنظرة تشكيك: تعبانة ولا إنها ماتبا تشوفني؟
شيخه: ياحرمه شو هالرمسة بعد.. الا وينهم عيال نوره
أم فيصل: فوق يلعبن فديتهن.. وايد مستانسين عندي فالبيت
شيخه حست بالنغزة.. بس يودت نفسها.. : الله يسعدهم يارب..
أم فيصل: آمين يارب
شيخه: عالعموم انا عندي رمسة اقولها لج.. ويايتنج اتفاهم وياج فيها.. عايشه.. انا وانتي أمهات ونفهم شو معناة ان الوحدة فينا اذا ابتعد ضناها عنها شو يصير فيها.. ونعرف جيمة الضنا أكثر.. مثل ما انتي لج حق تشوفين عيال فيصل الله يرحمه.. هم مايوز انج تحرمين امهم من عيالها اسبوع عشان خاطر يتمن العيال عندج.. دام العيال عندهم أم بعدها ماعرست اعتقد قانونياً من حقهم يتمون عند الأم.. وكل يومين ترا انييبهم عندكم.. لكن حرام عليكم تشلون اليهال اسبوع وتخلونهم عندكم.. وتدرون ان نوره ماتقدر اتييكم البيت ..
تمت ام فيصل تسمع الرمسة كأن مب عايبنها كلام شيخه.. وفي هاللحظة دخل بوفيصل عليهم.. وهو سامع نص رمسة شيخه تقريباً
بوفيصل: حي الله ام خالد..
شيخه وهي تعدل برقعها.. : الله يحييك ويبجيك..
بوفيصل: سمحيلنا عاد على اللي سويناه.. وكلامج صح 100%.. والعيال ألزم ماعليهم يكونون عند أمهم.. خذيهم وماعليج من هالعيوز.. حبها الزايد لهم خلاها ماتفكر عدل.. وانا ياما ياحرمة اقولج بس انتي عنيدة
ام فيصل مفتشله.. وفي نفس الوقت مقهورة: ليش انا مب امهم بعد؟
شيخه بإسلوب حلو وابتسامه: انتي تاج راسهم غصبن عن اللي مايرضى.. افا عليج يا ام فيصل شو هالرمسة.. بس شرات ماقلت لج.. نوره روحها نفسيتها تعبانه من وفاة فيصل.. واتشلون عنها العيال اسبوع كامل وايد صعب عليها تحمل بعدهم..
أم فيصل: ماعرف شو اقولج.. بس اباج تعذريني على تصرفي.. (ادمعت عينها) من غاب ضناي وانا مب عارفة شو اسوي.. ابا أي شي من ريحته وعياله هم ضي عيني..
بوفيصل وهو يولع السيجاره: مثل ماقلت لج يا أم خالد.. ماعليج من العيوز..
أم فيصل: إنت وبعدين يعني مابتبطل هالسم الي في ايدك.. استح شيبت.. احفادك كبار.. وانت بعدك على هالموال..
ارتاحت شيخه.. وحست ان فعلاً مافي شي احسن من التفاهم يحل أي سوء خلاف.. وبهالطريقة قدرت تساعد نوره ..
=-=-=-=-=-=-=
مطار البحرين
فواز: ابا افهم انت هالكثر زهقان مني يعني.. ما قعدت كم يوم وألحين بتروح
أحمد: انت ماتعرف شو يعني ينشعل نور الأمل في قلبي مره ثانيه.. اااااااااه يا فواز.. لو تحس بربع هالمحبة الي في قلبي جانك حسيت..
ابتسم فواز: ياااااااارب انه مايلقى حجز..
أحمد صد صوب فواز وشوي وبيكفخه.. : وربي الي خلقني.. اني بروح بسيارة وانت الي بتوصلني جان ماشي حجز..
فواز: أحسن بعد.. منها كشته ومنها نوصلك
أحمد: عيل اييك شور.. قم نطلع من المطار وانت وصلني..
فواز: عيل خلني اتصل في الشله عشان اييون ويانا.. بالمره نحضر عرسك
أحمد: الله يسمع منك..
استانس أحمد زود.. والشله (البطالية طبعاً) كلهم تيمعوا عالساعه 5 العصر عشان يظهرون بموترين.. وصدق كان الجو ربشه في هالسيارتين.. شوي يتسابقون.. وشوي يوقفون في إستراحة ويتشرون ويعقدون سوالف وربشة .. أحمد على الهدوء الي كان فيه فالبداية يوم شافهم.. انجلب حاله 180 درجة.. صار مايقعد مكان.. وأكثر واحد مرتبش.. والوحيد الي مول ماغفت عينه طول الدرب..
عادل بصوت واطي لفواز: ياخي هالإنسان غريب الأطوار..
فواز: ههههه هذا عسل
عادل: اللي يشوفه اول يومين كان يالس ويانا مايقول هو نفسه الي يدامنا ألحين.. فرق كبير..
فواز: مثل مايقولون.. أزمة وعدت على خير
عادل: الله لا يعودها عيل
من بعد هالإستراحة كملوا طريجهم .. لأن كان باقي لهم 7 ساعات ثانيه وبيوصلون فيها البلاد..
أحمد: اقول فواز انت تعبان خلني انا بسوق عنك..
فواز: لا انا بخير عادي ماعليك انت الي مارقدت بالمره. انا على الأقل رقدت ساعه في خلال استراحتنا..
أحمد: ياريال قوم بسوق عنك انا بخير..
فواز: مشكوووووور
وسكتوا.. .. وكل واحد فيهم سرحان بهمه.. أحمد يفكر شو بيسوي يوم بيرجع.. يكلم منو.. يبدأ بمنو.. كيف يحل أموره.. ويخطط.. غمض عينه شوي... مانش الا بصوت هرن قوي ودعمه قوية.. فتح عينه مصدوووووم من المنظر الي يشوفه..
كانت الجامه كلها دم.. ومتكسره.. مب قادر ينطق بشي.. فتح حزام الأمان الي عليه ونزل من السياره..
=-=-=-=-=-=-=-=
في بيت بوهزاع
مها: هزاع البنت تباك بعدها انا متأكدة.. عيل شو الي يخلي وحده مثل منال ترفض كل الي يخطبونها..
هزاع: بس انا الي سويته فيها مب شوي.. تخيلي ان ريلج قبل ملجتج وانتي مجهزة كل شي يقولج اكرهج وماباج ويودرج.. تخيلي الموقف بس.. انا نفسي مب عارف كيف سويت هالشي
مها وهي رافعه حياتها: لو سمحت لا اتييب مثال علي انا .. ممكن ..
هزاع: اووه انتي متفيجة.. انا وين وانتي وين..
مها: شوبلاك اسوي سوالف..
هزاع: تدرين.. مالت عليج وعلى سوالفج..
مها: عيل انا بنش..
هزاع يود ايدها وسحبها: تعال عاااد.. اسووووولف.. وانا لي غنى عنج اصلا..
دخل عليهم حمدان: شو ها.. اجتماع مغلق
مها تستهبل تتقرب من هزاع وتيود ايد حمدان تسحبه صوبهم.. : تعال خل نسويه مغلق..
ماحست الا بإيد حمدان وهزاع على راسها يضربونها.. نشت وحطت ايديها على خصرها وهي تحرطم: تعرفون شو.. مالت عليكم وعلى الي يسوي لكم سالفه..
تموا يضحكون عليها وهي منغاضه زود منهم.. : اووووووكي ماعلي.. بخبر عليكم..
هزاع: بتخبرين منو ان شاء الله؟؟
حمدان: هاي منو عندها غير زيوود ريلها تهددنا فيه..
هزاع: ويه شعر يمي وقف من الخوف..
حمدان: ههههههههههه ويييو سوولها..
مها: لا هالمره مابخبر زايد.. تعرفون بخبر منو؟؟
هزاع & حمدان: منوووو..
مها وهي تلعب بحياتها: احم احم.. ابووووووووويه..
حمدان: يا ريال السالفه فيها قطع رقاب.. قوم خل نراضيها..
هزاع: لا ماصدقت ابويه يرضى علي... نراضيها ليش مانراضيها..
نشوا اثنينهم واقفين مجابلها: ساااامحينا مانعيدها خلاص.. انتي اختنا حبيبتنا..
رفعت مها ايديها واحد صوب هزاع والإيد الثانيه صوب حمدان: حبو ايدي .. عقب بفكر اخبر ابوي ولا لا..
كل واحد ضربها على ايدها..
هزاع: مصختها اختك..
حمدان: بالقو بعد مصختها
مها حست ان بيصير تآمر عليها .. توها بتشرد جان ايودونها ويسحبونها.. والكل تم يضحك..
طلع بوحمدان من غرفته يوم سمع هالحشرة.. ويوم شافهم يضحكون استانس..
بوحمدان: ماشاء الله الضحكة واصلة لين فوق.. شو السالفة؟
مها: ماشي بس..
حمدان وقف يدامها: يالسين نلعب غميضة..
مها تتطالعه بنص عين .. وسايرته: هيه نلعب نـلـــــــــــــــعب..
بوحمدان: انزين انا ساير المسيد أصلي العشا.. بتنزلون وياي..
هزاع : هيه ويوم بنرجع ان شاء الله في موضوع أبا أرمسك فيه
بوحمدان: يالله عيل انا بسبقكم..
مها وهي تتطالع هزاع مستغربه: شو الموضوع ..
هزاع: اقول حمدان نش خل نروح..
مها: اييييييه ارمسك انا..
هزاع: توج تبين تفتنين علينا.. وتبيني اقولج شو الموضوع.. ..
مها: خلاص .. اتصال واحد مني بينفنقش الموضوع كله..
هزاع رافع حياته: شو الموضوع؟
مها: مايخصك يلا سير الحق على الصلاة..
حمدان: ههههه حريم ماين الا بالعين الحمرا
هزاع وهو ماشي: الخضرا وانت الصاج..
مها: حشاكم مب اخواني.. ههههههه عين خضرا وعين حمرا.. ينانوه
حمدان: ههههههههه
=-=-=-=-=-=-=-=
أحمد: اقول عاد هالمره صدق حاسبو..
مروان: والله زين ما انجلب فينا الموتر.. انا من شفت الحادث ماعرفت كيف انحرف عن الدرب عشان ما ادعمهم..
فواز: انا الي تميت مصدوم ايدي مافارقت الهرن من الخوف.. ووقفت الموتر..
أحمد: انزين اتصلتوا في الشرطة..
فواز: هيه وهم يايين في الدرب..
أحمد: ياخي انا من شفت هالموتر خفت على موتر مروان والشله.. بس عقب مانزلت من السياره استوعبت ان هالسياره مب تابعه لنا...
فواز: شباب اسمع صوت من الموتر.. يمكن في حد حي..
مروان: ياريال اشلك انت .. مانعرف نحن.. بتوصل سياره الشرطة مع الإسعاف..
أحمد: مينون.. يمكن الريال محتاي شي..
تقربوا من السياره.. كانت متهشمه.. والهوش الي داعمينه طايح ع طرف الشارع .. كان المنظر فضيع جداً .. والكل متخوف.. تقربوا من الموتر اكثر.. كان مبين ان 3 اشخاص في الموتر.. السايق وواحد حذاله.. وواحد ورا..
أحمد: فواز .. مروان.. عدنان.. تعالو ساعدوني نطلعهم.. والباقي اركبوا الموتر وشغلو دبل إشاير عشان السيارات اليايه في الدرب تنتبه ان هني مستوي حادث.. وانا وفواز بنطلع الشباب من الموتر..
السايق كان نص فاقد وعي ونص واعي.. لأن المخدة الهوائية ساعدته شوي.. وحمته.. وفتح الباب.. وهو مع فواز طلعوا الريال من الموتر.. وربع فواز ياب صندوق الإسعافات الأوليه الي في موتره عشان يسعف بعض جروحه..
وساعدوا بعض طلعوا الإثنين.. بس للأسف كانو متوفين.. ماكان لهم أي نبض..
-----: ربعي.. ربعي وينهم؟؟
احمد : لا تحاتي هم بخير.. والإسعاف قريب..
عدنان: شباب الشرطة وصلوا..
أحمد: سمعت الشرطة وصلو.. لا تحاتي الكل بخير..
أحمد توصخت كندورته بالدم.. وفواز ووصلت سيارة الإساف ونقلت الشباب الثلاث.. وراحوا يودونهم لأقرب مستشفى..
الشباب ماكانو قادرين يكملون دربهم من المنظر الي شافوه.. كل حد يتذكر وقلبه معورنه.. وقفوا مواترهم على جانب ونزلوا الحصير وتيلسوا كلهم سوا ..
أحمد: يا جماعه هالمنظر اعتقد بيكون عبره لنا..
فواز: أحمد تبا الصدق... اني في لحظة غفت عيني.. ويوم نشيت حصلت عمري برع الطريق شوي.. تبا الصدق.. خلني ارقد.. وانت كمل عني
أحمد: شفت قلت لك انك تعبان..
عدنان: الواحد يوصل متأخر ولا يستعيل ويفقد نفسه
أحمد: الله يحفظنا جميعاً.. قومو نصلي ركعتين شكر على ان نحن ماصار فينا شي..
مروان: شباب احس الجو ماينفع نكمل دربنا فيه.. لأن ضباب..
أحمد: خلاص عيل بنبات الليله هني.. وكلنا نرقد ونرتاح.. نكمل على طلعة الشمس ان شاء الله
فواز: ان شاء الله
=-=-=-=-=-=-=-=
اليوم الثاني الصبح
خوله: خليفه اليوم ماروم اداوم..
خليفه: ليش حبيبي شي بلاج؟؟
خوله: مادري احس بعوار..
خليفه: لا يكون موعد الولادة..
خوله: لا ماعتقد لأن الألم مب ذاك الشدة..
خليفه: تستهبلين .. ماشي نشي خلينا نسير المستشفى..
خوله: خايفه خليفه..
خليفه: لحوووول انتي من دشيتي التاسع وانتي حاشرتني خايفه وخايفه.. مابيصير الا كل خير.. افا عليج انتي بس.. اذكري الله
خوله: لا إله إلا الله..
خليفه: نشي فديتج..
خوله: انت عندك اجتماع مهم اليوم سير الداوم واذا شد العوار بتصل فيك
خليفه: خولــ..
تقاطعه: عشاني ترا بزعل
خليفه: لا كله ولا زعل الحلا كله
خوله تبتسم له وتنش تروح صوب الحمام.. بس ماكانت رايمه تمشي تحس الألم يشتد عليها..
خليفه يودها بسرعه قبل لا اتطيح وزقر على امه الي دخلت الغرفة..
ام خليفه: شو صاير؟
خليفه: اظن خوله موعدها الحين
ام خليفه: لا والله وتقولها وانت جي بارد.. شو تتريا روح شغل الموتر ونحن يايين..
طلع عبود الصغير من غرفته : ماما شو فيج؟
خوله: تعبانه ماما..
عبود: بتييبين لي اخت صغيره
خوله: هيه ان شاء الله.. عمتي الألم يشتد ..
وبسرعه راحوا ركبوا الموتر وخليفه مسرع بموتره صوب المستشفى
ام خليفه: شوي شوي بلاك جي مسرع.. تبي تنفدنا..
وماحس بعمره الا انه معدي الإشارة الحمرا.. وصوت الدورية وراه..
خوله: قالت لك عمتي لا تسرع زين جي..
خليفه: لحووووول وقته هذا..
وقفه الشرطي ونزل له الجامه..
توه الشرطي بيهزبه وبيمرس.. خليفه سبقه: شوف انا مرتي بتربي.. وتعبانه.. وابا الحق على المستشفى قبل لا اتربي في الموتر..
الشرطي سكت.. : انزين أي مستشفى تبون توصلون؟
خليفه: مستشفى الوصل..
الشرطي: عيل بعدك يبالك درب.. عيل تموا وراي وانا بشغل الدوريه عشان افسح المجال لكم.. زين جي
همسة: هالسالفه حقيقيه صارت لأحد من أقاربي.. تخيلو.. جان زين كل الشرطيين جي لول
..
استانس خليفه: يزاك الله خير..
وراح عنه الشرطي ركب موتره ..
خليفه: شفتي أمي ولدج مو أي شي..
ام خليفه: اسكت راونا همتك ألحين وخلنا نوصل لأن خوله تعبانه
خليفه: ان شاء الله
خلال نص ساعه تقريباً وصلوا المستشفى وبسرعه نقلوها لغرفة الولادة..
خليفه تم يتريا برع الغرفة ومتحرقص.. رن تليفونه.. كان ربيعه الي فالدوام
سعيد: ياريال وينك المدير يسأل عنك..
خليفه: مابداوم اليوم سعيد دخيلك قول للمدير.. الحرمة بتربي ماروم اودر المستشفى
سعيد: خوله بتربي.. يالله بالبركة ان شاء الله وتقوم بالسلامه
خليفه: الله يسمع منك..
وبند سعيد عن خليفه ورمس المدير وطبعاً عذر خليفه.. وخصوصاً ان خوله زميلة لهم في الدوام بعد..
..
خليفه من شاف ممرضة طالعه من الغرفه.. : ها طمنيني.. شو صار؟
الممرضه: انت شنو في.. صبر شوي.. كلو يريد سرعه سرعه مايستوي بابا
خليفه: بلاها هاي شوي وبتكفخني.. خلاص على امرج.. بسكت ومايريد بسرعه بسرعه .. خل تاخذ راحتها..
الممرضه تضحك على خليفه .. ومشت راحت..
وبعد شوي وهي رادة بتدخل الغرفه وقفها خليفه
خليفه: انزين طمنيني عليها.. ممكن انا ادخل؟
الممرضه وهي محرجة: انت شو فيييييك.. مافي صبر سوي.. كلووو حرمه في داخل انتي يريد روح داخل.. واللهي مجنووووون
خليفه: طاعو هاي انتو.. قالت عني مينون اخبرج.. دشي قبل لا اشتكي عند المدير
الممرضه: سنو يعني قول حق مانيجر.. قوووول انا مافي كووف.. انت سوي قرقر وايد خلي راس انا كووووولو عور ..
وعطته ظهره ودخلت..
خليفه: والله وقوة عين.. اسميكم ماكلين البلاد أكال انتو ماخليتو لنا شي.. لازم بتقولين جي.. اكيد مديرج من ثوبج
وبعد 3 ساعات ونص.. وصل له خبر ولادة خوله ببنوته صغيره..
تخبل خليفه من سمع الخبر مب عارف كيف يترجاهم عشان يدخل عندها.. طبعاً ماخلوه الا بعد نص ساعه تقريباً.. دخل خليفه عند خوله وهي حاضنه البنت..
خوله: خليفه شوف حور اشحلاتها؟؟
خليفه: سمتها بدون شوري.. حريم آخر زمن..
خوله: ليش مب حلو هالإسم؟
خليفه: حور الله يرحمها تستاهل ان ناخذ اسمها..
خوله: فديتك والله
ام خليفه: كلمت اخوك..
خليفه: هيه امي.. هو وسوسن يايين في الدرب.. والربع كلهم يسلمون عليج ويباركون لج فديتج..
خوله: الله يبارك فيهم جميعاً يارب
=-=-=-=-=-=-=
وصلوا الشباب دبي وهم هلكانين من التعب..
أحمد : يلا مابقى شي بنوصل بيتنا ان شاء الله
الشباب: ياريال نحن بنحجز لنا فندق قريب وبنسكن فيه..
أحمد: افا والله افا.. فندق وبيت اخوك موجود.. ماشي اتيون البيت عندي.. عيب عليك اتقول هالرمسه اصلا..
فواز: مادري شو رايكم شباب؟
عدنان: لا الصراحة انا ابا اروح الفندق اريح لي
مروه: وانا بعد جان تبون الصدق..
فواز: عيل خلها فرصة ثانيه
أحمد: عالأقل تعالو الغدا عندنا مايصير توكم واصلين البلاد وأودركم واروح
مروان: بس ..
أحمد: لا بس ولا شي.. جانكم تبوني ازعل منكم برايكم روحوا..
كلهم تموا يطالعون بعض وعقبها ابتسموا له بحيث انهم راضين ايون عنده.. اتصل احمد في أمه..
أحمد: مرررررررحبا بميثاني..
ميثا: عنلاتك.. انا امك تزقرني بإسمي
أحمد: أدلعج .. ماتبيني ادلعج..
ميثا: آخ منك لوتي
أحمد: طالع على ابوي ادري.. المهم امايه تراني في البلاد.. عدي لين العشره انا عندج..
ميثا والفرحة مب شايلتها: من صدق.. والله؟
أحمد: تحريني اجذب.. هيه والله صدق..
ميثا: فديتك تربيتي اعرفك ماتعرف تجذب.. انزين وينك ومتى بتوصل؟
أحمد: كلها ربع ساعه انا وشلة ربعي بنوصل..
ميثا: يا حياهم الله.. خلاص اترياك اميه لا تحير وشوي شوي فالدرب
أحمد: ان شاء الله..
بند عن أمه وسار عند ربعه عشان يتحركون صوب بيت أحمد.. طبعاً هم مايدلون مكانه... أحمد كان يسوق موتر فواز .. والشلة وراه.. سايرين صوب بيت أحمد..
=--=-=-=-=-=-=
مجد وهي نازله من الدري تيبب وتغني.. ومرتبشه..
مجد: أمييييييييه..
يدووووووه..
أبوووووووويه
تعالووو بقولكم شي يونس وااااااااايد..
الكل تم يطالعها مستغرب ..
مجد: خوله ربت بالسلامه ويابت بنت سمتها حور..
لطيفه: يحليلها.. حمد لله ع سلامتها..
جلثم: واعليه.. وين هي الحين ابا ازورها..
مجد: هيه ان شاء الله العصر بنمر عليها ..
لطيفه: تستاهل حليلها حرمه فقيرة وطيبه..
عبدالعزيز: منو هاي ؟
لطيفه: كنت ربيعه حور الله يرحمها.. هيه الي توسطت لحور عشان توظف..
عبدالعزيز: هييييه ذكرتها.. ماشاء الله يابت بنت..
مجد: هيه .. ابا اشوفها اكيد حلوة
لطيفه: بس مب احلى عن ريماني
مجد: بنتي مافي حد احلى عنها
جلثم تتطالع مجد بخبث وتضحك..
مجد: وعندي خبر ثاني حلو
لطيفه: عل فرحتج دوم يابنتي.. ودوم هالأخبار الحلوة.. قولي شو الخبر الحلو الي عندج..
مجد: خلود حامل..
لطيفه: والله.. ربي يسهل عليها يارب..
جلثم: مادري بلاهن هالحريم مستعيلات على الحمل.. يتحرن الحمال والربى سهل..
عبدالعزيز: بس احسن لهن عشان يتعلمن اصول التربية من هن صغار ويحسن بالمسؤولية..
لطيفه: صدقه عبدالعزيز..
جلثم: بنات اليوم مايتعلمن لو يابن درزن عيال..
مجد: ههههههههه خيبه فاقدة الأمل فينا يدووه..
جلثم: انجعمي انتي اصلا زعلانة منج..
مجد: ويديه ليش؟
جلثم: يبالج حد يمرغج بالخيزرانه يعلمج السنع وان الجذب يودي للنار
عبدالعزيز: أمي بنتي ماتجذب
جلثم: انت بتخبرني عن بنتك.. اسكت الله يخليك.. تراها ان طلعت جذابه طالعه عليك..
مجد وهي ناقعه ضحك: ههههههههه اوووب حطو على الوالد..
لطيفه: خل انش قبل لا ايي دوري
جلثم: دورج ياي مالج شردة منه..
مجد مستغربه بلاها يدتهم حاقدة عليهم هالكثر.. سمعت مجد صياح الصغيرونه وسارت فوق..
جلثم: الا اتخبركم شو صار على موضوع عبيد ومجد
لطيفه: اتريا عبدالعزيز يقرر..
عبدالعزيز: مادري ليش انا مب مقتنع ولا مرتاح
جلثم: يوم اقولك البنت ماتباه تمثل لكم وانت مصدقين..
لطيفه: منو قال.. انا سمعتها بإذني وهي تقول موافقه
جلثم: يالخدية.. (وتضربها بالعصا عالخفيف) .. تقول هالرمسه يدامكم عشان ترضيكم.. بنتي وانا اعرف الي في قلبها اكثر عنكم.. عندي رمسة ابا اقولها لكم..
عبدالعزيز: خير امي شو السالفه قولي؟
جلثم: انتو تعرفون ليش أحمد سافر البحرين؟
لطيفه: يزور ربعه.. وشو يخص احمد في موضوع عبيد ومجد..
جلثم: انتي الخدية انجعمي وخليني اكمل رمستي..
ضحكت لطيفه وسكتت يودت عمرها عن تنضرب بالعصا بعد مره..
جلثم: يا جماعه أحمد قايل لي من زمان (في خاطرها تقول.. حسبي الله عليج يا مجد خليتيني اجذب على اخر عمري عشانج ولا هو متى قالي اصلا).. ان وده في مجد وبس يخلص دراسته يبا يخطبها.. واعتقد ان مجد انسب لأحمد من عبيد.. مو حرام عليكم تظلمون اثنين عشان خاطر ميت..
تضايق زود عبدالعزيز.. والحين تذكر يوم بنته كانت معصبه عن سفر أحمد.. كيف انفعلت.. وفعلاً حس نفسه بيظلم البنت..
لطيفه: بس أحمد عمره مارمس ولا لمح لنا..
جلثم: الريال حاط في باله ان بنت عمه له .. شرات عادة العايله.. ماتوقع ان الظروف تنجلب بهالطريقة..
لطيفه: لا لا لا .. وصية حور لازم تنفذ..
عبدالعزيز صد صوبها معصب: انتي ياحرمه ليش جي انانية.. تفكرين ببنتج الميته.. ونسيتي ان لج بنت حية قلبها ينبض وتحس تبين تعيشينها عمر بعذاب.. بنتج طلعت انانية وانتي تبين تكملين مشوارها..
لطيفه سكتت.. فعلاً ماودها تشوف بنتها متضايقه.. يكفي انها شافت عذاب حور بعينها.. وفي نفس الوقت ماودها ترفض وصية بنتها.. بين نارين.. بس نار عذاب انسانه يدامها .. اقوى .. مهما يكون قلب الأم على عياله..
عبدالعزيز: سمعي زواج مجد من عبيد إنسي.. واذا تبون تسوون هالشي من غير رضاي كيفكج انتي وبنتج.. بس انا مب راضي من ألحين اقولكم.. وأحمد يرجع البلاد.. وجانه يبا بنتي تفداه بنتي.. أحمد ريال والنعم فيه.. افتخر به يكون ريل بنتي.. وحلاته يكون عندي بدال النسيب نفسه .. نسيبين وكلهم عيال حميد اخويه..
جلثم: هيه هذا ولدي الي يحب عياله ويفكر فيهم..
لطيفه: شورك يابو حور.. وانا مالي رمسة فوق رمستك
عبدالعزيز: هذا العشم فيج
جلثم استانست من الوضع.. عالأقل هيئت كل شي لأحمد يوم يوصل كل شي جاهز مايبقى غير يخطب.. بس مجد شو بيكون رايها في الموضوع؟
........................
=-=-=-=-=-=


في بيت شيخه
نوره: أميه عمتي كيف رضت انج اتييبين اليهال؟
شيخه: كل شي بالتفاهم والزين ينحل .. وعمتج حرمة عاجل وفاهمه.. قعدت اتفاهم وياها.. وعمج أيد رمستي.. واقتنعت..
نوره: ربي لا يحرمني منج..
شيخه: ويخليج لعيالج
نوره: آمين يارب... إلا امي وينها خلود اليوم ما مرت صوبنا؟
شيخه: ليش ماعرفتي الخبر؟
نوره:أي خبر .. شو السالفة!!
شيخه: فديتها اليوم الصبح كلمتني وقالت لي انها حامل
نوره: ماشاء الله.. بس مو جنه امي استعيلو .. توهم ماكملو عالأقل 6 شهور.. توهم مكملين شهر وشوي.
شيخه: بعد إرادة ربج ماترومين تمنعينها.. الله يبارك لها بس وتقوم بالسلامه ان شاء الله
نوره: على قولتج. والنعم بالله..
نشت نوره تروح عند مهره لأنها كانت تصيح..
ورن تليفون البيت سارت شيخه ترد عليه.
شيخه: السلام عليكم
جلثم: وعليج السلام والرحمه.. ها يقولون زامه خشمج هاليومين .. عنبوج لا تسألين عن أمج ولا تنشدين عن حالها؟
شيخه: لا امييه مب جذا الموضوع..
جلثم تقاطعها: عيل شو .. خبريني شو الي بيخلي بنت ما تسأل عن امها.. الا جانج هب معتبرتني أمج بعد
شيخه: افا والله انتي تاج راسي مب بس أمي.. وحقج علي لأني مقصره بحقج
جلثم: هيه جي اباج.. الا اتخبرج شواخ.. (في هاللحظة انعفس ويه شيخه.. عنبو حرمه شو كبري عيوز.. بعدها تزقرني شواخ .. زين انه فالتليفون ومحد يسمع)..
شيخه: هلا امي
جلثم: بلاج ساعه لين ماتردين
شيخه: لا وياج قولي اميه شو السالفه؟
جلثم: انتي سمعتي عن سالفه وصية حور صح؟
شيخه: هيه وتضايقت الصراحة.. كيف حور توصي مثل هالوصية
جلثم: شفتي انتي.. اول وحده في العايله توافقني الراي.. لأن الكل ضدي
شيخه: أميه هم مب ضدج بس هم كل تفكيرهم بمشاعرهم ناحية الريم.. مع ان الريم بتم عندنا وبتربونها سواء عبيد عرس ولا ماعرس
جلثم: سمعي امي.. عبيد من حقه الشرعي انه يعرس ... بس هب انه ياخذ مجد.. لو على سالفة الزواج.. من باجر بدور له حرمة سنعه .. تناسب له... والبنت بتم عندنا..
شيخه: ليش شو صار فالموضوع هالأيام.. لأني انشغلت ومانشدت عن السالفة
جلثم: انزين خليني اخبرج سر.. مجد وأحمد يبون بعض..
شيخه: أحمد ولد حميد؟
جلثم: شواااااااخ وويع ابليس ان شاء الله.. بلاج انتي كم أحمد عندنا يعني.. هيه ولد حميد اخوج
شيخه: سامحيني عاد أميه بداية الخرف
جلثم: انا الي اكبر عنكم وأعقل عنكم..
شيخه: الله يحفظج يارب ويخليج لنا.. وعن طاري أحمد ومجد.. عيل أحمد أولى بها.. عيل من جي احمد سافر
جلثم: هيه واعليه حماده فديته.. من سمع الخبر ماقدر يتم في البلاد..
شيخه: علني افدااااه .. طلع الولد يحب..
جلثم: انا رمسته وقلت له السالفة.. وقالي انه ماكان يعرف بموضوع الوصية .. وقال بيرجع عشان يرمسهم..
شيخه: الله يوفقه يستاهل..
جلثم: انزين نشف ريجي.. خل اسير أقيّل لي ساعه .. وانتي انشدي عن أمج..
شيخه: هههههه ان شاء الله .. وانا منو لي غيرج اصلا..
جلثم: الله يخليج..
=-=-=-=-=-=
وصل أحمد البيت ودخل ربعه الميلس.. وأول مادخل البيت جابل مروه..
أحمد: السلام عليكم
مروه: وا فديييييييت هالويه كم أفداه.. وولهت عليه
أحمد: احم احم كل ها شوق لي
مروه: يالدب تولهنا عليك والله.. وانت ليش تسافر.. هب عايبتنك بلادنا شو
أحمد: عايبتني ومالي غنى عنها.. عشان جي رديت لها بسرعة..
مروه: تعال سولف لي شو سويت هناك..
أحمد: بعدين بعدين.. ألحين مو فاضي.. بسير لأن ربعي في الميلس.. بمر على أمي أسلم عليها.. ولهت عليها
ميثا وهي داشه: علني ما خلا من هالصوت وطاريه..
احمد ابتسم لأمه وتقرب منها وحب راسها وحضنها..
ميثا: لا خليت منك يارب.. وتحب الكعبة.. هالمره سامحناك.. المره الياية ماشي سفر..
أحمد: عاد انتو وقراركم بيتحتم عليه اتم ولا اسافر.. المهم خلهم يحطون الغدا لربعي في الميلس
ميثا: وينهم خل اسلم عليهم ..
أحمد: فالميلس..
ميثا: خلاص شوي وانا بكون عندكم..
راح أحمد صوب الميلس الخارجي.. شاف عبيد فدربه..
عبيد: اووووووب.. بو شهاب.. حي الله هالشوف..
أحمد: الله يحييك بو الريم.. اشحالك؟
عبيد: بخير بشوفتك.. ياخي لك وحشه..
أحمد يطالع عبيد ويشوفه كيف ضعفان وعيونه مسوده تحتهن.. وكيف كئيب .. تضايق من الحالة الي وصل لها أخوه..
عبيد: بلاك سرحت
أحمد: ها لا ماشي.. الا تعال سلّم على ربعي من البحرين.. فالميلس..
عبيد: يلا ..
وتوهم داخلين الميلس.. ضحك أحمد من المنظر الي شافه..
كل واحد فيهم مستاند على الكنبه وراقد..
عبيد: حليلهم ميهود حيلهم من الدرب
أحمد: شو تقول يا ريال لو تشوف المنظر الي شفناه خلانا طول الوقت فاتحين عيونا مانرقد.. لين ماوصلنا واستقرينا الحين حسينا بالتعب
عبيد: السفر بالسيارة متعب..
أحمد: بس وناسه.. خصوصاً يوم نوقف في الإستراحات وننزل .. ربشه شباب
عبيد: هيه والله ذكرتني بأيام
أحمد: إلا وينها الريم؟
عبيد: بيت عمي عبدالعزيز عند مجد..
أحمد: هيه وشو صار على موضوعكم؟
عبيد: الزواج قصدك..
أحمد: هيه..
عبيد: رمسنا عمتي وعمي ونتريا ردهم ..
أحمد: امي شو رايها؟
عبيد: موافقه..
أحمد: أبوي..
عبيد: مادري بس يوم قلت له ماقال شي تم ساكت..
أحمد: قم نسير داخل برمسك شوي.
عبيد: خير ان شاء الله
وطلعوا من الميلس وقال أحمد لأمه ان ربعه رقود فخلهم على راحتهم يريحون.. وسار فوق غرفته .. وعبيد وياه..
عبيد: قولي شو الي بترمسني فيه؟
أحمد: عبيد انت من خاطرك مقتنع في مجد وتباها
عبيد: تبا الصدق.. انا باخذها بس عشان البنت ووصية حور.. ولا احسها ياهل مو للزواج وماتناسبني
أحمد: يعني عادي ماتقرب منها حتى..
عبيد سكت كأن يأيد كلام أحمد بسكوته.. عصب أحمد بس تمالك نفسه .. وقرر انه يقول واللي فيها فيها.. هو راجع عشان هالشي.. ومستعد انه يحارب عشان هالحب لآخر لحظة..
أحمد: عبيد انا قبل سكت عن الموضوع لأن كنت حاط في بالي ان مجد مقتنعه بنفسها وانت بعد.. بس يوم عرفت السالفه انها مجرد تنفيذ وصية ماتصح أصلا لأن فيها مضرة.. فقلت بقول ومابسكت
عبيد: أحمد شو السالفه.. احس بعيونك كلام وايد .. شو الي صاير؟
أحمد: عبيد.. واذا قلت لك ان انا ومجد نبا بعض من زمان.. ؟؟
عبيد اسودت الدنيا في عينه.. وتم مصدوم.. استغرب من نفسه كيف ماطرى على باله إن أحمد ومجد يكون بينهم شي خصوصاً الفتره الي كان يلاحظ قعداتهم وسوالفهم.. كيف ماطرى على باله ان اخوه اولى انه ياخذ مجد .. حس نفسه في لحظة كان أناني.. يدمر حياة إثنين .. مجد و أخوه.. عشان ينفذ وصية انسانة تملكتها الأنانية والغيره لآخر لحظة من عمرها.. هي عارفه اني مابقرب من إختها.. عارفه ان مجد مابتقدر حتى تقرب مني لأني في يوم من الأيام كنت زوج إختها.. أنا كيف مافكرت في هالشي.. الله يرحمج ويغفر لج يا حور..
أحمد تم يطالع عبيد ودقات قلبه تزيد من الخوف.. يتريا ردة فعل عبيد في أي لحظة.. : عبيد؟
عبيد انتبه لنفسه .. وكل الي سواه ابتسم لأخوه.. : مبروك عليك.. سامحني لأني مافكرت فيك ولا فيها..
استانس أحمد حس الدنيا ماشلته من الفرحة كل الي سواه حضن أخوه من الفرحة: ربي يخليك لي ياخوي..
عبيد: يا ريال الدنيا كلها يومين مايسوى ان نعيش فيها ونحن بهم وغم ومشاكل.. وانا منو لي اقرب من اخوي وبنت عمي اشوف فرحتهم..
دخلت ميثا الغرفه عليهم مستغربه..
ميثا: شبلاكم فرحوني وياكم؟
ومروه كانت واقفه ورا ميثا..
عبيد: أميه.. أحمد قرر يعرس
ميثا بفرحة: والله.. هذي ساعة المنى والفرح..
مروه تجدمت عن أمها: يافرحتي انا .. اخوي بيعرس.. والله وكبرت يا أحمد
ميثا: انزين من اليوم بندور لك بنت الناس الأصيلة الي تناسبك.. انت تأشر بس
أحمد صد صوب عبيد وعبيد هز راسه كأنه فاهم نظرات أحمد: بس امي البنت موجودة ماله حاية إتدورين ..
ميثا: افا من ورانا يا أحمد..
مروه كانت حاسه قبل بعلاقة مجد وأحمد.. وهاللي مخلنها مستغربة شوي منو ممكن تكون هالبنت..
عبيد: امي أحمد يبا يخطب مجد..
مروه تنهدت .. وابتسمت.. بس ميثا تغيرت ملامح ويهها..
ميثا: لا والله.. وانت يا عبيد؟
عبيد: امي.. أحمد أولى بمجد فيه انا.. وبعدين لا تنسين انا بس بغيت اخذها عشان الوصية ولا انا ما ودي أرتبط بإخت زوجتي الله يرحمها..
ميثا بعدها مب مستوعبة: انت ماتفهم شو معناة نخطب البنت لواحد وعقب انيي نغير راينا ونقول نباها للثاني؟؟
أحمد: أمي انتي دومج كنتي تقولين لي اخطب لك بنت عمك..
ميثا: أميه أحمد فرحتك هيه فرحتي.. ومجد شرا بنتي.. اتمناها تكون كنتي.. وبالعكس محلاها من فرحة تكون حرمة ولدي الثاني.. وعبيد امره هين ندور له وحدة ثانيه.. بس انا احاتي لطيفه وعبدالعزيز.. بيزعلون مني..
أحمد: اميه انتي رمستيهم عساس الوصية.. واللي بيصير ألحين نثبت لهم ان مثل هالوصايا ماتيوز.. والله مايرضى بها.. وغير هذا كله.. الشخصين مالهم رغبة في بعض.. موافقين بس عشان هالوصية الي مغربلتنهم ومغربلتني..
ميثا تتقرب منه تضربه عالخفيف: ايا اللوتي.. طلعت تحب..
أحمد استحى ويلس يحج راسه والكل يضحك..
عبيد: ياريال وينك عن البيت من زمان ماضحكنا
مروه: هيه والله
أحمد: المهم .. موضوع عمي ومرته خلوه علي.. انا برمسهم.. وعمي عبدالعزيز يعزني وايد.. ماعتقد بيعارض اذا طلبت بنته.. وغير ان يدتي .. الراس العود في العايلة.. هيه الي اتصلت فيه وخبرتني.. ولا انا ماكنت ناوي ارجع
عبيد صد صوب احمد: يعني اللي افهمه انت سافرت لأني كنت مقرر اتزوج مجد
أحمد: هيه
عبيد يطالع بإستحقار.. : تدري انك سخيف..
الكل ضحك..
=-=-=-=-=-=
في بيت جاسم
كان يالس ويا خلود في الغرفه.. ورن تليفونه..
جاسم: هلا والله .. حمد لله عالسلامه.. ياريال اختفيت فجأة لا حس ولا خبر.. ولا جنه عندك أهل هني تنشد عنهم
أحمد: شو نسوي عاد هناك قعدة ووناسه.. وشفت ربعي الي من زمان ماكنت شايفنهم.. تعرف تغيير
جاسم: زين سويت غيرت جو عالأقل.. بس ياخي جان قلت لنا بترجع نستقبلك شي نسوي لك
أحمد: انا ياي ويا ربعي عن طريق البر..
جاسم: يا ريال جان زين مب معرس .. جان لقيتني وياكم ألحين
ماحس الا بقرصه وضحك..
أحمد: ههههههههه عن يسمعونك بس..
جاسم: ههههههههه.. انزين خل اخبرك الخبر السار والسعيد
أحمد: شو قولي ..
جاسم: الحرمه حامل
أحمد: ماشاء الله شو هالأخبار الحلوة.. مبروووووك ألف ألف مبروووك.. تستاهل.. يالله ربي يسهل عليها يارب.. والله وكبرت خلودووو..
جاسم: ههههههه شفت عاد.. يالله دورك ألحين
أحمد : جريب ان شاء الله .. بتوصلك الأخبار
جاسم استغرب من رمسة أحمد.. شو يقول اي جريب. يعني ناوي يعرس؟؟ بياخذ منو ؟؟
أحمد: الووو وياي
جاسم: هيه وياك.. خلاص عيل بوشهاب خلني اليوم بمرك البيت ان شاء الله بشوفك
أحمد: على خير.. سلم على الأهل
جاسم: يبلغ ان شاء الله
وبند عن احمد صد صوب خلود.. يطالعها وعلامات التعجب تارسه ويهه
خلود: شو بلاك بسم الله..
جاسم: تعرفين كنت ارمس منو؟
خلود: منو؟
جاسم: أحمد ولد خالج
خلود: له له .. أحمد ولد خالي حميد .. سمعتك تقوله حمد لله عالسلامه.. يعني رد من السفر
جاسم: هيه .. ويوم قلت له عقبالك قالي.. جريب بتوصلك الأخبار.. يعني ناوي يعرس
خلود وهي تعقد حياتها: بيعرس!!!!!!
جاسم: انا روحي شراتج مستغرب
خلود: لا يكون يبا يسوي حركة يقهر بها مجد
جاسم: مايندرى الصراحة
خلود: الله يستر..
جاسم: انزين انا اليوم بسير عند أحمد .. مابتزورين بيت خالج؟
خلود: تعال انت تقوله بتسير عنده نسيت اليوم فيصل واهله بيون عشان يتفاهمون على الموضوع
جاسم: اووووووه تعالي والله راح عن بالي.. سالفة أحمد خلتني انسى هالموضوع.. خلاص مابروح له اليوم .. بمر عليه يوم ثاني.. ونشوف الأخ فيصل هذا شو يبا..
خلود: انت شاورت فطوم..
جاسم: هيه البارحة يلست وياها وقعدت ارمس وياها قريب الساعتين.. والبنت من نفسها مقتنعه انها تبا تطلّق منه.. لأنها تعبتر علاقتهم منتهيه ..
خلود: غامضتني هالبنت.. صغيره وحرام جي يصير فيها
جاسم في خاطره.. غلطتي يا فطوم وتحملي ثمن غلطتج.. تنهد وطلع من الغرفة
خلود: جاسم.. الله يخليك يوم تشوف فيصل وهله تمالك أعصابك وماباك تعصب ولا تتنرفز.. عشان خاطري اوكي؟
جاسم: اوكي
.. ..
ومرت ساعتين وصلوا أهل فيصل وفيصل وياهم.. واستقبلهم جاسم.. وكان طالب من سلطان وأبوه وخالد بعد يكونون موجودين بما إنهم عيال عمومته..
بوفيصل: يا جماعة نحن يايين هني نطلب منكم ان تنسون موضوع الطلاق.. ترا مايستوي ان ابغض الحلال عند الله الطلاق..
بوسلطان: والله يا بوفيصل محد فينا مستانس من الي بيصير ولا عمره الطلاق كان حل..
فيصل: عمي تسمح لي أرمس..
بوسلطان: تفضل
فيصل: انا يوم خطبت فاطمة.. خطبتها وأنا مقتنع فيها ولازت مقتنع ومتمسك فيها.. واذا عن المشاكل الي صارت ترا لازم بين أي اثنين مايعرفون بعض تصير مشاكل وخلافات.. مايصير على أي خلاف نطلب الطلاق هذا مب حل
جاسم كان يطالع فيصل والود وده يقطعه.. بس ميود نفسه: بس في حالة فاطمة هذا هو الحل..
بوفيصل: جاسم يا ولدي نحن ناس شارينكم لآخر لحظة ومايصير الكلام الي تقوله
فيصل: جاسم تسمح لي ايلس ويا فاطمة شوي واتفاهم وياها واسمع رايها ..
بوسلطان: صدقه فيصل يا جاسم.. أهم شي راي البنت..
جاسم: خلاص مب مشكلة.. بزقرها
وطلع جاسم من الميلس ودخل الفيلا..
خلود: ها شو صار..
جاسم: ازقري فطوم..
خلود: ليش؟
جاسم: انتي ازقريها ولا تيلسين تسألين وايد.. بخبرج عقب
خلود برطمت من اسلوب جاسم.. اففف مب حلو يوم يعصب.. وزقرت فطوم الي كانت ترتعش من الخوف..
فطوم: خير جاسم
جاسم: فيصل يبا يقعد يتفاهم وياج موافقة
فطوم فاجة ثمها مب عارفه شو تقول
جاسم: حوو ارمسج انا ردي علي.. شو قلتي؟؟
فطوم: انت شو رايك؟
جاسم: انتي وبعدين يعني اقولج انتي شو تبين .. لا تسأليني عن رايي.. لو عني ابا اجتل فيصل
فطوم بلعت ريجها.. : هيه اوكي موافقه
جاسم: خلود انتي دخلي داخل لأن فيصل بيدخل
وراح جاسم زقر فيصل ويابه الصالة ودخل قعدوا الثلاثه سوا
فيصل: فطوم أنا احبج وشاريج .. وسامحيني على كل شي صار.. وماودي نتطلق.. ابا اعرف انتي شو رايج انتي بنفسج بدون تأثير من أي شخص
جاسم: شو تقصد ان نحن مأثرين عليها.. ياخي اعترف عن سواياتك عقب قول هالرمسة
فيصل: محشوم بس ابا اسمعها
فطوم شريط ذكرياتها مع فيصل يدام عينها.. من اول يوم رمسته فيه.. لليوم الي صار فيه الي صار.. عارفه ان مهما تسوي له ماراح يقدر يوثق فيها.. هيه غلطت ولازم تحمل نتايج غلطها.. ويكون درس انها ماتعيد هالتجربة في عمرها.. فيصل كان شي من مراهقتها ولازم تنساه للأبد.. الحمد لله ماصار شي كبير يفقدها سمعتها.. لكن الدرس الي تعلمته يكفيها للباقي من عمرها .. حاولت معاه كل الطرق.. تحول تليفونها عليه.. وساعات كان يبدل البطايق وياها بس عشان يشوف منو يتصل ومنو مايتصل بها.. في كل شي تسويه تخبره.. ماتخش عنه أي شي .. لكنه ماتغير.. ويوم عن يوم يزيد..
فطوم: فيصل .. انا غلطت غلطة عمري يوم اني تعرفت عليك.. مابا اذكر الي صار.. لكن يكفي انه يكون درس لي اني عمري ما اطيح في نفس الفخ لو شو ماصار.. حاولت وياك وايد ان ترجع ثقتك فيه.. لكن ماشي فايدة.. كان ودي نعيش شرات أي اثنين يحبون بعض ومرتبطين في بعض.. لكن الي اكتشفته ان نحن مانصلح لبعض... فيصل طلب أخير مني.. طلقني أرجوك
تضايق فيصل وايد.. وكل الي سواه وقف وهو منزل راسه.. : فاطمه.. إنتي طالق..
انهارت فطوم من صدمتها وصعدت لغرفتها.. وطلع فيصل وجاسم يطالع الموقف مذهول.. كأنه ندم انه طلب هالشي.. لكن هذا الواقع الي كان بيصير سواء ألحين ولا بعد الزواج..
فيصل: ابوي.. خلاص طلقت فاطمة
الكل في الميلس وقف من الصدمة.. ويلس يطالع فيصل..
فيصل: السموحة منكم يا جماعه.. سامحوني.. وربي يوفق بنتكم.. وطلع من الميلس وابو فيصل يطالع فيصل ويهز راسه..
بوفيصل: حسبي الله عليك ونعم الوكيل جانك فشلتني يدام العرب.. لا بركتن فيك من ولد..
استستمح من ابو سلطان وطلع.,..
دخل عليهم جاسم
سلطان: جاسم صدق الي سمعناه؟؟
جاسم: هيه طلقها بعد ماسمع رايها
بوسلطان: لا حول ولا قوة إلا بالله
=-=-=-=-=-=
خلود: بس عاد فطوم هدي نفسج مب هذا الي كنتي تبينه..
فطوم: صح اني كنت ابا هالشي بس مادري حسيت وايد صعب اني ..
خلود تقاطعها: حبيبتي مب زين الي تسوينه بعمرج.. وخلاص لازم تفتحين لنفسج حياة يديدة وتنسين الي مضى
فطوم: خليني اسير الغرفه ارتاح شوي..
خلود: بس توعديني ماتفكرين وايد وتنزلين للعشا
فطوم تبتسم من ورا خاطرها: ان شاء الله
وتوها منى نازله كانت تصيح لأنها سمعت كل الي صار وربعت لحضن خلود..
منى: خلود انا خايفه
خلود وهي تمسح على راسها..: منايه من شو خايفه؟
منى وهي تبتسم: الله اول وحده تقولي منايه
خلود: هههههههه.. هيه جي اباج.. ليش كنتي تصيحين
منى وهي تستهبل: مادري نسيت
خلود تضربها على راسها: وايد شيطانة تراج..
منى: هيه خلاص تذكرت.. بس أول قولي لي منايه مره ثانيه
خلود وهي تضحك على هبالة منى.. : مصختيها
منى: خلاص خلاص.. خايفه من الزواج.. خلاص انا مابا اعرس.. وبعتزل الشعر وعالم الرومانسيه للأبد
خلود: أقولج سيري جابلي قيس بن الملوح وايد احسن من مجابلي لأنج بتنهزبين
نشت منى وهي تضحك.. عالأقل اخليهم ينسون السالفه.. وانا الي مو لاقيه انسي عمري.. اوووه بألف قصيدة يديدة.. بسرعه بسرعه قبل لا انسى..
منى بطفوليتها عايشه حياتها .. تزعل في دقايق وتنسى كل شي..
.. ..
تمت يالسه خلود وهي تهز ريولها.. وفجأة وقفت تذكرت سالفة أحمد.. ابتسمت بخبث ونشت راحت صوب الغرفه تشل تليفونها.. وخذت تليفونها.. واتصلت على طول..
مجد: حي الله هالصوت
خلود: ماسمعج .. ريم مسويه حشرة ..
مجد: لا تغلطين على صوت بنتي.. جنها كناري فديتها
خلود: هههههههههه .. اقول اسكتي الله يخليج
مجد: اصلا لو شو ماتسوين مابيوز بنتي لولدج
خلود: عداااال ولدي الي بيموت على بنتج ألحين
مجد: بتشوفين وبذكرج..
خلود: ههههههه ماعلينا خليني اقولج الخبر التالي
مجد: شو السالفه؟؟ أي خبر اليوم انتي مصبحة علي بخبر والحين بتمسين بخبر ثاني شو السالفة
خلود: أحمد
مجد: لا تيبين طاري هالإسم أرجوج
خلود: اسكتي وخليني ارمس يالمزعجة.. أحمد رجع من السفر
مجد: شوووووووووو.. متى وكيف وليش ماطرش لي مسج يخبرني
خلود: مسودة الويه .. بعد الي صار متوقعه منه يقولج..
مجد: يعني على الأقل يقدر
خلود: اسكتي الله يخليج يقدر وحده ماقدرته
مجد: خلود انتي اكثر وحدة عالمة بالظروف
خلود: مالت عليج انتي وظروفج زين جي
مجد: خلووووووووووووووود بس عاااد..
خلود: صه صه.. بتخرعين البنت بصوتج.. والظروف انتي الي تبينها تكون جي
مجد: جب سخيفه
خلود: عالأقل مب اكثر عنج... خذت الي احبه.. ماضحيت عشان شخص اناني يحكم علي بالإعدام وانا حية عشان شي ماله اساس
مجد وكانت خلاص معصبة من خاطرها من اسلوب خلود.. : ترا هالإنسانه اللي ترمسين عنها تكون إختي فاهمة
خلود: لا مب فاهمة .. لأن اختج الله يرحمها توفت.. وانتي الي عايشة.. وانتي تفلسفتي وقلتي لإختج لا ما احب أحمد.. وخليتيها تقنعج بالوصية الي مادري على أي اساس تقبلين فيها..
مجد: اقول لمي ثمج قبل الا اييج البيت واصفعج
خلود: كيفج امي كيفج.. عيشي حياتج عشان هالوصية زوجة بالإسم بتكونين وبتذكرين كلامي.. وعمرج مابتعيشين حياة عادية ويا عبيد .. لأن لا نفسج ولا نفسه بترضى هالشي
مجد تمت ساكته فعلا كلام خلود صح.. بس الي ضدها هم يدتها وخلود.. اما الباقي كلهم موافقين.. خصوصا عبيد نفسه ما افتكر ان هالشي ممكن يأثر في مجد وافق وبينفذ وبس.. ماقعد ويا مجد قعدة صريحة يعطيها مجال ترمس يمكن تغير رايها.. شرات مايقولون مب لاقيه من يدعمها.. تنهدت: خلود بخليج الحين وقت رضاعة الريم..
خلود: خلاص حبيبتي بس فكري دخيلج..
مجد: ان شاء الله
بندت خلود عن مجد وهي متضايقه.. مب عارف هالبنت وين راح يكون مصيرها المحتوم ..
=-=-=-=-=-=
=-=-=-=
هزاع صاد وراه يطالع مها وبصوت واطي: هبله انتي هبله..
مها تضحك : لا استهبل ادخل يلا شو تتريا
هزاع: الله يعينك يا زايد على أم البلاوي هاي
مها: بلاوي منو.. سير يابوي بلا رمسة زايدة
يضحك هزاع ويهز راسه فتح باب الميلس : هود..
منال رافعه راسها مصدومه بسرعه تغشت.: هدا ..
هزاع: اشحالج منال
منال تتطالع من تحت الغشوة ومصدومه.. منال تميزها عيونها الواسعه .. الي فعلاً يجذبن كل من يطالعهن... كانت غشوتها خفيفه شوي.. بياض عينها كانن مبينين .. وهزاع يطالع فيها مب طايع ينزل عينها .. في خاطره يقول كم احلوت هالبنت..
منال بدون نفس: بخير
هزاع سكت شوي يترياها تسأل عنه.. بس ماشي فايدة.. : انا الحمد لله بخير
منال ميودة ضحكتها غصب.. : انزين انا ماسألتك عن حالك..
هزاع صد الصوب الثاني قافط ويتحرطم.. هاي ويهها لوح شرات مهووي الدعله...
منال: انا استأذن..
هزاع: ها لا خلج شوي في موضوع ابا اكلمج فيه
منال: موضوع.. ماعتقد ان بيني وبينك أي مواضيع
هزاع: لا في موضوع وايد مهم بالنسبة لي..
منال: قول لأني مستعيله.. غريب أخويه بيوصل ألحين عشان ياخذني..
هزاع: لا تخرطين.. أصلا غريب ومها متفقين عشان اني ارمسج.. يلسي وإنتي مطمنه..
منال: الله اكبر.. من وراي.. ماعليه يا غروووب أنا أراويك..
هزاع يبتسم لها: منال سؤال واحد بسألج اياه.. وردي علي فيه بس بإجابة صريحة.. وإذا تحسين نفسج تبين وقت عشان تجاوبين انا ماعندي أي مشكلة..
منال: قول بسرعه ..
هزاع: منال لو انا خطبتج مره ثانيه وطلبت اردج.. شو بيكون ردج؟؟ .. بس قبل لا تردين عندي شي اباج تحطينه في بالج.. هزاع الأولي الي عرفتيه مات.. والي يدامج انسان شاريج وهو عارف انه مابيلقى انسان احسن منج..
منال تمت مذهولة تتطالعه.. كل الي سوته شلت عمرها وطلعت من الميلس.. وأول مافتحت الباب شافت مها كانت متسانده عالباب وكانت بطيح..
منال تتطالعها : احسن علج الكسر بعد. .
مها تربع صوب منال وتيودها من شطنتها: عنبوووووووج بنت خالتج انا تدعين علي.. تعالي تبين تتضاربين انا ماعندي مانع..
منال: لا انتي مب منال بنت خالي الي اعرفها.. وين الرقة وين الدلع..
مها: رقتي ودلعي بس حق ريلي.. يالله ها قولي لي شو رايج .. الريال يتريا..
منال رافعه حياتها: حلاوة هيه يلا شو رايج..
مها: اقولج ترا انا اعرف رايج لا تخليني اقوله
منال: أيه اصطلبي.. خليني اتغلا واسوي عمري ثقيلة..
مها: لوووووتيه طالعه علي
منال: جب .. انا سايره وين غريب خل اجتله..
مها: منال لا تحاولين.. انا مرمسه الكل.. وغريب بعد وياي .. والكل موافق.. باقي بس انتي..
منال: يعني مزهبين كل شي من وراي
مها: حشا منو قال.. كل شي من يدامج.. والدليل اني قلت لج
منال: قلت لج اونه.. متى قلتي بعد ما خلصتي كل شي.. دبه وحده
مها: اووووكي حسابج عسير..
وصل غريب في هالوقت ماحس الا بفلعه على راسه بـ بوك منال..
غريب: عنبووج دفشه.. هزااااااااع.. هزاااع وينك ..
طلع هزاع من الميلس يطالع منو الي يزقره.. : مرحبا والله بولد الخاله..
غريب يتقرب من هزاع: اووه ماي كازن.. لوك يور فيوووونسييه وايد شريره .. (اوه ولد الخاله شوف خطيبتك وايد شريرة)
منال وهي قافطة وفي نفس الوقت معصبه وتتوعد لغريب.. وهزاع مبتسم يطالعهم.. : اصلا انت تسكت .. ماي فيونسيه حره باللي تسويه
اطالعته منال ورفعت له حياتها.. وشوي تسمع صوت بو هزاع.. جان تمد بوزها وفي خاطرها: لا بالله كملت الحفلة.. اليوم شكلي برد بيتنا معرسة
بوهزاع: انا اقول من وين هالنور.. اثاري منال هني..
منال: احم احم.. عمي شوف هاييل كلهم متفقين علي..
مها: لا انا صح
منال: انتي اولهم
مها: لا عيل اليوم مابتعشى في بيتنا بتعاقب
بوهزاع: تستاهلين . في حد يلعوز هالقمر
هزاع: انا بعد اقول جي في حد يلعوز هالقمر
بوهزاع: ايا اللي ماتستحي يدامي هالرمسه .. يلا انجلع من يدامي لا اييك شي مايرضيك
تم يتحايس هزاع بثمه من فشلته.. لأن الكل ناقع من الضحك عليه.. : اوكي يابوي ماعليه.. يوم بتغدين حرمتي براويج
منال: عمي شوف شو يقولي
بوهزاع: يهبي.. جانه ريال خله يقرب .. وبيشوف شو بييه
هزاع: اقول مهووي قومي انتي وغريب نسوي حزب المعارضه..
مها: يلا ماعندي مانع
منال: طع طع .. اتحريتج وياي.. مالت عليج حد يودر هالويه السمح (تأشر على بوهزاع) ويروح لل.. اسكت احسن
هزاع يطالعها بغيض وفي خاطره.. عنلاتج خبله شرات اختي.. بس حسابج عسير مالج شردة عني..
بوهزاع: منال يا بنتي تعالي ابا ارمسج شوي..
منال: ان شاء الله
وساروا سوا الميلس..
تقرب هزاع من مها ويودها من جتفها: انا اراويج يالهرمه.. ابوي شو يبا من منال؟
مها: شو تتحراني عالمة بالغيب استغفر الله.. يارجل إتقي الله في أختك
هزاع يدزها: سيري لا انتي الواحد لا ياخذ حق ولا باطل منج
مها طول الوقت تضحك.. ماعندها شي الا تضحك.. جان اتييها الخدامه
Housemaid: Madam.. your phone is keep ringing many times please come and answer I got a headache from it
مها: طاعو هذي تهزبني بعد.. هاتي التليفون وانتي ساكته
هزاع: احسن تستاهلين انتي محد يروم لج غير ديانا
مها: هي هي هي.. مايضحك
غريب يطالعهم ويضحك على هبالهم.. وراحت مها ترمس تليفون..
هزاع: حي الله غريب.. ها خلصت الثانويه
غريب: معلوم مابتعرف شي عني.. خلصت وادرس في المعهد البترولي حالياً
هزاع: زييين يالله ربي يوفقك.. الا صدق خالوو وريلها يدرون عن سالفتي
غريب: انا رمستهم وقلت لهم كل شي.. وامي ماعندها مانع ولا ابوي عنده مانع. يتريون راي منالووو
هزاع: لو سمحت اسمها منال
غريب: عاشووو.. من ألحين محامي الدفاع مستوي
هزاع: شي از ماي فيونسي اوكي..
غريب: عدال .. خلاص يابوي بنسكت اسفين
ابتسم له هزاع..: نش ندخل البيت ونرمس حر برع.. الدنيا صيف
=-=-=-=-=

فالميلس
بوهزاع: ها منال بنتي شو قلتي
منال: عمي انا لو ادور الدنيا مابلقى واحد شرات ولد خالتي يستر علي ويحشمني..
بوهزاع: هذا العشم فيج يا بنتي.. على بركة الله
منال ابتسمت له : تسمح لي اروح ألحين
بوهزاع: سيري ابويه الله يحفظج
منال: مع السلامه
وطلعت منال من الميلس واتصلت على غريب وردوا البيت
مها من سمعت كلام ابوها وهي تيبب ماتسكت..
مها: يافرحتي يااااااااااااااافرحتي
حمدان: شو السالفه؟؟ شو هالحشرة..
ام هزاع: انتي اييه يالخبله شو بلاج شالة الدنيا ع راسج
مها: من حقي اخوي بيعرس
حمدان: اسكتي الله يغربل ابليسج .. منو قال اني بعرس عن تسمعج حرمتي تسوي لنا سالفة
مها: اقول هذا يوم موتك الي بتفكر فيه انك تعرس مابيبب لك ويا هالويه.. هزاع الي بيعرس مب انت..
ام هزاع تتطالعهم مستغربة: لحظة لحظة.. فهموني وانا شو هني فالبيت.. مب أم؟؟ مو لازم اعرف كل شي يصير
هزاع يطالع امه ويهز راسه ويتنهد..: تعرفين عن كل شي؟؟ ماشفتج تعرفين عني متى ارد البيت ومتى اطلع.. متى اكل ومتى ارقد... متى امرض ومتى انجح ايام المدرسة.. شو تعرفين انتي؟؟ بس الصوالين وأعراس وعزايم حريم
أم هزاع: هزاع اسكت.. انت ترمس امك حشم شوي
بو هزاع: صدقه ولدج .. انتي متى افتكرتي فيهم. جان ماكان حال عيالج اليوم.. المهم مابخرب فرحتنا بهزاع برمسة وياج مالها معنى لأنج عمرج مابتفهمين شو يعني تكونين ام.. سيري عند الي تعيبين على انها هندية خليها تعلمج اصول الأمومه
ام هزاع: نعم.. الحين انت تقارني بذيج الهندية
بوهزاع: هالهنديه الي ترمسين عنها.. عيالها لو ما السجود لغير الله شرك.. جان سجدوا لها.. ضحت وعطت لعيالها اكثر مما خذت.. اسكتي الله يخليج
ام هزاع سكتت .. لآن فعلا ماعندها شي تقوله
حمدان: انزين ومنو الي بتاخذها
هزاع يصد صوب امه: مارحت مكان بعيد يا أميه.. باخذ منال بنت خالتي
ام هزاع: ومنال شو رايها؟ اعتقد عقب سواد الويه الي سويته مابترضى ترجع لك
بوهزاع: استريحي انتي سيري الصالون لا يبند عنج.. رمسنا البنت ورمست انا ابوها.. وماعندهم أي مانع..
أم هزاع محرجة: انتو لغيتو وجودي خلاص.. مالي اهميه عندكم تخطبون وتخططون .. ماباقي الا يملج واييني ويا حرمته يقولي هاي مرتي.. يعد طرش لي بطاقة العرس امييه انزين
تقرب هزاع وحبها على راسها: اصلا عرسي ماله معنى بدون وجود امي.. امي انتي عمرج ماحسستينا بالأمومه بس تعطينا بيزات كل يوم وتظهرين من غرفتنا.. عمرج ماطليتي علي تشوفين هل انا متلحف وانا راقد عن البرد.. عمرج ماسألتي عني فالمدرسة شو سويت وكم يبت .. عمرج ما اتصلتي تقولين لي وينك حبيبي تأخرت.. عمرج ماطبختي لي بإيدج وتأكلينا.. كل الي نعرفهم يقولون طباخ امنا كم يسوى وانتي..
ام هزاع ماخلتهم يكملون رمستهم وطلعت غرفتها وهي تصيح..
الكل تم يطالع المنظر متأثر.. اختفت ابتسامة الكل.. خصوصا مها وحمدان..
تنهد هزاع وصعد لغرفته متضايق..
=-=-=-=-=-=-=-=-=-=
=-=-=-=-=-=-=
=-=-=-=
=-=
=
اليوم الثاني في بيت عبدالعزيز
عبدالعزيز في الميلس وكان وياه أحمد .. يسلم عليه وبالمره يرمسه في الموضوع .. أحمد راد كل هالمسافة عشان هالإنسانه مب قادر يأجل الموضوع يوم واحد.. ودر ربعه في فندق من الفنادق وعلى طول سار بيت عمه
عبدالعزيز: ههههههههه يحليلك يا أحمد .. عيل هاي سوالفك في البحرين
أحمد: عمي الصراحة يبالك تسير هناك مره..
عبدالعزيز: هالعيوز تخليني اروح مكان..
دشت جلثم: اي عيوز فينا؟
أحمد نش بسرعه صوب يدته وحبها على راسها: حي الحيا .. حي غرشوبتي..
جلثم: جب عنلاتك الخام خوز عني.. ماباك ريحتك ريحة غرشوبة بحرينيه..
أحمد: أفااا يا امي هاي رمسة .. انا ولدج تربيتج..
جلثم: عيل هاي سواة تسويها تسافر وتودرنا تخليني اشتاق لك
أحمد: شو اسوي ابا اشوف غلاتي عندكم
عبدالعزيز: يا أحمد غلاتك عندي غلاة ولدي الي الله ماكتب اني اييبه
أحمد: سلمت عمي عساك ذخر يارب
عبدالعزيز: والله يا إحمد لو كنت ادري بالموضوع من البداية لا حرمت بنتي تكون لغيرك
أحمد انصدم.. وصد صوب يدته: مافيج صبر لين ما انا ارمس يعني
جلثم: انت ماتدريبي مابات الليل وانا افكر فيك وفي هالفقيره الي فوق..
أحمد: محد فقير غيري.. ومجد درت بالموضوع
عبدالعزيز: لا بعدنا مارمسناها
جلثم: بعد مايباله تشاورونها البنت موافقه من عيونها تبان
أحمد: يدوو ماحيدج تعرفين تجذبين وانتي شدراج
جلثم: جب .. جب يلا لم ثمك بلا رمسة ماصخه.. قالي اشدراج.. انت والباقي لو تروحون السما وتنزلون انا يدتكم ماترومون تخشون علي شي ..
عبدالعزيز: في هاي صدقتي امي..
جلثم: قم يلا من يدامي .. يالصخام
أحمد: امي بلاج اليوم علي .. ماخذتني بشراع وميداف..
جلثم: قم ماعنا بنت انيوزك اياها .. لسانك غادي طويل يباله قص
أحمد تقرب من يدته : افا والله .. لا لا كله ولا انكم ماتيوزوني اياها..
عبدالعزيز ضحك على عفوية احمد إلي نفسه من انتبه لكلامه استحى يدام عمه.. بس عبدالعزيز مازعل منه.. تذكر نفسه يوم كان يحب لطيفه وكيف امه تهزبه لأنه كان دوم يطفر بها لين ماوافقت عليه..
دخلت لطيفه مستانسه تسلم على أحمد وترحب به
لطيفه: عيل هاي سواة تسويها يا أحمد .. تسافر وانت زعلان علينا..
أحمد: ماعاش الي يزعل منج عمتي
لطيفه: يعني جان ييت ورمستني وقلت لي.. وانا من لي اغلى منك يا ولدي
أحمد: عساج ذخر عمتي..
لطيفه: سلمت يا ولد ميثا.. الا وينهم الخدم مانجبو الغدا..
جلثم: خدمج هاييل كلهن لازم ينراغن.. ولا خليني اصلخهن بهالعصا في الحوي.. عشان يتأدبن
لطيفه: لا أميه حرام عليج فقاره هاييل مساكين
جلثم: محد فقير فهالبيت غيرج يا لطوف..
لطيفه: ههههه..
مجد كانت فوق في غرفتها طول الوقت ماتطلع اصلا.. تعابل الصغيره.. لأن مقرر في هاليوم يودونها بيت عبيد .. واتم هناك اسبوع ويردونها.. مجد تتضايق بس في النهايه ماتقدر تحرم البنت من ابوها.. سمعت صوت أمها تزقر عليها..
مجد: امي خفي صوتج ريم راقدة..
لطيفه: انزين البسي المخورة .. وشيلتج ونزلي نتغدى ولد عمج هني..
مجد برطمت ومشت صوب الغرفه.. ها بعد ليش مستعيل .. بنييب له بنته اليوم .. الا ايي من الحين ياخذها .. عالأقل يتريا القايله خلاف ايي
ولبست لها مخورة كحليه.. عليها تطريز خوص بالفضي.. ولبست لها شيلة ونزلت..
لطيفه: الله شو هالزين شو هالحلاة كلها.. ربي يبلغني فيج عروس افرح بج واشوف عيالج يارب قولي امين
مجد تبتسم لأمها: امين يا أحلى ام..
مشت ويا أمها ودخلت الميلس.. شافت أحمد بس من ظهره فماقدرت تعرف منو ها.. او بالأحرى مب مستوعبة.. معقولة عبيد ضعف جي.. (لأن عبيد مليان شوي .. وعريض)..
مجد: السلام عليكم..
وقفت اللقمة في بلعوم أحمد الي من سمع صوتها رفع راسه طاحت عيونه في عيون يدته الي تمت تلعب له بحياتها..
عبدالعزيز: حياج تعالي.. عليج السلام
مجد استغربت ليش مارد عليها السلام عبيد.. اول ماتقربت صوب السفرة وقعدت وشافت ويهه... ردت وقفت من الصدمة.. الكل انتبه لها.. وهالشي الي أكد لأمها وابوها ان مجد فعلاً في مشاعر تكنها صوب أحمد
وانتبهت لنفسها وردت قعدت تمثل انها طبيعيه..
مجد: حمد لله عالسلامه ولد عمي..
أحمد: الله يسلمج..
مجد تقرب من يدتها: العادة منقود الحرمة تيلس ويا اخو خطيبها او بالأحرى ريلها.. واشعنه زاقريني
جلثم: انجعمي.. تقول منقود اونه.. انتي تعرفين المنقود اصلا.. استريحي وكلي انتي بس.. فكينا الله يخليج.. وبعدين منو الي اخو خطيبج..؟
مجد فاجه عيونها مستغربه من رمسة يدتها.. : شو منو .. يدو لا تخبلين بي..
جلثم: محد غيرج الخبل في هالبيت كله.. ومن عقبه امج
ضحكت مجد يوم سمعت طاري امها..
لطيفه: شبلاكم تصاصرون.. خلونا نضحك وياكم
مجد: لا ماشي..
مجد تمت تلعب بالعيش الي غرفته ومب قادرة تاكل.. ولا أحمد قادر يركز في أكله وياكل عدل.. نش
أحمد: تسلم إيديج مرت عمي..
لطيفه: هني وعافية.. بس ماكلت شي
أحمد: لا تسلمين شبعت..
ونش احمد وسار الحمام.. ومجد بعد نشت
لطيفه: مجد أمي ماكلتي..
مجد: لا بسني شبعت امي..
جلثم: هههههههههه لواتة بنات.. سيري فديتج سيري..
مشت مجد بدون لا ترد على يدتها ولا بالعادة لسانها طويل.. وصدت جلثم صوب لطيفة وعبدالعزيز: يوم اقولكم ماتصدقوني
لطيفه: اششششش البنت ماتعرف شي
جلثم: مصيرها بتعرف كل شي..
=-=-=-=-=-=-=
طبعاً شرات ماعرفنا ان الدكتور محمد وطيف ملجوا..
محمد: يلا عاد حبيبي ماجهزتي.. محلات المفروشات كلهم بيبندون وانتي بعدج
طيف: انزين يايه والله نازله دقيقة بس..
محمد: اترياج في الموتر
طيف: اوكي..
وطلعت طيف من بيتها وركبت موتر محمد
محمد: مابغيتي العروس تتجهزين
طيف: انت ماخبرتني الا ساعه قبل يادوب وحالي اتزهب..
محمد: مره ثانيه بتصل بج 8 ساعات قبل زين
طيف وهي تبتسم له: هيه زين
محمد : وافديت هالإبتسامه.. يالله مابقى شي نفرش الشقة ان شاء الله ونعرس واجابلج 24 ساعه
طيف: خيبه بمل منك جي..
محمد: شو ماسمعت عيديها مره ثانيه..
طيف: ها ماشي سلامتك ..
محمد: اتحرى بعد اني سمعت شي..
تبتسم له طيف ويتحركون صوب محلات المفروشات عشان يكملون فرش الشقة ويستعدون للزواج..
=-=-=-=-=-=
مجد تمت يالسه تتطالع من الجامه.. تذكرت اليوم الي كانت تشوف فيه أحمد على اول ايام زواج حور.. كانت هيه وخلود في نفس هالموقف وهن يشوفن أحمد تحت..
ابتسمت وهي تتذكر الي صار
=-=-=-=-=
(نرحع بذاكرتنا للبارت الثاني من القصة)
مجد وخلود كانو جريب الدريشه ويسولفون.. فتحت مجد الستاره شوي عشان تشوف برع.. شافت احمد.. وتمت تتطالعه..أحمد مغرور شوي لجماله.. حنطاوي وخشمه طويل شرات اخوه عبيد شرات ماقلت قبل .. هذي علامة العايلة.. أحمد طبعه يخف لحيته شوي واما شواربه شوي تكون أغلض.. الكل يحط عليه.. بس هو ولا مهتم.. من طبعه لا اطالع وحده وركز فيها يرفع حاجبه اليسار عيونه عيون بدويه وسيعه وخامله شوي عنده شامه صغيره شوي في رقبته ومطول شعره شوي على حد اذنه وشوي اطول ... تقربت منها خلود واطالعت احمد وتساندت على الدريشه وجابلت مجد: هيه انتي وين سرحتي..
مجد: ههههههه.. لا بس اشوف ولد عمي فيها شي..
خلود: ابد مافيها شي.. وماعليج منه يغازل اكيد احين..
مجد: اشووو؟؟
خلود: يحليلج نسيت انج ماتدرين عنه شي.. هذا الي تشوفينه مامخلي بنت لحالها.. ياما اكتشفت ان بنات اعرفهن يرمسهن.. من جي اقول لج مادانيه..
مجد: لو درت به يدتي تدرين شو بتسوي..
خلود: هههههه.. لا ماتخيل شو بتسوي فيه..
مجد تمت تتطالعه وتحس قلبها يعورها.. ماترضى ان ولد عمها يكون جيه.. تذكرت اسلوبه وهو يرمسها امس .. قبل لا يعرف انها بنت عمه كان عاق الكلفة شوي.. صكت الستاره بقهر ومسكت ايد خلود ..
=-=-=-=-=
تنهدت وفتحت عينها شافته مره ثانيه في نفس المكان.. وهو يتعبث بتليفونه..
مجد: بوطبيع مايوز عن طبعه..
وشوي تسمع صوت التليفون.. يوصل لها مسج وصدت صوب الجامه تشوف أحمد إختفى..
راحت صوب التليفون تشوف المسج من منو



< تغازلين منو اعترفي شفتج.. الظاهر خطيبج ماصلبج عدل>
يلست مجد تتطالع المسج ..
هذا من صدقه ألحين ولا يستهبل.. ردت عليه
< يوم بتكون ولي أمري وقتها تعال إتأمر >

قرا أحمد المسج ويلس يضحك... ولي أمرج غصبن عنج الدبه .. انا براويج ماعليه.. لسانها طويل بنت عبدالعزيز..
< لسانج يباله قص >
تقرا مجد المسج وهي مغيضه..
< دخيلك تعال قص لي إياه >
أحمد مايعرف يغيض ولا يضحك على رمستها.. صدق هالإنسانه تعني له أشيا وايدة ويتم يحبها لو شو ماتسوي..
< بييج يوم وبتفهمين كل شي >
مجد لا إرادياً رفعت حياتها مستغربه.. هذا شو قاعد يخربط.. لا اليوم محد صاحي.. ورن تليفونها فزت من مكانها. كان عبيد الي متصل فيها..
عبيد: اقولج انتي اييه... هاتي البنت تحت اترياج؟
مجد تبا تستوعب.. هذا عبيد ليش يرمسها بالإسلوب.. لا بالله اليوم الكل مينون رسمي.. : شو ايه ماعندي اسم..
عبيد: اقولج بلا طولة لسان ورمسة مالها معنى.. يلا هاتي الريم اتريا
مجد: لا والله.. السالفه عناد يعني.. اخبرك البنت مابتنزل اوكي
عبيد: مب بكيفج.. يوم بتكون البنت بنتج اتحكمي فيها
مجد: بنتي غصبن عن الي مايرضى.. راوني شو بتسوي..
عبيد: اكسري الشر وانزلي وياج البنت..
جلثم تتطالع عبيد ومستانسه .. لأن الي قاعدين يبون يسوونه يخلون مجد من نفسها تكره عبيد وترفضه نهائيا.. وعبيد نفسه مب هاينه عليه يسوي هالشي.. بس عشان سعادة أخوه يهون عليه كل شي
مجد: اقولك مب يايبه البنت يعني مب يابتنها.. دام السالفة فيها عناد.. انا محد كثري عنيد..
عبيد: سمعي انا مافي شي بيمنعني ادش الغرفه واشل بنتي واسير..
مجد: لا والله ليش تهدد.. تعال ونفذ..
عبيد بند في ويهها.. وصد صوب يدته..
عبيد: والله اميه لو سرت فوق بتتصفع هالبنت على إيدي.. لسانها طويل..
جلثم: يوم أقولكم مجد ماتليق لـ عبيد.. انتو ماشي كل شي عندكم بالعناد..
عبدالعزيز: عبيد نحن اتفقنا انك اتشد عليها بس مب جي.. عاد هاي بنتي مابتهون علي..
لطيفه: تدرون لو العرب يدرون بسواياكم هاي بيضحكون.. اسميكم مب صاحين.. شو هالأحمد الي خلا العايله كلها تنجلب..
جلثم: هاي فيها سعادة بنتج يالهبله..
لطيفه: عمتي عاد من الصبح وإنتي ماعندج غير تحطين علي.. خفي شوي علي
عبدالعزيز: فديت هالعيوز انا..
جلثم: أي عيوز فينا..
عبدالعزيز: اثنينكم تاج راسي ونور هالبيت
عبيد: يالله انا ساير فوق .. واسمح لي عمي انا ماقدر امثل زود.. مجد شرات اختي وماتهون علي.. برمسها وبقولها اني ماباها .. وبنهي الموضوع ليش انطول السالفة
جلثم: شوفو الأيام كيف تتغير.. بين يوم وليله الحال تغير بالمره..
عبدالعزيز: والله ودنا نفرح ونستانس وننسى الهم شوي..
لطيفه: بس عمرنا ماراح ننسى حور ربي يغفر لها يارب
عبيد: شي أكيد..
=-=-=
مجد في هالوقت في غرفتها وتتطالع الباب تتريا في أي لحظة إن عبيد يدخل.. وفي نفس الوقت تحس ان في شي مو طبيعي قاعد يصير.. الكل غير طبيعي.. قاعدة تستوي اشيا اول مره تشوفها في حياتها..
كأنهم خلال يوم وليله نسوا كل اللي كانو متربين عليه وقوانين سنتها العايله..
وشوي تنصدم بدخول عبيد.. تمت مذهوله تتطالع
مجد: قبل لا تنطق بأي كلمة.. عبيد فهمني شو اللي قاعد يصير.. أنا متأكدة ان في شي مب طبيعي.. مو معقول الي قاعد يصير.. اليوم اجتمع ويا اخوك على نفس السفرة.. ويطرش لي مسج ويقول الي يقوله.. وكلام يدتي.. والحين انت دخلت غرفتي وها اكبر منقود في العايله.. كيف ابوي سمح لك تدخل؟؟ ابوي الي دومه متشدد في كل شي.. لا في شي غير طبيعي.. ممكن تفهمني..
عبيد صد وراه وشاف عبدالعزيز واقف يهز راسه .. كأنه يقوله قولها.. ابتسم عبيد..
عبيد: انزين ممكن تطلعين الصالة.. برمسج في موضوع..
مجد مشت برع غرفتها .. كانت بتبند الغرفه بس تذكرت الريم.. خلت الباب شوي مفتوح.. وقعد عبيد ومعاه مجد.. وعبدالعزيز واقف.. ومجد مصدومه تتطالع
مجد: ارمس لا تحرق أعصابي
عبيد: مجد بإختصار.. أنا ماباج.. وحرام اظلمج وياي على حساب وصية ..
مجد تمت تتطالع عبيد مستغربة من رمسته.. : لا والله.. وكلام حور ماله معنى عندك
عبيد: حور كلامها على عيني وراسي.. بس ردي علي بصراحة.. يرضيج تتزوجين انسان هو في غرفه وانتي في غرفه.. والي يجمعكم بنت بس عشان تربيتها.. يرضيج تعيشين زوجة بإسم بس؟؟ اذا هالشي يرضيج انا ماعندي مانع..
مجد تنصدم أكثر.. وتصد صوب أبوها..
عبدالعزيز: مجد نحن تهمنا سعادتج وسعادة عبيد.. والعايله كلها اجتمعت على إنج انتي وعبيد ماتصلحون تعيشون سوى.. حور بنتنا والله يرحمها وغلاتها وغلاتج واحد عندنا.. مابنفضلها عليج ونحتم عليج حياة تنظلمين عشانها
مجد نزلت دمعتها وهي تتذكر كلام اختها.. : بس ..
عبيد: لا بس ولا شي.. يا بنت الناس انا نفسي ماتطاوعني آخذ اخت حرمتي خلاص عاد.. كنت قبل مهووس بالوصية وبعدني كنت في فترة صدمة من فراق حور.. لكن يوم فكرت فيها بعقل .. اصلا الزواج ماراح يكون صحيح.. لأن كل الطرفين هدفه من هالزواج إرضاء نفس ميته.. على حساب تعاسه إنسان..
مجد ماقدرت تيود عمرها ويلست تصيح.. : محد حس فيه غير يدتي.. والله يا عبيد ماتدري برمستك هاي اشكثر ريحتني.. مابات الليل وانا أفكر كيف بتكون حياتي .. كنت اقولكم انا موافقة وفي قلبي إمية طعنة وطعنة.. ربي يوفقك يا ولد عمي.. بس لي طلب واحد بس..
عبيد ابتسم لها.. ولطيفه تسمع رمسة مجد وتصيح انها كانت بتدمر بنتها بدون لا تحس.. وجلثم مستانسة.. : تامرين بنت عمي
مجد: الريم تتربى عندي.. ويتم شرات ما اتفقنا البنت تكون هني اسبوع واسبوع عندكم..
عبيد: لج الي تامرين به.. بس مره ثانيه يوم اقولج نزلي البنت نزليها..
مجد تضحك.. : ان شاء الله..
عبيد: وتسمحين لي يدام عمي ويدتي وعمتي .. أخطبج لواحد يعزج ويقدرج.. ويسوي أي شي مقابل بس يفرح فيج وتفرحين به..
مجد مستغربه وتصد صوب أبوها..
عبدالعزيز: وإذا انتي تأمنين برمسة أبوج وتوافقين رايه.. هو الإنسان المناسب لج
مجد ترد تصد صوب عبيد تترياه ينطق..
عبيد: احمد يا مجد.. ابا اخطبج لأخويه أحمد
مجد ماتعرف تضحك ولا تصيح ولا شو تسوي بالضبط لأنها صدق مصدومة من كل شي قاعد يصير.. معقولة بهالسرعه الأمور تمشي.. وألحين يمكن قدرت تحصل تفسير لرجوع أحمد من السفر.. بس كانت حاسه نفسها مب قادرة تقعد وياهم زود.. مب قادره تتطالع في عيونهم لأن عيونها فضحتها.. طلعت من المكان وردت غرفتها..
عبيد: انزين ييبي لي بنتي..
دخلت الغرفه ويابت ريم.. وشنطتها.. وكان ابوها اقرب واحد لها.. سلمته ريم وحطت الشنطة على الأرض ورجعت لغرفتها وبندت الباب..
عبدالعزيز: آخ منكن انتو البنات..
عبيد: هات بنتي ولهت عليها ..
وشل عبيد بنته وكانت في هالوقت البنت راقده ولكن كانها مبتسمه.. حبها على خدها وهو مستانس اخيرا ارتاح ضميره..
جلثم: وين على الله
عبيد: بسكم ماشبعتوا من بنتي خلوني اشوفها شوي تولهت عليها
جلثم: الله يبلغك فيها عروس ان شاء الله
عبيد يبتسم: آمين يارب..
وطلع من البيت..
لطيفه صاعدة الدري بتسير عند مجد
جلثم: انتي وين سايرة؟
لطيفه: سايره عند مجد بشوف شو حالها...
جلثم: تعالي هني خلي البنت تفكر شوي ع راحتها.. عيوز مخرفه
لطيفه: هههههههه ردينا.. على امرج ننزل
----=----=----=----
في غرفة مجد
-=-=-=-=-=-
واقفه يدام المرايه تتطالع عمرها شوي تضحك.. وشوي تكون عادية..
معقولة الي قاعد يصير صدق.. لا لا أكيد أنا أحلم.. خل اسير اغسل ويهي.. من التعب مب راقدة عدل قمت احلم وايد.. سارت الحمام.. وغسلت ويهها مره.. واطالعت بالمرايه.. لا بعدني راقدة.. ردت غسلته مره ثانيه.. لا انا مب راقدة.. مب راااااااااااااقدة.. وتضحك بصوت عالي.. وعقب تحط ايدها على ثمها
عنلاتج احين بيفهمون عليج وبيقولون البنت مب مصدقه انها بتعرس
تذكرت خلود واتصلت فيها على طول..
مجد: هلا بهالصوووووووووت .. مرحبا ملاييييييييين.. حي من سمع هالصوت والله.. فدييييييييتج انا .. ولهت عليج يالغاليه بنت الغاليه .. بنت عمة الغالي.. اشحالج شخبارج؟؟ واشحال الي في بطنج.. وشخبار ريلج واهل ريلج.. سلمي عليهم سلام كثر وقولي لهم مجد تسلم عليكم ذاك السلام اللي من القلب للقلب..
خلود تسمع مجد وكل شوي تتطالع شاشة التليفون.. كأنها تبا تتأكد ان راعية المكالمة هيه مجد..
مجد: خلودووو بلاج ماترمسين..
خلود: لا مستحيل انتي مجد شو هالحب والحنيه الي نازله عليج
مجد: من اليوم وساير مابتشوفين الا الحب والحنان وكل شي حلو من صوبي
خلود: هههههههه مجووود شو بلاج.. الظاهر هالبنت خلتج تستخفين..
مجد: لا وانتي الصاجة.. ابوها الي خلاني استخف
خلود: لحظة ابو منو تقصدين
مجد: ابو ريم .. الظاهر انتي بعد مستخفه
خلود: والله الي يسمع رمستج لازم بيستخف
مجد: اسكتي اسكتي .. اسمعي الخبر التالي.. أحمدوو خطبني
خلود نشت من مكانها من الصدمه.. وجاسم يطالعها مستغرب.. : حبه حبه علي الله يخليج.. قلبي بيوقف لا تصدميني بهالطريقة.. كيف ومتى وشقايل.. عطيني كل التفاصيل
مجد: اصصصصص ولا كلمة بقولج.. تعالي بيتنا عقب بقولج
خلود: جااااسم الحق علي بيغمى علي..
جاسم سحب التليفون من خلود: انتي اييه شو تبين من حرمتي .. ناويه عليها ولا شو السالفه؟؟
مجد: ههههههه جاسم انت وخلود معزومين على ملجتي انا وأحمد
جاسم: خلود اتريي لا يغمى عليج انا بعد بيغمى علي وياج..
مجد يلست تضحك على هبالهم.. وبندت عقب..
=-=-=-=-=
فطوم: شو السالفه
خلود: مادري للحين مب فاهمه شي.. مجد بتاخذ أحمد
فطوم: الله وناسه.. ومتى خطبها ؟
خلود: مادري..
منى: عيل بسير اكتب قصيدة
فطوم اتيرها من شعرها: تعالي انتي لا اتخليني اكتب مرثيه عليج..
منى: ويه بسم الله علي ليش هالفال..
فطوم: بس .. انزين جاسم انا ومنى يايينك في سالفه نبا نرمسك فيها..
جاسم: خير قولو..
منى: شوف جاسم .. الإنسان عندما يجتهد ويتعب يحتاج من بعدها إلى فترة نقاهة أليس كذلك..
جاسم وهو يضحك .. : نعم نعم..
فطوم اتدز منى : خوزي انتي ويا مقدماتج .. بإختصار.. باقي على الدوامات اسبوعين.. ونبا منك اتودينا صلاله.. تغيير جو..
جاسم يصد صوب خلود: لا تتطالعني انا توني حامل مابقدر ايي.. وخواتك من حقهن الصراحة.. اذكر يوم خلصت الثانويه سافرنا شهر فرنسا وردينا..
جاسم: بس الإخت ناسيه شي وايد مهم
فطوم: شووو
جاسم: الجامعه منو بيسجل فيها .. أمي..
فطوم: ههههههه نسيت سالفتها.. خلاص باجر شو.. الأربعا.. يعني مجال التسجيل بعده.. بنسير وياك باجر وبسجل في كلية الطب..
جاسم: وبعدين في شي ثاني نسيتيه
منى: لحوووووول بعد شو وراها هاي
جاسم: امتحان تحديد المستوى
فطوم: انزين جاسم يعني مابنسافر.. (كانت متأملة انها تسافر على الأقل تغير جو وتطلع من جو الإكتئاب الي هيه فيه.. صح ان منى مامعطتنها مجال للتفكير بالمرة.. لكن هذا مايعني ان ذهنها صافي. توها كملت 24 ساعه من طلاقها.. وهي في هالعمر صعب عليها تتقبل مثل هالأمور بالسرعة هذي)..
فطوم كانت الدمعه في عينها.. طلعت من الغرفه وصعدت غرفتها..
منى: شفت عاد زين جي.. خليت اختي الوحيدة تصيح.. انت عارف نفسيتها كيف.. تحتاج انها تغير جو عشان تنسى.. وتقولها دراسه.. لاحقه عليها.. حتى لو ضيعت هالفصل .. عندها الفصل الثاني.. فالنهاية بتسير جامعه خاصه يعني عادي اي وقت.. لا تشد عليها..
خلود: جاسم صدقها منى اول مره ترمس بعقل..
منى تقاطعها: كلي عقل اصلا..
خلود: لازم تغير جو.. فطوم عمرها 17 سنه.. والي صار مب شوي على وحده بهالعمر..
جاسم: خلاص قولي لها يوم الجمعه ان شاء الله بنتحرك..
منى: وااااااااااااو
ربعت حبت اخوها على راسه وسارت تبشر فطوم الي طارت من الفرحة من صوبها..

=-=-=-=-=-=-=-=-=-=
بهذا تكون كل الأوضاع مستتبه في بيوت أبطالنا
مجد ملجت وبدت تتجهز للعرس.. وطبعاً طلابنا وطالباتنا (خلود.. مجد.. منى.. فطوم.. عمّار ) كلهم رجعوا للمدرسة.. لحظة نسيت الزعيم .. علاوي اخو خلود..
كل دخل أمامه درب ومستقبل يكمل مسيرته فيه
فطوم : صيدله في جامعه الشارجة
منى: بعدها في المدرسة.. لكن عمرها مانست الشعر وهوسها فيه
خلود: تكمل دراستها في جامعه زايد وهالسنة تخريج.. وغير انها متأقلمة مع وضعيتها اليديدة.. الحمل
مجد: سنه تخريج.. وتستعد لزواجها في عطلة الربيع..
عمّار: شرات ما وعد أمه.. إلتحق بكلية الإمارات للطيران.. يدرس فيها طيران..
هزاع: الحبيب بعد عذاب ومذلة من الخطيبة منال.. وافقت عليه بشروط... وهزاع ماكان عنده اي مانع.. التحق بكلية خاصه يكمل فيها دراسته بتشجيع من منال.. ويستعد لتحضيرات زواجه الي تقرر في الصيف الي بعده وهذا لأن أم منال مسافره مع اخوها للعلاج برع البلاد..
شما: مستانسه مع سلطان الي مب مقصر عليها بشي.. تحسنت احوالهم المعيشيه.. وصار عندهم بدال الخدامه .. هنتين.. يساعدن أم شما في البيت.. وعمّار قام يكشخ بأحلى واحدث السيايير وكل الي في خاطره كان مايقصر فيه بوهزاع.. اممم زواجها من سلطان.. تقرر انه يكون بعد ولادة خلود.. حضرتها تبا تكشخ.. حركات حريم
الدكتور محمد وطيف.. تحدد زواجهم بعد عيد الفطر
خوله وخليفه حياة مستقره وطبيعيه ..
أحمد: يشتغل مدير لشركة عبدالعزيز.. ومسانده في كل شي..
عبيد قرر يكمل دراسته ويشغل نفسه وسجل في احدى الجامعات يكمل فيها ماجيستير.. والزواج مشروع وارد ولكنه مؤجل
نوره بواسطة ابوها .. قدرت تشتغل في احدى الشركات .. مترجمه.. لأنها تتقن الفرنسية لظروف سكنهم السابق هناك .. والإنجليزيه.. وبدت تشغل نفسها.. والعيال تمن شرات ما اتفقت شيخه مع اهل زوجها..

لحظة.. على شو مستعيلين.. ماخلص البارت..
هناك أحداث أخرى تنتظركم

مرت الشهور وكلن على حاله..
وصلنا لليوم الي الكل يترياه
يوم زواج أبطالنا
مجد وأحمد
=-=-=-=-=-=

خلود وهي تمشي ببطئ.. حاسه بالثجل.. دخلت الشهر الخامس.. وبدا الحمل يبين عليها.. تمشي صوب مجد.. وتبتسم لها..
مجد: ههههههههه شكلج يضحك بهالبطن..
خلود: ماعليه بييج يوم وبضحك عليج اتريي.. الله يسامحج انتي ماعرستي الا يوم انا حامل.. الحين كنت برقص لج..
مجد: ارقصي وانتي حامل دخيلج خل نضحك شوي..
خلود: سباله .. طاعو هاي تباني ارقص عشان تضحك علي.. مهرجة يدامج انا..
مجد: ههههههههههه.. انزين قولي لي.. شكلي مرتب.. احس مكياج عيني اليمين وايد غير عن اليسار.. مب شي
خلود: لا غير ولا شي.. بالعكس وايد حلو.. انتي يتهيأ لج من الربكة
مجد: تتوقعين يستانس يوم يشوفني..
خلود: انتي أصلا سخيفه.. عمري ماشفت انسانه شراتج في هالدنيا... عيل شي حرمة شراتج ماترمس ريلها طول آخر 4 شهور من العرس ولا تخليه يشوفها.. بس مسجات جنكم مادري شو
مجد: هههههههه هيه انا جي.. انتي شو عرفج اصلا.. عشان يشتاق لي
خلود وهي تسوي لها حركة مالت.. : مادري على شو يشتاق..
مجد وهي تتطالع خلود بنص عين: لا والله.. اوكي ماعليه خل يخلص العرس براويج
خلود: ههههههههه انتي اصلا من اطير طيارتكم بتنسين كل من حواليج
مجد: لا فديتج ما انسى حد..
خلود: انتي من صجج بتودين الريم وياج السفر.. انتي في شهر عسل كيف تودين البنت وياج
مجد: خلود.. شرط زواجي كان ان البنت تتربى عندي.. انا امها..
خلود: بس السفر احسها مصاخة منج.. ترا الياهل عندها ابو لو نسيتي..
مجد: لا مانسيت.. والبنت منو قالج انها بتسافر وياي.. بتكون عند ابوها.. بس يوم ترجع بتعيش وياي
خلود: ماختلفنا يوم ترجعين شي ثاني..
دخلت عليهم مروه الي كانت لابسه فستان أصفر .. بسيط وايد.. وفاله شعرها الطويل.. : يالله العروس متى ناويه تنزلين ان شاء الله يوم يروحون المعازيم..
مجد: ههههههه بنزل بس اخلص تصوير
خلود: بطرانه مرت اخوج وايد خقاقه
مجد: كيييييييييفي.. مب مرت أحمد.. من حقي اخق..
مروه: ويييه سكتتنا الصراحة..
مجد: ههههه..
المصورة: خلك هيك .. بدي صورك هالصورة..
.. ..

.. ..
طلعت مروه وسارت تشارك الحريم في الصاله الي كانو يستقبلون الضيوف.. كان الجو في الصالة روعه.. نورة كانت يالسه على نفس الطاوله الي يالسه فيها عمتها وخوات ريلها.. والعنود ومهره عيالها.. وفطوم ومنى يرقصن ويا باقي البنات على الإستيج..
تقربت منى من فطوم وتهمس في إذنها: منى شوفي تحت.. صوب الحاجز.. عاليمين.. في حرمة ماشلت عينها من عليج وانتي تمشي وحتى ألحين ياسه تتطالع
فطوم صدت الصوب الي وصفته لها منى: هيه هاي بنتها ويانا في الجامعه بس اكبر عني بسنة..
منى: اهااا..
.. ..
نشت شما وشاركتهم الفرحة.. والكل تونس عليها..
مريم: بس ماشاء الله عليج صدق عرفتي تنقين حرمة لولدج ماشاء الله عليها حلوة والكل يمدح فيها..
شيخه: هيه فديتها .. وطيبه وايد بعد..
مريم: الله يهنيها ويا ولدج ان شاء الله
شيخه: تسلمين عقبال ولدج طارق..
مريم: طروووق هذا عازف عن الزواج خليه.. الا صدق متى بيكون عرس سلطان ان شاء الله؟..
شيخه: تعرفين حركات البنات .. خلود متشرطة عليهم ماتعرسون الا بعد ولادتي اذا الله راد ان شاء الله..
مريم: هيه .. يالله بالبركة ان شاء الله.. وشو احوال نوره بنتج وشو نفسيتها ألحين..
شيخه: الحمد لله وايد احسن.. مشغوله ويا عيالها.. وتشتغل فديتها في شركة تقضي وقتها على الأقل وملتهية
مريم: زين تسوي.. ربنا يصبرها..
جلثم قاعدة حذالهم وراسها معورنها من أسئلة هالحرمة.. كل شوي تسأل عن شي..
مريم: الا العروس متى بيدخلونها..
صدت جلثم صوب الحرمة: انتي يا حرمه ماتعرفين تسكتين.. الله يعين ريلج عليج.. خليتي حد مانشدتي عنه .. تأكدي دوري عدل فالصالة يمكن تلقين لج حد ماسألتي عنه..
قفطت مريم .. وشيخه ودها تضحك بس ميودة نفسها.. وشوي نادت ميثا عليها لأن العروس بتدخل.. والحريم يبن يساعدونها ..
مجد وهي واقفه ورا باب الصالة وهو بعده مسكر..
مجد: خلود احس ريلي تتراقل (ترتجف) من الخوف.. ماعرف كيف بدخل..
خلود:عادي امشي على ريولج وادخلي مايبالها
مجد: سخيفه تدرين.. افففففف مامنج فايدة
خلود: ههههههه.. ماعليج انتي خلج طبيعيه.. عشنا هالتجربة قبلج.. اول شي تحسين انه يزيغ بس خلج طبيعيه ..
مجد: اقول غيرت رايي مابا اعرس.. دشي بدالي وقولي لهم العروس كنسلت العرس
مروه: طاعو هاي انتو.. توها تقول انا مرت احمد ومن حقي اخق.. والحين اسمعيها شو تقول.. اونه كنسلت العرس.. بكيفج..
مجد: الصوت يخوف.. احس وايد ناس داخل..
خلود: هههههههه مادري وين داخله مسرح أوبرا عشان يكون وايد ناس داخل.. الا هي صالة عرس ..
مجد : انزين يلا افتحوا الباب..
مروه : قوية هالبنت.. ههههههه شديدة ماشي تفاهم كله تامر..
وفتحوا الباب على انغام موسيقى كلاسيكية.. ومشت خطوتين لين ماوصلت للمدخل.. وعقبها بدت تكمل مشيها وهي تتطالع الحضور بإبتسامة خفيفه تخفي من وراها فرحة وخوف من الموقف.. كانت طالعه جميله وااايد.. الكل
لاحظ ان مجد ضعفانه.. قبل كانت غزوزها مبينه.. وألحين ماشي.. الفتره الي مرضت فيها حور.. وبعد وفاتها أثرت على الكل.. خصوصا على مجد.. اثر هالشي على تغذيتها وغير قلة النوم عشان الريم.. لكن عمرها ماشتكت ولا تعبت.. ودومها تقابل الناس بهالإبتسامه.. تبا تبين للكل انها سعيدة .. وهي فعلاً في هاللحظة تمتلك كل مقومات السعادة الي تخليها مستانسه من نفسها والي يصير حواليها..
مشت وهي سرحانه .. تحس نفسها تمشي صوب عالم يديد راح تدخله وتبدأ مشوار حياتها مع انسان طول عمرها حبته.. يارب ماتخيل عمري كنت بكون لغيره وخصوصاً أخوه.. آآآه كان بيكون اصعب شي.. كان ودي في هاليوم تحضره اختي الغاليه بس الحمد لله على كل حال..
وصلت الكرسي ونست انها لازم اتم واقفه 5 دقايق على الأقل.. يلست على طول.. يودتها مروه وقفتها..
مجد: شو بلاج؟
مروه: نسيتي لازم اتمين واقفه
مجد: هي هوالله نسيت.. يختي من رهبة هالمكان والحشره قمت ماعرف كيف اتصرف
مروه: حليلج..
وارتبشن الحريم.. وين رباعة مجد يسلمن عليها . مستانسين يشوفونها أحلى عروس يدامهم.. وشوي في وحده بعد يايه صوبها.. كان الويه مألوف لمجد بس ماتقدر تشوفها عدل..
مجد: هندوو منو هاي..
عنود: اويييه هاي شو يايبنها .. منو عزمها أصلا..
مجد: شو السالفه خبروني..
هند: لو تعرفين منو الي يايه يا مجود بتيرين شعرج..
مجد: لا مافيني التسريحة بتخترب انتي يري شعرج عني..
هند: سخيفه الله يعين ريلج على سخافتج..
وشوي وصلت لها هالبنت.. مدت ايدها تسلم ومجد مصدومة من وجودها.
جواهر: ألف ألف مبروووك.. يوم سمعت خبر زواجج قلت لازم اييج وابارك لك لج بنفسي..
مجد بحاله صدمة: الله يبارك فيج .. تسلمين..
جواهر تقربت من اذن مجد وكل الي قالته. : مشكورة على كل شي سويتيه.. ماتعرفين حياتي اشكثر تغيرت بمساعدتج.. بس ليتني سمعت رمستج وودرت قبل لا يصير هذا كله.. اتمنى لج كل الخير يارب..
مجد ادمعت عينها يوم سمعت هالرمسه.. تقربت منها جواهر ومسحت الدمعه بصبعها : العروس عيب تصيح..
ابتسمت مجد وعنود وهند مستغربين ..
مجد: شخبارج طمنيني؟
جواهر: عرست.. وابشرج.. حامل بأول شهر..
مجد: والله مبروووك.. تستاهلين كل خير .. ربي يهنيج يارب..
جواهر: ويهنيكم..
وتقربت من هند وعنود سلمت عليهم.. والدمعه متيمعه في عينها.. وعنود وهند مستغربين من تصرفاتها.. بس ماحبو يبينون للحضور الي يطالعهم ان في شي غريب هني..
ونزلن الثلاث بنات سوى.. وقعدت على طاولة وحده..
هند: جواهر وااااااايد متغير شكلج ماعرفتج عدل الا يوم قربتي..
جواهر بإبتسامه خفيفه.. : ليش عاد ..
عنود: تبين الصراحة ماتعودنا نشوفج بمثل هالعبا مثلا.. وسيعه وساتره.. يعني
جواهر تضحك.. : إن الله يهدي من يشاء ويضل من يشاء..
هند: الله يثبتنا على دينه.. الا خبرينا شو اخبارج وينج اختفيتي فجأة..
جواهر: ماشي من بعد وفاة امي ماكان لي خلق ارجع اكمل دراستي.. وعرست.. وإلتحقت بجمعيه نسائية.. وصرت اقدم وياهم نشاطات مختلفه.. ومحاضرات.. ونحضر ندوات دينيه وثقافيه.. يعني هالأمور الي شاغلتني
عنود: عيل سمعنا ماشاء الله حامل..
جواهر : هيه توني بأول شهر
هند: الله يسهل عليج يارب..
جواهر: تسلموون.. المهم انا بترخص ريلي اتصل اكيد وصل عند الباب لازم اروح.. فرصة حلوة اني شفتكم فيها..
عنود: بالعكس والله نحن الي مستانسين من اخبارج
جواهر: تعالو الجمعيه مره.. عندنا انشطة حلوة..
هند: ان شاء الله جان لقينا وقت بنمر عليج..
جواهر: ان شاء الله
وطلعت عنهم جواهر وركبت موتر جابر..
جابر: فديتج.. خبريني شو اخبار الياهل واخبار احلى حرمه في هالدنيا..
جواهر تفتح عينها وتنهد...
جابر: حوو انتي ماتسمعيني شو.. بندي الباب عدل أقولج..
صحت جواهر من الحلم الي في لحظة حلمت به ان جابر يقولها مثل هالرمسة الحلوة.. يودت دمعتها عشان مايحس بها جابر..
جابر: عنلاتج انتي ورباعتج .. مادري من وين طالعتلي بهالفنتك.. عرس ربيعتي.. اخر مره تروحين عرس فاهمه..
جواهر ساكته ماكانت ترد عليه.. لأنها لو رمست بتنفجر من الصياح..
جابر: انتي ايييه .. هبله ولا تستهبلين.. ماتعرفين ترمسين شو.. ولا ماعلموج الرمسة.. مقيولة وحده شراتج وين بتعلم الرمسة.. لو هلج عرفوا يربونج جان ماتجرأتي وطلعتي وياي من وراهم..
جواهر يوم ان السالفه وصلت إنهم يهينون أهلها ماقدرت تيود عمرها صرخت: بـــــــــــس.. بس خلاص يكفي.. لا اتييب طاري هلي على لسانك أرجوك.. ليش مخلني يوم انك ماتباني طلقني..
جابر: تعرفين ليش مابا اطلقج.. اباج جي تعذبين.. تعيشين بحسرة طول عمرج وتعذبين.. وان ماخليتج تخبلين ماكون انا جابر..
جواهر: انت شو من البشر قولي.. انت فيك روح متأكد.. يا خسارة هالحرمة العيوز الي في البيت تكون أمك
ماحست الا بإيد جابر اتيي على ثمها.. وانزفت .. ويلست تصيح..
جابر: جـــــــــب ولا كلمة اقولج.. لا اتييبين طاري هلي على لسانج قبل لا اقصه فاهمه.. اشرف منج واشرف من عشرة من اشكالج..
جواهر: بس ارجووووووك طلقني خلاص كفايه..
جابر: مابطلقج.. لو شو ماتسوين..
جواهر: دامك مابطلقني خلنا نعيش شرات اي اثنين معرسين.. خصوصاً ألحين ..
جابر: كيف يعني خصوصاً ألحين .. شو الفرق الي بين الحين وقبل
جواهر: لأني حامل .. ربنا بيرزقنا بياهل..
جابر وقف موتره في حوي البيت.. ونزل وسار صوب جواهر.. وفتح الباب ويودها من ايدها بالقو وسحبها ويلس يصرخ: انتي شو قلتي.. حامل؟؟ .. كيف بتحملين وانا في عمري مالمستج.. مينونه انتي.. تبين اتبلين علي.. مادري من وين حملتي وتعقين سواد ويهج علي.. يعني لأني مب راضي اطلقج تبين تفضحيني..
يلست تصيح جواهر وتصارخ.. الكل طلع من البيت.. أمه واخوه واخته ومرت اخوه يلسوا يطالعون المنظر.. ومحد قادر يقرب منهم.. لأن جابر كان في قمة عصبيته.. وكل من يقرب منه يتكفخ.. .. فرها على الأرض.. ويودها من شعرها تم ايرها: انتي ايييييييييييه انطقي ارمسي قولي شي..
فهالوقت كان توه سهيل واصل بيتهم.. ويوم شاف المنظر.. ماقدر يتحمل مهما يكون اخته.. يود جابر وسحبه بعيد
سهيل: انت ايه وين تحرى عمرك ميود حرمتك وتضربها.. هاي المريلة
جابر: مايخصك.. هاي مشكله بيني وبين زوجتي انت ماتتدخل.. اضربها فالشارع.. فالبيت كييييييييييفي..
سهيل: لا مب كيفك.. يوم بموت انا ولا ابوي يموت.. وقتها تصرف براحتك.. تحرا الدنيا فوضى مافيها الا غيرك..
جابر: لا والله كملت بعد.. اقول خوز عني
صد جابر صوب جواهر.. ويودها وفرها على السيارة.. وداس على بطنها بقو.. يلست تصارخ جواهر بقوة.. ربع سهيل صوب جابر.. ومعاه اخو جابر.. يودوه وسحبوه بعيد.. وام جابر ومرت اخوه.. شلو جواهر الي كانت تصرخ من الألم الي فيها.. وبسرعه نقلوها لأقرب مستشفى..
وطبعاً وصلت المستشفى سوولها غسيل لأنها أجهضت..
الدكتورة: يا جماعه الآثار الي على جسم المريضة مش آثار سقوط عادي.. هذي اثار ضرب عنيف..
سهيل: هيه دكتورة.. اختي تعرضت للضرب
تقربت ام جابر من سهيل تترجاه
سهيل: عمتي انتي قدرج على عيني وراسي.. بس ولدج لازم يتأدب.. واللي سواه شي ماينسكت عنه.. عيل يشكك في اختي انها مب حامل منه شو هالرمسه..
وصل الشرطي الي طلبته ادارة المستشفى وبدوا بالتحقيق مع سهيل وقالهم الموضوع.. والشرطة طلبوا من المستشفى انهم يحتفظون بعينه دم الجنين لأن بعده كان عبارة عن كتله دم.. لأنه بأول شهر.. عشان يجرون أي فحوصات تتطلب انهم يتأكدون من تابعية الجنين لزوج المريضة
سهيل دخل عند اخته يصيح على حالتها.. : ليتج كنتي عاقل من قبل الزواج جان ماصار هذا كله.. ياااااارب ساعدها..
وتم يالس عندها.. ومانع اي حد من طرف جابر يدخل عندها حتى لو امه...
الشرطة طلبوا جابر عشان يحبسونه بذمة التحقيق عشان الي سواه شي يتعاقب عليه..
.. .. .. ..
=-=-=-=-=-=-=
من هالأجواء ننتقل للأجواء التاريخية لقصة الحب الصادقة بين مجد وأحمد
الي تكللت بالزواج..
عند الرياييل كان الجو من أروع مايكون..
محد شاف أحمد بفرحة كثر هالفرحة الي فرحان بها اليوم.. كانت ليله من ألف ليله.. ليله فالعمر طول عمره يحلم بها..
الكل مرتبش ويرزف ومستانس على الآخر.. كانت الفرحة عايمه الكل من الصغير للكبير..
سلطان: يا ريال خله يستانس..
جاسم: صبر ونال من حقه يستانس
عبيد: تدرون ماكنت مستوعب نتيجة الي كنت بسويه.. تخيلو لو صار الي كنت ناوي عليه جان شو كان حال احمد..
سلطان: الحمد لله ان الفرحة عامره الكل.. وهذا كله بمساعدة يدتي الله يحفظها
عبيد: صدق انها حاسه بعيالها دوم.. وهي اول وحده حست باحمد ومجد
سلطان: الله يحفظها لنا يارب..
جاسم و عبيد: آمين..
خالد: عبيد انت ماقررت شي بالنسبة للزواج؟؟
عبيد: حالياً لا.. قررت اكمل دراسة الماجستير في جامعه الشارجة.. يعني بنشغل في الدراسه.. عقب ان شاء الله يصير خير..
خالد: أهم شي انت مقتنع من سالفه الزواج وحاطنها في بالك
عبيد: هيه .. بس حالياً مب متهيأ له..
خالد: الله يوفقك.. يلا هذوه خالي يزقرنا بندخل المعرس..
صد حواليه عبيد.. : الا وين المعرس؟؟
جاسم ناقع من الضحك: الحقوا يا جماعه المعرس عند باب صالة الحريم..
الكل تم يضحك على عيلة أحمد.. من حقه.. مجد بنذالتها المعتادة .. حرمت أحمد منها في فترة الملجة.. مايعرف هذا من الحب ولا عقاب ولا شو بالضبط.. بس الي يعرفه انه مشتاق لها من كل خاطره.. وده بس يسمع حسها عالأقل فكيف لو يشوفها عروسته ويدامه..
دخلو الرياييل
عبيد و خالد وسلطان وجاسم وعبدالعزيز وحميد وبوخالد.. الرياييل وصلو المعرس لين الدري وخلوه يكمل طريقه مع ابوه وابو مجد واليده كانت بعد وياهم..
الباقي تموا شوي يرزفون عن خاطرهم شوي يدام الحريم.. وكل واحد حرمته تتوعد له لأنهم يرزفون والحريم يطالعن.. وطلعوا من الصاله عشان تتكشف مجد لمعرسها..
توها مروه بتساعد مجد تكشف .. ضرب احمد على ايدها..
احمد: يلا مناك.. خلصت وظيفتج.. دوري انا..
جلثم: ايا اللوتي ماشوفك اتيي صوبي.. ولا ضويت بغرشوبتك ونسيتنا..
أحمد: مو فاضي لج ألحين.. خليني اشوف عروسي..
مجد من تحت الغطا الي مغطينها فيه تضحك على رمسة يدتها وأحمد..
جلثم: ماعليه يالهرم إن ماراويتك.. حسافة ان الناس بعدهم هني ولا عرفت كيف اداويك..
أحمد شل القطعه الي كانت على مجد.. والود وده انه يحضنها بهاللحظة.. بس ميود عمره عشان الناس.. وحب راسها.. وقالها بصوت واطي: أحبج يالسبالة
ضحكت مجد..
جلثم: انت اييه.. عن الحركات الماصخة هاي.. وانتي اثجلي شوي.. فاجه ثمج جنج أول مره تعرسين ..
مجد: ويديه يدوووه.. أول مره اعرس بعد شو ..
أحمد: واضافه مني.. آخر مره بعد
الكل: آمين..
لطيفه: أحمد عاد ماوصيك في مجد ماعندي غيرها..
أحمد يطالع مجد الي كانت منزله راسها: لا توصين.. مجد في عيوني الثنتين
ميثا: مجد.. ماوصيج على ولدي..
جلثم : عنبوج توصين الحرمة على ريلها.. وبعدين ولدج ذيب ماينخاف عليه..
ميثا: بسم الله ع ولدي..
جلثم: خوزو يلا خلوني أوقف فالنص عشان اتصور..
الكل ابتسم وتيمع حوالين المعاريس وتصوروا صورة عائلية حلوة .. الفرحة باينه على ويوه الكل..
قعدوا المعاريس والحريم نزلن تحت يقعدن..
أحمد: الله يسامحج يالظالمة كل هالشهور ماتخليني اشوف هالويه الحلو واسمع هالصوت .. صدق ظالمة وقلبج قوي
مجد: بس بذمتك مب احلى جي..
أحمد: تبين الصدق.. شعور راااااااااائع فعلاً داش وانا كلي شوق..
مجد: عشان جي طلبت منك جي.. خصوصاً ان ظروف زواجنا صار بسرعة خلال فتره بسيطة كان لازم اجهز كل شي للعرس.. وانشغلت بالدراسه والبروجكتات..
أحمد: تعرفين شو اسعد لحظة في حياتي..
مجد: شو
أحمد: اليوم وانا حاط عيني بعينج بلا خوف ولا مستحى ولا اي احساس غير الحب والشوق
استحت مجد ونزلت راسها..
من عقب زقروهم عشان يقطعون كيكة العرس.. ومشوا المعاريس صوب الكيك وقطعوه وأكلو بعضهم .. كان صدق شكلهم لايقين على بعض.. حلوين ..
أحمد: اقول وايد بنطول هني فالصالة؟
مجد: ليش مستعيل شو وراك.. خلنا نستانس ونشوف هالوناسه في ويه الكل..
أحمد: ابا ارمسج ع راحتي.. ايلس اطالعج بكيفي.. اما جي احس الناس كلهم يطالعون فشلة..
مجد: افا مفتشلي مني انا حرمتك.. اوكي ماعلي
أحمد: لحووووول مو وقت زعل ألحين مجوووود عن الحركات
مجد: لا تحاول انا زعلانه
أحمد: براضيج بطريقه حمادة الخاصه
مجد: الله اكبر شو هالطريقة بعد
أحمد: بتعرفين عقب ..
مجد: انزين لا تمشي بسرعه جي ماروم امشي بسرعه فستاني ثجيل
أحمد: محد قالج سوي فستان بهالثجل
مجد: انت شو عرفك بالموضه
أحمد: بعرفها من وراج
مجد: عيل استعد للخساير من الحين
أحمد: فدواج..
وصلوا عند الكيك وقطعوه وكل واحد فيهم لقم الثاني.. كان شكلهم وااايد كيووت وابتسامتهم ماليه الدنيا من الفرحة..
وهم رادين مكانهم.. صدت مجد وراها لأن علق الفستان.. وراحت مروه صوبهم عشان تساعدها..
مجد والدمعه في عينها: أحمد.. مفتقدة اختي وايد فهاليوم..
أحمد: ترحمي عليها
مجد: الله يرحمها ويغمد روحها الجنه.. (صدت صوب مروه) .. مروه هاتي الريم خل اتصور وياها.. فديتها بتوله عليها والله.. هاي اول ليله مابترقد فيها عندي
أحمد: خلاص انا بستوي لج ريم..
مجد ضحكت على عبط أحمد واسلوبه.. ومروه ابتسمت لهم وصدت صوب الطاوله الي فيها نوره وخلود..
نشت نوره وتقربت من مروه
نوره: خير شو بغيتي؟
مروه: هاتو ريماني الصغيرة.. مجد تبا تتصور وياها
نوره: ان شاء الله
وسارت نوره يابت الريم وودوها عند مجد.. الي من شافتها دمعت.. وقفوا نوره ومروه يدامها عشان الناس مايلاحظون دموع مجد..
أحمد صد وشاف دموع مجد تضايق.. لا إرادياً لف إيده على جتفها.. وطبطب على جتفها.. : ترحمي عليها مب زين جي .. واذا شافتج عمتي بتتكدر زود..
مجد مسحت دموعها ورفعت الباقه عشان تغطي ويهها.. ومن عقب يلسن نوره ومروه يسوون لها حركات ويعلقون عشان تنسى السالفه وتهدأ..
... ..
كانت فعلاً ليلة من العمر ماتنسى والكل مستانس فيها ..
-=-=-=-=-=-=-


=-=-=-=
سلطان: بس عاد اطلعي دقيقه بس اترياج في الموتر ابا اشوفج يا بنت الناس
شما: عدال الي يقول ماشفتني.. ولا جنك انت الي خذتني من الصالون ويبتني الصاله
سلطان: اشتاق لج فيها شي
شما: مافيها شي بس مادري كيف..
سلطان: اففف من هالحرمة لازم تعذبنا.. تعالي اخبرج ياوييييييلج لو سويتي فيني شرات ماسوت مجوود بأحمدوو.. مسكين حاله كان كل يوم يصيح عندنا ..
شما: لا لا مجوود شوي قلبها قوي انا مابسوي شراتها.. هيه كانت عالأقل بالمسجات وياه.. انا حتى مسجات ماشي ههههههههه
سلطان: لا انتي تكرهيني رسمياً عيل..
شما: ها الحب االزيد وانت الصاج
سلطان: عنلاته من حب مابغيناه دامه بيحرمني من أعذب صوت سمعته أذوني
شما: يعني سامع اصوات قبل
سلطان: اويييه يالوهقة
شما: هههههههههه.. خلاص يلا دقايق وانا يايتنك
سلطان: لحظة خل اكشخ..
شما: ليش مب كاشخ؟
سلطان: شو نسوي من الربشة واليولة تبهدلت شوي..
شما: هههههه يعني شرات حالتي
سلطان: يعني رقصتي
شما: هيه عرس مجوود مو أي حد
سلطان: انتي تعالي وحسابي وياج
شما: هههههههههه خلاص هونت مابا ايي
سلطان: بتيين وانتي تضحكين..
شما: يلا انا عند الباب وين اسير
سلطان: بييج بموتري لا تظهرين اغار عليج
شما : اوكي
ام جابر: سهيل يا ولدي خلني اشوفها..
سهيل: انتو لكم ويه اتيون بعد.. شفتوا ولدكم يضربها قعدتوا تفرجون عليها بس..
ام جابر: يا سهيل يا ولدي شو بنقدر نسوي ..
سهيل: اقولج لا تيلسين تقولين شو بنقدر نسوي.. ومابا اشوفكم هني.. وبينا المحاكم.. جانه مابيطلقها بالزين.. المحاكم بتاخذ حقنا
أم جابر تلومت وكانت صدق مفتشلة من فعايل جابر.. مهما كانت الأسباب مافي شي يبرر الي سواه.. ومحد يعرف الحقيقة غير جواهر الي للحين نايمة من تأثير المهدئات.. دخل سهيل عندها وكان تأوه من الألم.. تقرب زود منها
سهيل: شو بلاج؟
جواهر وهي تتطالع حواليها: انا وين ؟؟
سهيل: فالمستشفى
جواهر حطت ايدها على بطنها : والياهل شي صابه
سهيل: الله مب كاتب ان الحمل يكتمل..
جواهر غمضت عيونها وتصيح بصمت.. تذكرت الي صار وكأنه صورة تشاهدها يدامها.. ردت فتحت عينها وصدت صوب سهيل
جواهر: سهيل انت مصدق الي انقال عني؟
سهيل: انا يوم رديت ثقتي فيج رديتها وانا واثق ان عمرج مابتردين للغلط نفسه
جواهر وهي تنهد: والله اني حامل منه.. بس هو مايذكر.. لأنها كانت اول مره يقرب مني وكان خارج عن وعيه يا سهيل.. كان سكران كلياً مايذكر شي..
سهيل: اششششش.. خلاص انتهى الموضوع وهالإنسان مابتعيشين وياه بعد.. الموضوع صار قضية بإيد الشرطة
جواهر: سهيل دخيلك ابا اطلق من هالإنسان.. خلاص حاولت كل الي اقدر عليه .. بس مب طايع.. بعده يذلني ويحتقر وجودي في هالدنيا .. أرجووك سهيل
سهيل: انتي ارقدي وارتاحي.. ودامي وياج لا تحاتين شي
جواهر: ابوي خبرتوه؟
سهيل: لا ابوي راقد الحين اكيد.. باجر بقوله .. روحه صحته على قده المسكين
جواهر: الله يعينك يابوي من تحت راسي ياما تعذبت
سهيل: شو قلنا.. خلاص انتهى الموضوع
ابتسمت له جواهر وغمضت عيونها علها ترقد..
=-=-=-=
في المركز
كان صوت جابر مالي المكان كله
جابر: ليش حابسيني ومخلينها هيه.. انا ماسويت شي غلط.. ابا افك البلاد من شر وحده مثلها تخرب سمعة بناتنا .. هيه الي لازم تكون في هالمكان مب أنا..
الشرطي: انت ايه وين تتحرى نفسك؟؟ اسكت ولا نحن نعرف كيف نسكتك..
جابر: عاشووو .. بعد من متى الشرطة ضد الحق
الشرطي: كل شي بيبين يوم الفحوصات الجنائية بتطلع عن اثبات النسب. مايحتاي هالحشرة كلها
جابر: لا والله..
الشرطي: كلمة ثانيه نسمعها منك صدقني نفرك في الإنفرادي
جابر سكت وصد وراه .. وتم يطالع الأشكال الي قاعدين وياه كانو صدق يخوفون.. مجرمين .. والله العالم بأسباب وجودهم في هالسجن.. قعد في زاوية يتريا مصيره وين راح يكون
======
اليوم الثاني الصبح
نشت مجد ولبست لها المغربيه .. لونها كان أصفر على ذهبي.. كان وايد أنيق وحلو عليها.. ولمت شعرها على فوق.. ونزلت خصل على ويهها .. ويسلت تتعدل وتمكيج مكياج خفيف يبرز ملامحها.. وبخرت المكان ..دخلت الغرفة شافت الفراش فاضي.. يعني أحمد نش .. عدلت الفراش.. وعطرت الغرفة.. وطلعت له كندورته وعطرتها وبخرتها وعلقته له وطلعت من الغرفه.. واتصلت في يدتها..
جلثم: مرحبا العروس.. حي هالصووووت.. محلاه صوتج استوا احلى بعد الزواج
مجد وهي تحاول ترقق صوتها وتدلع: تدرين بعد كبرنا خلاص
جلثم: عدال لا يطيح نصج وانتي ترمسين.. شو ماتسوين بتمين مجد الصغيره في عيني..
مجد: هههههههه الله يطول بعمرج يدو ويخليج
جلثم: يا عيون يدتها.. هاج امج بترمسج..
لطيفه: ألف ألف ألف مبرووووووووك حبيبتي
مجد بحيا: الله يبارك فيج أمي..
لطيفه: ماتصورين كيف البيت خالي من دونج.. ماتعودنا انش الصبح ومانسمع حشرتج
مجد: ماعليكم انا بييكم مالكم شردة مني..
لطيفه: انزين امي اليوم عالغدا بتكونون في بيت عمج صح
مجد: هيه ان شاء الله.. دخيلكم هاتو ريماني
لطيفه: اكيد بتكون هناك.. يلا امي اكشخي ابا الكل يرمس عن بنتي وحلاتها
مجد: افا عليج بخلي الكل يقول طالعه حلوة شرات امها
لطيفه: علني ماخلا منج يارب..
وبندوا عن بعض وتنهدت مجد صدت وراها
شافته واقف يراقبها .. جان تضحك: شو بلاك تتطالعني جي
أحمد: مب مصدق عيني
مجد: امممم شو اسوي عشان اخليك تصدق
أحمد: سوي الي تبينه .. بتم مب مصدق
مجد: صدق .. وعن الرمسه الزايدة خلنا نسير هلك يتريونا
أحمد: مابا ماشي طلعه من الباب فاهمه
مجد وهي تحط ايدها على خصرها: لا والله
أحمد: هيه والله .. أم لسان طويل.. انا بأدبج
مجد حست ان مالها مفر منه .. جان تبتسم بخبث: فدييييييت روحك انا .. وانا من لي غيرك اصلا.. اسولف غناتي..
أحمد: هيه جي اباج حرمة سنعه
مجد: من عيووووووني
أحمد: تسلم لي عيونك يا عيوني... انزين غمضي عيونج ابا اييب لج شي
مجد: الله شو ..
أحمد: قلت غمضي
غمضت عين وفتحت عين.. : جي ينفع
أحمد: مجد بعد لل3 اذا ماغمضتي صدق مابراويج شي
مجد: ها لا خلاص توبه توبه ببند.. وبندت عيونها تتريا وهي متحرقصه
أحمد سار الغرفه وياب علبة الطقم وطلع منه الطقم الي كان شاريه لها..
أحمد: افتحي عينج..
مجد تمت تتطالع الطقم مذهولة.. صدق روووووووووعه .. : أحمد ذوقك وااااااايد حلو
أحمد: لو ماكان حلو ذوقي جان ما اخترتج زوجة لي..
مجد: مشكووووووووور والله وايد روعه
أحمد: بتلبسينه اليوم
مجد: هيه ابا اتخقق فيه
أحمد: هههههههههه فديتج انا
=-=-=-=-=
في بيت حميد
العايله كلها متيمعه يتريون المعاريس يوصلون..
مروه: علي سير ييب الأوراق الملونه..
علي: عندي اياهم
خلود: شيطان جاهز حق هالسوالف..
علي: لازم تراهم معاريس..
نوره: عنود ماما تعالي هالصوب لا تلعوزين خالج..
خالد: خلها شو بلاج على البنت.. خليها تستانس...
سلطان: من زود خوفج مدلعتنهم..
نوره: بناتي وكيفي..
علي: ماعلي خلهم يكبرون بس انا براويهم..
ميثا: ههههههههه هيه جي اباك ..
عبيد: اتصل فيه أحمد يقول انهم جريب..
خلود: الف الصلاة والسلام عليك يا حبيب الله محمد..
الحريم: كلولولولولولولوووووووش
الرياييل تموا يضحكون وكل واحد يهز راسه..
وصل أحمد ودخل موتره.. ومجد يلست تتطالع الكل متيمع برع يترياهم.. والجو كان روووعه في هالوقت..
مجد: أحمد اخاف انزل.. احس عمري يايه حرب..
أحمد: هههههه شو بلاج يايين يباركون لنا..
مجد: ليش شو السالفه الا هو زواج..
أحمد: بس مو أي زواج.. زواج أحمد ومجد..
مجد: اشمعنى قلت اسمك قبل يعني..
أحمد: تراني الريال..
مجد: لا والله .. مايخصه.. ليديييز فييرست
أحمد: فعينج.. انجعمي..
وشوي يسمعون دق على بونيت السياره.. فز أحمد.. شاف يدته تضرب بالعصا.. وأحمد يسوي عمره انه بيصيح.. وينزل الجامه: موتري الله يسامحج..
جلثم: انزل وبعدين يعني لين متى بنترياكم..
أحمد: هاي مب طايعه تنزل خايفه منكم..
جلثم: شووو.. ناكل نحن عشان تخاف.. نزلي قبل الا اييج بالعصا..
مجد تتطالع احمد بنص عين.. ونزلت من السياره واول شي سوته حضنت يدتها ويلست تصيح.. ماتدري شو سبب صياحها بس الي حسته ان ودها تصيح.. والكل تقرب صوبهم والي يرش عليهم من مدفع الأوراق الملونه.. والي يبب .. والي واللي.. كانت الفرحة ماليه ويوه الكل.. تقرب عبيد والريم في حضنه وياهم.. ومجد تتطالع عبيد وملهوفه على الريم ..
وبسرعه شلت عنه البنت وحضنتها ويلست تبوسها وتصيح.. والكل تذكر حور الله يرحمها.. الكل وده لو كانت موجودة في هاليوم تشاركهم الفرحة.. بس قدّر الله ماشاء وفعل
..
كان مقرر سفر العرسان نفس اليوم فليل لسنغافورة يقضون فيها اسبوع ويرجعون لأن راح تبدأ الكلية ومجد ماتقدر اتم زود
أحمد: انتي مايستوي تأجلين الدراسه للسنه اليايه
مجد: أحمد شو السنه اليايه ماصدقت بخلص هالكورس..وبفتك من الدراسه
أحمد: الله يوفقج انزين لا تعصبين
مجد: انزين انا مابا اركب التلفريك..
أحمد: مب ع كيفج.. انا بيودج وبفرج فيه.. عيل اركب روحي
مجد: أحمد والله أخاف وايد مرتفع شوف كيف..
أحمد: ماعليج بتستانسين.. يلا عاد..
ركبت مجد التلفريك وتيودت بأحمد وميته من الخوف.. وأحمد يطالعها ويضحك.. وشوي تحرك التلفريك ..
مجد: أحمد خلاص بنزل نزلوني مابا ..
أحمد: ههههه حاضرين ماطلبتي افتحي عيونج..
فتحت مجد عيونها وشافت الإرتفاع الي هم فيه خافت بزود.. كان الجو وايد حلو.. وأمطار ووناسه صدق.. كان المنظر من فوق روووعه..
مجد: بس تصدق المنظر وايد حلو
أحمد: يوم اقولج ماتصدقين..
مجد: هات الكيمرا خلني اصور..
وقعدت تصور مجد المنظر من على هالمرتفع..


كان فعلا المنظر وااااايد حلو.. ومن عقبها نزلوا من على التلفريك وماقدرو يروحون أي مكان غير انهم يرجعون الفندق ويبدأون جولتهم اليوم الثاني..
كانو مقررين يروحون إحدى الأماكن السياحية هناك كان في عندهم عرض للدلافين.. وراحوا حديقة الفراشات..



مجد: والله سبحان الله شوف الفراشات ألوان واشكال.. شو رايك نهرب شوي منهم البلاد
أحمد: ههههههه عشان يحترقون.. امشي ورانا درب بلا نهرب بلا شي..
مجد: وين بنروح ..
احمد: بنسير النفق الي مسواي تحت الماي..
مجد: كيف جي بعد
أحمد: بتشوفين بنفسج..
ودخلوا النفق هذا كان مظلم تقريبا.. بس يخوف.. حواليك كله أسماك أنواع وأشكال.. ومجد ترتعد من الخوف..
مجد: انت اونك بتحط بالك علي.. واشوفك يايبني هالمكان.. تخيل ينكسر هالزجاج..
أحمد: مابينكسر جي شو.. مضاد للكسر هذا
مجد: لا والله وشو يضمنك.. مافي شي مضاد للكسر.. خل نطلع بسرعه
أحمد: ظلمة وناس يدامنا تبيني ادعمهم شو..
مجد: أحمد والله خايفه خل نطلع..
أحمد: شوفي فوق
رفعت راسها مجد ويوم شافت هالسمجة.. قرش بو منشار.. تمت ترتجف من الخوف.. وصرخت خلت الكل يطالعها


أحمد: فضحتينا عنبوووج حد يصرخ جي..
مجد: طلعني أحمد بليييييز
أحمد يود ايدها ومشوا بين الناس وطلعو.. : ارتحتي
مجد: هيه ارتحت.. شو ها ان ماشتكيت عند يدتي.. والله مخوفني..
أحمد: هههههههه دواج تستاهلين.. عيل انا يالهرمه تخليني طول فتره الملجة ما اسمع صوتج
مجد: تستاهل زود يوم ان هاي سوالفك.. بتييب لي سكته..
أحمد: بسم الله عليج
مجد: هيه هذا الي فالح فيه .. تقردني وبس..
أحمد: ههههههههههه احبج هاي مشكلتي
مجد: هنف عليك وعلى حبك..
أحمد: بعد احبج
ابتسمت مجد وكملوا دربهم.. كان اخر لهم اليوم.. واليوم الثاني الساعه 10 الصبح لازم يكونون في المطار عشان يرجعون البلاد..
مجد كانت مستمتعه في كل لحظة تعيشها مع أحمد.. فعلاً انسان قمة الأخلاق والرقي ف التعامل.. نفس اسلوبها وشخصيتها وخبالها.. والي يجمعهم.. حب قوي .. مافي اي قوى في العالم تفرق هالقلبين..
=-=-=-=-=-=-=
في هالأيام في البلاد..
تحولت القضية للجنائيات وبهذا كانت الإجرائات سريعة عشان يثبتون نسب الجنين.. عادة مثل هذا الفحص ياخذ وقت.. لكن في الحالات الطارئة مثل هالقضية يستعيلون في النتايج.. وخذوا عينه دم من الأب والأم والجنين .. وكل النتايج طلعت لصالح جواهر..
اثبتوا ان الجنين هو فعلاً من جابر.. كان الخبر صدمة لجابر.. كانت في هالوقت جواهر واقفه مع اخوها يدامه تتطالع جابر بكل استحقار.. وجابر مفتشل .. لكنه يبا يفهم كيف صار هذا كله..
جواهر: طعنت في شرفي يدام الكل .. وحاولت تشوه سمعتي.. وفي النهاية.. محد خسر غيرك.. المحكمة طلقتني منك أول شي .. وثاني شي خسرت الطفل الي كان بيكون حلقة وصل علها كانت بتقربني منك.. حاولت وياك بكل ما اقدر.. وكنت لآخر لحظة متحملتنك.. واليوم نفذ صبري خلاص.. مابا شي منك ياجابر.. انت خذيتني غصب .. وألحين انا بكمل مشواري اتحمل ثمن كل شي سويته..
جابر: بس جواهر فهميني ارجوج .. نوريني كيف صار هذا كله
جواهر: ههههههههه انورك.. وانت انسان تعرف النور اصلا.. جابر لا تفشل نفسك زود ما انت مفتشل يدام اللي قاعدين.. يكفي بس يكفي..
جابر صد صوبها وعيونه محمره من الدموع.. : يعني انا ذبحت ولدي بإيدي.. لا الله يخليكم قولو غير هالرمسة..
جواهر: أحمد الله ان الجنين ماكتمل ولا كانت فيه روح .. ولا جان انا صحت عليه أكثر منك.. والله مب رايد لهالجنين يعيش بكنف أبو شراتك.. يفشل .. ’ومايفتخر به.. احمد ربي زود ان مافي شي يربطني بإنسان مثلك.. سهيل الله يخليك طلعني من هالمكان..
سهيل: المهم حضرة الضابط.. نحن خذنا حقنا خلاص.. ومايحتاي قضية الإعتداء بالضرب هاي نتنازل عنها..
الضابط: على خير.. وقع هني للتنازل
وقع سهيل وجابر مو قادر ينطق اي كلمة من فشلته... وطلع سهيل ومعاه جواهر.. ربع جابر وراهم.. ومسك ايد جواهر..
جابر: جواهر .. سامحيني الله يخليج.. جواهر بكون لج شرات ماتبين سامحيني..
سحبت جواهر ايدها: جابر.. انت ماضي مايشرفني.. ارجوك ابتعد..
مشت جواهر مع اخوها وهو مبتسم وفخور انها قدرت تسترجع ثقتها بنفسها.. وجابر كان متحطم في مكانه.. فقد كل شي.. وقتها بس حس بمعنى كلام ربيعه له .. لكن ماينفع شي ألحين غير الندم..

بهذا أنهي روايتي الرابعه
روحـ(ن) عشقته وقلبـ(ن) فقدته